QURAN SAMAJHNE K LIYE SUNNAT KI ZARURAT

QURAN SAMAJHNE K LIYE SUNNAT KI ZARURAT

Bismillahirrahamanirraheem

SUNNAT (HADEES) K BAGAIR QURAN MAJEED SE TAMAAM SHARI MASA'IL MALOOM KARNA MUMKIN NAHI
SUNNAT MEIN BAYAN KIYE GAYE AHKAMAAT, QURAN MAJEED K AHKAMAAT KI TARAH WAJIBUL ITTEBA HAI

Hazrat Miqdaam bin Maadi Karb Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Loogo, yaad rakkho! quran hi ki tarah ek aur cheez (Yaani Hadees) mujhe Allah ki taraf se di gayi hai, khabardaar! ek waqt ayega k ek pait bhara (yaani takabbur shaks) apni musnad par takiya lagaye baitha hoga aur kahega loogo! tumhare liye ye quran hi kaafi hai is mein jo cheez halaal hai bas wahi halaal hai aur jo cheez haraam hai bas wahi haraam hai, halankey jo kuch Allah k Rasool Sallallahu Alaihi Wa Sallam ne haraam kiya hai wo aese hi haraam hai jese Allah ne haraam kiya hai, suno! gharelu gadha bhi tumhare liye halaal nahi (halankey quran mein uski hurmat ka zikr nahi) na hi wo darindey jinki kuchliya (yaani now kiye (teekhey) daant jinse wo shikaar karte hai) hai, na hi kisi zimmey ki giri padi cheez kisi k liye halaal hai, han albatta agar uske maalik ko uski zarurat hi na ho to phir jayez hai". (Sahih Sunan Abu Dawood juzz e Saani Hadees no. 3848)

Hazrat Abu Raafee Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya: "(loogo!) mein tum mein se kisi ko is haal mein na pau k wo apni musnad par takiya lagaye baitha ho uske paas mere un ahkamaat mein se jinka mene hukm diya, ya jinse mene mana kiya hai, koi hukm aye aur wo yuh kahe mein to (Aap Sallallahu Alaihi Wa Sallam k is hukm ko) nahi jaanta, humne jo kitabullah mein paya usi par amal kar liya (yaani hamare liye wahi kaafi hai)". (Sahih Sunan Abu Dawood Juzz e Saani Hadees no. 3849)

QURAN E MAJEED KO SUNNAT K ZARIYE HI SAMJHA JA SAKTA HAI, CHAND MISAALEY DARJ E ZAIL HAI

1. Hazrat Huzaifah Razi Allahu Anhu kehte hai k Rasool Allah Sallallahu Alaihi Wa Sallam ne irshad farmaya: "Diyanat-daari aasamano se loogo k dilo mein utri hai (yaani insan ki fitrat mein shamil hai) aur quran bhi (aasman se) nazil hua hai jise loogo ne padha aur sunnat k zariye samjha". (Sahih Bukhari Kitabul Aetasaam bil Kitabis Sunnah)

2. Hazrat Yaala bin Ummayah Razi Allahu Anhu kehte hai mene Hazrat Umar Razi Allahu Anhu se pucha "Allah ta'ala farmata hai agar tumhey kafiro k sataane ka khauf ho to namaz qasar kar lene mein koi harj nahi aur ab jabke zamana e aman hai (to kya phir bhi qasar ki rukhsat hai) to Hazrat Umar Razi Allahu Anhu ne kaha mujhe bhi tumhari tarah tajjub hua tha, to mene Rasool Allah Sallallahu Alaihi Wa Sallam se masla daryaft kiya to Aap Sallallahu Alaihi Wa Sallam ne farmaya k (doran e safar khauf ho ya na ho) Allah ta'ala ne tumhey sadqa diya hai, lihaza uska sadqa qubool karo". (Mukhtasar Sahih Muslim Hadees no. 433)

3. Hazrat Adi bin Hatim Razi Allahu Anhu kehte hai mene Rasool Allah Sallallahu Alaihi Wa Sallam se roozey k baarey mein sawal kiya to Aap Sallallahu Alaihi Wa Sallam ne farmaya "(Sehri us waqt tak khao piyo) jab tak safaid dhari siyah dhari se alag nazar na aye" chunanchey mene 2 dooriya (dhagey) li, unme se ek safaid, doosri siyah thi aur (raat bhar) dono ki taraf dekhta raha (mene ye soorat e haal Rasool Allah Sallallahu Alaihi Wa Sallam ko batayi to) Aap Sallallahu Alaihi Wa Sallam ne mujhse koi aesi baat kahi, jo Abu Sufyaan ko yaad nahi rahi phir farmaya "Is se muraad raat aur din hai". (Sahih Sunan Tirmizi juzz e Saani Hadees no. 2372)

4. Hazrat Abdullah bin Mas'ood Razi Allahu Anhu kehte hai ye aayat nazil hui "Wo loog jinhone apne emaan mein zulm shamil nahi kiya (Surah Anaam Ayat no. 83)" to tamaam musalman pareshan ho gaye aur arz kiya "Ya Rasool Allah Sallallahu Alaihi Wa Sallam! hum mein se kaun aesa hai jisne koi zulm (yaani gunah) na kiya ho? Aap Sallallahu Alaihi Wa Sallam ne irshad farmaya "Ayat mein zulm se muraad, gunah nahi balkey shirk hai, kya tumne Hazrat Luqman Alaihis Salaam ko apne baitey ko nasihat suni ae mere baitey! Allah k saath shirk na karna, kyunki shirk bahut bada zulm hai". (Sahih Sunan Tirmizi juzz e Saani Hadees no. 2452)

SUNNAT E RASOOL SALLALLAHU ALAIHI WA SALLAM NAZAR ANDAAZ KARENE SE BAAZ SHARI AHKAAM NA MUKAMMAL AUR GAIR WAZEY REHTE HAI, MUKAMMAL DEEN SAMAJHNE AUR US PAR AMAL KARNE K LIYE QURAN MAJEED K SAATH SAATH SUNNAT KI PAIRVI AUR ITTEBA BHI ZARURI HAI, CHAND MISAALEY DARJ E ZAIL HAI


1. Quran majeed ne sirf musafir aur bimaar ko ramazaan mein roozey chood kar qaza ada karne ki rukhsat di hai jabkey Rasool Allah Sallallahu Alaihi Wa Sallam ne musafir aur bimaar k alawa haiza aur doodh pilaane wali aurato ko bhi rooza chood kar baad mein ada karne ki rukhsat di hai.

