JANNAT K CHASHMEY

JANNAT K CHASHMEY

Bismillahirrahmanirraheem

JANNAT K EK CHASHMEY KA NAAM "SALSABEEL" HAI JIS SE SOONTH (ZANJABEEL) KI AAMEZISH WALI SHARAAB BARAMAD HOGI

"Ahle jannat k aagey chandi k bartan aur sheeshey k piyaaley gardish karaaye ja rahe hongey shishey bhi chandi ki tarah (chamakdaar) hongey, un piyaalo ko (khuddaam) theek andaazey k mutabiq bharengey ahle jannat ko waha aesi sharaab k jaam pilaaye jayenge jisme soonth ki aamezish hogi, ye (sharaab jannat k) ek chashmey se (baramad) hogi jiska naam "Salsabeel" hai". (Surah Dahar Surah no. 76 Ayat no. 15-18)


JANNAT K EK CHASHMEY KA NAAM "KAAFOOR" HAI JISKI SHARAAB SE AHLE JANNAT LUTF ANDOOZ HONGEY

"Naik loog (jannat mein) sharaab k aese saagir piyengey jisme aab e kaafoor ki aamezish hogi ye (kaafoor) ek behta hua chashma hai jis se Allah k bandey (khoob paani) piyengey aur jaha kahi chahengey ba-sahoolat uski shakhey nikaal le jayengey". (Surah Dahar Surah no. 76 Ayat no. 5-6)


JANNAT K EK CHASHMEY KA NAAM "TASNEEM" HAI JISKA KHAAS PAANI SIRF ALLAH K MUQARRAB LOOGO KO HI PEENE K LIYE DIYA JAYEGA
ABRAAR LOOGO KO (JO DARYA MEIN MUQARRAB LOOGO SE KAM HONGEY) UMDAH SHARAAB MEIN TASNEEM KA PAANI MILA KAR PEENE KO DIYA JAYEGA

"Beshak naik loog bade mazey mein hongey unchi musnado par baithey nazaare kar rahe hongey tum unke chehro par se naimato ki ronaq aur tar o taazgi mehsoos karoge unko nafees bartan sarband sharaab pilaayi jayegi jis par mushk ki muhar lagi hogi jo loog doosro par baazi le jana chahte hai wo us (sharaab) ko hasil karne mein baazi le jaane ki koshish karenge is nafees aur umdah sharaab mein tasneem k paani ki aamezish hogi tasneem ek chashma hai jis (ka khalis pani) muqarrab loog piyengey". (Surah Mutaffafeen Surah no. 83 Ayat no. 22-28)


BAAZ CHASHMO SE SAFAID CHAMAKDAAR AUR LAZEEZ SHARAAB BARAMAD HOGI

"Ahle jannat k liye jana pehchana rizq hai har tarah ki lazeez chizey aur naimat bhari jannatey jinme wo izzat k saath rakkhe jayenge takhto par aamne saamne baithenge sharaab k chashmo se saagir bhar bhar kar unke darmiyaan phiraaye jayenge safaid (chamakti hui) sharaab jo peene walo k liye lazeez hogi na us se sar chakrayega na hi aqal mein fatoor ayega". (Surah Saaffaat Surah no. 37 Ayat no. 41-45)


BAAZ CHASHMEY FUWAARO KI TARAH AHLE UBAL RAHE HONGEY

"Un do baagho mein do chashmey aese hongey jisme paani joosh maar raha hoga pas ae jinn wa insaan tum apne rabb ki kin kin naimato ko jhutlaogey?". (Surah Rahman Surah no. 55 Ayat no. 66-67)


AHLE JANNAT K QALB WA NAZAR KI TASKEEN K LIYE HAR DO RAWA DAWA PAANI K KHOOBSURAT CHASHMEY AUR AABSHAREY JANNAT MEIN HONGI

"Jannat mein rawa dawa behte chashmey hongey". (Surah Gashiya Surah no. 88 Ayat no. 12)

"(jannat mein) door tak phaili huui chaao aur girta hua paani bhi hoga". (Surah Waqiah Surah no. 56 Ayat no. 30-31)


MAZKOORAH CHASHMO K ALAWA AHLE JANNAT KI KHATIR MADARAAT K LIYE JABAJA MUKHTALIF CHASHMEY HONGEY

"Beshak muttaqi loog saayo aur chashmo mein hongey aur manpasand maivey unke liye hazir hongey". (Surah Mursalaat Surah no. 77 Ayat no. 41-42)

JANNAT KI NEHREY

JANNAT KI NEHREY

Bismillhairrahmanirraheem

JANNAT MEIN MEETHEY PAANI, KHUSH ZAIQA DOODH, LAZEEZ SHARBAT AUR SHAFFAAF SHEHAD KI NEHREY BEH RAHI HAI
JANNAT KI NEHRO K MASHROBAAT KA RANG AUR ZAIQA HAMESHA EK JESA HI RAHEGA

"Muttaqeen loogo se jis jannat ka wada kiya gaya hai uski shaan to ye hai k us mein meethey paani ki nehrey beh rahi hai, aese doodh ki nehrey jiske zaiqey mein zarra farq na aaya ho, aesi sharaab ki nehrey jo peene walo k liye lazeez ho aur saaf shaffaaf shehad ki nehrey beh rahi hai". (Surah Muhammad Surah no. 47 Ayat no. 15)


SEEHAAN, JEEHAAN, FURAAT AUR NEEL JANNAT KI NEHREY HAI

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Seehaan, Jeehaan, Furaat aur Neel jannat ki nehro mein se hai". (Sahih Muslim Kitabul Jannah wa Sifatun Naeemaha)


KAUSAR JANNAT KI NEHAR HAI JISKA PAANI DOODH SE ZIYAADA SAFAID AUR SHEHAD SE ZIYAADA MEETHA HOGA
KAUSAR ALLAH TA'ALA KI TARAF SE RASOOL E AKRAM SALLALLAHU ALAIHI WA SALLAM KO DIYA GAYA HADYA HAI

Hazrat Anas bin Malik Razi Allahu Anhu kehte hai Rasool E Akram Sallallahu Alaihi Wa Sallam se daryaft kiya gaya "kausar kya hai?" Aap Sallallahu Alaihi Wa Sallam ne irshad farmaya "Ye ek nehar hai jo mujhey Allah ta'ala ne jannat mein ata farmayi hai jiska paani doodh se ziyaada safaid aur shehad se ziyaada meetha hai, isme aese parindey (udhte hai) jinki gardaney untho ki si hai" Hazrat Umar Razi Allahu Anhu ne arz kiya "wo parindey to khoob mazey mein hai" Aap Sallallahu Alaihi Wa Sallam ne irshad farmaya "un parindo ko khaane wale ziyaada mazey mein hai". (Sunan Tirmizi Abwabul Jannah)


