TEESRA (3rd) HAQQ - AAP SALLALLAHU ALAIHI WA SALLAM SE MUHABBAT KARNA

TEESRA (3rd) HAQQ - AAP SALLALLAHU ALAIHI WA SALLAM SE MUHABBAT KARNA 

Bismillahirrahmanirraheem


RASOOL E AKRAM SALLALLAHU ALAIHI WA SALLAM K SAATH AESI MUHABBAT KARNA AHLE EMAAN PAR FARZ HAI JO ALLAH K ALAWAH BAAQI TAMAAM MUHABBATO PAR GHALIB HO

"Ae Nabi! keh do, agar tumhare baap, tumhare baite, tumhare bhai, tumhari beewiya, tumhare azeez wa aqarib, tumhare wo maal jo tumne kamaaye hai, tumhari tijarat jiske manda padne ka tumhey darr hai aur tumhare pasandeedah ghar, tumhey Allah uske Rasool aur Allah ki raah mein jihaad se ziyaadah mehboob hai to phir intazaar karo yaha tak k Allah ta'ala ka faisla aa jaye (aur yaad rakkho) Allah ta'ala aese fasiqo ki rehnumaayi nahi farmata". (Surah Tauba Surah no. 9 Ayat no. 24)

Hazrat Anas Razi Allahu Anhu kehte hai k Rasool Allah Sallallahu Alaihi Wa Sallam ne farmaya "Koi aadmi us waqt tak momin nahi ho sakta jab tak wo apne baite (aur betiyo), apne baap (aur maa) aur saare loogo se badh kar mere saath muhabat na kare". (Sahih Muslim Kitabul Emaan)


RASOOL E AKRAM SALLALLAHU ALAIHI WA SALLAM KI ZAAT E MUBARAK AHLE EMAAN K LIYE UNKI APNI JAANO SE BHI ZIYAADAH AZEEZ AUR MOHTARAM HAI

"Nabi ki zaat ahle emaan k liye unki apni jaano se bhi muqaddam hai aur nabi ki beewiya ahle emaan ki maayen hai". (Surah Ahzaab Surah no. 33 Ayat no. 6)


RASOOL E AKRAM SALLALLAHU ALAIHI WA SALLAM SE MUHABBAT KARNE WALA SACCHA MOMIN HAI

Hazrat Abbas bin Abdul Muttalib Razi Allahu Anhu kehte hai mene Rasool Allah Sallallahu Alaihi Wa Sallam ko ye farmate hue suna hai "Emaan ka maza us aadmi ne chakha jo Allah k rabb hone par raazi hua, islam k deen hone par raazi hua aur Hazrat Muhammad Sallallahu Alaihi Wa Sallam k Rasool hone par raazi hua". (Sahih Muslim Kitabul Emaan)


AAP SALLALLAHU ALAIHI WA SALLAM KI SEERAT E TAYYEBA KA MUTA'ALA KARNA, APNI MAJALIS MEIN AAP SALLALLAHU ALAHI WA SALLAM KA ZIKR KARNA AUR AAP SALLALLAHU ALAIHI WA SALLAM SE MUHABBAT KA IZHAAR KARNA AHLE EMAAN PAR WAJIB HAI

Hazrat Anas bin Malik Razi Allahu Anhu kehte hai Hazrat Abu Bakr Siddeque Razi Allahu Anhu aur Hazrat Abbas Razi Allahu Anhu ansaar ki ek majlis k paas se guzrey to dekha wo roo rahe hai, unhone pucha "kyu roo rahe ho?" unhone kaha hamey Rasool E Akram Sallallahu Alaihi Wa Sallam ki sohbatey yaad aa rahi hai ye sun kar wo dono Rasool Allah Sallallahu Alaihi Wa Sallam ki khidmat mein hazir hue (Aap Sallallahu Alaihi Wa Sallam ko ansaar ki baat bataayi) Aap Sallallahu Alaihi Wa Sallam apne sar par chadar baandhey hue bahar nikle (Aap Sallallahu Alaihi Wa Sallam k sar mubarak mein bahut dard tha) mimbar par chadhey bas ye Aap Sallallahu Alaihi Wa Sallam (ki hayaat e tayyeba) ka aakhiri khutba tha, Aap Sallallahu Alaihi Wa Sallam ne Allah ki hamd o sana farmayi, phir irshad farmaya "Loogo! mein tumko ansar k baare mein waseeyat karta hu wo to mere qalb wa jigar hai un par jo mera haqq tha wo ada kar chukey ab unka haqq (jannat) baaqi hai, un mein se jo koi naik ho uski qadar karna aur jo koi bura ho uske qasooro se darguzar karna". (Sahih Bukarhi Kitabul Manaqib al Ansar)


HAZRAT ABU BAKR SIDDEQUE RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

1. Hazrat Bara bin Aajib Razi Allahu Anhu kehte hai jab Rasool Allah Sallallahu Alaihi Wa Sallam ne madeena ki taraf hijrat farmayi to raaste mein Aap Sallallahu Alaihi Wa Sallam ko piyaas lagi, achanak raaste mein ek charwaaha mila, Hazrat Abu Bakr Siddeque Razi Allahu Anhu farmate hai, mene ek piyaala liya aur (charwaahe ki ijazat se) us mein thoda sa (bakri ka) doodh doohya aur Aap Sallallahu Alaihi Wa Sallam ki khidmat mein paish kiya, Aap Sallallahu Alaihi Wa Sallam ne itna doodh noosh farmaya k mera dil khush ho gaya. (Sahih Bukhari Kitabul Manaqib al Ansar)

2. Hazrat Bara bin Aajib Razi Allahu Anhu se riwayat hai k Hazrat Abu Bakr Siddeque Razi Allahu Anhu kehte hai "hum (hijrat k liye) rawana hue to loog hamare ta'aqub mein they un mein se sirf Surqa bin Malik bin Jushm ne apne ghoode par hamey paya mene arz kiya "Ya Rasool Allah Sallallahu Alaihi Wa Sallam! ta'aqub mein ye shaks hamare qareeb pahunch gaya hai" Aap Sallallahu Alaihi Wa Sallam ne irshad farmaya "gham na kar! Allah hamare saath hai" phir wo is qadar hamare qareeb aa gaya k hamare aur uske darmiyaan ek do ya teen naizo k barabar faasla reh gaya, mene arz kiya "Ya Rasool Allah Sallallahu Alaihi Wa Sallam! usne to hamey pakad liya aur mein rooney laga" Aap Sallallahu Alaihi Wa Sallam ne irshad farmaya "Abu Bakr Razi Allahu Anhu kyu roote ho?" mene arz kiya "Allah ki qasam mein apni jaan ko khatre mein dekh kar nahi roo raha hu balke mujhe Aap Sallallahu Alaihi Wa Sallam ki jaan ka khatra hai is liye roo raha hu, Hazrat Abu Bakr Siddeque Razi Allahu Anhu kehte hai Rasool Allah Sallallahu Alaihi Wa Sallam ne Surqa k liye bad-dua farmaayi "Ya Allah! tu hum dono k liye jese tu chaahey kaafi ho ja" chunanchey uske ghoode ki taangey sakht zameen mein pait tak phans gayi aur surqa ne ghoode se chalaang laga di. (Musnad Ahmad Hadees no. 3)

3. Hazrat Ayesha Razi Allahu Anha kehti hai mein (beemari k doraan) Hazrat Abu Bakr Siddeque Razi Allahu Anhu k paas gayi to unhone mujhse daryaft farmaya "Rasool Allah Sallallahu Alaihi Wa Sallam kaun se rooz faut hue they?" mene arz kiya "Somvaar ko" Hazrat Abu Bakr Siddeque Razi Allahu Anhu ne pucha "Aaj konsa din hai?" Hazrat Ayesha Razi Allahu Anha ne jawab diya "Aaj bhi somvaar hai" tab Abu Bakr Siddeque Razi Allahu Anhu ne farmaya "Mein ummeed rakhta hu k aaj raat tak kisi bhi waqt dunya e faani se kooch kar jaunga". (Sahih Bukhari Kitabul Jana'iz)

Wazahat: Yaad rahe Hazrat Abu Bakr Siddeque Razi Allahu Anhu ki wafaat mangal k rooz hui thi ye mehaz Rasool E Akram Sallallahu Alaihi Wa Sallam se muhabbat ka jazba tha k Aap Razi Allahu Anhu ne somvaar ko faut hone ki tamanna farmayi.


HAZRAT UMAR RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

1. Hazrat Abdullah bin Hishaam Razi Allahu Anhu kehte hai hum Nabi E Akram Sallallahu Alaihi Wa Sallam k saath they aur Aap Sallallahu Alaihi Wa Sallam ne Hazrat Umar Razi Allahu Anhu ka haath thama hua tha, Hazrat Umar Razi Allahu Anhu ne arz kiya "Ya Rasool Allah Sallallahu Alaihi Wa Sallam! Aap mujhe meri zaat k alawah baaqi har cheez se ziyaadah mehboob hai" Nabi E Akram Sallallahu Alaihi Wa Sallam ne farmaya "Nahi! qasam hai us zaat ki jiske haath mein meri jaan hai (tum us waqt tak momin nahi ho sakte) jab tak mere saath apni jaan se bhi ziyaadah muhabbat na karo" tab Hazrat Umar Razi Allahu Anhu ne arz kiya "Allah ki qasam! ab to aap mujhe apni jaan se bhi ziyaadah mehboob hai" Rasool E Akram Sallallahu Alaihi Wa Sallam ne farmaya "Ae Umar! ab tum poore momin ho". (Sahih Bukhari Kitabul Emaan wan Nuzoor)

2. Hazrat Umar bin Khattab Razi Allahu Anhu ne (Apni wafaat se qabl apne baite Hazrat Abdullah bin Umar Razi Allahu Anhu se) kaha "Abdullah! Ummul Momineen Hazrat Ayesha Razi Allahu Anha k paas jao aur unki khidmat mein hazir ho kar arz karna "Umar salaam arz karta hai aur han dekho, Ameer ul Momineen ka lafz istemaal na karna, kyunki aaj mein Ameer ul Momineen nahi hu, salaam arz karne k baad darkhuwast karna k Umar bin Khattab Razi Allahu Anhu apne dono saathiyo k saath dafan hone ki ijazat maangta hai, Hazrat Abdullah Razi Allahu Anhu ne hazir ho kar salaam arz kiya aur andar aaney ki ijazat maangi, ijazat milne k baad Hazrat Ayesha Razi Allahu Anha ki khidmat mein hazir hue to dekha k Hazrat Ayesha Razi Allahu Anha (Ameer ul Momineen ki beemari k gham mein) baithi roo rahi hai, Hazrat Abdullah Razi Allahu Anhu ne arz ki "Umar bin Khattab Razi Allahu Anhu salaam arz karte hai aur apne dono saathiyo k saath dafan hone ki ijazat maangte hai" Hazrat Ayesha Siddeqa Razi Allahu Anha ne farmaya "wo jagah mene apne liye rakkhi thi, lekin ab mein apni bajaaye Umar ko tarjeeh deti hu" Hazrat Abdullah Razi Allahu Anhu wapas lootey to loogo ne Hazrat Umar Razi Allahu Anhu ko bataya "Abdullah Razi Allahu Anhu aa gaye hai" Hazrat Umar Razi Allahu Anhu ne loogo se kaha "Mujhe utha kar baithao" ek aadmi ne Hazrat Umar Razi Allahu Anhu ko sahara diya, Hazrat Umar Razi Allahu Anhu ne pucha "Abdullah! kya khabar laaye ho? Hazrat Abdullah Razi Allahu Anhu ne arz kiya "Ameer ul Momineen jo aap chahte they, Hazrat Ayesha Razi Allahu Anha ne aapko ijazat de di hai" Hazrat Umar Razi Allahu Anhu ne kaha "Alhamdulillah! mere liye is se aham aur koi baat nahi". (Sahih Bukhari Kitabul Fazail E Sahaba)