QURAN MAJEED KA HUKM:

"Tum mein se jo shaks bimaar ho ya safar mein ho (aur roza na rakkhey) to (ramazaan k baad) doosre dino mein ginti poori kare". (Surah Baqarah Ayat no. 184)

RASOOL ALLAH SALLALLAHU ALAIHI WA SALLAM KA HUKM:

Hazrat Anas Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya: "Allah ta'ala ne musafiro ko rooza mu'akkhar karne aur nisf namaz ki rukhsat di hai jabke hamila aur doodh pilane wali aurat ko sirf rooza mu'akkhar karne ki rukhsat di hai". (Sahih Sunan Nasayi Juzz e Saani Hadees no. 2145)

Hazrat Abu Zanaad Rahimahullah farmate hai masnoon aur shari ahkaam basa auqaat raaye k bar-aks hote hai lekin musalmano par un ahkaam ki pairvi karna lazim hai unhi ahkaam mein se ek ye bhi hai k haiza roozo ki qaza ada kare, lekin namaz ki qaza ada na kare. (Sahih Bukhari Kitabus Saum)


2. Quran majeed ne zaani mard aur zaani aurat ko 100-100 koodey maarne ka hukm diya hai jabke Rasool Allah Sallallahu Alaihi Wa Sallam ne gair shadi-shuda mard aur aurat ko 100-100 koodey maane ka hukm diya hai aur shadi-shuda mard aur aurat ko sangsaar karne ki saza di hai.

QURAN MAJEED KA HUKM:

"Zaniya aurat aur zaani mard dono mein se har ek ko 100-100 koodey maro aur Allah ta'ala k deen (ko nafiz karne) k maamley mein tumko taras na aye, agar tum Allah aur yaum e akhirat par emaan rakhte ho". (Surah Noor Ayat no. 2)

RASOOL ALLAH SALLALLAHU ALAIHI WA SALLAM KA HUKM:

Hazrat Abdullah bin Abbas Razi Allahu Anhu kehte hai k Maaiz bin Malik Razi Allahu Anhu, Nabi E Akram Sallallahu Alaihi Wa Sallam ki khidmat mein hazir hue aur do martaba zina ka aetraaf kiya, Aap Sallallahu Alaihi Wa Sallam ne unhe wapas loota diya, Hazrat Maaiz Razi Allahu Anhu phir hazir hue aur do martaba zina ka aetraaf kiya, tab Aap Sallallahu Alaihi Wa Sallam ne irshad farmaya: "Tumne char martaba apne khilaf gawahi de di (tab loogo ko hukm diya) jao use sangsaar kardo". (Sahih Sunan Abu Dawood juzz e Saani Hadees no. 3823)


3. Quran majeed ne tamaam murdaar haraam qarar de diye hai jabkey Rasool Allah Sallallahu Alaihi Wa Sallam ne mari hui machli halal qaraar di hai.

QURAN MAJEED KA HUKM:

"Haraam kiya gaya hai tum par murdaar, khoon, khinzeer ka goosht aur har wo janwar jispar (zibah karte waqt) Allah k alawa kisi aur ka naam liya jaye". (Surah Maaida Ayat no. 3)

RASOOL ALLAH SALLALLAHU ALAIHI WA SALLAM KA HUKM:

Hazrat jabir Razi Allahu Anhu se riwayat hai k Nabi E Akram Sallallahu Alaihi Wa Sallam se samundar k baarey mein sawal kiya gaya to Aap Sallallahu Alaihi Wa Sallam ne farmaya: "Samundar ka paani paak hai aur uska murdaar (yaani machli) halal hai". (Sahih Ibne Khuzaimah Juzz e Awwal Hadees no. 112)


4. Quran e majeed ne mardo aur aurato k liye har tarah ki zeenat ko jayez aur halaal qaraar diya hai jabke Rasool Allah Sallallahu Alaihi Wa Sallam ne mardo k liye soona aur raisham haraam qaraar diya hai.

QURAN MAJEED KA HUKM:

"Ae Muhammad (Sallallahu Alaihi Wa Sallam)! un se kaho jisne rizk ki pakeezah cheezo ko aur Allah ki us zeenat ko haraam qaraar diya jise Allah ne apne bando k liye nikaala hai". (Surah Aaraaf Ayat no. 32)

RASOOL ALLAH SALLALLAHU ALAIHI WA SALLAM KA HUKM:

Hazrat Abu Moosa Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya: "Meri ummat ki aurato k liye soona aur resham halal kiya gaya hai aur mardo k liye haram kiya gaya hai". (Sahih Sunan Nasayi juzz e Saani Hadees no. 4754)


5. Quran majeed ne wuzu ka tareeqa muh aur haath kohniyo tak dhoona phir sar ka masah aur pao ka dhoona bataya hai jabke Rasool Allah Sallallahu Alaihi Wa Sallam ne teen martaba haath dhoona, teen martaba kulli karna, teen martaba naam saaf karna aur phir muh dhoona, teen martaba dono haath kohniyo tak dhoona, uske baad sar aur kaano ka masah karna aur phir teen martaba dono pao takhno tak dhoona bataya hai.