AHLE JANNAT HASB KHAWAHISH JANNAT KI NEHRO MEIN SE CHOOTI CHOOTI NEHREY NIKAAL KAR APNE APNE MAHLAAT MEIN LE JAA SAKENGEY

Hazrat Hakeem bin Muawiyah Razi Allahu Anhu apne baap se riwayat karte hai k Nabi E Akram Sallallahu Alaihi Wa Sallam ne farmaya Jannat mein paani, shehad, doodh aur sharaab ki nehrey hai aur un nehro se (chooti) nehrey niklengi (jo jannatiyo k mahlaat mein jayengi). (Sunan Tirmizi Abwabul Jannah)


JANNAT KI EK NEHAR KA NAAM "NEHAR E HAYAAT" HAI JISKA PAANI JAHANNAM SE NIKALNE WALO PAR DALA JAYEGA TO WO DOBAARAH BEEJH KI TARAH "UGH" PADENGEY

Hazrat Abu Saeed Khudri Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Allah ta'ala apni rahmat se jis ko chaahega jannat mein dakhil farma dega aur aagh (fire) walo ko aagh mein dakhil farma dega phir (jannati muddat baad chahega) irshad farmayega "Dekho jis shaks k dil mein raayi barabar bhi emaan ho usko aagh se nikaal lo chunanchey wo loog us haal mein niklengey k unke jism koiley ki tarah jaley hue hongey tab wo nehar e hayaat ya nehar haya mein daale jayengey aur wo loog usi tarah ugh padengey (yaani bilkul sahi saalim ho jayengey) jis tarah beejh silaab mein (foran) ughta hai kabhi tumne dekha nahi wo beejh kesa zaro lipta hua ughta hai". (Sahih Muslim Kitabul Emaan)

JANNAT K PHAL

JANNAT K PHAL

Bismillhairrahmanirraheem

JANNAT K PHAL AHLE JANNAT K LIYE WAFIR MIQDAAR MEIN MOJOOD HONGEY
JANNAT MEIN HAR MOSAM KA PHAL HAR WAQT MAYASSAR HOGA
JANNAT K PHAL HASIL KARNE K LIYE KISI SE IJAZAT NAHI LENI PADEGI
JANNAT K PHALO KA ZAKHEERAH KABHI KHATAM NAHI HOGA
KAILA AUR BAIR JANNAT K PHAL HAI

"Aur daayi baazu wale, baayi baazu walo (ki khush naseebi) ka kya kehna wo be-khaar bairiyo aur ta ba ta kailo aur door tak phaili chaao aur har damm rawa rawa paani aur kabhi khatam na honey wale be rook took milne wale bakasrat phalo mein mazey karengey". (Surah Waqiyah Surah no. 56 Ayat no. 27-33)

"Jannat k phal sada bahaar aur uska saaya la-zawaal hoga ye inaam hai muttaqi loogo ka". (Surah Raad Surah no. 13 Ayat no. 35)


JANNAT MEIN HAR JANNATI K MAN-PASAND TAMAAM PHAL MOJOOD HONGEY

"Muttaqi loog (jannt mein) saayo aur chashmo mein hongey aur jo phal wo chahengey (unke liye hazir kiye jayengey aur kaha jayega) khao aur piyo mazey se un aamaal k badley mein jo tum karte rahey naik loogo ko hum aesi hi jaza dete hai". (Surah zumar Surah no.77 Ayat no. 41-44)


JANNAT K PHAL HAR WAQT JANNATIYO KI PAHUNCH MEIN HONGEY-KHADE, BAITHEY, CHALTE PHIRTE JAB CHAHENGEY TOOD SAKENGEY

"Jannat ki chaao un par jhuki hui saaye kar rahi hogi aur uske phal har waqt unki pahunch mein hongey". (Surah Dahar Surah no. 76 Ayat no. 14)


JANNAT KI KHAJOOR MATKEY K BARABAR HOGI JO DOODH SE ZIYAADA SAFAID, SHEHAD SE ZIYAADA MEETHI AUR MAKKHAN SE ZIYAADA NARAM HOGI

Hazrat Abdullah bin Abbas Razi Allahu Anhu farmate hai jannat k khajoor ka tana sabz zamrad ka hoga uski tehni se ahle jannat ki poshaak tayyar ki jayegi unke libaas aur jubbey bhi usi se banaaye jayenge, khajoor ka phal matkey ya dool k barabar hoga jo doodh se ziyaada safaid aur shehad se ziyaada meetha hoga, makkhan se ziyaada naram hoga usme sakhti bilkul nahi hogi. (Sharah Sunnah baab Sifatul Jannah wa ahliha)


JANNAT K PHAL KA EK KHOSHA ITNA BADA HAI K AGAR DUNYA MEIN AA JATA TO SAHABA E KIRAAM RAZI ALLAHU ANHUM KI JAMAAT QAYAMAT TAK USE KHATAM NA KAR SAKTI

Hazrat Abdullah bin Abbas Razi Allahu Anhu se namaz e kusoof ki hadees mein riwayat hai k Sahaba E Kiraam Razi Allahu Anhum ne Rasool E Akram Sallallahu Alaihi Wa Sallam se arz kiya "Ya Rasool Allah Sallallahu Alaihi Wa Sallam! humne aapko (doraan e namaz) dekha k aapne apni jagah par koi cheez li hai phir humne aapko dekha k Aap (wo cheez lene se) ruk gaye hai" Aap Sallallahu Alaihi Wa Sallam ne irshad farmaya "mene jannat dekhi aur uske ek khosha ko lena chaha, agar mein use tood leta to jab tak dunya rehti tum loog use khaate rehtey". (Sahih Muslim Kitabus Salatul Kusoof)


JANNAT K PHAL KA EK KHOSHA AGAR DUNYA MEIN AA JAYE TO ZAMEEN WA AASMAAN KI SAARI MAKHLOOQ K KHAANE PAR BHI KHATAM NA HO

Hazrat Jabir Razi Allahu Anhu kehte hai k Rasool Allah Sallallahu Alaihi Wa Sallam ne farmaya "Mere saamne jannat aur usme mojood saari naimatey laayi gayi phal, phool aur sar sabz wa shadabi mene tumhare liye angoor ka ek khosha lena chaha lekin rook diya gaya, agar mein wo khosha tumhare liye le aata to zameen aur aasmaan ki saari makhlooq use khatam karne k liye khaati (lekin khatam na kar paati)". (Nihaya li bin Kaseer 2: 367)