HAZRAT ALI RAZI ALLAHU ANHU KI RASOOL E AKRAM SALLALLAHU ALAIHI WA SALLAM SE MUHABBAT

Hazrat Ali bin Abu Talib Razi Allahu Anhu se pucha gaya "Aap ki Rasool Allah Sallallahu Alaihi Wa Sallam se muhabbat kesi thi?" Hazrat Ali Razi Allahu Anhu ne farmaya "Wallah! Rasool Allah Sallallahu Alaihi Wa Sallam hamey apne maalo, aulaado, baapo, maao aur shadeed piyaas k waqt thandey paani se bhi ziyaadah mehboob they". (Sharah As Shifa Kitabul Huqooq un Nabi Sallallahu Alaihi Wa Sallam Safa no. 70)


HAZRAT SAAD BIN MUAAZ RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Hazrat Saad bin Muaaz Razi Allahu Anhu ne (jang e badar se qabl) arz ki "Ae Allah k Nabi Sallallahu Alaihi Wa Sallam! kya hum aapke liye ek uncha chappar na tameer karde jis mein aap qayaam farmaye aur hum aapke paas sawariya bhi tayyar rakkhey aur phir dushman se muqalabah kare? agar Allah ne hamey izzat bakshi aur dushman par ghalba ata farmaya to yahi wo cheez hai jo hum chahte hai aur agar soorat e haal uske bar-aks hui to aap apni sawariyo par baith kar hamari qaum k un loogo k paas pahunch jaaye jo pichey reh gaye hai, hum aapki muhabbat mein unse badh kar nahi agar unhey ilm hota k aapko jang se saabqa padega to wo kabhi aapse pichey na rehte, Allah unke zariye aapki hifazat farmayega wo loog aapse wafa karengey aur aapke saath mil kar jihaad karengey, Rasool Allah Sallallahu Alaihi Wa Sallam ne Hazrat Saad Razi Allahu Anhu ki is tajweez par unki tareef farmaayi aur unke liye dua e khair ki, phir Aap Sallallahu Alaihi Wa Sallam k liye ek "Areesh" (chappar) tameer kiya gaya jisme Aap Sallallahu Alaihi Wa Sallam ne (jang k doraan) qayaam farmaya. (Al Bidaya Wan Nihaya Juzz e Salis Safa no. 284)


HAZRAT KHUBAIB BIN ADI RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Hazrat Urwah bin Zubair Razi Allahu Anhu se riwayat hai k jin mushrikeen k aaba wa ajdaad badar mein qatal hue they wo jab Hazrat Khubaib Razi Allahu Anhu ko qatal karne lage to unhey qasam de kar pucha "Kya tumhey ye pasand hai k tumhari jagah Muhammad Sallallahu Alaihi Wa Sallam hote aur tum phaansi paane se bach jaate?" Hazrat Khubaib Razi Allahu Anhu ne farmaya "Nahi, Allah buzurg wa bartar ki qasam! mujhe to ye bhi gawarah nahi k meri jagah Aap Sallallahu Alaihi Wa Sallam k qadam mubarak mein kaanta bhi chubhey" is par mushrikeen ne kehkaha lagaya (hasne lage). (Tabraani Hadees no. 5284)


HAZRAT ZAID BIN HAARSA RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Hazrat Jablah bin Haarsa Razi Allahu Anhu kehte hai mein Rasool Allah Sallallahu Alaihi Wa Sallam ki khidmat mein hazir hua aur arz ki "Ya Rasool Allah Sallallahu Alaihi Wa Sallam! mere bhai Zaid bin Haarsa ko mere saath rawana farma de, Aap Sallallahu Alaihi Wa Sallam ne irshad farmaya "Zaid tumhare saamne mojood hai agar tumhare saath jana chahta hai to mein usey kabhi nahi rokunga" Hazrat Zaid Razi Allahu Anhu ne arz ki "Ya Rasool Allah Sallallahu Alaihi Wa Sallam! Allah ki qasam, mein Aap Sallallahu Alaihi Wa Sallam k muqabaley mein kisi doosre ko tarjeeh nahi dunga" Hazrat Jablah Razi Allahu Anhu kehte hai "Mere bhai ki raaye, meri raaye ki nisbat bahut behtar hai". (Tirmizi Abwabul Manaqib 3:2998)

Wazahat: Yaad rahe Hazrat Zaid bin Haarsa Razi Allahu Anhu Hazrat Khadeeja Razi Allahu Anha k ghulaam they, Hazrat Khadeeja Razi Allahu Anha ne Rasool Allah Sallallahu Alaihi Wa Sallam ko hibah kar diya tha, Aap Sallallahu Alaihi Wa Sallam ne Hazrat Zaid Razi Allahu Anhu ko aazaad karke apna muh boola baita bana liya tha, jab Hazrat Zaid Razi Allahu Anhu k ghar walo ko ilm hua k Zaid Rasool E Akram Sallallahu Alaihi Wa Sallam k paas hai to wo unhey lene aaye, lekin Hazrat Zaid Razi Allahu Anhu ne unke saath jaane se inkaar kar diya.

HAZRAT SAAD BIN RABEE RAZI ALLAHU ANHU KI RASOOL ALLAH SALLALLAHU ALAIHI WA SALLAM SE MUHABBAT

Hazrat Yahya bin Saeed Razi Allahu Anhu kehte hai uhad k rooz Rasool Allah Sallallahu Alaihi Wa Sallam ne farmaya "Mujhe Saad bin Rabee k baare mein kaun khabar la kar dega?" (wo maidaan e jang mein kis haal mein hai) ek aadmi (Hazrat Ubey bin Kaab Razi Allahu Anhu ya Zaid bin Sabit Razi Allahu Anhu) ne arz kiya "Ya Rasool Allah Sallallahu Alaihi Wa Sallam mein khabar lata hu" chunanchey wo gaya aur laasho mein Hazrat Saad bin Rabee Razi Allahu Anhu ko talaash karne laga, Hazrat Saad bin Rabee Razi Allahu Anhu ne (aadmi ko dekh kar) pucha "kise talash karte ho?" aadmi ne jawab diya "Mujhe Rasool Allah Sallallahu Alaihi Wa Sallam ne tumhari khabar lene k liye bheja hai, Hazrat Saad bin Rabee Razi Allahu Anhu ne kaha "Accha! wapas jao, Nabi E Akram Sallallahu Alaihi Wa Sallam se mera salaam arz karna aur bata dena k mujhe naizey k 12 zakam aaye hai jo meri jaan lene wale hai aur apni qaum se kehna "Yaad rakkho! agar tum mein se ek aadmi bhi zindah raha aur Rasool Allah Sallallahu Alaihi Wa Sallam shaheed kar diye gaye to Allah ta'ala k han tumhara koi uzr qabool nahi hoga". (Muatta Imam Malik Kitabul Jihaad)


HAZRAT ZIYAAD BIN SAKAN RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Ibne Is'haaq kehte hai (gazwa e uhad k din) jab dushmano ne Aap Sallallahu Alaihi Wa Sallam par hujoom kar liya to Aap Sallallahu Alaihi Wa Sallam ne irshad farmaya "Kaun hai jo hamare liye apni jaan deta hai?" Hazrat Ziyad bin Sakan Razi Allahu Anhu 5 ansariyo samait khade hue aur ek ek karke Rasool Allah Sallallahu Alaihi Wa Sallam ka difa karte hue shaheed ho gaye, sabse aakhir mein Hazrat Ziyaad Razi Allahu Anhu, Hazrat Umarah Razi Allahu Anhu tanha reh gaye aur wo akele ladte rahe yaha tak k zakhmo ne unhey gira diya phir musalmano ki ek jamaat palti aur unhone Hazrat Ziyaad Razi Allahu Anhu se dushmano ko hataya, Rasool Allah Sallallahu Alaihi Wa Sallam ne farmaya "Ise mere qareeb karo" loogo ne Hazrat Ziyaad Razi Allahu Anhu ko Nabi E Akram Sallallahu Alaihi Wa Sallam k qareeb kiya to Nabi E Akram Sallallahu Alaihi Wa Sallam ne apna qadam mubarak unki taraf badhaaya takey wo us par apna rukhsaar mubarak rakh sakey phir wo is halat mein faut hue k unke rukhsaar Rasool Allah Sallallahu Alaihi Wa Sallam k qadam mubarak par they. (As Seerat un Nabwiyah li bin Hishaam, Juzz e Saalis Safa no. 53)


BANU DEENAR KI EK KHATOON KI RASOOL E AKRAM SALLALLAHU ALAIHI WA SALLAM SE MUHABBAT

Hazrat Saad bin Abi Waqaas Razi Allahu Anhu se riwayat hai k (gazwah e uhad se waapsi par) Rasool E Akram Sallallahu Alaihi Wa Sallam ka banu deenar ki ek khatoon par guzar hua jiska shohar, bhai aur baap jang e uhad mein Rasool Allah Sallallahu Alaihi Wa Sallam k saath ladte ladte shaheed ho gaye they, jab loogo ne usey uske shohar, bhai aur baap ki shahadat ki khabar di to usne pucha "Rasool Allah Sallallahu Alaihi Wa Sallam ka kya haal hai? loogo ne jawab diya "Ummey falah! tumhari khawahish k mutabiq wo to Allah k fazal se bilkul theek hai" aurat ne kaha "Mujhe dikhao, jab tak mein apni aankho se dekh nahi leti, mujhe qaraar nahi aayega" loogo ne Nabi E Akram Sallallahu Alaihi Wa Sallam ki taraf isharah karke bataya k wo hai, jab usne apni aankho se Rasool Allah Sallallahu Alaihi Wa Sallam ko dekh liya to kehni lagi "Aap Sallallahu Alaihi Wa Sallam ko dekhne k baad saari museebatey door ho gayi". (Al Bidaya wan Nihaya juzz e rabee Safa no. 423)