QURAN MAJEED KA HUKM:

"Ae loogo, jo emaan laye ho! jab namaz k liye utho to muh aur apne haath kohniyo tak dhulo, saro  par masah karlo aur pao ko takhno tak dho liya karo". (Surah Maaidah Ayat no. 6)

RASOOL ALLAH SALLALLAHU ALAIHI WA SALLAM KA HUKM:

Hazrat Humraan Razi Allahu Anhu se riwayat hai k Hazrat Usman Razi Allahu Anhu ne wuzu k liye paani mangwaya aur bartan se dono haato par paani daala aur dono haato ko teen baar dhooya phir apna haath bartan mein dala, kulli ki, naak saaf ki aur unme paani dala, phir apna chehra teen martaba dhooya aur kohniyo tak baazu teen martaba dhooye phir sar ka masah kiya phir teen martaba dono pao dhooye phir farmaya "Mene Nabi E Akram Sallallahu Alaihi Wa Sallam ko isi tarah wuzu karte dekha hai". (Sahih Bukhari wa Sahih Muslim Kitabul Wuzu)

SUNNAT KI MOJOODGI MEIN RAAYE KI HESIYAT

SUNNAT KI MOJOODGI MEIN RAAYE KI HESIYAT

Bismaillahirrahmanirraheem

SUNNAT E RASOOL SALLALLAHU ALAIHI WA SALLAM PAR AMAL KARNE KI BAJAYE APNI MARZI SE ZAYADA AMAL KARKE ZAYADA SAWAB HASIL KARNE KI KHAWAHISH PAR AAP SALLALLAHU ALAIHI WA SALLAM NE IZHAAR E NARAAZGI FARMAYA

Hazrat Anas Razi Allahu Anhu farmate hai teen sahabi azwaaj e mutahharaat Razi Allahu Anhum k gharo mein hazir hue aur Nabi E Akram Sallallahu Alaihi Wa Sallam ki ibadat k baare mein sawal kiya jab unhe bataya gaya to unhone Aap Sallallahu Alaihi Wa Sallam ki ibadat ko kam samajha aur aapas mein kaha Nabi E Akram Sallallahu Alaihi Wa Sallam k muqabaley mein hamara kya muqaam hai unki to agli pichli saari khtaye maaf kardi gayi hai (lihaza hame Aap Sallallahu Alaihi Wa Sallam se zayada ibadat karni chahiye) unmey se ek ne kaha mein hamesha saari raat namaz padhunga (aaraam nahi karunga) doosre na kaha mein hamesha roozey rakkhunga aur kabhi tark nahi karunga, teesre na kaha mein aurato se alag rahunga aur kabhi nikah nahi karunga jab Rasool Allah Sallallahu Alaihi Wa Sallam tashreef laye to un se pucha "Kya tumne aesa aur aesa kaha hai?" (unke iqraar par) Aap Sallallahu Alaihi Wa Sallam ne irshad farmaya "Khabardaar! Allah ki qasam mein tum sab se zayada Allah ta'ala se darne wala aur tum sab se zayada parhaizgaar hu, lekin mein rooza rakhta hu, tark bhi karta hu, raat ko qayam bhi karta hu aur aaraam bhi karta hu, aurato se nikha bhi kiye hai (yaad rakkho) jisne meri sunnat se muh mooda uska mujhse koi talluq nahi". (Sahih Bukhari Kitabun Nikah)

SUNNAT E RASOOL SALLALLAHU ALAIHI WA SALLAM PAR AMAL KARNE KI BAJAYE APNI RAAYI PAR AMAL KARNE WALO KO RASOOL ALLAH SALLALLAHU ALAIHI WA SALLAM NE "NAFARMAAN" KAHA HAI

Hazrat Arwah bin Zubair Razi Allahu Anhu se riwayat hai k Abu Bakr Siddequi Razi Allahu Anhu ne farmaya: "Mein koi aesi cheez nahi chood sakta jis par Rasool Allah Sallallahu Alaihi Wa Sallam amal kiya karte they, kyunki mujhey darr hai k agar mein Rasool Allah Sallallahu Alaihi Wa Sallam k qaul wa fail mein koi cheez bhi chood dunga to gumraah ho jaunga". (Al loo loo wal Marjaan Kitabul Jihad Hadees no. 1150)

SAHABA E KIRAAM RAZI ALLAHU ANHUM FAISLA KARTE WAQT APNI RAAYE PAR AMAL KARNE SE PEHLE HAMESHA SUNNAT E RASOOL SALLALLAHU ALAIHI WA SALLAM KI TARAF RUJU FARMATE
SUNNAT E RASOOL SALLALLAHU ALAIHI WA SALLAM KA ILM HOTE HI SAHABA E KIRAAM RAZI ALLAHU ANHUM APNI RAAYE WAPAS LE LETE THEY
ITTEBA E SUNNAT HI MUSALMANO K BA'HAMI IKHTALAFAAT KHATAM KARNE KA WAHID RAASTA HAI

Hazrat Qubaisah bin Zuyeb Razi Allahu Anhu se riwayat hai k ek mayyat ki naani Hazrat Abu Bakr Siddequi Razi Allahu Anhu k paas meraas maangne aayi, Hazrat Abu Bakr Siddequi Razi Allahu Anhu ne farmaya "Quraani ahkaam k mutabiq meraas mein tumhara koi hissa nahi aur na hi mene is baare mein Rasool Allah Sallallahu Alaihi Wa Sallam se koi hadees suni hai, lihaza wapas chali jao, mein is baare mein loogo se daryaft karunga" chunanchey Hazrat Abu Bakr Siddequi Razi Allahu Anhu ne loogo se pucha to Hazrat Mugeera bin Shuba Razi Allahu Anhu ne kaha "Meri mojoodgi mein Rasool Allah Sallallahu Alaihi Wa Sallam ne naani ko chatha (6th) hissa dilaya hai" Hazrat Abu Bakr Siddequi Razi Allahu Anhu ne pucha "Koi aur bhi iska gawah hai?" Hazrat Muhammad bin Maslamah Ansari ne bhi is hadees ki ta'eed ki, chunanchey Hazrat Abu Bakr Siddequi Razi Allahu Anhu ne naani ko chatha (6th) hissa dila diya. (Sahih Sunan Abu Dawood juz e Awwal Hadees no. 2888)

Hazrat Saeed Razi Allahu Anhu se riwayat hai k Hazrat Umar bin Khattab Razi Allahu Anhu farmaya karte they "Dayat sirf walid k rishtedaro k liye hai lihaza beewi ko apne shohar ki dayat se koi hissa nahi milta" Zahaak bin Sufyaan Razi Allahu Anhu ne (Hazrat Umar Razi Allahu Anhu) se kaha Rasool E Akram Sallallahu Alaihi Wa Sallam ne mujhe ye paigaam likhwa kar bhijwaya k mein Aseem Siyaabi ki beewi ko uske shohar ki dayat se hissa dilau, chunanchey Hazrat Umar Razi Allahu Anhu ne apni raaye se ruju kar liya. (Sahih Sunan Abu Dawood juz e Awwal Hadees no. 2921)