Wazahat: Jannat ki naimato k baare mein aesi hadees kam az kam musalmano k liye to bilkul ba'as e tajjub nahi hai jo apni aankho se guzishta 6 hazaar saal se musalsal zamzam k kuwey ko behta dekh rahe hai jis se saari dunya k ahle emaan saal bhar mustafeed hote rehte hai ramazaan ul mubarak aur hajj k doraan to har shaks khuli aankho se us "naimat" ka nazaara karta hai loog na sirf ji bhar ka use istemaal karte hai balkey apne apne shehro aur mulko ko wapas jaate hue bila rook took jitna chahte hai saath le jaat hai lekin na to paani mein kabhi kami aayi hai na khatam hua hai, aur qayamat tak ye paani yu hi istemaal hota rahega. SUBHANALLAHI WA BI HAMDIHI SUBHANALLAHIL AZEEM


KHAJOOR, ANAAR AUR ANGOOR JANNAT K PHAL HAI

"Dono baagho mein (har qism k) phal hai (khaas taur par) khajoor aur anaar k, phir ae jinn wa ins! tum apne rabb ki kis kis naimat ko jhutlaogey". (Surah Rahman Surah no. 55 Ayat no. 68-69)
[
"Beshak muttaqi loog hi (aakhirat mein) kaamyaab hongey jaha unke liye baagaat aur angoor hongey". (Surah Naba Surah no. 78 Ayat no. 32-33)


ANJEER JANNAT KA PHAL HAI
JANNAT K TAMAAM PHAL BAGAIR GUTHLI K HONGEY

Hazrat Abu Hurairah Razi Allahu Anhu se riwayat hai k Nabi E Akram Sallallahu Alaihi Wa Sallam ki khidmat mein anjeer ka ek thaal paish kiya gaya Aap Sallallahu Alaihi Wa Sallam ne irshad farmaya "khao" khud bhi us se anjeer khayi aur farmaya "agar mein kisi phal k baare mein kahu k ye jannat se nazil hua hai to yahi wo phal hai kyunki jannat k phal guthli k bagair hongey pas khao, anjeer bawaseer ko khatam karti hai aur gathiya k liye mufeed hai". (Tibb e Nabivi raqam rafa no. 318)


JANNATI JAB KISI DARAKHT SE PHAL TOODENGEY TO USKI JAGAH FAURAN NAYA PHAL LAG JAYEGA

Hazrat Sobaan Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jab koi aadmi jannat se phal toodega to uski jagah doosra phal lag jayega". (Majmua e Zawa'id 10:414)

JANNAT K DARAKHT

JANNAT K DARAKHT

Bismillahirrahmanirraheem

JANNAT MEIN HAR TARAH K PHAL-DAAR DARAKHT HONGEY LEKIN KHAJOOR, ANAAR AUR ANGOOR K DARAKHT BAKASRAT HONGEY

"Dono baagho mein (har qism k) phal hai (khaas taur par) khajoor aur anaar k, phir ae jinn wa ins! tum apne rabb ki kis kis naimat ko jhutlaogey". (Surah Rahman Surah no. 55 Ayat no. 68-69)

"Beshak muttaqi loog hi (aakhirat mein) kaamyaab hongey jaha unke liye baagaat aur angoor hongey". (Surah Naba Surah no. 78 Ayat no. 32-33)


JANNAT K DARAKHT KAANTO K BAGAIR HONGEY
KAILA AUR BAIRI JANNAT K DARAKHT HAI
JANNAT MEIN DARAKHTO K SAAYE BAHUT TAWEEL HONGEY

"Aur daahine haath wale, daahine haath walo ka kya kehna, be-kaante ki bairiyo mein hongey, kailey teh ba teh, lambey saaye, behta hua paani aur bakasrat phool". (Surah Waqiya Surah no. 56 Ayat no. 27-32)


JANNAT K DARAKHT IS QADAR SAR SABZ WA SHADAAB HONGEY K UNKI RANGAT SABZ SIYAAHI MAYIL HOGI
JANNAT K DARAKHT HAMESHA HAREY BHAREY RAHENGEY

"(Jannat k baagh) ghaney siyaahi maayil sar sabz hai, pas ae jinn wa ins! tum apne rabb ki kis kis naimat ka inkaar karogey". (Surah Rahman Surah no. 55 Ayat no. 64-65)


JANNAT K DARAKHTO KI SHAKHEY HARI BHARI LAMBI AUR GHANI HONGI

"Jannat k baagho (k darakhto) ki tehniyan lambi aur hari bhari hongi, pas ae jinn wa ins! tum apne rabb ki kin kin naimato ko jhutlaogey". (Surah Rahman Surah no. 55 Ayat no. 48-49)


JANNAT K EK DARAKHT KA SAAYA ITNA TAWEEL HOGA K GHOODA SAWAAR 100 BARAS TAK MUSALSAL CHALTA RAHEY TAB BHI SAAYA KHATAM NAHI HOGA

Hazrat Abu Hurairah Razi Allahu Anhu se riwayat hai k Nabi E Kareem Sallallahu Alaihi Wa Sallam ne farmaya "Jannat mein ek darakht hai jiske saaye mein ek (ghooda) sawaar 100 baras tak chalta rahey (tab bhi khatam na ho) agar (quran se samajhna) chaaho to (Surah Waqiya Ayat no. 30) (WA ZILLIM MAMDOODAH -  aur lamba saaya) padh lo jannat mein kisi shaks ki kamaan rakhne k barabar jagah (dunya ki) har us cheez se behtar hai jis par sooraj tuju ya guroob hota hai". (Sahih Bukhari Kitabul Bad ul Khalk)


JANNAT MEIN TAMAAM DARAKHTO K TANEY SOONEY K HONGEY

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jannat mein koi darakht aesa nahi jis ka tana sooney ka na ho". (Sunan Tirmizi Abwabus Sifatul Jannah)


BAAZ KHAJOORO KA TANA SABZ ZAMRAD KA HOGA AUR USKI TEHNIYO KI JADEY SURKH SOONEY KI HONGI

Hazrat Abdullah bin Abbas Razi Allahu Anhu farmate hai jannat k khajoor ka tana sabz zamrad ka hoga uski tehni se ahle jannat ki poshaak tayyar ki jayegi unke libaas aur jubbey bhi usi se banaaye jayenge, khajoor ka phal matkey ya dool k barabar hoga jo doodh se ziyaada safaid aur shehad se ziyaada meetha hoga, makkhan se ziyaada naram hoga usme sakhti bilkul nahi hogi. (Sharah Sunnah baab Sifatul Jannah wa ahliha)