HAZRAT RABEEYA BIN KAAB ASLAMI RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Hazrat Rabeeya bin Kaab Aslami Razi Allahu Anhu kehte hai mein raat Nabi E Akram Sallallahu Alaihi Wa Sallam k han basar karta Aap Sallallahu Alaihi Wa Sallam k liye wuzu ka pani aur doosri zaroorat ki cheezey laya karta (ek rooz) Aap Sallallahu Alaihi Wa Sallam ne (khush ho kar) irshad farmaya "Koi cheez (maangna chaho) to maango" mene arz ki "Jannat mein Aap Sallallahu Alaihi Wa Sallam ki rifaqat chahta hu" Aap Sallallahu Alaihi Wa Sallam ne phir pucha "Kuch aur?" mene arz ki "bas yahi" Aap Sallallahu Alaihi Wa Sallam ne irshad farmaya "Kasrat e sujood k saath mari madad kar (takey tumhare liye sifarish karna mere liye aasaan ho jaye)". (Sahih Muslim Kitabus Salaat)


HAZRAT ABU HURAIRAH RAZI ALLHAU ANHU KI AAP SALLALLAHU ALAIHI WA SALLAM SE MUHABBAT

Hazrat Abu Hurairah Razi Allahu Anhu (ne Rasool Allah Sallallahu Alaihi Wa Sallam ko mukhatib karke) farmaya "Ya Rasool Allah Sallallahu Alaihi Wa Sallam! jab mein aapko dekhta hu to meri aankhey thandi ho jati hai aur dil khush ho jata hai lekin jab aap nazar nahi aatey to mera dil bujh jata hai ya aesa hi koi lafz kaha". (Bazzaar, Majmua uz Zawahid Kitabul Manaqib 9:604)


HAZRAT ABU AYYUB ANSARI RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Hazrat Abu Ayyub (Ansari Razi Allahu Anhu) se riwayat hai k Nabi E Akram Sallallahu Alaihi Wa Sallam (Madeena tashreef lane k baad) unke han mehmaan thehrey Rasool Allah Sallallahu Alaihi Wa Sallam ne nichli manzil mein qayaam farmaya aur Hazrat Abu Ayyub Razi Allahu Anhu uper wali manzil mein they.... Abu Ayyub Razi Allahu Anhu Aap Sallallahu Alaihi Wa Sallam k liye khana tayyar karte jab (khadim) khana wapas lata to Abu Ayyub Razi Allahu Anhu khadim se puchte "Rasool Allah Sallallahu Alaihi Wa Sallam ki ungliya khane par kaha kaha lagi hai?" Abu Ayyub Razi Allahu Anhu bhi usi jagah (apni ungliya rakh kar) khana khate. (Sahih Muslim Kitabul Ashrabah)


HAZRAT UMMEY HAANI RAZI ALLAHU ANHA KI AAP SALLALLAHU ALAIHI WA SALLAM SE MUHABBAT

Hazrat Ummey Haani Razi Allahu Anha kehti hai fatah makkah k rooz Hazrat Fatima Razi Allahu Anha Rasool E Akram Sallallahu Alaihi Wa Sallam ki baayi taraf aa kar baith gayi aur mein Aap Sallallahu Alaihi Wa Sallam ki daayi taraf, itne mein ek loondi bartan le kar aayi, jis mein peeney ki koi cheez thi, loogndi ne wo bartan Rasool Allah Sallallahu Alaihi Wa Sallam ko diya, Aap Sallallahu Alaihi Wa Sallam ne us bartan se piya, phir wo bartan mujhe diya, mene bhi us se piya aur kaha "Ya Rasool Allah Sallallahu Alaihi Wa Sallam! mera rooza tha mene (Aap Sallallahu Alaihi Wa Sallam ka jhoota pene k liye) rooza tood diya" Aap Sallallahu Alaihi Wa Sallam ne pucha "Kya tumne qaza rooza rakkha tha?" mene arz kiya "nahi" Aap Sallallahu Alaihi Wa Sallam ne irshad farmaya "Agar nafli rooza tha, to koi harj ki baat nahi". (Sahih Sunan Abu Dawood Hadees no. 2145)


HAZRAT BILAL RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Hazrat Muhammad bin Ibraheem Taemi Rahimahullah kehte hai k Rasool Allah Sallallahu Alaihi Wa Sallam ki wafat k baad abhi Aap Sallallahu Alaihi Wa Sallam ki tadfeen nahi hui thi, Hazrat Bilal Razi Allahu Anhu ne azaan di aur jab "ASH'HADU ANNA MUHAMMADAR RASOOLULLAH" par pahunchey to Sahaba E Kiram Razi Allahu Anhum phoot phoot kar roone lage, jab Aap Sallallahu Alaihi Wa Sallam ki tadfeen ho gayi to Hazrat Abu Bakr Razi Allahu Anhu ne Hazrat Bilal Razi Allahu Anhu se kaha azaan do, Hazrat Bilal Razi Allahu Anhu ne kaha "Agar aapne mujhe apni khatir aazaad kar diya hai to phir aapko ye hukm dene ka haqq hai, lekin agar aapne mujhe Allah ki raza k liye aazaad karaya hai to phir mujhe kuch na kahiye" Hazrat Abu Bakr Razi Allahu Anhu ne kaha "Mene tumhey sirf Allah ki raza k liye aazaad karaya hai" Hazrat Bilal Razi Allahu Anhu ne kaha "to phir Rasool Allah Sallallahu Alaihi Wa Sallam ki wafat k baad mein kisi doosre k liye azaan nahi kahunga" Hazrat Abu Bakr Razi Allahu Anhu ne farmaya "Accha, teri marzi". (Sifatus Safwah 1:200)


EK SAHABI KA SARMAYA E HAYAAT......HUBBEY RASOOL SALLALLAHU ALAHIH WA SALLAM

Hazrat Anas bin Malik Razi Allahu Anhu kehte hai ek aadmi Rasool Allah Sallallahu Alaihi Wa Sallam ki khidmat mein hazir hua aur arz ki "Ya Rasool Allah Sallallahu Alaihi Wa Sallam! qayamat kab aayegi?" Aap Sallallahu Alaihi Wa Sallam ne us se pucha "Tuney qayamat k liye kya tayyari ki hai?" Aadmi ne arz ki "Allah aur uske Rasool ki Muhabbat!" Aap Sallallahu Alaihi Wa Sallam ne irshad farmaya "(qayamat k rooz) yaqeenan tu uske saath hoga jiske saath tuney muhabbat ki" Hazrat Anas Razi Allahu Anhu kehte hai "Islam laane k baad hamey jitni khushi is baat se hui itni khushi kisi baat se nahi hui". (Sahih Muslim Kitabul Birr Wa Silah)

EK KHUSH-NASEEB SAHABI KI RASOOL ALLAH SALLALLAHU ALAIHI WA SALLAM SE MUHABBAT PAR QURAN MAJEED KA NUZOOL

Hazrat Ayesha Razi Allahu Anha kehti hai ek aadmi Nabi E Akram Sallallahu Alaihi Wa Sallam ki khidmat mein hazir hua aur arz ki "Ya Rasool Allah Sallallahu Alaihi Wa Sallam! mein aapse apni jaan se bhi jayada muhabbat karta hu apne baite se bhi ziyadah muhabbat karta hu jab ghar mein hota hu aur aapki yaad aati hai to us waqt tak sabr nahi aata jab tak hazir e khidmat ho kar Aap Sallallahu Alaihi Wa Sallam ka deedaar na karlu, lekin jab mujhe apni aur aapki maut yaad aati hai to jaanta hu k jannat mein dakhil hone k baad ambiya k saath buland maqaam par hongey aur mein jannat mein chala bhi gaya to (kam darja ki wajah se) darta hu k Aap Sallallahu Alaihi Wa Sallam ka deedaar nahi kar paunga" Nabi E Akram Sallallahu Alaihi Wa Sallam ne apne sahabi ki is baat ka us waqt tak koi jawab na diya jab tak Hazrat Jibraeel Alaihis Salaam ye aayat le kar na aa gaye (WA MAIY'YUTI ILLAHA....) "Aur jisne Allah aur uske Rasool Sallallahu Alaihi Wa Sallam ki ita'at ki wo (jannat mein) un loogo k saath honge jin par Allah ta'ala ne ina'am kiya hai ambiya mein se, siddeqeen mein se, shuhada mein se aur saliheen mein se, un loogo ki rifaqat kesi acchi hai (Surah Ambiya Surah no. 21 Ayat no. 69)". (Majmua uz Zawahid Kitabut Tafseer)


HAZRAT UMMEY AYEMAN RAZI ALLAHU ANHA KI AAP SALLALLAHU ALAIHI WA SALLAM SE MUHABBAT

Hazrat Anas Razi Allahu Anhu kehte hai Rasool Allah Sallallahu Alaihi Wa Sallam ki wafaat k baad Hazrat Abu Bakr Razi Allahu Anhu ne Hazrat Umar Razi Allahu Anhu se kaha "Chalo Ummey Ayeman Razi Allahu Anha se mil ka aaye, Rasool Allah Sallallahu Alaihi Wa Sallam bhi unhey milne jaya karte they" jab dono waha pahunchey to Ummey Ayeman Razi Allahu Anha roone lagi, Hazrat Abu Bakr Razi Allahu Anhu aur Hazrat Umar Razi Allahu Anhu ne pucha "Aap kyu rooti hai Allah k paas jo naimatey hai wo Rasool Allah Sallallahu Alaihi Wa Sallam k liye (dunya ki naimato se kahi ziyaadah) behtar hai" Hazrat Ummey Ayeman Razi Allahu Anha kehne lagi "Mein is liye nahi rooti k mujhe ye ilm nahi k Allah k paas apne Rasool k liye bahut kuch hai balke mein is liye rooti hu k ab wahi k aaney ka silsila band ho chuka hai" Hazrat Ummey Ayeman Razi Allahu Anha ki is baat se Hazrat Abu Bakr Razi Allahu Anhu aur Hazrat Umar Razi Allahu Anhu ko bhi roona aa gaya aur wo bhi Ummey Ayeman Razi Allahu Anha k saath roone lage. (Sahih Muslim Kitabul Fazail)


SAHABA E KIRAAM RAZI ALLAHU ANHUM KI RASOOL ALLAH SALLALLAHU ALAIHI WA SALLAM SE MUHABBAT

Hazrat Bara bin Aajib Razi Allahu Anhu kehte hai k sabse pehle hamare paas (madeena mein) Hazrat Mus'ab bin Umair Razi Allahu Anhu aur Abdullah bin Ummey Maktoom Razi Allahu Anhu (jo na-beena they) aaye, wo dono loogo ko quran padhaya karte they, phir Hazrat Bilal Razi Allahu Anhu, Hazrat Saad bin Abi Waqaas Razi Allahu Anhu aur Hazrat Ammaar bin Yasir Razi Allahu Anhu aaye, phir Hazrat Umar Razi Allahu Anhu 20 Sahaba E Kiraam Razi Allahu Anhum ko saath liye hue aaye phir Nabi E Akram Sallallahu Alaihi Wa Sallam (Hazrat Abu Bakr Razi Allahu Anhu aur Amir bin Fuhairah Razi Allahu Anhu ko saath le kar) tashreef laaye, mene madeena walo koi kisi baat se itna khush hote nahi dekha jitna Rasool Allah Sallallahu Alaihi Wa Sallam k tashreef laane se wo khush hue, loondiya tak kehne lagi "Allah k paighambar Sallallahu Alaihi Wa Sallam tashreef laaye hai". (Sahih Bukhari Kitabul Manaqib)