Hazrat Miswar bin Makhramah Razi Allahu Anhu se riwayat hai k Hazrat Umar Razi Allahu Anhu ne pait k bacchey ki dayat k baare mein loogo se mashwara kiya, to Hazrat Mugeerah bin Shuba Razi Allahu Anhu ne kaha Rasool Allah Sallallahu Alaihi Wa Sallam ne is par ek gulam ya loondi aazaad karne ka hukm diya hai, Hazrat Umar Razi Allahu Anhu ne farmaya "Apni baat par gawah lao" chunanchey Hazrat Muhammad bin Maslamah Razi Allahu Anhu ne is baat ki tasdeeq ki (Is k baad Hazrat Umar Razi Allahu Anhu ne Sunnat E Rasool Sallallahu Alaihi Wa Sallam k mutabiq faisla farmaya). (Sahih Muslim Kitabul Qasamah)

Hazrat Bajalah Razi Allahu Anhu kehte hai "Mein ahnf k chacha juzz bin Muaviyah ka munshi tha, hamey Hazrat Umar Razi Allahu Anhu ka ek khat unki wafaat se ek saal qabl mila, jisme likha tha k jis munshi ne apni mahram aurat se nikah kiya ho unhe alag karo, Hazrat Umar Razi Allahu Anhu majoosiyo se jizya nahi lete they, lekin jab Hazrat Abdur Rahman bin Aouf Razi Allahu Anhu ne gawahi di k Rasool Allah Sallallahu Alaihi Wa Sallam majoosiyo se jizya liya karte they (to Hazrat Umar Razi Allahu Anhu ne bhi jizya lena shuru kar diya)". (Sahih Bukhari Kitabul Jizya)

Hazrat Zainab binte Kaab bin Ujrah Razi Allahu Anha se riwayat hai k Hazrat Abu Saeed Khudri Razi Allahu Anhu ki behan Fureah binte Malik bin Sunaan Razi Allahu Anha ne unhe bataya k wo Rasool Allah Sallallahu Alaihi Wa Sallam k paas aayi aur pucha "Kya wo bani khudrah mein apne ghar ja sakti hai?" kyunki mere khawind k chand gulaam bhaag gaye they wo unhe dhundhne nikle jab tarfe qadoom (ek muqaam hai madeena se saat meel par) pahunche to waha gulamo ko paya aur gulamo ne mere khawind ko maar dala chunanchey mene Rasool Allah Sallallahu Alaihi Wa Sallam se daryaft kiya kya mein apne ghar wapas chali jao kyunki mera khawind mere liye koi makaan ya kharch wagairah chood kar nahi mara?" Hazrat Fureah Razi Allahu Anha kehti hai Rasool Allah Sallallahu Alaihi Wa Sallam ne farmaya "chali jao" Hazrat Fureah Razi Allahu Anha kehti hai mein waha se nikli abhi masjid ya hujre mein thi to Aap Sallallahu Alaihi Wa Sallam ne mujhe bulaya ya kisi ko bulane ka hukm diya aur mujhe bulaya gaya, Aap Sallallahu Alaihi Wa Sallam ne irshad farmaya "tumne kya kaha tha?" mene saari baat dobara bayan ki jo mene apne shohar k mutalliq kahi thi Hazrat Fureah Razi Allahu Anha kehti hai tab Rasool Allah Sallallahu Alaihi Wa Sallam ne farmaya "Apne ghar mein thehri raho hatta k iddat poori ho jaye" chunanchey mene us ghar mein 4 maah 10 din poorey kiye, Hazrat Fureah Razi Allahu Anha kehti hai jab Usman bin Affan Razi Allahu Anhu ne mere paas paigaam bheja aur masla daryaft kiya to mene unhey yahi bataya aur unhone uske mutabiq faisla kiya. (Sahih Sunan Abu Dawood Juzz e Saani Hadees no. 2016)

SUNNAT KA EHTARAAM

SUNNAT KA EHTARAAM

Bismillahirrahamanirraheem

SAHABA E KIRAAM RAZI ALLAHU ANHUM SUNNAT E RASOOL SALLALLAHU ALAIHI WA SALLAM KI MAMOOLI SI MUKHALIFAT BHI GAWARA NAHI SAMAJHTE THEY

Hazrat Umarah bin Ruwaibah Razi Allahu Anhu ne hakim e waqt Marwaan k baite Bashar ko (doraan e khutba e juma) mimbar par dono haath uthate dekha to famaya: "Allah kharaab kare un dono haatho ko mene Rasool Allah Sallallahu Alaihi Wa Sallam ko us se zayada karte hue nahi dekha". (Sahih Muslim Kitabuj Juma)

Hazrat Kaab bin Ujrah Razi Allahu Anhu masjid mein dakhil hue aur ummey hakam ka baita Abdur Rahman baith kar khutba de raha tha, Hazrat Kaab Razi Allahu Anhu ne farmaya: "Is khabees ko dekho baith kar khutba de raha hai (jo khilaf e sunnat hai) Allah ta'ala Quran e Majeed mein farmata hai: "Ae Muhammad Sallallahu Alaihi Wa Sallam! Jab loogo ne khareed o farokht ya khail kood dekha, to us taraf bhagey aur tujhe khada hua chood gaye". (Sahih Muslim Kitabuj Juma)

SAHABA E KIRAAM RAZI ALLAHU ANHUM RASOOL E AKRAM SALLALLAHU ALAIHI WA SALLAM K QAUL YA FAIL K KHILAAF KISI QISM KI BAAT SUN'NA YA USE MAMOOLI SAMAJHNA SAKHT NA PASAND FARMATE THEY

Hazrat Abdullah bin Umar Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya: "Koi shaks Allah ki bandiyo ko masjid mein aane se na rookey" Hazrat Abdullah Razi Allahu Anhu k baite ne kaha "Hum to rokenge" Hazrat Abdullah Razi Allahu Anhu sakht naraaz hue aur farmaya: "Mein tere saamne Hadees e Rasool Sallallahu Alaihi Wa Sallam bayan kar raha hu aur tu keh raha hai k hum unhe zaroor rokenge". (Ibne Maja Kitabus Sunnah)