JANNAT MEIN CHAAR BEHTAREEN DARAKHT LAGAANE WALI TASBEEH YE HAI

Hazrat Abu Hurairah Razi Allahu Anhu se riwayat hai k wo ek darakht laga rahe they k itne mein Rasool E Akram Sallallahu Alaihi Wa Sallam unke paas se guzey pucha "Ae Abu Hurairah Razi Allahu Anhu!" kis k liye darakht laga rahe ho? mene arz kiya "apne liye" Aap Sallallahu Alaihi Wa Sallam ne farmaya "Kya mein tujhey is se behtar darakht na batau?" Hazrat Abu Hurairah Razi Allahu Anhu ne arz kiya kyu nahi ya Rasool Allah Sallallahu Alaihi Wa Sallam! (zaroor bataiye) Aap Sallallahu Alaihi Wa Sallam ne farmaya "kaho SUBHAAN-ALLAHI (Allah paak hai) WAL HAMDU LILLAHI (tareef sirf Allah k liye hai) WA LAA ILAHA ILLALLAHU (aur Allah k siwa koi ila nahi) WALLAHU AKBAR (aur Allah sabse bada hai) ye kehne par har kalmey k badley tumhare liye jannat mein ek darakht lagaya jayega". (Sunan ibne Maja Kitabul Adab)


JANNAT MEIN KHAJOOR KA DARAKHT LAGAANE WALA KALMA DARJ E ZAIL HAI

Hazrat Jabir Razi Allahu Anhu kehte hai k Rasool Allah Sallallahu Alaihi Wa Sallam ne farmaya "Jisne kaha" SUBHAAN-ALLAHIL AZEEM WA BI HAMDIHI, (Azmat wala Allah apni hamd k saath paak hai) uske liye jannat mein khajoor ka ek darakht lagaya jata hai. (Sahih Jamey Tirmizi Hadees no. 2858)


TOOBA JANNAT KA DARAKHT HAI JISKA SAAYA 100 SAAAL KI MUSAFAT K BARABAR HAI
TOOBA DARAKHT K PHALO K KHOOSHO SE AHLE JANNAT K KAPDEY TAYYAR HONGEY

Hazrat Abu Saeed Khudri Razi Allahu Anhu kehte hai k Rasool Allah Sallallahu Alaihi Wa Sallam ne farmaya "Tooba jannat ka darakht hai jiska saaya 100 saal ki musafat k barabar hai, ahle jannat k kapdey usi k khooshey se tayyar kiye jayengey". (Silsila Ahadees E Saheeya Hadees no. 1958)


ZAITOON JANNAT KA DARAKHT HAI

Hazrat Raafey bin Umar Razi Allahu Anhu kehte hai Rasool Allah Sallallahu Alaihi Wa Sallam ne farmaya "ajwah (khajoor) aur chattaan (yaani muqaam e ibraheem) aur darakht (yaani zaitoon) jannat mein se hai". (Tehqeeq E Mustafa Abdul Qaadir, darul kutub ilmiyah, bairoot 4: 226)

JANNAT K BAZAAR

JANNAT KA BAZAAR

Bismillahirrahmanirraheem

JANNAT MEIN HAR JUMA K ROOZ BAZAAR LAGA KARENGEY
JUMA BAZAAR MEIN SHAREEK HONE WALE JANNATIYO KA HUSN PEHLE SE DUBAL HO JAYEGA
AURATEY JUMA BAZAAR MEIN SHAREEK NAHI HONGI ALLAH TA'ALA GHAR BAITHEY HI UNKE HUSN WA JAMAAL MEIN IZAAFA FARMA DEGA

Hazrat Anas bin Malik Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jannat mein ek bazaar hai jisme har juma k din jannati loog aya karengey shimaal ki taraf se ek hawa chalegi jiska gard o gubbar (mushk aur zaafraan par mushtamil hoga jab wo) jannatiyo k chehrey aur kapdo par padega to us se unke husn wa jamaal mein izaafa ho jayega jab wo palat kar apne ghar ayengey to unki beewiyo ka husn wa jamaal bhi pehle se ziyaada hoga, beewiya apne mardo se kahengi Allah! tumhara husn wa jamaal hamare baad to bahut badh gaya hai, jannati loog kahengey Allah! hamare baad tumhara husn wa jamaal bhi pehle se bahut badh gaya hai". (Sahih Muslim Kitabul Jannah was Sifaah)

JANNAT K KHAIMEY

JANNAT K KHAIMEY

Bismillahirrahmanirraheem

HAR JANNATI K MAHAL MEIN KHOOBSURAT KHAIMEY HONGEY JISME AHLE JANNAT KI HOOREY QAYAAM PAZEED HONGI

"Ahle jannat k liye khaimey mein hoorey thehraayi gayi hongi pas ae jinn wa ins! tum apne rabbb ki kis kis naimat ka inkaar karogey". (Surah Rahman Surah  no. 55 Ayat no. 72-73)


JANNAT KA HAR KHAIMA 60 MEEL CHOODEY KHOOBSURAT MOOTI KO ANDAR SE TARAASH KAR BANAYA GAYA HOGA
UN KHAIMO MEIN AHLE JANNAT KI BEEWIYA HONGI JO UNKI AAMAD KI HAR AAN MUNTAZIR HONGI

Abdullah bin Qais Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jannat mein mooti ka ek khooldaar khaima hoga jiski choodayi 60 meel hogi us khaimey k har kooney mein (momin ki) beewiya hongi jinhey doosre (mahal k) loog (doori aur wus'at ki wajah se) nahi dekh sakengey momin aadmi un (beewiyo) k darmiyaan chakkar lagata raheyga". (Sahih Muslim Kitabul Jannah was Sifaah)

JANNAT K MAHLAAT

JANNAT K MAHLAAT

Bismillahirrahmanirraheem

JANNAT K MAHLAAT HAR CHOOTI BADI GALAZAT AUR GANDAGI SE PAAK AUR SAAF HONGEY

"Momin mardo aur aurato se Allah ta'ala ne wada kar rakkha hai k wo unhey aese baagh dega jiske nichey nehrey behti hongi aur wo un mein hamesha rahengey un baagho mein unke liye pakeeza qayaam-gaahey hongi aur sab se badh kar ye k unhey Allah ta'ala ki khushnudi hasil hogi yahi badi kaamyabi hai". (Surah Touba Surah no. 9 Ayat no. 72)