Hazrat Abu Juhaifa Razi Allahu Anhu kehte hai do-paahar k waqt Rasool Allah Sallallahu Alaihi Wa Sallam tasheef laye Aap Sallallahu Alaihi Wa Sallam ki khidmat mein wuzu ka paani paish kiya gaya jis se Aap Sallallahu Alaihi Wa Sallam ne wuzu farmaya Sahaba E Kiraam Razi Allahu Anhum Aap Sallallahu Alaihi Wa Sallam k wuzu se bacha hua paani le kar apne badan par malne lage. (Sahih Bukhari Kitabul Wuzu)

EK KAMSIN BACCHEY KI AAP SALLALLAHU ALAIHI WA SALLAM SE MUHABBAT

Hazrat Abdul Malak bin Umair Razi Allahu Anhu kehte hai Madeena Munawwarah mein ek ladka tha jiski kunniyat Abu Mus'ab thi, wo Nabi E Akram Sallallahu Alaihi Wa Sallam ki khidmat mein hazir hua Aap Sallallahu Alaihi Wa Sallam k dast e mubarak mein ek khoosha tha, Aap Sallallahu Alaihi Wa Sallam ne khoosha haatho mein mal kar uska chilka utara, phoonk maari aur uske daane ladke ko de diye, Ladke ne le kar kha liye, agarchey ansaar madeena usey accha na samjhte lekin jab Rasool Allah Sallallahu Alaihi Wa Sallam ne Abu Mus'ab Razi Allahu Anhu ko daane diye to usne Aap Sallallahu Alaihi Wa Sallam ko wapas na paltaaye, Abu Mus'ab Razi Allahu Anhu kehte hai k mein Nabi E Akram Sallallahu Alaihi Wa Sallam k paas se uth kar thodi door hi gaya tha k phir wapas palta aur Aap Sallallahu Alaihi Wa Sallam se arz ki "Ya Rasool Allah Sallallahu Alaihi Wa Sallam! Aap mere liye dua farmaye k Allah mujhe jannat mein Aap Sallallahu Alaihi Wa Sallam ki rifaqat ata farmaye" Aap Sallallahu Alaihi Wa Sallam ne us se pucha "Tumhey ye baat kisne sikhaayi?" Abu Mus'ab ne arz kiya "Kisi ne nahi" Aap Sallallahu Alaihi Wa Sallam ne farmaya "accha, mein dua karunga" jab mein wapas hone laga to Aap Sallallahu Alaihi Wa Sallam ne mujhe bulaya aur irshad farmaya "Kasrat e sujood se meri madad karna"....jab mein apni maa k paas wapas (ghar) aaya to maa ne daryaft kiya (itni dair kaha rahe?) mene bataya "mein Nabi E Akram Sallallahu Alaihi Wa Sallam ki khidmat mein hazir tha, Aap Sallallahu Alaihi Wa Sallam ek khoosha laaye apne dast e mubarak se uske daane nikaale aur apni phoonk mubarak se chilkey utaare aur mujhe diye, mene wapas karna munasib na samjha (aur le liye) Abu Mus'ab Razi Allahu Anhu ki maa ne kaha "Tuney bahut accha kiya" Anu Mus'ab Razi Allahu Anhu ne kaha phir mein Aap Sallallahu Alaihi Wa Sallam ki khidmat mein hazir hua aur Aap Sallallahu Alaihi Wa Sallam ne mere liye dua farmaayi. (Bazzaar, Majmua uz Zawahid Kitabul Manaqib 9:665)

DOOSRA (2nd) HAQQ - AAP SALLALLAHU ALAIHI WA SALLAM KI ITTEBA KARNA

DOOSRA (2nd) HAQQ - AAP SALLALLAHU ALAIHI WA SALLAM KI ITTEBA KARNA 

Bismillahirrahmanirraheem


AHLE EMAAN PAR AAP SALLALLAHU ALAIHI WA SALLAM KI ITTEBA WAJIB HAI

"Aur jo kuch Rasool tumhey de wo le lo aur jis se mana kare us se ruk jao aur (ita'at e Rasool k maamle mein) Allah se darte raho beshak Allah sakht saza dene wala hai". (Surah Hashar Surah no. 59 Ayat no. 7)

Hazrat Abu Moosa Ash'ari Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Meri aur us hidayat ki misaal, jise mein de kar bheja gaya hu aesi hai jese k ek aadmi apni qaum k paas aaye aur kahe, loogo! mene apni aankho se ek lashkar dekha hai jis se tumhey wazey taur par khabardaar kar raha hu lihaza us se bachne ki fikr karo, qaum k kuch loogo ne uski baat maan li aur raato raat (chupke se) fursat k lamhaat mein nikal gaye jabke doosre loogo ne jhutla diya aur apne gharo mein (gaflat se) padey rahe, subah k waqt lashkar ne unhey aa liya (pakad kiya ya unke paas aa gaye) aur halaak karke unki nasal ka khaatma kar diya, ye misal meri aur mujh par nazil kiye gaye haqq ki pairvi karne wale aur na karne wale aur jis haqq ko mein le kar aaya hu usko jhutlaane wale loogo ki hai". (Sahih Bukhari Kitabur Riqaaq)


RASOOL E AKRAM SALLALLAHU ALAIHI WA SALLAM KI ITA'AT, ALLAH KI ITA'AT HAI

"Jisne Rasool ki ita'at ki usne dar-asal Allah ki ita'at ki aur jisne Rasool ki ita'at se muh phera to humne aapko un par nigraan bana kar nahi bheja". (Surah Nisa Surah no. 4 Ayat no. 80)

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jisne meri ita'at ki usne Allah ki ita'at ki, jisne meri nafarmaani ki usne Allah ki nafarmaani ki aur jisne ameer ki ita'at ki, usne meri ita'at ki aur jisne ameer ki nafarmani ki usne meri nafarmani ki". (Mukhtasar Sahih Muslim Hadees no. 1223)

Wazahat: Yaad rahe k ameer ki ita'at kitab o sunnat k ahkaam k saath shart hai.


RASOOL ALLAH SALLALLAHU ALAIHI WA SALLAM KI ITA'AT AUR FARMABARDAARI NA KARNE KI SAZA

Hazrat Salma bin Akwa'a Razi Allahu Anhu se riwayat hai k unke baap ne unhey bataya k ek aadmi ne Rasool Allah Sallallahu Alaihi Wa Sallam k paas baaye hath se khana khaya to Aap Sallallahu Alaihi Wa Sallam ne farmaya "Apne daaye haath se khao" us aadmi ne jawab diya "Mein aesa nahi kar sakta" Aap Sallallahu Alaihi Wa Sallam ne irshad farmaya "(Accha Allah kare) tujhse aesa na ho sake" us shaks ne takabbur ki wajah se ye baat kahi thi (halankey koi shari'e uzr nahi tha) raavi kehte hai k wo shaks (umar bhar) apna daaya haath muh tak na utha saka. (Sahih Muslim Kitabul Ashrabah)


HAZRAT ABU BAKR SIDDEQUE RAZI ALLAHU ANHU KA JAZBAH ITTEBA E RASOOL SALLALLAHU ALAIHI WA SALLAM

Hazrat Hisham bin Urwah Rahimahullah apne baap se riwayat karte hai k jab Hazrat Abu Bakr Siddeque Razi Allahu Anhu ki bait mukammal ho gayi to unhone (lashkar usama ka) mutanazah masla hal karne k liye ansaar ko jama kiya, Sahaba E Kiram Razi Allahu Anhum ne Hazrat Abu Bakr Siddeque Razi Allahu Anhu ko mashwarah diya k lashkar e usama mein jaane wale (madeena k) aksar musalman hai aur arab mojoodah soorat e haal mein jis tarah aapko kamzoor samajh rahe hai, wo aapke saamne hai, is soorat e haal mein aapko lashkar e usama rawana nahi karna chahiye, Hazrat Abu Bakr Siddeque Razi Allahu Anhu ne jawab diya "Us zaat ki qasam! jiske haath mein Abu Bakr ki jaan hai, agar mujhe yaqeen ho k mujhe jangal k darindey achak lengey tab bhi mein lashkar e usama ko rawana karunga jese k Rasool Allah Sallallahu Alaihi Wa Sallam ne usey rawana karne ka hukm de rakkha hai agar un bastiyo mein mere siwa koi bhi baaqi na rahe tab bhi mein lashkar e usama ko zaroor rawana karunga". (Al Bidaya Wan Nihaya Juz e Sadis Safa no. 696)


HAZRAT UMAR BIN KHATTAB RAZI ALLAHU ANHU KA JAZBAH ITTEBA E RASOOL SALLALLAHU ALAIHI WA SALLAM

Hazrat Zaid bin Aslam Razi Allahu Anhu apne baap se riwayat karte hai k Hazrat Umar bin Khattab Razi Allahu Anhu ne Hajra e Aswad ko mukhatib karke kaha "Wallah! mein jaanta hu tu ek patthar hai na nuksan pahuncha sakta hai na nafa de sakta hai agar mene Nabi E Akram Sallallahu Alaihi Wa Sallam ko istalaam (Hajra e Aswad ko haath laga kar boosa dena) karte na dekha hota to tujhe kabhi na choomta, phir farmaya Ab hamey ramal karne ki kya zaroorat hai, ramal to mushriko ko dikhaane k liye tha ab to Allah ta'ala ne unhey halaak kar diya hai" phir khud hi farmate hai "Lekin ramal to wo cheez hai jo Rasool Allah Sallallahu Alaihi Wa Sallam ki sunnat hai aur sunnat choodna hamey pasand nahi". (Muttafiqun Alaih, Al Loo Loo wal Marjaan Hadees no. 1120)


HAZRAT ALI RAZI ALLAHU ANHU KA JAZBAH ITTEBA E RASOOL SALLALLAHU ALAIHI WA SALLAM

Hazrat Ali Razi Allahu Anhu kehte hai mujhe Rasool Allah Sallallahu Alaihi Wa Sallam ne ek reshmi jooda diya mein usey pehan kar nikla to Aap Sallallahu Alaihi Wa Sallam k chehrah e mubarak par gusse k aasaar dekhey to usey phaad kar (ghar ki) khawateen ko de diya. (Sahih Muslim Kitabul Libas)


HAZRAT ABU ZARR RAZI ALLAHU ANHU KA JAZABH ITA'AT E RASOOL SALLALLAHU ALAIHI WA SALLAM

Hazrat Abu Zarr Razi Allahu Anhu kehte hai mein do-pahar k baad Rasool Allah Sallallahu Alaihi Wa Sallam k saath madeena ki pathreeli zameen par ja raha tha Nabi E Akram Sallallahu Alaihi Wa Sallam ne farmaya "Abu Zarr Razi Allahu Anhu! mere wapas aaney tak yahi rukna aur Aap Sallallahu Alaihi Wa Sallam waha se tashreef le gaye hatta k meri nigaaho se ojhal ho gaye achanak mene kuch shoor aur aawaaz suni to mujhe khadsha paida hua k kahi Rasool Allah Sallallahu Alaihi Wa Sallam ko koi haadsa paish na aa gaya ho, mene iraadah kiya k Aap Sallallahu Alaihi Wa Sallam k pichey jao phir mujhe yaad aaya k Aap Sallallahu Alaihi Wa Sallam ne farmaya tha "Jab tak mein wapas na aao tum yahi theharna" chunanchey mein ruk kar aapka intazaar karne laga. (Sahih Musim Kitabuz Zakaat)