Hazrat Abdullh bin Mugfal Razi Allahu Anhu se riwayat hai k unka bhatija pehlu mein baitha kankariya phaink raha tha, Hazat Abdullah Razi Allahu Anhu ne use mana kiya aur bataya k Nabi E Akram Sallallahu Alaihi Wa Sallam ne is se mana farmaya hai neez Nabi E Akram Sallallahu Alaihi Wa Sallam ka irshad e mubarak hai hai k aesa karne se na to shikar ho sakta hai na dushman ko nuksan pahunchaya ja sakta hai, albatta is se (kisi ka) daant toot sakta hai ya aankh phoot sakti hai, bhatije ne dobara kankariya phainkni shuru kardi, to Hazrat Abdullah Razi Allahu Anhu ne kaha: "Mene tujhe bataya hai k Nabi E Akram Sallallahu Alaihi Wa Sallam ne is se mana farmaya hai aur tu phir wahi kaam kar raha hai, lihaza mein tujhse ab kabhi baat nahi karunga". (Sahih Sunan Ibne Maja Juz e Awwal Hadees no. 17)

Hazrat Imran bin Hussain Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya: "Haya to saari bhalayi hai" ya Aap Sallallahu Alaihi Wa Sallam ne farmaya: "Haya mukammal bhalayi hai" Basheer bin Kaab Razi Allahu Anhu ne kaha humne baaz kitabo mein ya danayi ki baato mein padha hai k haya ki ek qism to Allah ta'ala k huzoor sakeenah aur waqaar hai jabke doosri qism bodapan aur kamzoori hai, ye sunkar (Sahabi E Rasool) Hazrat Imarn Razi Allahu Anhu ko sakht gussa aya, aankhey surkh ho gayi aur farmaya k mein tumhare saamne Hadees e Rasool Sallallahu Alaihi Wa Sallam bayan kar raha hu aur tu uske khilaf baat kar raha hai, raavi kehte hai Hazrat Imran Razi Allahu Anhu ne phir Hadees padh kar sunayi, idhar Basheer bin Kaab Razi Allahu Anhu ne bhi apni wahi baat dohrayi, to Hazrat Imran Razi Allahu Anhu gazabnaak ho gaye aur (Basheer bin Kaab Razi Allahu Anhu ko saza dene ka faisla kiya) hum sab ne kaha "Ae aba najeed (Hazrat Imran Razi Allahu Anhu ki kaneet) basheer hamara hi musalman saathi hai (ise maaf kar dijiye) isme koi (munafiqat ya kufr wali) baat nahi hai". (Sahih Muslim Kitabul Emaan)

SUNNAT E RASOOL SALLALLAHU ALAIHI WA SALLAM KA ILM HO JANE K BAWAJOOD MASLA DARYAFT KARNE PAR HAZRAT UMAR RAZI ALLAHU ANHU KA IZHAAR E NARAZI

Hazrat Haris bin Abdullah bin Aaus Razi Allahu Anhu kehte hai mein Umar bin Khattab Razi Allahu Anhu k paas hazir hua aur unse pucha: "Agar qurbani k din tawaaf e ziyarat karne k baad aurat haiza ho jaye to kya kare?" Hazrat Umar Razi Allahu Anhu ne farmaya: "(Taharat hasil karne k baad) aakhiri amal baitullah shareef ka tawaaf hona chahiye" Haris Razi Allahu Anhu ne kaha Rasool Allah Sallallahu Alaihi Wa Sallam ne bhi mujhe yahi fatwa diya tha is par Hazrat Umar Razi Allahu Anhu ne farmaya: "Tere haath toot jaye, toone mujhse aesi baat puchi, jo Rasool Allah Sallallahu Alaihi Wa Sallam se puch chuka tha takey mein Rasool Allah Sallallahu Alaihi Wa Sallam k khilaf faisla karu". (Sahih Sunan Abu Dawood juz Awwal Hadees no. 1765)

SUNNAT KI AHMIYAT

SUNNAT KI AHMIYAT

Bismillahirrahamanirraheem

ZAYADA SAWAB HASIL KARNE K IRADEY SE SUNNAT E RASOOL SALLALLAHU ALAIHI WA SALLAM KO NA KAAFI SAMAJH KAR GAIR MASNOON TAREEQO PAR MEHNAT AUR MASHAKKAT KARNA AAP SALLALLAHU ALAIHI WA SALLAM KI NARAAZGI KA BAA'AS HAI
WAHI AMAL QABIL E QUBOOL HAI JO SUNNAT E RASOOL SALLALLAHU ALAIHI WA SALLAM K MUTABIQ HO

Hazrat Anas Razi Allahu Anhu farmate hai teen sahabi azwaaj e mutahharaat Razi Allahu Anhum k gharo mein hazir hue aur Nabi E Akram Sallallahu Alaihi Wa Sallam ki ibadat k baare mein sawal kiya jab unhe bataya gaya to unhone Aap Sallallahu Alaihi Wa Sallam ki ibadat ko kam samajha aur aapas mein kaha Nabi E Akram Sallallahu Alaihi Wa Sallam k muqabaley mein hamara kya muqaam hai unki to agli pichli saari khtaye maaf kardi gayi hai (lihaza hame Aap Sallallahu Alaihi Wa Sallam se zayada ibadat karni chahiye) unmey se ek ne kaha mein hamesha saari raat namaz padhunga (aaraam nahi karunga) doosre na kaha mein hamesha roozey rakkhunga aur kabhi tark nahi karunga, teesre na kaha mein aurato se alag rahunga aur kabhi nikah nahi karunga jab Rasool Allah Sallallahu Alaihi Wa Sallam tashreef laye to un se pucha "Kya tumne aesa aur aesa kaha hai?" (unke iqraar par) Aap Sallallahu Alaihi Wa Sallam ne irshad farmaya "Khabardaar! Allah ki qasam mein tum sab se zayada Allah ta'ala se darne wala aur tum sab se zayada parhaizgaar hu, lekin mein rooza rakhta hu, tark bhi karta hu, raat ko qayam bhi karta hu aur aaraam bhi karta hu, aurato se nikha bhi kiye hai (yaad rakkho) jisne meri sunnat se muh mooda uska mujhse koi talluq nahi". (Sahih Bukhari Kitabun Nikah)