JANNAT K MAHLAAT MEIN TAMAAM BARTAN SOONEY AUR CHAANDI K HONGEY
JANNATIYO K MAHLAAT MEIN HAR WAQT AUOR JALTI RAHEGI JISKI KHUSHBU SE UNKE MAHLAAT MUATTAR RAHENGEY
JANNATIYO K PASEENE SE MUSHK KI KHUSHBU AAYEGI
JANNAT MEIN THOOK, NAAK AUR RAFEY-HAAJAT WAGAIRAH NAHI HONGEY
TAMAAM JANNATI BAAHAM WA SHAIR O SHUKR HONGEY KISI K DIL MEIN DOOSRE K KHILAAF KOI HASAD YA BUGAZ NAHI HOGA
AHLE JANNAT HAR SAANS K SAATH ALLAH KI HAMD AUR TASBEEH KAREGEY

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jannat mein sabse pehle (mardo aur aurato ka) jo garooh dakhil hoga unke chehrey choodvi raat k chand ki tarah (roshan) hongey unhey thook nahi ayega na naak aur rafey-haajat ki zaroorat mehsoos karengey unke bartan sooney k hongey kanghiya (tak) sooney aur chaandi ki hongi, angeethiyo se auos ki khusbu nikal rahi hogi, jannatiyo k paseene se mushk ki khushbu ayegi, har jannati k paas do beewiya aesi hongi jinke husn ki wajah se unki pindali ka gooda goosht k andar se dikhayi dega jannati loogo mein baahami ikhtalaaf nahi hongey na hi bugz hoga, balkey yak jaan hongey subah wa shaam Allah ki tasbeeh karte rahengey". (Sahih Bukhari Kitabul Bad ul Khalq)


JANNAT K MAHLAAT SOONEY AUR CHAANDI KI EENTO SE BANE HONGEY
JANNAT K SANGREEZEY MOOTI AUR YAQOOT K HAI AUR MITTI ZAAFRAAN KI HAI
JANNAT MEIN MAUT NAHI AYEGI JANNATI HAMESHA HAMESHA ZINDA RAHEGA
JANNAT MEIN BUDHAPA NAHI AYEGA BALKEY WO HAMESHA JAWAAN RAHENGEY

Hazrat Abu Hurairah Razi Allahu Anhu se riwayat hai k mene arz kiya "Ya Rasool Allah Sallallahu Alaihi Wa Sallam makhlooq kis cheez se paida ki gayi hai?" Aap Sallallahu Alaihi Wa Sallam ne irshad farmaya "paaki se" mene arz kiya "jannat kis cheez se bani hai?" Aap Sallallahu Alaihi Wa Sallam ne irshad farmaya "uski ek eent chandi ki hai ek sooney ki, uska seement taiz khushbu wala mushk hai, uske sangreezey moti aur yaqoot k hai uski mitti zaafraan hai, jo shaks usme dakhil hoga wo aish karega kabhi takleef nahi dekhega, hamesha zinda rahega kabhi nahi marega, jannatiyo k kapde kabhi puraane nahi hongey aur unki jawaani kabhi fana nahi hogi". (Sunan Tirmizi Abwabus Sifatul Jannah)


JANNATUL ADN KO ALLAH TA'ALA NE APNE HAATH SE TAAMEER FARMAYA
JANNATUL ADN K MAHLAAT KI EK EENT SAFAID MOTI KI EK EENT SURKH YAQOOT KI EK EENT SABZ ZAMRAD KI HAI USKI MITTI MISK KI HAI USKE SANGREEZEY LO LO K AUR USKI GHAAS ZAAFRAAN KI HAI

Hazrat Anas Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jannatul adn ko Allah ta'ala ne apne haath se taameer farmaya hai jiski ek eent safaid moti ki ek surkh yaqoot ki ek sabz zamrad ki hai, uski mitti misk ki hai uske sangreezey se lo lo k hai uska ghaas zaafraan ka hai (jannat ki tameer k baad) Allah ta'ala ne jannat se irshad farmaya "Kuch keh" jannat ne kaha "falah paa gaye emaandaar loog" phir Allah azz wa jall ne irshad farmaya "Mere jalaal aur izzat ki qasam! koi bakheel tujh mein dakhil nahi ho sakega" phir Rasool Allah Sallallahu Alaihi Wa Sallam ne ye aayat tilawat farmayi "Jo loog nafs ki bakheeli se bacha liye gaye wo falah paa gaye". (An Nihaaya li bin Kaseer Hadees no. 352)


BAAZ MAHLAAT MEIN SOONEY K BAAGAAT HONGEY JISKI HAR CHEEZ SOONEY KI HONGI BAAZ MAHLAAT MEIN CHAANDI K BAAGH HONGEY JINKI HAR CHEEZ CHANDI KI HOGI

Hazrat Abdullah bin Qais Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "(Jannat mein jannatiyo k liye) do baagh chandi k hongey uske bartan aur har cheez chandi ki hogi aur do baagh sooney k hongey (yaani) uske bartan aur har cheez sooney ki hongi loogo k liye jannatul adn (jannat ka naam hai) mein apne rabb ko dekhne mein koi cheez rukawat na banegi siwaye uski kibriyaai ki chadar k jo uske chehrey mubarak par hogi". (Sahih Muslim Kitabul Emaan)


JANNAT K MAHLAAT MEIN BADE BADE GUMBAD KHOOBSURAT SAFAID MOTIYO SE TAMEER KIYE GAYE HAI

Hazrat Anas bin Malik Razi Allahu Anhu se meraaj ki hadees mein riwayat hai k Rasool Allah Sallallahu Alaihi Wa Sallam ne farmaya "Phir mujhey jannat mein le jaya gaya jis mein gumbad safaid mootiyo k baney hue hai aur uski mitti misk ki hai". (Sahih Muslim Kitabul Emaan)

JANNAT K DARJAAT

JANNAT K DARJAAT

Bismillahirrahmanirraheem

JANNAT K BULAND WA BAALA MAHLAAL JANNATIYO K DARJAAT K AETABAAR SE UPER NICHEY BANE HUE HAI

"Jo loog apne rabb se darr kar rehe unke liye buland imaratey hai (darja ba darja) manzil ba manzil bani hui hai jinke nichey nehrey beh rahi hai ye Allah ta'ala ka wada hai aur Allah ta'ala apne wadah ki kabhi khilaaf warzi nahi karta". (Surah Zumar Surah no. 39 Ayat no. 20)


JANNAT KA AALA TAREEN DARJA "WASEELA" HAI JIS PAR HAMARE PIYAARE RASOOL E AKRAM SALLALLAHU ALAIHI WA SALLAM RONAQ AFROOZ HONGEY