HAZRAT ABU AYYUB ANSARI RAZI ALLAHU ANHU KA JAZBAH ITTEBA E RASOOL SALLALLAHU ALAIHI WA SALLAM

Hazrat Abu Ayyub Ansari Razi Allahu Anhu kehte hai (mere han qayam k doraan) Rasool Allah Sallallahu Alaihi Wa Sallam ki khidmat mein jab khana paish kiya jata to Aap Sallallahu Alaihi Wa Sallam (hasb e khawahish) us mein se tanawul farma lete aur baaqi khana mere paas bhej dete, ek rooz Aap Sallallahu Alaihi Wa Sallam ne khana khaye baghair wese ka wesa wapas bhej diya kyunki us khaane mein lahsun tha, mene Aap Sallallahu Alaihi Wa Sallam se arz ki "Kya lahsun haraam hai?" Aap Sallallahu Alaihi Wa Sallam ne irshad farmaya "Haraam to nahi, mein us ki na-gawaar boo ki wajah se usey napasand karta hu" Hazrat Abu Ayyub Razi Allahu Anhu farmane lage "Jis cheez ko Aap Sallallahu Alaihi Wa Sallam napasand farmate hai, mein bhi napasand karta hu". (Sahih Muslim, Muqadma Daarmi Baab 39, Hadees no.435)


HAZRAT KAAB BIN MALIK RAZI ALLAHU ANHU KA JAZBAH E ITA'AT

Hazrat Kaab bin Malik Razi Allahu Anhu farmate hai (Gazwa e tabook mein adm shirkat ki bina par Rasool Allah Sallallahu Alaihi Wa Sallam ne pehle Sahaba E Kiraam Razi Allahu Anhum ko mujhse baat cheet karne se mana farma diya) aur jab 50 dino mein se 40 din guzar gaye to Rasool Allah Sallallahu Alaihi Wa Sallam ka qasid mere paas aaya aur kehne laga "Rasool Allah Sallallahu Alaihi Wa Sallam ne tumhey hukm diya hai k apni beewi se alag ho jao" mene pucha "kya usey talaaq de du ya kya karu?" Qasid ne kaha (talaaq na do) balke us se alag raho aur uske qareeb na jao, chunanchey mene apni beewi se keh diya k apne ghar walo k paas chali jao aur us waqt tak wahi raho jab tak Allah ta'ala mere maamley ka faisla nahi farma deta. (Sahih Bukhari Kitabul Magaazi)

Wazahat: Yaad rahe gazwa e tabook se pichey reh jaane wale teeno sacchey aur mukhlis Sahaba E Kiraam Razi Allahu Anhum (Hazrat Kaab bin Malik Razi Allahu Anhu, Hazrat Murarah bin Rabee Razi Allahu Anhu aur Hazrat Bilal bin Umaiyya Razi Allahu Anhu) ki tauba 50 dino k baad qabool hui thi.


EK KHUSH NASEEB KHATOON HAZRAT UMMEY HUMAID SAADIYA RAZI ALLAHU ANHA KA JAZBAH ITA'AT E RASOOL SALLALLAHU ALAIHI WA SALLAM

Hazrat Abu Humaid Saadi Razi Allahu Anhu ki zooja Hazrat Ummey Humaid Saadiya Razi Allahu Anha Nabi E Akram Sallallahu Alaihi Wa Sallam ki khidmat mein hazir huyi aur arz kiya "Ya Rasool Allah Sallallahu Alaihi Wa Sallam! mera jee chahta hai k Aapke saath (Masjid E Nabawi mein) namaz padhu" Aap Sallallahu Alaihi Wa Sallam ne irshad farmaya "Mujhe maloom hai k tu mere saath namaz padhna chahti hai lekin tera ghar k ek gooshey mein namaz padhna apne kamre mein namaz padhne se afzal hai aur tera kamrey mein namaz padhna ghar k sehan mein namaz padhne se behtar hai aur tera ghar k sehan mein namaz padhna muhalley ki masjid mein namaz padhne se afzal hai aur tera muhalley ki masjid mein namaz ada karna meri masjid mein namaz ada karne se afzal hai" Raavi kehte hai k Hazrat Ummey Humaid Razi Allahu Anha ne (uske baad apne ghar mein masjid banaane ka) hukm diya chunanchey unke liye ghar k aakhiri hissey mein masjid banaayi gayi jise tareek rakkha gaya (yaani us mein roshandaan wagairah na banaya) aur wo hamesha us mein namaz padhti rehti hatta k apne Allah azza wa Jall se ja mili. (Musnad Ahmad, Ibne HIbban, Sahih Ibne Khuzaima, At Targheeb wat Tahzeeb Hadees no. 338)


NOJAWAAN DOSHEEZAH KA BEMISAAL JAZBAH ITA'AT E RASOOL SALLALLAHU ALAIHI WA SALLAM

Hazrat Barzah As-Salami Razi Allahu Anhu se riwayat hai k Rasool Allah Sallallahu Alaihi Wa Sallam ne ek ansari se kaha "Apni baiti ka nikah mujhse karo" Ansari na kaha "Hazir ya Rasool Allah Sallallahu Alaihi Wa Sallam! ye to mere liye ba'as e izzat aur aankho ki thandak hai, Aapne irshad farmaya "Mein ye rishta apni zaat k liye nahi chahta" ansari ne arzi ki "Ya Rasool Allah Sallallahu Alaihi Wa Sallam! phir Aap Sallallahu Alaihi Wa Sallam kiske liye talab farma rahe hai?" Aap Sallallahu Alaihi Wa Sallam ne irshad farmaya "Julaibeeb k liye!, ansari ne arz ki "Ya Rasool Allah Sallallahu Alaihi Wa Sallam! (ijazat de) mein uski walidah se mashwarah karlu" Ansari ne ghar aa kar uski walidah se kaha "Rasool Allah Sallallahu Alaihi Wa Sallam tumhari baiti ka rishta maangte hai, walidah ne kaha bahut khoob ye to hamari aankho k liye thandak hai" ansari ne kaha "khud apne liye nahi Julaibeeb k liye" ansari ki beewi ne kaha "Julaibeeb is layiq kaha?" Wallah! hum apni beti ka us se kabhi nikah nahi karenge, jab ansari Sahabi (mashwarah k baad) wapas jaane lage takey Rasool Allah Sallallahu Alaihi Wa Sallam ko uski maa k faisle se aagaah karde to dosheezah ne kaha "Tumhare paas mere nikah ka paighaam kisne bheja hai?" dosheezah ki maa ne bataya "Rasool Allah Sallallahu Alaihi Wa Sallam ne" dosheezah ne kaha "Kya Rasool Allah Sallallahu Alaihi Wa Sallam k hukm ka inkaar karoge?" aap loog mujhe Rasool Allah Sallallahu Alaihi Wa Sallam k hawale karde wo mujhe zaaye nahi karenge, Ansari Nabi E Akram Sallallahu Alaihi Wa Sallam ki khidmat mein hazir hue aur arz ki "Ya Rasool Allah Sallallahu Alaihi Wa Sallam! meri beti ka maamla aapke hath mein hai" chunanchey Aap Sallallahu Alaihi Wa Sallam ne uska nikah Hazrat Julaibeeb Razi Allahu Anhu se kar diya. (Musnad Ahmad Hadees no. 19784)


HAZRAT ABU QATADAH RAZI ALLAHU ANHU KA JAZBAH E ITA'AT

Hazrat Kaab bin Malik Razi Allahu Anhu farmate hai (gazwah e tabook mein adm e shirkat ki bina par Sahaba E Kiraam Razi Allahu Anhum ne Rasool Allah Sallallahu Alaihi Wa Sallam k hukm par jab mujhse bool chaal band kardi to) kuch muddat k baad loogo ki ye rugardaani mere liye dobhar ho gayi, ek rooz mein apne chachazaad bhai Abu Qatadah k baagh ki deewaar par chadha mein Abu Qatadah se doosre tamaam loogo se ziyaadah muhabbat karta tha, usey salaam kiya, lekin Allah ki qasam! usne mujhe salaam ka jawab tak na diya, phir mene usey Allah ka waasta de kar pucha "Abu Qatadah! mujhe batao k tum mujhe Allah aur uske Rasool se muhabbat karne wala samajhte ho ya nahi?" Abu Qatadah ne phir khamooshi ikhtiyaar ki, mene dobaarah Allah ka waasta de kar us se pucha to phir bhi usne khamooshi ikhtiyaar ki, teesri martaba mene phir usey Allah ka waasta de kar yahi baat puchi to usne sirf itna jawab diya "Allah aur uska Rasool behtar jaante hai" ye sun kar meri aankho mein aansu jaari ho gaye aur mein baagh ki deewaar par chadh kar wapas palat aaya. (Sahih Bukhari Kitabul Magaazi)

HAZRAT ANAS RAZI ALLAHU ANHU KA JAZBAH ITTEBA E RASOOL SALLALLAHU ALAIHI WA SALLAM

Hazrat Anas bin Malik Razi Allahu Anhu kehte hai k ek darzi ne Rasool Allah Sallallahu Alaihi Wa Sallam k liye khane ki dawat ki, mein bhi Rasool Allah Sallallahu Alaihi Wa Sallam k saath tha, Darzi ne Aap Sallallahu Alaihi Wa Sallam k saamne rooti aur shoorba jisme kaddu aur khushk goosht tha rakkha, mene dekha k Rasool Allah Sallallahu Alaihi Wa Sallam palait mein se kaddu talaash kar rahe hai, Hazrat Anas Razi Allahu Anhu kehte hai us rooz se mein bhi kaddu pasand karne laga hu. (Sahih Bukhari Kitabul Beeyu)


HAZRAT ABDULLAH BIN MAS'OOD RAZI ALLAHU NAHU KA JAZBAH ITA'AT E RASOOL SALLALLAHU ALAIHI WA SALLAM

Hazrat Jabir Razi Allahu Anhu se riwayat hai k ek martaba juma k din Rasool Allah Sallallahu Alaihi Wa Sallam (khutba dene k liye) mimbar par tashreef laaye to farmaya "Loogo baith jao" Hazrat Abdullah bin Mas'ood Razi Allahu Anhu ne suna to masjid k darwaazey par hi baith gaye, Rasool Allah Sallallahu Alaihi Wa Sallam ne dekha to farmaya "Abdullah! masjid k andar aa kar baitho". (Sahih Sunan Abu Dawood Hadees no. 203)