Hazrat Ayesha Razi Allahu Anha farmati hai Rasool Allah Sallallahu Alaihi Wa Sallam jab Sahaba E Kiraam Razi Allahu Anhum ko kisi baat ka hukm farmate to unhi kaamo ka hukm dete jinhe wo kar sake, Sahaba Razi Allahu Anhum arz karte "Hum Aap Sallallahu Alaihi Wa Sallam ki tarah (Allah ta'ala k mehboob) thoodey hai, Aap Sallallahu Alaihi Wa Sallam ki to Allah ne agli pichli saari khataye maaf kardi hai (lihaza hamey zayada ibadat karne dijiye) ye sun kar Aap Sallallahu Alaihi Wa Sallam itna gussa hue k unke aasaar Aap Sallallahu Alaihi Wa Sallam k chehra e mubarak par zahir hue phir Aap Sallallahu Alaihi Wa Sallam ne irshad farmaya beshak mein tum sab se zayada parhaizgaar hu aur Allah ta'ala k ahkaam k baare mein sabse zayada jaan'ne wala hu". (Sahih Bukhari Kitabul Emaan)

Hazrat Ayesha Razi Allahu Anha farmati hai Rasool Allah Sallallahu Alaihi Wa Sallam ne koi kaam kiya aur loogo ko uski rukhsat de di, lekin kuch loogo ne wo rukhsat lene se parhaiz kiya, Nabi E Akram Sallallahu Alaihi Wa Sallam ko pata chala to Aap Sallallahu Alaihi Wa Sallam ne khutba diya, Allah ta'ala ki qasam! mein loogo ki nisbat Allah ta'ala ki mansha aur marzi se zayada waqif hu aur loogo ki nisbat zayda Allah ta'ala se darne wala hu (yaani tum loog na to mujhse zayada Allah ta'ala k ahkamaat se waqif ho sakte ho na mujhse zayada muttaqi ban sakte ho). (Al loo loo wal Marjaan juz e saani Hadees no. 1518)

RASOOL ALLAH SALLALLAHU ALAIHI WA SALLAM KA HUKM NA MAAN'NE WALE KO AAP SALLALLAHU ALAIHI WA SALLAM NE SAZA DENE KA FAISLA FARMAYA

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya: "(Iftar k bagair) musalsal roozey na rakkho", Sahaba Razi Allahu Anhum ne arz kiya Ya Rasool Allah Sallallahu Alaihi Wa Sallam Aap to rakhte ho? Aap Sallallahu Alaihi Wa Sallam ne farmaya: "Mein tumhari tarah nahi hu, mujhe mera rabb raat ko khilata bhi hai pilata bhi hai" lekin uske bawajood loog baaz nahi aaye, Hazrat Abu Hurairah Razi Allahu Anhu kehte hai tab Nabi E Akram Sallallahu Alaihi Wa Sallam ne musalsal do din ya musalsal do raat rooza rakkha phir (ittefaaq se) Eid ka chaand nazar aa gaya, Aap Sallallahu Alaihi Wa Sallam ne farmaya: "Agar chand nazar na aata to mein abhi musalsal roozey rakhta" goya unko saza dene k liye Aap Sallallahu Alaihi Wa Sallam ne ye baat farmayi (Yani mera hukm na man'ne wale loog bhi mere saath rooza rakhte aur unhe saza milti). (Sahih Bukhari Kitabul Aetasaam bil Kitabis Sunnah)

SUNNAT KA ILM HO JAANE K BAAD USPAR AMAL NA KARNE WALO KO NABI E AKRAM SALLALLAHU ALAIHI WA SALLAM NE NAFARMAAN KAHA

Hazrat Jabir Razi Allahu Anhu se riwayat hai k Rasool Allah Sallallahu Alaihi Wa Sallam ramazaan mein fatah makkah wale saal makkah k liye (madeena se) nikley to Aap Sallallahu Alaihi Wa Sallam ne rooza rakkha jab kura gameem (jagah ka naam) pahunchey to loogo ne bhi rooza rakkha chunanchey Aap Sallallahu Alaihi Wa Sallam ne paani ka piyala manga kar uncha kiya, yaha tak k loogo ne us (piyaley) ko dekh liya phir Aap Sallallahu Alaihi Wa Sallam ne paani pee liya baad mein Aap Sallallahu Alaihi Wa Sallam ko bataya gaya k kuch loogo ne abhi rooza rakkha hua hai, is par Aap Sallallahu Alaihi Wa Sallam ne irshad famaya "Ye loog nafarman hai, ye loog nafarman hai". (Sahih Muslim Kitabus Siyaam)

JO AMAL SUNNAT E RASOOL SALLALLAHU ALAIHI WA SALLAM K MUTABIQ NA HO WO ALLAH TA'ALA K YAHA MARDOOD (NA QABIL E QUBOOL) HAI

Hazrat Ayesha Razi Allahu Anha kehti hai Rasool Allah Sallallahu Alaihi Wa Sallam ne farmaya: "Jisne deen mein koi aesa kaam kiya jiski bunyaad shariyat mein nahi, wo kaam mardood hai". (Al loo loo wal Marjaan Juz e saani Hadees no. 1120)

KITAB O SUNNAT KI PAIRVI SE HATNE KA NATEEJA GUMRAHI HAI
RASOOL ALLAH SALLALLAHU ALAIHI WA SALLAM KI NAFARMAANI HALAKAT AUR TABAHI KA BAA'AS HAI

Hazrat Abu Musa Ash'ari Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya: "Meri aur us hidayat ki misaal, jise mein de kar bheja gaya hu aesi hai jese k ek aadmi apne quam k paas aye aur kahe loogo! mene apni aankho se ek lashkar dekha hai jis'se tumhe wazey taur par khabardaar kar raha hu lihaza us se bachne ki fikr karo qaum k kuch loogo ne uski baat maanli aur raato raat chipke se nikal gayi jabke doosre loogo ne jhutla diya aur apne gharo mein (gaflat se) padey rahe, subah k waqt lashkar ne unhe aa liya aur halaak karke unki nasal ka khatma kar diya ye misal meri aur mujh par nazil kiye gaye haqq ki pairvi karne wale aur na karne wale loogo ki hai". (Sahih Bukhari Kitabur Riqaaq)

