KISI MUTTAEEN SHAKS K BAARE MEIN JANNATI HOONE KA HUKM LAGAANA JAYEZ NAHI

KISI MUTTAEEN SHAKS K BAARE MEIN JANNATI HOONE KA HUKM LAGAANA JAYEZ NAHI

Bismillahirrahmanirraheem

KISI SHAKS K BAARE MEIN QATAE JANNATI KA HUKM LAGAANA JAYEZ NAHI
KISI SHAKS K QATAE JANNATI YA JAHANNAMI HOONE KA ILM SIRF ALLAH TA'ALA KO HAI

Hazrat Ummey Ala'e Ansaariya Razi Allahu Anha Nabi E Akram Sallallahu Alaihi Wa Sallam ki bait karne wali khawateen mein se thi, kehti hai k qura daal kar muhajireen ko ansaar mein taqseem kiya gaya to hamare hisse mein Hazrat Usman bin Maz'oon Razi Allahu Anhu aaye humne unhey apne ghar mein thehraaya phir wo us bimaari mein mubtala hue jis mein faut hue, faut hoone k baad unhe gusal diya gaya kafan pehnaaya gaya Rasool E Akram Sallallahu Alaihi Wa Sallam tashreef laye to mene kaha ae Abu Saa'ib  (Hazrat Usman bin Maz'oon Razi Allahu Anhu ki kunniyat) tujh par Allah ki rehman hai mein tere haqq mein gawaahi deti hu k Allah ne tujhe izzat bakhshi, Rasool E Akram Sallallahu Alaihi Wa Sallam ne farmaya "(Ummey Ala'e) tujhe kese maloom hua Allah ne use izzat di hai?" mene arz kiya "Ya Rasool Allah Sallallahu Alaihi Wa Sallam! mere maap baap aap par qurbaan phir Allah ta'ala kisko izzat dega" Aapne irshad farmaya "Beshak usman ko maut aa gayi aur Allah ki qasam mein bhi uske liye (Allah se) khair aur bhalaayi ki ummeed rakhta hu leikn Allah ki qasam mein nahi jaanta k (qayamat k rooz) mera kya haal hoga halankey mein Allah ka Rasool hu" Hazrat Ala'e Razi Allahu Anha kehti hai Allah ki qasam uske baad mene kabhi kisi ko (gunaah se) paak nahi kaha".  (Sahih Bukhari Kitabul Jana'iz)

Wazahat: 1. Jin Sahaba E Kiraam Razi Allahu Anhum k naam le kar Aap Sallallahu Alaihi Wa Sallam ne jannat ki basharat di hai unhey jannati kehna jayez hai.
2. Apne baare mein Rasool Allah Sallallahu Alaihi Wa Sallam ne jo baat irshad farmayi wo Allah ta'ala ki azmat kibriyaai aur jalaal k paish e nazar farmayi jiska izhaar doosri hadees mein yuh farmaya k "Koi shaks apne aamaal se jannat mein nahi jayega" arz kiya gaya "Ya Rasool Allah Sallallahu Alaihi Wa Sallam! kya aap bhi?" farmaya "Han" mein bhi, illa ye k mera rabb apni rahmat se mujhe dhaanp le. (Sahih Muslim)
3. Yaad rahe Hazrat Usman bin Maz'oon Razi Allahu Anhu ko do dafa hijrat e habsha ki sa'aadat hasil hui aur teesri dafa madeena munawwarah ki hijrat ka sharf paaya, aapki wafaat k baad Rasool Allah Sallallahu Alaihi Wa Sallam ne teen martaba paishani par boosa diya aur farmaya "Tum dunya se is tarah rukhsat hue k tumhara daaman zarra barabar dunya se aalooda na hoone paya uske ba'wajood Aap Sallallahu Alaihi Wa Sallam ne unke qatae jannati hoone ka hukm lagaane wali khatoon ko took diya".


SAHABA E KIRAAM RAZI ALLAHU ANHUM NE MAIDAAN E JANG MEIN QATAL HOONE WALE EK SHAKS KO JANNATI SAMJHA AAP SALLALLAHU ALAIHI WA SALLAM NE FARMAYA "HARGIZ NAHI WO JAHANNAM MEIN HAI"

Hazrat Umar bin Khattab Razi Allahu Anhu kehte hai Rasool E Akram Sallallahu Alaihi Wa Sallam ki khidmat mein arz kiya gaya k falah shaks shaheed ho gaya (aur jannat mein hai) Aap Sallallahu Alaihi Wa Sallam ne irshad farmaya "Hargiz nahi mene use maal e ganeemat ki ek chaadar choori karne k gunah mein jahannam mein dekha hai". (Sunan Tirmizi Abwabus Sabr)


KISI ZINDAH YA FAUT SHUDAH AADMI KO KHAWAH WO BA-ZAAHIR KITNA BADA MUTTAQI, AALIM, WALI, PEER, FAQEER AUR DARVAISH HI KYU NA HO, QATAE JANNATI SAMAJHANA JAYEZ NAHI

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Ek aadmi muddat tak jannatiyo k se kaam karta rehta hai phir uska khatima jahannamiyo wale kaam par hota hai aur ek muddat tak jahannamiyo wale kaam karta rehta hai phir uska khatima jannatiyo wale kaam par hota hai". (Sahih Muslim Kitabul Qadr)

Hazrat Sahal bin Saad Saadi Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Ek aadmi loogo ki nazar mein jannatiyo wale kaam karta hai aur wo jahannami hota hai aur ek aadmi loogo ki nazar mein jahannamiyo wale kaam karta hai jabke wo jannati hota hai". (Sahih Muslim Kitabul Qadr)

Wazahat: Wese to auliya Allah ki qabro aur mazaaro par nazrey niyaaze dena chadaavey chadhana shirk e akbar hai hi lekin mazkoorah ahadees ki rooshni mein ek la haasil, bekaar be-faida amal hai is liye k kisi bhi faut shudah aadmi k baare mein Allah k siwa kisi ko ilm nahi k qabr mein wo aaraam ki neend soo raha hai ya Allah k azaab mein giraftaar hai.