Hazrat Abu Hurairah Razi Allahu Anhu se riwayat hai k Rasool E Akram Sallallahu Alaihi Wa Sallam ne farmaya "Jab tum mujh par darood bhejo to mere liye Allah ta'ala se "Waseela" ki dua karo, Sahaba E Kiraam Razi Allahu Anhum ne arz kiya "Ya Rasool Allah Sallallahu Alaihi Wa Sallam! waseela kya hai?" Aap Sallallahu Alaihi Wa Sallam ne irshad farmaya "Jannat mein aala tareen darja jo sirf ek aadmi ko hasil hoga aur mein ummeed karta hu k wo mein hi hu". (Musnad Ahmad Hadees no. 7588)


JANNAT K 100 DARJAAT HAI HAR DARJA MEIN ITNA FARQ HAI JITNA ZAMEEN WA AASMAAN K DARMIYAAN HAI
JANNAT KI SABSE UPER WALE DARJA KA NAAM FIRDAUS HAI JIS SE JANNAT KI CHAAR NEHREY JAARI HOTI HAI
HAR MOMIN KO ALLAH TA'ALA SE JANNAT KA SABSE UPER WALA DARJA "FIRDAUS" MAANGNA CHAHIYE
FIRDAUS K UPER ALLAH TA'ALA KA ARSH HAI

Hazrat Ubada bin Saamit Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jannat mein 100 darjey hai har 2 darjo k darmiyaan zameen o aasmaan k barabar faasla hai sab se aalaa tareen darjey ka naam firdoos hai firdoos se jannat ki chaaro nehrey (meehaan, jeehaan, faraat aur nail) jaari hoti hai firdoos k uper Allah ta'ala ka arsh hai jab bhi Allah ta'ala se (jannat ka) sawaal karo to firdoos ka sawaal karo". (Sunan Tirmizi Abwabul Jannah)


NICHEY DARJA K MAHLAAT WALE JANNATI UPER WALE DARJAAT K MAHLAAT KO DEKH KAR YUH MEHSOOS KARENGEY JESE DOOR KOI CHAMAKTA HUA SITAARA NAZAR AA RAHA HAI

Hazrat Abu Saeed Khudri Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jannati loog apne se uper wale mahlaat k jannatiyo ko dekhengey (to aesa mehsoos karengey) jesa k door aasman k mashriqi ya magribi kinaarey par koi tara chamak raha hai itna faasala jannatiyo k ba'hami darjaat k farq ki wajah se hoga" Sahaba E Kiraam Razi Allahu Anhum ne arz kiya "Ya Rasool Allah Sallallahu Alaihi Wa Sallam! us buland muqaam par ambiya k alawa aur kaun pahuncheyga?" Aap Sallallahu Alaihi Wa Sallam ne irshad farmaya "Kyu nahi (pahunchega) qasam us zaat ki jiske haath mein meri jaan hai wo loog un darjaat mein hongey jo Allah par emaan laaye aur Rasoolo ki tasdeeq ki". (Sahih Muslim Kitabul Jannah was Sifaah)


JANNAT K 100 DARJEY HAI HAR DO DARJO K DARMIYAAN 100 SAAL KI MUSAFAT KA FARQ HAI

Hazrat Abu Hurairah Razi Allahu Anahu kehte hai Rasool Allah Sallallahu Alaihi Wa Sallam ne farmaya "Jannat mein 100 darjey hai har do darjo k darmiyaan 100 saal (ki musafat) ka farq hai". (Sunan Tirmizi Abwabul Jannah)


ALLAH K LIYE EK DOOSRE SE MUHABBAT KARNE WALO K GHAR MASHRIQ YA MAGRIB SE TULU HONEY WALE CHAMAKDAAR SITAARO KI TARAH NAZAR AAYENGEY

Hazrat Abu Saeed Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Allah k liye ek doosre se muhabbat karne walo k ghar jannat mein tumhey is tarah nazar aayengey jese mashriq ya magrib se tulu hone wala sitaara! loog puchengey ye kaun hai? unhey bataya jayega ye Allah k liye ek doosre se muhabbat karne wale loog hai". (Musnad Ahmad Kitabul Ahle Jannah)


"SAABIQOON" K LIYE SOONEY K DO BAAGH "ASHABUL YAMEEN" K LIYE CHANDI K DO BAAGH HONGEY

Hazrat Abu Bakr bin Musa (Ash'ari) apne baap se riwayat karte hai k Rasool Allah Sallallahu Alaihi Wa Sallam ne farmaya "Saabiqoon k liye sooney k do baagh aur ashabul yameen k liye chaandi k do baagh". (An Nihaya Li bin Kaseer Hadees no. 346)

Wazahat: "Saabiqoon" se muraad emaan laane mein pehal karne wale aur ashabul yameen se muraad tamaam naik-o-kaar loog hai, "Saabiqoon" ashabul yameen se afzal hai. (Wallahu Aalam bis Sawaab)

JANNAT K DARWAAZEY

JANNAT K DARWAAZEY

Bismillahirrahmanirraheem

AHLE JANNAT KI AAMAD PAR FARISHTEY JANNAT K DARWAAZEY KHOLENGEY
DARWAAZO SE DAKHIL HOTE WAQT FARISHTE AHLE JANNAT K LIYE SALAMATI KI DUA KARENGEY

"Muttaqi loogo ko giroh dar giroh jannat ki taraf le jaya jayega yaha tak k jab wo waha pahunchengey to jannat k darwaazey khool diye ja chukey hongey jannat k khadim (farishte) unse kahengey "Salaal ho tum par bahut acchey rahey dakhil ho jao is jannat mein hamesha hamesha k liye". (Surah Zumar Surah no. 39 Ayat no. 73)


SABSE PEHLE JANNAT KA DARWAAZAH RASOOL E AKRAM SALLALLAHU ALAIHI WA SALLAM K LIYE KHOOLA JAYEGA

Hazrat Anas bin Malik Razi Allahu Anhu kehte hai Rasool Allah Sallallahu Alaihi Wa Sallam ne irshad farmaya "Qayamat k rooz mein (sabse pehle) jannat k darwaazzey par aayunga aur darwaaza khulwaunga jannat ka khazin (darwaaza khatkhatane par) poochega kaun hai?" mein jawab dunga "Muhammad (Sallallahu Alaihi Wa Sallam)!" khazin kahega "Mujhe isi baat ka hukm diya gaya tha k aapse pehle kisi k liye darwaaza na khoolu". (Sahih Muslim Kitabul Emaan)

Hazrat Anas bin Malik Razi Allahu Anhu kehte hai Rasool E Akram Sallallahu Alaihi Wa Sallam ne farmaya "Qayamat k rooz sabse ziyadah ummati mere hongey aur sabse pehle mein jannat ka darwaaza khatkhataunga". (Sahih Muslim Kitabul Emaan)