Hazrat Arbaaz bin Saariyah Razi Allahu Anhu se riwayat hai k unhone Rasool Allah Sallallahu Alaihi Wa Sallam ko farmate hue suna hai "Loogo mein tumhe aese roshan deen par choodey ja raha hu jiski raat bhi din ki tarah roshan hai us se wahi shaks guraiz karega jise halaak hona hai". (Sahih Kitabus Sunnah juz e awwal Hadees no. 49)

RASOOL ALLAH SALLALLAHU ALAIHI WA SALLAM K MUQABILEY MEIN KISI NABI YA WALI, MUHADDIS YA FUQAHA, IMAAM YA AALIM KI ITTEBA KA TASAWWUR SARASAR GUMRAAHI HAI

Hazrat Jabir Razi Allahu Anhu se riwayat hai k Hazrat Umar Razi Allahu Anhu Nabi E Akram Sallallahu Alaihi Wa Sallam ki khidmat mein hazir hue aur arz kiya "Hum yahoodiyo se kuch baatey sunte hai jo hamey acchi lagti hai kya unme se baaz (zayada acchi lagne wali) likh liya kare?" Nabi E Akram Sallallahu Alaihi Wa Sallam ne irshad farmaya "Kya tum (apne deen k baare mein) shak mein mubtala ho (k ye naqis hai) jis tarah yahood wa nasara (apne apne deen k baare mein) shak mein padey they, halakey mein ek wazey aur roshan shariyat le kar aya hu, agar aaj Musa Alaihis Salaam bhi zinda hote, to meri pairvi k bagair unke liye bhi koi chara na hota". (Musnad Ahmad, Behaqui, Mishkaatul Masabeeh Kitabul Emaan)

Hazrat Jabir Razi Allahu Anhu riwayat karte hai k Hazrat Umar bin Khattab Razi Allahu Anhu Toraat le kar Rasool Allah Sallallahu Alaihi Wa Sallam ki khidmat mein hazir hue aur arz kiya "Ya Rasool Allah Sallallahu Alaihi Wa Sallam! ye Toraat hai" Aap Sallallahu Alaihi Wa Sallam khamoosh rahe, Hazrat Umar Razi Allahu Anhu Toraat padhne lage, to Rasool Allah Sallallahu Alaihi Wa Sallam ka chehra mubarak (gusse se) badalne laga, Hazrat Abu Bakr Siddequi Razi Allahu Anhu ne (ye soorat e haal dekhi) to kaha: "Ae Umar! gum karne waliya tujhe gum paaye, Rasool Allah Sallallahu Alaihi Wa Sallam k chehre ki taraf nahi dekhte" Hazrat Umar Razi Allahu Anhu ne Rasool Allah Sallallahu Alaihi Wa Sallam k chehra e mubarak ki taraf dekha to kaha "Mein Allah aur uske Rasool k gusse se Allah ta'ala ki panah maangta hu, hum Allah k rabb hone par, islam k deen hone par, aur Muhammad Sallallahu Alaihi Wa Sallam k Nabi hone par raazi hai" uske baad Rasool E Akram Sallallahu Alaihi Wa Sallam ne irshad famaya: "Us zaat ki qasam! jiske haath mein Muhammad Sallallahu Alaihi Wa Sallam ki jaan hai agar aaj Musa Alaihis Salaam tashreef le aye aur tum loog meri bajaye unki itteba shuru karo, to seedhi raah se gumraah ho jaoge aur agar Musa Alaihis Salaam zinda hote aur meri nabuwat ka zamana paate to wo bhi meri hi itteba karte". (Muqadma Daarmi Baab 39 Hadees no. 435)

RASOOL E AKRAM SALLALLAHU ALAIHI WA SALLAM KI ITA'AT MEIN KOTAHI NE JANG E UHAD KI FATAH KO SHIKAST MEIN BADAL DIYA

Hazrat Bara Razi Allahu Anhu farmate hai k uhad k rooz mushriko se hamara muqabala hua, Nabi E Akram Sallallahu Alaihi Wa Sallam ne teer-andaazo ki ek jama'at (pahaad ki chooti par) bitha di aur Abdullah bin Jubair Razi Allahu Anhu ko unka ameer muqarrar karte hue farmaya: "Tum hame (maidaan e jang mein) khawah gaalib hote dekho ya magloob hote, apni jagah se hargiz na hatna aur na hi hamari madad ko aana" chunanachey kafiro se muqabala hua, to kafir bhaag nikle hatta k mene dekha k mushriko ki aurate pindliyo se kapda uthaye hue pahaad par bhaagi ja rahi hai, unki pazaibey dikhayi de rahi thi, Hazrat Abdullah bin Jubair Razi Allahu Anhu ne unko samjhaya k Rasool Allah Sallallahu Alaihi Wa Sallam taakeed kar gaye hai k is jagah se na hatna lihaza yaha se mat palto, neez andaza na maaney (apni marzi se wo jagah chood di chunanchey) musalmano ko shikast ho gayi aur 70 Sahaba E Kiraam Razi Allahu Anhum shaheed ho gaye. (Sahih Bukhari Kitabul Magaazi)

SAHABA E KIRAAM RAZI ALLAHU ANHUM SUNNAT E RASOOL SALLALLAHU ALAIHI WA SALLAM KO TARK KARNA SARASAR GUMRAAHI SAMAJHTE THEY

Hazrat Arwah bin Zubair Razi Allahu Anhu se riwayat hai k Abu Bakr Siddequi Razi Allahu Anhu ne farmaya: "Mein koi aesi cheez nahi chood sakta jis par Rasool Allah Sallallahu Alaihi Wa Sallam amal kiya karte they, kyunki mujhey darr hai k agar mein Rasool Allah Sallallahu Alaihi Wa Sallam k qaul wa fail mein koi cheez bhi chood dunga to gumraah ho jaunga". (Al loo loo wal Marjaan Kitabul Jihad Hadees no. 1150)