EK SAHABI E RASOOL SALLALLAHU ALAIHI WA SALLAM KA MUNFARID JAZBAH ITA'AT E RASOOL SALLALLAHU ALAIHI WA SALLAM

Hazrat Abdullah bin Mas'ood Razi Allahu Anhu se riwayat hai k Rasool Allah Sallallahu Alaihi Wa Sallam ne ek aadmi k haath mein sooney ki angoothi dekhi Aapne uske haath se utaar k phaink di aur farmaya "Tum mein se koi shaks qasadan aagh ka angaarah apne haath mein le leta hai" Jab Rasool Allah Sallallahu Alaihi Wa Sallam tashreef le gaye to Sahaba E Kiraam Razi Allahu Anhum ne usey kaha "Apni angoothi utha lo aur (pehan'ne k bajaaye) koi doosra fayeda utha lo (masalan apni beewi ko de do ya baich do)" us aadmi ne jawab diya "Allah ki qasam! jis angoothi ko Rasool Allah Sallallahu Alaihi Wa Sallam ne phainka hai mein usey kabhi nahi uthaunga". (Sahih Muslim Kitabul Libaas)


SAHABA E KIRAAM RAZI ALLAHU ANHUM KA JAZBAH ITA'AT E RASOOL SALLALLAHU ALAIHI WA SALLAM

1. Hazrat Anas bin Malik Razi Allahu Anhu se riwayat hai k (gazwah e khaibar k mouqey par) Rasool Allah Sallallahu Alaihi Wa Sallam k paas ek aadmi hazir hua aur arz kiya "Sahaba E Kiraam Razi Allahu Anhum gharelu gadhey ka goosht kha rahe they" Aap Sallallahu Alaihi Wa Sallam khamoosh rahe phir doosra aadmi hazir hua aur arz ki "Loog gharelu gadhey ka goosht kha rahe hai" Aap Sallallahu Alaihi Wa Sallam ne phir khamooshi ikhtiyaar farmayi, phir teesra aadmi hazir hua aur arz ki "Loogo ne gharelu gadhey khatam kar daale hai" Aap Sallallahu Alaihi Wa Sallam ne munadi ko hukm diya aur usne buland aawaaz se ye aelaan kiya "Allah aur uske Rasool Sallallahu Alaihi Wa Sallam tum loogo ko gharelu gadha khane se mana farmate hai" tamaam loogo ne ye sun kar apni haandiya ulat di halankey un mein goosht ubal raha tha. (Sahih Bukhari Kitabul Magaazi)

2. Hazrat Anas bin Malik Razi Allahu Anhu se riwayat hai k hum loog sirf fazeeh (khajoor se banaayi gayi) sharaab hi istemaal karte they mein (ek majlis mein) Abu Talha aur doosre loogo ko sharaab pila raha tha k achanak ek aadmi aaya aur pucha "Kya tumhey ittela mil gayi hai?" unhone kaha "kaun si ittela?" aadmi ne kaha "Hurmat e Sharaab ki" ye sunte hi sabne baik zuban kaha "Anas Razi Allahu Anhu! ye saare matkey baha do" Hazrat Anas Razi Allahu Anhu kehte hai "Hurmat e sharaab ki ittela milne k baad na to kisi ne uske baare mein koi sawal kiya aur na hi kisi ne takraar ki". (Sahih Bukhari Kitabut Tafseer)

3. Hazrat Abu Saalba Khushni Razi Allahu Anhu kehte hai (doraan e safar) Sahaba E Kiraam Razi Allahu Anhum jab kisi muqaam par thehartey to waadiyo aur ghaatiyo mein idhar udhar bikhar jaate, Rasool Allah Sallallahu Alaihi Wa Sallam ne farmaya "Tumhara waadiyo aur ghaatiyo mein bikhar jana shaitan ki taraf se hai" uske baad Sahaba E Kiraam Razi Allahu Anhum ne kisi muqaam par aesa nahi kiya balke ek doosre k saath is tarah mil kar baith'te k ek hi kapda un par daal diya jaye to sabko dhaanp le. (Abu Dawood Kitabuj Jihaad Hadees no. 2:2288)

4. Hazrat Bara Razi Allahu Anhu se riwayat hai k Nabi E Akram Sallallahu Alaihi Wa Sallam ne (Madeena Munawwarah tashreef aawaari k baad) 16 ya 17 maah tak baitul maqdas k rukh par namaz padhi, lekin Aap Sallallahu Alaihi Wa Sallam ki khawahish thi k (musalmano ka qiblah) Baitullah Shareef ho (hukm e ilahi aaney k baad) Aap Sallallahu Alaihi Wa Sallam ne asar ki namaz Baitullah Shareef k rukh par padhi aur loogo ne bhi Aap Sallallahu Alaihi Wa Sallam k saath (Baitullah Shareef k rukh par) namaz ada ki, Aap Sallallahu Alaihi Wa Sallam k saath namaz padhne walo mein se ek aadmi bahar nikla aur uska guzar ek masjid par hua us waqt namazi halat e ruku mein (Baitul Maqdas ki taraf rukh kiye hue) they us shaks ne (buland aawaaz se) kaha "Mein Allah ta'ala ko gawah bana kar kehta hu k mene Nabi E Akram Sallallahu Alaihi Wa Sallam k saath Baitullah Shareef ki taraf rukh karke namaz padhi hai" (aawaaz sunney k baad) masjid k saare namazi halat e ruku mein hi Baitullah Shareef ki taraf ghoom gaye. (Sahih Bukhari Kitabut Tafseer)

5. Hazrat Abu Saeed Khudri Razi Allahu Anhu kehte hai k ek dafa Rasool Allah Sallallahu Alaihi Wa Sallam Sahaba E Kiraam Razi Allahu Anhum ko namaz padha rahe they k doraan e namaz Aap Sallallahu Alaihi Wa Sallam ne joote utaar kar baayi janib rakh diye, jab Sahaba E Kiraam Razi Allahu Anhum ne dekha to unhone bhi apne joote utaar diye, Rasool E Akram Sallallahu Alaihi Wa Sallam ne namaz khatam ki, to unhone daryaft farmaya "Tum loogo ne apne joote kyu utaare?" Sahaba E Kiraam Razi Allahu Anhum ne arz kiya "Humne Aap Sallallahu Alaihi Wa Sallam ko joote utaarte dekha, lihaza humne bhi apne joote utaar diye" Rasool Allah Sallallahu Alaihi Wa Sallam ne farmaya "Mujhe Jibraeel Alaihis Salaam ne aa kar bataya k mere jooto mein galazat hai, ya kaha takleef deh cheez hai (lihaza mene joote utaar diye) phir Aap Sallallahu Alaihi Wa Sallam ne Sahaba E Kiraam Razi Allahu Anhum ko naseehat farmayi "Jab masjid mein namaz padhne aao to pehle apne jooto ko acchi tarah dekh liya karo, agar un mein galazat ho to usey saaf karlo phir un mein namaz padho". (Sahih Sunan Abu Dawood Hadees no. 605)

6. Hazrat Kaab bin Malim Razi Allahu Anhu se riwayat hai k (gazwah e tabook se wapsi k baad jab Rasool Allah Sallallahu Alaihi Wa Sallam gazwah mein adm shirkat karne walo se mulaqaat k liye masjid tashreef laaye to) mein bhi Aap Sallallahu Alaihi Wa Sallam ki khidmat mein hazir hua aur Aap Sallallahu Alaihi Wa Sallam k saamne aa kar baith gaya, Aap Sallallahu Alaihi Wa Sallam ne mujhse pucha "Tum jihaad se kyu pichey rahe?" kya tumne jihaad k liye sawari nahi khareedi thi? mene arz kiya "Kyu nahi sawari khareedi thi aur Allah ki qasam! mere paas koi uzr bhi nahi, us waqt mein sehat aur maal o dolat k aetabaar se pehle ki nisbat ziyaadah behtar tha" Rasool Allah Sallallahu Alaihi Wa Sallam ne farmaya "Usne sach baat kahi hai (aur mujhe hukm diya gaya k) jao hatta k Allah ta'ala tumhare maamle ka faisla farma de" mein uth kar chala aaya.... Aap Sallallahu Alaihi Wa Sallam ne tamaam musalmaano ko hukm de diya k hum teen aadmiyo (Hazrat Kaab bin Malik Razi Allahu Anhu, Hazrat Muraarah bin Rabee Razi Allahu Anhu aur Hazrat Bilal bin Umaiyyah Razi Allahu Anhu) se koi shaks kalaam na kare, ye hukm jihaad se pichey reh jaane wale hum teen aadmiyo se mutalliq tha, Sahaba E Kiraam Razi Allahu Anhum ne hum se qata'a talluq kar liya aur is tarah badal gaye jese jaante hi nahi aur wo sar-zameen jise hum jaante they hamare liye ajnabi ban gayi. (Sahih Bukhari Kitabul Magaazi)

PEHLA (1st) HAQQ - AAP SALLALLAHU ALAIHI WA SALLAM PAR EMAAN LANA

PEHLA (1st) HAQQ - AAP SALLALLAHU ALAIHI WA SALLAM PAR EMAAN LANA 

Bismillahirrahmanirraheem

AAP SALLALLAHU ALAIHI WA SALLAM KI BA'ASAT MUBARAK K BAAD ALLAH TA'ALA NE TAMAAM LOOGO KO AAP SALLALLAHU ALAIHI WA SALLAM PAR EMAAN LANE KA HUKM DIYA HAI

"Emaan lao Allah par, uske Rasool par aur us noor (yaani quran majeed) par jise humne nazil kiya hai jo amal tum karte ho Allah us se ba-khabar hai". (Surah Taghabun Surah no. 64 Ayat no. 8)


DUNYA PAR BASNEY WALE TAMAAM INSAN AAP SALLALLAHU ALAIHI WA SALLAM PAR EMAAN LAANE K MUKALLAF HAI

"Aur humne saare loogo k liye tumhey basheer (khushkhabri dene wala) aur nazeer (daraane wala) bana kar bheja hai lekin loogo ki aksariyat nahi jaanti". (Surah Saba Surah no. 34 Ayat no. 28)

(Ae Muhammad Sallallahu Alaihi Wa Sallam) kaho, Ae loogo! mein tum sabki taraf Allah ka rasool ban kar aaya hu, wo Allah jo aasmaano aur zameen ka malik hai, uske siwa koi ila nahi wahi zindah karta hai aur maarta hai, lihaza emaan lao Allah aur uske rasool par, jo nabi aur ummi hai aur emaan rakhta hai Allah aur uske irshadaat par, uski itteba karo takey seedhi rah pao. (Surah Aaraaf Surah no. 7 Ayat no. 158)


JINNAAT BHI AAP SALLALLAHU ALAIHI WA SALLAM PAR EMAAN LANE K MUKALLAF HAI

"Aur jab hum jinno ki ek jamaat ko tumhari taraf le aaye takey wo quran suney, jab wo us jagah par pahunch gaye (jaha tum quran padh rahe they) to unhone (aapas mein) kaha: khamoosh ho jao, phir jab quran padha ja chuka to wo khabardaar karne wale ban kar apni qaum ki taraf paltey, unhoney (ja kar apni qaum se) kaha: Ae hamari qaum! humne ek kitab suni hai jo Musa k baad nazil ki gayi hai, apne se pehle aayi hui kitab ki tasdeeq karne wali hai, haqq ki rehnumaayi karti hai aur raah e raast ki taraf le jaane wali hai, Ae hamari qaum k loogo! Allah ki taraf bulane wale ki dawat qubool karo aur us par emaan le aao, Allah ta'ala tumhare gunah maaf farmayega aur tumhey azaab e aleem se bacha lega". (Surah Ahqaaf Surah no. 46 Ayat no. 29-31)