JANNAT K 8 DARWAAZEY HAI

Hazrat Sahal bin Saaad Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jannat mein 8 darwaazey hai jinmein se ek ka naam "Rayyaan" hai jisme se sirf roozadaar hi dakhil hongey". (Sahih Bukhari Kitabul Bad ul Khalq)


JANNAT K BAAZ DOOSRE DARWAAZO K NAAM YE HAI BABUS SALAAT, BABUL JIHAAD, BABUS SADQA

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jis shaks ne Allah ki raah mein jooda kharch kiya (masalan do ghoode do talwaare wagairah) use jannat mein yu keh kar bulaya jayega Ae Allah k bandey! ye hai behtar sila (tumhare infaaq ka) jo ahle salah se hoga use babus salaat se pukara jayega jo ahle jihaad mein se hoga wo baabul jihaad se pukara jayega jo ahle sadqa se hoga wo babus sadqa se pukara jayega jo ahle siyaam se hoga wo babur rayyaan se pukara jayega" Hazrat Abu Bakr Siddequi Razi Allahu Anhu ne arz kiya Ae Allah k Nabi Sallallahu Alaihi Wa Sallam! aese shaks ko to koi khasarah nahi hoga jo sab darwaazo se pukara jayega aur koi aesa shaks bhi hai jo un sab darwaazo se bulaya jayega?" Aap Sallallahu Alaihi Wa Sallam ne irshad farmaya "Han" aur mujhey ummeed hai k tum unhi mein se hongey". (Sunan Nasayi Kitabul Jihaad)


JANNAT K EK DARWAAZEY KI CHOODAYI TAQREEBAN 1200, 1300 KILOMETER K BARABAR HAI
BILA HISAAB KITAB JANNAT MEIN JAANE WALE KHUSHNASEEB LOOG JIS DARWAAZEY SE DAKHIL HONGE US KA NAAM "BABUL YAMAN" HAI

Hazrat Abu Hurairah Razi Allahu Anhu se hadees shifa'at mein riwayat hai k (Rasool E Akram Sallallahu Alaihi Wa Sallam ki shifarish k baad) Allah ta'ala irshad farmayega "Ae Muhammad (Sallallahu Alaihi Wa Sallam)! apni ummat k un loogo ko baabul yaman se jannat mein dakhil karo jis par koi hisaab kitab nahi hai aur wo jannat k doosre darwaazo mein se dakhil hone wale loogo k saath shareek hai (yaani agar kisi doosre darwaazo mein se dakhil hona chahey to ho sakte hai) Qasam hai us zaat ki jiske haath mein Muhammad (Sallallahu Alaihi Wa Sallam) ki jaan hai jannat ki chokhat k darmiyaan itna fasala hai jitna makka aur hajr (bahreen k ek shehar ka naam hai) darmiyaan hai ya jitna makka aur busra (shaam k ek shehar ka naam hai) k darmiyaan hai". (Sahih Muslim Kitabul Emaan)

Wazahat: Yaad rahey k makka aur hajr ka darmiyaani fasala 1160 kilometer aur makka wa busra ka darmiyaani fasala 1250 kilometer hai.


BILA HISAAB KITAB JANNAT MEIN JAANE WALE 70 HAZAAR IFRAAD BAIK WAQT BABUL YAMAN SE DAKHIL HONGEY KOI AAGEY YA PICHEY NAHI HOGA

Hazrat Sahal bin Saad Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Meri ummat k 70 hazaar ifraad ya 7 lakh (hadees k raavi) abu hazam ko yaad nahi raha k 70 hazaar ya 7 lakh ifraad is tarah jannat mein dwakhil hongey k ek doosre ka haath pakdey hue hongey unme se koi bhi us waqt tak jannat mein dakhil nahi hoga jab tak aakhiri aadmi dakhil na ho jaye (yaani saare baik waqt dakhil hongey) un jannatiyo k chehre choodhvi raat k chand ki tarah chamak rahe hongey". (Sahih Muslim Kitabul Emaan)

Wazahat: Muslim Shareef ki doosri hadees se 70 hazaar ki tadaad sabit hai. (Wallahu Aalam bis Sawaab)


ACCHI TARAH WUZU KARNE K BAAD KALMA E SHAHADAT PADHNE WALA SHAKS JANNAT MEIN AATHO (8) DARWAAZO MEIN SE JIS SE CHAAHEGA DAKHIL HO SAKEGA

Hazrat Umar bin Khattab Razi Allahu Anhu kehte hai Rasool E Akram Sallallahu Alaihi Wa Sallam ne farmaya "Tum mein se jo shaks acchi tarah poora wuzu kare phir kahe "ASH'HADU ALLA ILAHA ILLALLAHU WA ANNA MUHAMMADAN ABDUHU WA RASOOLUHU (yaani mein gawahi deta hu k Allah k siwa koi mabood nahi aur Muhammad Sallallahu Alaihi Wa Sallam Allah k bandey aur uske rasool hai)" uske liye jannat k aatho (8) darwaazey khool diye jaate hai jis se chaahey dakhil ho". (Sahih Muslim Kitabut Taharah)


PAANCH NAMAZO KI PABANDI KANRE WALI, RAMAZAAN K ROOZEY RAKHNE WALI, PAAKDAMAN AUR APNE SHOHAR KI ITA'AT GUZAAR KHATOON JANNAT K AATHO (8) DARWAAZO MEIN SE JIS SE CHAAHEGI DAKHIL HO SAKEGI

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jo aurat paanch namazey ada kare, ramazaan k roozey rakkhey, apni sharmgaah ki hifazat kare aur apne shohar ki farmabardaari kare use (qayamat k rooz) kaha jayega jannat k (aatho) darwaazo mein se jis se chaaho dakhil ho jao". (Sahih Jamey Sageer Hadees no. 683)


TEEN NABAALIG BACCHO K FAUT HONE PAR SABR KARNE WALA SHAKS JANNAT K AATHO DARWAAZO MEIN SE JIS SE CHAAHEGA DAKHIL HO SAKEGA

Hazrat Anas bin Malik Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jis musalman k teen nabaalig bacchey faut ho gaye (aur usne sabr kiya) to wo bacche use jannat k aatho darwaazo par milengey wo jis darwaazey se chaahega dakhil ho jayega". (Sunan Ibne Maja Kitabul Janaiz)