AAP SALLALLAHU ALAIHI WA SALLAM PAR EMAAN NA LAANE WALE JAHANNAM MEIN JAYENGEY

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Qasam hai us zaat ki jiske haath mein Muhammad Sallallahu Alaihi Wa Sallam ki jaan hai, is ummat ka koi bhi aadmi khuwah wo yahoodi ho ya isaayi, mere baare mein sun lene k baad is halat mein mar jaaye k wo us taleem ko na maney jise de kar mein bheja gaya hu, to wo jahannami hai". (Sahih Muslim Kitabul Emaan)


HAZRAT ABU BAKR SIDDEQUE RAZI ALLAHU ANHU KA EMAAN

Hazrat Ayesha Razi Allahu Anha farmati hai k Nabi E Akram Sallallahu Alaihi Wa Sallam ko raat k waqt masjid e aqsa le jaya gaya us se agli subah Nabi E Akram Sallallahu Alaihi Wa Sallam ne loogo ko uski khabar di, kuch loog jo Aap Sallallahu Alaihi Wa Sallam par emaan laaye they aur tasdeeq ki thi wo murtad ho gaye aur Hazrat Abu Bakr Siddeque Razi Allahu Anhu k paas bhaagey bhaagey aaye aur kaha "Kya tujhe apne dost k baare mein maloom hai wo dawa kar raha hai k raato raat baitul maqdas se ho kar aaya hai? Hazrat Abu Bakr Siddeque Razi Allahu Anhu ne pucha "kya usne waqayi ye baat kahi hai?" loogo ne kaha "han" waqayi kahi hai, Hazrat Abu Bakr Siddeque Razi Allahu Anhu ne farmaya "Agar kahi hai to phir usne sach kaha hai" loogo ne phir pucha "Kya tu tasdeeq karta hai k wo raat ko baitul maqdas gaya aur subah se pehle wapas pahunch gaya" Hazrat Abu Bakr Siddeque Razi Allahu Anhu ne kaha "han" mein is se bhi ziyaadah na-qabil yaqeen baaton ki tasdeeq karta hu yaani subah wa shaam aasmaan se aane wali cheezo ki tasdeeq karta hu, tab aapko siddeque ka khitab diya gaya. (Mustadrak E Hakim, 3:62, Silsila Ahadees E Saheeya Hadees no. 306)


HAZRAT UMAR FAROOQ RAZI ALLAHU ANHU KA EMAAN

Hazrat Zumrah Razi Allahu Anhu se riwayat hai k do aadmi apna muqadmah le kar Rasool Allah Sallallahu Alaihi Wa Sallam ki khidmat mein hazir hue, Aap Sallallahu Alaihi Wa Sallam ne jhoote shaks k muqabiley mein sacchey shaks k haqq mein faisla farma diya, jiske khilaf faisla hua tha usne kaha "Mein is faisle par raazi nahi hu" doosre shaks ne kaha "phir tum kya chahte ho" usne kaha "chalo hum Abu Bakr Siddeque Razi Allahu Anhu k paas chalte hai" dono fareeq Hazrat Abu Bakr Siddeque Razi Allahu Anhu k paas pahunchey jiske haqq mein faisla hua tha usne (Hazrat Abu Bakr Siddeque ko) bataya "humne ya muqadma Nabi E Akram Sallallahu Alaihi Wa Sallam ki khidmat mein paish kiya tha aur Aap Sallallahu Alaihi Wa Sallam ne mere haqq mein faisla farma diya tha" Hazrat Abu Bakr Siddeque Razi Allahu Anhu ne farmaya "mera faisla bhi wahi hai jo Rasool Allah Sallallahu Alaihi Wa Sallam ne farmaya hai" jiske khilaf faisla hua tha usne Hazrat Abu Bakr Siddeque Razi Allahu Anhu ki baat maan'ne se bhi inkaar kar diya aur kehne laga "hum Umar bin Khattab Razi Allahu Anhu k paas jate hai" chunanchey dono fareeq Hazrat Umar bin Khattab Razi Allahu Anhu ki khidmat mein hazir hue jiske haqq mein faisla hua tha usne (Hazrat Umar Razi Allahu Anhu se) arz kiya "Humne ye muqadma Rasool Allah Sallallahu Alaihi Wa Sallam ki khidmat mein paish kiya tha, Aap Sallallahu Alaihi Wa Sallam ne mere haqq mein faisla farma diya tha, lekin is shaks ne maan'ne se inkaar kar diya hai, Hazrat Umar Razi Allahu Anhu ne us se daryaft farmaya to usne aetraaf kiya (k han waqayi) maamla aesa hi hai, Hazrat Umar Razi Allahu Anhu ghar wapas gaye aur palte to unke haath mein talwaar thi, usey be-niyam kiya aur inkaar karne wale ki gardan uda di (us par warsa ne qasaas ka mutaalba kiya to) Allah ta'ala ne ye Aayat nazil farma di (FALA WA RABBI KA LA YUMINOONA......) "Ae Muhammad Sallallahu Alaihi Wa Sallam! tere rabb ki qasam, loog momin nahi ho sakte jab tak apne bahami ikhtalafaat mein tumhey faisla karne wala na maan le phir jo bhi faisla tum karo us par dil mein koi tangi mehsoos na kare aur usey sar basar tasleem karle". (Tafseer Ibne Kaseer Surah Nisa Surah no. 4 Ayat no. 65 ki tafseer)


HAZRAT KHABBAB BIN ARATT RAZI ALLAHU ANHU KA EMAAN

Hazrat Khabbab (bin Aratt) Razi Allahu Anhu farmate hai mein zamana e jahiliyat mein lohaar ka paisha karta tha aur (mere malik) Aas bin Wayil ki taraf meri kuch raqam nikalti thi mein uske paas apni raqam maangne gaya to kehne laga "Jab tak tu Muhammad (Sallallahu Alaihi Wa Sallam) ka inkaar nahi karega mein tujhe teri raqam nahi dunga" Hazrat Khabbab Razi Allahu Anhu ne kaha "Wallah! agar tu mar kar dobarah zindah ho jaye tab bhi mein Muhammad Sallallahu Alaihi Wa Sallam ka inkaar nahi karunga". (Sahih Bukhari Kitabut Tafseer)


HAZRAT AMMAAR BIN YASIR, HAZRAT SUMAIYYA, HAZRAT SUHAIB, HAZRAT BILAL AUR HAZRAT MIQDAAD RAZI ALLAHU ANHUM KA EMAAN

Hazrat Abdullah bin Mas'ood Razi Allahu Anhu kehte hai sabse pehle 7 aadmiyo ne apna islam zahir kiya:
1. Rasool Allah Sallallahu Alaihi Wa Sallam
2. Hazrat Abu Bakr Siddeque Razi Allahu Anhu
3. Hazrat Ammaar Razi Allahu Anhu
4. Hazrat Sumaiyya Razi Allahu Anha
5. Hazrat Suhaib Razi Allahu Anhu
6. Hazrat Bilal Razi Allahu Anhu
7. Hazrat Miqdaad Razi Allahu Anhu
Rasool Allah Sallallahu Alaihi Wa Sallam ko to Allah ta'ala ne unke chacha Abu Talib k zariye quraish e makka k muzalim se mehfooz rakkha, Hazrat Abu Bakr Siddeque Razi Allahu Anhu ko Allah ta'ala ne unki qaum k zariye bachaye rakkha aur jaha tak baaqi paanch Hazraat ka talluq tha unhey mushrik pakad lete aur loohey ki zirah pehna kar tapti dhoonp mein lita dete, un mein se tamaam afraad ne apni zuban se kuffar k matlab ki baat ada kardi (aur apni jaan bacha li) siwa e hazrat Bilal Razi Allahu Anhu k, unhoney Allah ki raah mein apni jaan (k halaak hone) ki parwah na ki aur apni (mushrik) qaum k saamne zaleel aur ruswa hote rahe, mushrik unhey pakad lete aur ladko k hawaley kar dete jo unhey makkah ki ghatiyo mein ghaseet'te phirte aur Hazrat Bilal Razi Allahu Anhu musalsal yahi kehte jate "Allah ek hai" "Allah ek hai". (Ibne Maja Kitabus Sunnah 1:122)


HAZRAT ANAS BIN NAZAR RAZI ALLAHU ANHU KA EMAAN

Hazrat Anas (bin Malik) Razi Allahu Anhu se riwayat hai k unke chacha (Hazrat Anas bin Nazar Razi Allahu Anhu) gazwah e badr mein shareek na ho sake to unhone (apne aapse) ahad kiya k mein pehli jang mein Nabi E Akram Sallallahu Alaihi Wa Sallam ka saath nahi de saka, lekin ayendah Allah ta'ala ne mujhe kisi jang mein Nabi E Akram Sallallahu Alaihi Wa Sallam ki rifaqat naseeb farmayi to phir Allah dekhega k mein kese (Allah ki raah mein) ladta hu, phir gazwah uhad ka moqa aaya to musalman (maidan e jang mein) titar bitar ho gaye, Hazrat Anas Razi Allahu Anhu kehne lage "Ya Allah! musalmano ne jo kuch kiya hai us par mein teri janab mein ma'azrat paish karta hu aur mushriko ne jo zulm kiya hai us se izhaar baizaari karta hu (ye keh kar) talwar liye aagey badhte Hazrat Saad bin Muaaz Razi Allahu Anhu se mulaqaat ho gayi, Hazrat Anas Razi Allahu Anhu farmane lage "Saad! kaha jaate ho? mujhe to uhad pahaad k pichey se jannat ki khushboo aa rahi hai, Hazrat Anas Razi Allahu Anhu gaye aur qitaal shuru kar diya hatta k shaheed ho gaye, shahadat k baad unki laash pehchani na ja saki aur unki behan ne (hath par) til k nishan ya ungli k pour se unhey pehchana, unke jism par naizey, talwar aur teer k 80 se zaayid zakham they". (Sahih Bukhari Kitabul Magaazi)


HAZRAT UMAIR BIN HAMMAM RAZI ALLAHU ANHU KA EMAAN

Hazrat Jabir bin Abdullah Razi Allahu Anhu kehte hai k uhad k rooz ek aadmi (Hazrat Umair bin Hammam Razi Allahu Anhu) ne Nabi E Akram Sallallahu Alaihi Wa Sallam se pucha "Ya Rasool Allah Sallallahu Alaihi Wa Sallam! agar mein jang mein maara jau to mera thikana kaha hoga?" Aap Sallallahu Alaihi Wa Sallam ne farmaya "Jannat mein" Aadmi ne apne haath se khajoorey phenki aur ladna shuru kar diya hatta k shaheed ho gaya. (Sahih Bukhari Kitabul Magaazi)


HAZRAT SALMA BIN AKWAA RAZI ALLAHU ANHU KA EMAAN

Hazrat Salma bin Akwaa Razi Allahu Anhu farmate hai mein (islam laane se qabl) Talha bin Ubaidullah ka mulazim tha unke ghoodey ko pani pilata tha, uski peeth khujata tha aur unki khidmat karta tha aur uske aouz se khana khata (jab musalman hua to) mene apna ghar-baar aur maal o dolat sab kuch chood diya aur hijrat karke Allah aur uske Rasool Sallallahu Alaihi Wa Sallam k paas chala aaya. (Sahih Muslim Kitabul Jihad was siyar)


HAZRAT ABU DAHDAAH RAZI ALLAHU ANHU KA EMAAN

Hazrat Anas Razi Allahu Anhu se riwayat hai k ek aadmi ne arz kiya "Ya Rasool Allah Sallallahu Alaihi Wa Sallam! fala shaks ki khajoor hai aur mein uske sahaare apni diwaar khadi karna chahta hu Aap Sallallahu Alaihi Wa Sallam usey hukm de k wo ye khajoor mujhe de de takey mein uske sahaare diwaar khadi kar saku, Rasool E Akram Sallallahu Alaihi Wa Sallam ne khajoor k malik se kaha "Ye khajoor ka darakht ise de do aur uske badle mein jannat ki khajoor le lo" lekin khajoor k malik ne inkaar kar diya, Hazrat Abu Dahdaah Razi Allahu Anhu khajoor k malik k paas aaye aur kaha "mera saara baagh le lo aur wo khajoor mujhe de do" (jo Nabi E Akram Sallallahu Alaihi Wa Sallam ne tujhse maangi hai) khajoor k malik ne baagh k badle mein apni khajoor Abu Dahdaah Razi Allahu Anhu ko de di, Hazrat Abu Dahdaah Razi Allahu Anhu Rasool E Akram Sallallahu Alaihi Wa Sallam ki khidmat mein hazir hue aur arz ki "Ya Rasool Allah Sallallahu Alaihi Wa Sallam! mene apne baagh k badle mein wo khajoor khareed li hai, mene ye khajoor Aap Sallallahu Alaihi Wa Sallam ko di aur Aap Sallallahu Alaihi Wa Sallam ye khajoor zaroorat-mand ko de de, Rasool Allah Sallallahu Alaihi Wa Sallam ne farmaya "Abu Dahdaah k liye jannat mein kitne hi khooshey latkey hue hai, Aap Sallallahu Alaihi Wa Sallam ne ye alfaaz kayi martaba ada farmaye, Hazrat Abu Dahdaah Razi Allahu Anhu apni ahliyah k paas aaye aur aawaaz di "Ummey Dahdaah! (Razi Allahu Anha) baagh se bahar nikal aao mene ye baagh jannat mein khajoor k badle mein baiche diya hai" Ummey Dahdaah Razi Allahu Anha ne (foran) kaha "Tumne bada nafa baksh sooda kiya hai" ya us se milta julta koi kalma kaha. (Tabraani, Musnad Ahmad Hadees no. 12482)


HAZRAT KHUZAIMA BIN SABIT RAZI ALLAHU ANHU KA EMAAN

Hazrat Khuzaima bin Sabit Razi Allahu Anhu se riwayat hai k Nabi E Akram Sallallahu Alaihi Wa Sallam ne Sawa'e bin Haris se ek ghooda kharida, Sawa'e bin Haris Aap Sallallahu Alaihi Wa Sallam se (qeemat mein) jhagda karne laga, Hazrat Khuzaima Razi Allahu Anhu ne Rasool Allah Sallallahu Alaihi Wa Sallam k haqq mein gawahi di (k Aap Sallallahu Alaihi Wa Sallam jo baat farmate hai wahi sahih hai baad mein) Rasool Allah Sallallahu Alaihi Wa Sallam ne Hazrat Khuzaima Razi Allahu Anhu se daryaft farmaya "Khuzaima! tum to sooda karte waqt hamare paas nahi they, tumne kese gawahi di?" Hazrat Khuzaima Razi Allahu Anhu ne arz kiya "Aap Sallallahu Alaihi Wa Sallam jo taleem laaye hai uski sacchayi ki bina par mene gawahi di hai aur mera ye emaan hai k Aap Sallallahu Alaihi Wa Sallam haqq k alawah koi baat nahi karte" Rasool Allah Sallallahu Alaihi Wa Sallam ne farmaya "Khuzaima (akela) jiske haqq mein gawahi de ya jiske khilaf gawahi de wo kaafi hai". (Majmua uz Zawahid Tehqeeq Abdullah Muhammad Darwaish Kitabul Manaqib 9:533)

Wazahat: Rasool Allah Sallallahu Alaihi Wa Sallam k is irshaad k baad Hazrat Khuzaima Razi Allahu Anhu Sahaba Razi Allahu Anhum mein zush shahadatain k laqab se mash'hoor ho gaye aur unki gawahi do gawaho k barabar shumar ki jaati, kaha jata hai k ahad e Siddeque mein tadweer e quran k waqt ye shart aayid ki gayi thi k har aayat tehreer karne se qabal do Sahaba E Kiram Razi Allahu Anhum se gawahi li jaye, Surah Ahzaab ki ek aayat (MINAL MOMINEENA RIJALUN......) k gawah sirf Khuzaima bin Sabit Razi Allahu Anhu they, Rasool Allah Sallallahu Alaihi Wa Sallam k irshad e mubarak k paish e nazar unki gawahi do aadmiyo k barabar shumar karke wo aayat likh li gayi. (Wallahu Aalam bis Sawaab)


EK SA'AADAT-MAND KHATOON KA EMAAN

Hazrat Abdullah bin Umar Razi Allahu Anhu kehte hai ek aurat Rasool Allah Sallallahu Alaihi Wa Sallam ki khidmat mein hazir hui uske saath uski baiti bhi thi jiske haath mein sooney k do kangan they, Aap Sallallahu Alaihi Wa Sallam ne daryaft farmaya "Kya tu unki zakaat ada karti hai?" Aurat ne arz kiya "nahi" Aap Sallallahu Alaihi Wa Sallam ne irshad farmaya "Kya tu ye pasand karti hai k un do kangano k badle mein Allah ta'ala qayamat k rooz tujhe do aagh k kangan pehnaaye?" (ye sun kar) aurat ne dono kangan utaar diye aur Nabi E Akram Sallallahu Alaihi Wa Sallam k khidmat mein paish kar diye aur kaha "Ye dono kangan Allah aur uske Rasool k liye hai". (Abu Dawood Kitabuz Zakaat Hadees no. 1:1382)


HAZRAT KAAB BIN MALIK RAZI ALLAHU ANHUM KA EMAAN

Hazrat Kaab bin Malik Razi Allahu Anhu kehte hai (gazwa e tabook mein adm shirkat ki lagzish par Rasool Allah Sallallahu Alaihi Wa Sallam ne Sahaba E Kiraam Razi Allahu Anhum ko mujhse guftago karne se mana farma diya tha) usi doraan (ek rooz) mein bazaar mein ja raha tha k mulk e shaam ka ek (isaayi) kisan jo k apna gallah bechne k liye madeena munawwarah ata tha, loogo se ye keh raha tha "Mujhe Kaab bin Malik ka pata kaun batayega?" loogo ne meri taraf isharah kiya to wo shami kisan mere paas aaya aur (roami governer) Shah Ghassan ka ek khat mujhe diya jisme ye likha tha "Amma Baad! mujhe maloom hua hai k tumhara sahib tum par zulm kar raha hai halankey Allah ne tumhey zaleel aur bekaar paida nahi kiya, lihaza (mein tumhey dawat deta hu k) hamare paas aa jao hum tumhari dil-jooyi karengey" mene khat padh kar soocha ye ek nayi aazmayish aayi, lihaza mein tannoor ki taraf gaya aur usko tannoor mein jala diya. (Sahih Bukhari Kitabul Magaazi)


HAZRAT SAAD BIN ABI WAQAAS RAZI ALLAHU ANHU KA EMAAN

Hazrat Mus'ab bin Saad Razi Allahu Anhu se riwayat hai k unke walid (Hazrat Saad bin Abi Waqaas Razi Allahu Anhu) kehte they k unke baare mein quran majeed ki kayi aayaat nazil hui (masalan unke emaan laane par) Ummey Saad ne ye qasam khaayi k jab tak Saad apna deen tark nahi karta wo us se baat karegi na khana khayegi na paani piyegi aur saath Saad Razi Allahu Anhu se ye kehti k Allah ne tujhe walidain ki ita'at ka hukm diya hai mein teri maa hu aur tujhe hukm deti hu k us deen ko chood de, Ummey Saad teen din tak isi tarah bhooki piyaasi rahi hatta k usey gushi k doorey padne lage tab uske ek baite amarah ne usey paani pilaya (hoosh mein aaney k baad) Hazrat Saad Razi Allahu Anhu ko bad-duwaye dene lagi (lekin Hazrat Saad Razi Allahu Anhu ne apna deen na chooda) aur Allah ta'ala ne quran majeed mein ye aayat nazil farmayi "Humne insan ko apne walidain k saath husn e salook ki takeed farmayi hai lekin agar wo tujhe mere saath shirk par majboor kare jiska tere paas koi saboot nahi to phir unki ita'at na kar albatta dunya mein unke saath naik salook karte raho". (Sahih Muslim Kitabul Fazail E Sahaba Razi Allahu Anhum)

HUQOOQ RAHMATULL LIL AALAAMEEN S.A.W.S

HUQOOQ RAHMATULL LIL AALAMEEN SALLALLAHU ALAIHI WA SALLAM

Bismillahirrahmanirraheem

Kitab o Sunnat k muta'ala se hamey ye maloom hota hai k Aap Sallallahu Alaihi Wa Sallam ki ummat k har fard par darj e zail das huqooq aayid hote hai, jinhey baja lana har fard k zimmey wajib hai:

1. Aap Sallallahu Alaihi Wa Sallam par Emaan lana.

2. Aap Sallallahu Alaihi Wa Sallam ki Itteba karna.

3. Aap Sallallahu Alaihi Wa Sallam se Muhabbat karna.

4. Aap Sallallahu Alaihi Wa Sallam ka Adab karna.

5. Aap Sallallahu Alaihi Wa Sallam par Darood bhejna.

6. Aap Sallallahu Alaihi Wa Sallam ki Zaat e Mubarak ka difa karna.

7. Aap Sallallahu Alaihi Wa Sallam k Deen ki nusrat karna.

8. Aap Sallallahu Alaihi Wa Sallam k Dushmano se dushmani aur Dosto se dosri rakhna.

9. Aap Sallallahu Alaihi Wa Sallam aur Sahaba Razi Allahu Anhum se Muhabbat karna.

10. Aap Sallallahu Alaihi Wa Sallam se Jafa (daga) na karna.

Mazoora bala 10 huqooq ki tafseel:

To Be Continued.....