PEER (MONDAY) AUR JUMA-RAAT (THURSDAY) K ROOZ JANNAT K DARWAAZEY KHOOLEY JATE HAI

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jannat k darwaazey peer aur juma-raat ko khool diye jaate hai aur har us shaks ko bakhs diya jata hai jo Allah se shirk na karta ho siwaye us aadmi k jo kisi doosre bhai k saath keena rakhta ho (un dono k baare mein farishto se) kaha jata hai un dono aadmiyo ka intazaar karo yaha tak k ye dono aapas mein mil jaye un dono ka intazaar karo hatta k aapas mein mil jaye". (Sahih Muslim Baab Shahna)


RAMAZAAN SHAREEF K POOREY MAHEENEY MEIN JANNAT K AATHO (8) DARWAAZEY KHULEY REHTE HAI

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jab ramazaan aata hai to aasman k darwaazey khool diye jaate hai, jahannam k darwaazey band kar diye jaate hai aur shayateen jakad diye jaate hai". (Al loo loo wal Marjaan Hadees no. 652)

JANNAT KI WUS'AT

JANNAT KI WUS'AT

Bismillahirrahmanirraheem

JANNAT KI KAM SE KAM WUS'AT KA TASAWWUR ZAMEEN AUR TAMAAM AASMAANO KI WUS'AT K BARABAR HAI LEKIN ZIYAADAH SE ZIYAADAH WUS'AT KI KOI HADD NAHI

"Doodho (bhaago) apne rabb ki magfirat ki taraf aur us jannat ki taraf jiski (sirf) chodaayi aasmaano aur zameen (ki wus'at) jesi hai wo jannat muttaqi loogo k liye tayyar ki gayi hai". (Surah Ale Imran Surah no. 3 Ayat no. 133)

"Ahle jannat ki aankho ko thandak pahunchane k liye jo kuch unse chipa kar rakkha gaya hai use koi nahi jaanta ye badla hai un aamaal ka jo wo (dunya mein) karte rahey". (Surah Sajdah Surah no. 32 Ayat no. 17)


JANNAT KO DEKHNE K BAAD HI SAHIH TAUR PAR ANDAAZA HOGA K JANNAT KITNI BADI HAI AUR USKI NAIMATEY KITNI AZEEM HAI

"Aur jab tum jannat ko dekhogey to har taraf naimatey hi naimatey aur ek badi saltanat ka saro samaan tumhey nazar aayega". (Surah Dahar Surah no. 76 Ayat no. 20)


JANNAT K 100 DARJAAT HAI HAR DARJAH K DARMIYAAN ITNA FARQ HAI JITNA ZAMEEN O AASMAAN K DARMIYAAN FAASALA HAI

Hazrat Ubada bin Saamit Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jannat mein 100 darjey hai har 2 darjo k darmiyaan zameen o aasmaan k barabar faasla hai sab se aalaa tareen darjey ka naam firdoos hai firdoos se jannat ki chaaro nehrey (meehaan, jeehaan, faraat aur nail) jaari hoti hai firdoos k uper Allah ta'ala ka arsh hai jab bhi Allah ta'ala se (jannat ka) sawaal karo to firdoos ka sawaal karo". (Sunan Tirmizi Abwabul Jannah)


JANNAT MEIN EK DARAKHT KA SAAYA ITNA LAMBA HOGA K GHOODA SAWAAR 100 BARAS TAK MUSALSAL USKE SAAYE MEIN SAFAR KARTA RAHE TAB BHI KHATAM NAHI HOGA

Hazrat Abu Hurairah Razi Allahu Anhu se riwayat hai k Nabi E Kareem Sallallahu Alaihi Wa Sallam ne farmaya "Jannat mein ek darakht hai jiske saaye mein ek (ghooda) sawaar 100 baras tak chalta rahey (tab bhi khatam na ho) agar (quran se samajhna) chaaho to (Surah Waqiya Ayat no. 30) (WA ZILLIM MAMDOODAH -  aur lamba saaya) padh lo jannat mein kisi shaks ki kamaan rakhne k barabar jagah (dunya ki) har us cheez se behtar hai jis par sooraj tuju ya guroob hota hai". (Sahih Bukhari Kitabul Bad ul Khalk)


SABSE AAKHIR MEIN JANNAT MEIN DAAKHIL HONE WALEY JANNATI KO IS DUNYA SE 10 GUNAAH WASEE MAMLAKAT ATA KI JAYEGI

Hazrat Abdullah (bin Masood) Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jahannam se sabse aakhir mein nikalne wale aadmi ko mein pehchaanta hu wo shaks kohlu k ball gisat'ta hua jayega to dekhega k sab loogo ne apni apni jagah par qabza jama rakkha hai (aur uske liye koi jagah baaqi nahi) us se pucha jayega tumhe wo waqt yaad hai jab tum jahannam mein they? arz karega han yaad hai chunanchey us se kaha jayega khawahish karo (kitni jagah jannat mein chahiye?) chunanchey wo khawahish karega phir use kaha jayega tere liye teri khawahish k mutabiq jannat mein jagah hai aur 10 dunyaao k barabar mazeed bhi tumhare liye jagah hai wo shaks arz karega (ya Allah!) tu baadshah ho kar mere saath mazaaq karta hai (jannat mein to mamooli si jagah bhi baaqi nahi rahi) Hazrat Abdullah bin Masood Razi Allahu Anhu kehte hai (k ye irshad farmane k baad) Rasool E Akram Sallallahu Alaihi Wa Sallam itna hansey k Aap Sallallahu Alaihi Wa Sallam ki dadhi nazar aaney lagi - ek doosri riwayat mein hai k "Allah ta'ala (us aadmi k jawab mein) farmayengey mein tujhse mazaaq nahi kar raha balkey mein jo kaam karna chahta hu us par poori tarah qaadir hu". (Sahih Muslim Kitabul Emaan)

Wazahat: Rasool E Akram Sallallahu Alaihi Wa Sallam ko bandey k jawab par hansi is wajah se aayi k bandey ka Allah ta'ala ki qudrat k baare mein gumaan kis qadar nafiz hai k wo Allah ta'ala k farmaan ko namumkin samajh kar mazaaq keh raha hai.


AAKHIRI AADMI KO IS DUNYA SE 10 GUNAAH ZAYADAH JAGAH ATA KARNE K BAWAJOOD JANNAT MEIN JAGAH BACH JAYEGI JISE PUR KARNE K LIYE ALLAH TA'ALA NAYI MAKHLOOQ PAIDA FARMAYEGA

Hazrat Anas Razi Allahu Anhu kehte hai Rasool Allah Sallallahu Alahi Wa Sallam ne farmaya "Jannat mein jitni jagah Allah chahega khali reh jayegi phir Allah ta'ala uske liye doosri makhlooq paida farmayega". (Sahih Muslim Kitabul Jannah wa Sifaah)