AESI BAAT YA AMAL, JO RASOOL E AKRAM SALLALLAHU ALAIHI WA SALLAM SE SABIT NA HO, HADEES YA SUNNAT KEH KAR LOOGO K SAAMNE PAISH KARNE KI SAZA JAHANNAM HAI

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya: "Jisne jaan boojh kar jhoot meri janib mansoob kiya wo apna thikana jahannam bana le". (Al loo loo wal Marjaan Juz e Awwal Hadees no. 30)

Hazrat Ali Razi Allahu Anhu kehte hai Rasool Allah Sallallahu Alaihi Wa Sallam ne farmaya: "Jisne meri janib jhoot baat mansoob ki wo aag mein dakhil hoga". (Al loo loo wal Marjaan juz e awwal Hadees no. 1)

Hazrat Salma Razi Allahu Anhu se riwayat hai k mene Nabi E Akram Sallallahu Alaihi Wa Sallam ko ye farmate hue suna hai k "Jo shaks meri taraf aesi baat mansoob kare, jo mene nahi kahi, wo apni jagah jahannam mein bana le". (Sahih Bukhari Kitabul Ilm)

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya: "Akhiri zamane mein dajjal aur kazzab loog aesi aesi hadeese tumhare paas layenge, jo tumne aur tumhare aslaaf ne kabhi na suni hongi lihaza unse bach kar raho kahi tumhe gumraah na karde ya fitne mein mubtala na karde". (Sahih Muslim Kitabus Sunnah Hadees no. 4604)

SUNNAT E RASOOL SALLALLAHU ALAIHI WA SALLAM CHOOD KAR KOI NAYA TAREEQA TALASH KARNE WALA SHAKS ALLAH TA'ALA K HAN SABSE ZAYADA MAGZOOB HAI

Hazrat Abdullah bin Abbas Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya: "Teen aadmi Allah ta'ala k han magzoob hai
1. Haram shareef ki hurmat paimaal karne wala
2. Islam mein Rasool Allah Sallallahu Alaihi Wa Sallam ka tareeqa chood kar jahliyat ka tareeqa talaash karne wala
3. Kisi musalman ka na haqq khoon talab karne wala takey uska khoon bahaye". (Sahih Bukhari Kitabud Dayaat)

RASOOL E AKRAM SALLALLAHU ALAIHI WA SALLAM KA HUKM NA MAAN'NE PAR DUNYA MEIN IBRAT-NAAT SAZA

Hazrat Salma bin Akwa Razi Allahu Anhu se riwayat hai k unke baap ne unhe bataya k ek aadmi ne Rasool Allah Sallallahu Alaihi Wa Sallam k paas baaye haath se khana khaya to Aap Sallallahu Alaihi Wa Sallam ne farmaya: "Apne daaye hath se khao" us aadmi ne jawab diya "Mein aesa nahi kar sakta" Aap Sallallahu Alaihi Wa Sallam ne irshad farmaya: "(accha Allah kare) tujhse aesa na ho sake, us shaks ne takabbur ki wajah se ye baat kahi thi (halankey koi shari uzr nahi tha) raavi kehte hai k wo shaks (umar bhar) apna daaya hath muh tak na utha saka". (Sahih Muslim Kitabul Ashrabah)

SUNNAT KI FAZILAT

SUNNAT KI FAZILAT

Bismillahirrahmanirraheem

SUNNNAT KI ITTEBA KARNE WALE KO RASOOL ALLAH SALLALLAHU ALAIHI WA SALLAM NE JANNAT KI KHUSHKHABRI DI HAI

Hazrat Abu Hurairah Razi Allahu Anhu kehte hai k Rasool Allah Sallallahu Alaihi Wa Sallam ne farmaya: "Meri ummat k saare loog jannat mein jayenge, siwa e un loogo k jinhone inkaar kiya", Sahaba E Kiram Razi Allahu Anhum ne arz kiya "Ya Rasool Allah Sallallahu Alaihi Wa Sallam! inkaar kisne kiya? "Aap Sallallahu Alaihi Wa Sallam ne farmaya: jinse meri ita'at ki wo jannat mein dakhil hoga, jisne meri nafarmani ki usne inkaar kiya (aur wo jannat mein nahi jayega)". (Sahih Bukhari Kitabul Aetasaam bil Kitabis Sunnah)

RASOOL ALLAH SALLALLAHU ALAIHI WA SALLAM KI ITA'AT AUR FARMABARDARI ALLAH KI ITA'AT AUR FARMABARDARI HAI

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jisne meri ita'at ki usne Allah ki ita'at ki, jisne meri nafarmani ki usne Allah ki nafarmani ki aur jisne ameer ki ita'at ki, usne meri ita'at ki aur jisne ameer ki nafarmani ki unse meri nafarmani ki". (Mukhtasar Sahih Muslim Hadees no. 1223)

QURAN WA SUNNAT PAR SAKHTI SE AMAL KARNE WALE LOOG GUMRAAHIYO SE MEHFOOZ RAHENGE

Hazat Abdullah bin Abbas Razi Allahu Anhu se riwayat hai k Rasool Allah Sallallahu Alaihi Wa Sallam ne hajjatul wida k mookey par khutba dete hue irshad farmaya: "Shaitan is baat se mayoos ho chuka hai k is sar-zameen mein kabhi uski bandagi ki jayegi lihaza ab wo isi baat par mutmaeen hai k (shirk k alawa) wo aamaal jinhe tum mamooli samajhte ho unme uski pairvi ki jaye, lihaza (shaitan se har waqt) khabardaar raho aur (suno) mein tumhare darmiyan wo cheez choode ja raha hu jise mazbooti se thaame rakkhoge to kabhi gumrah nahi honge aur wo hai Allah ki kitab aur uske Nabi (Sallallahu Alaihi Wa Sallam) ki sunnat". (Mustadrak E Hakim, Sahih Targeeb wa Tarheeb Hadees no. 36)

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya: "Mein tumhare darmiyan do chizey choode ja raha hu k agar unpar amal karoge to kabhi gumrah nahi honge ek Allah ki kitab aur doosri meri Sunnat". (Mustadrak E Hakim, Sahih Jamey Sageer Hadees no. 2937)

UMMAT MEIN IKTALAF K WAQT NABI K IKRAM SALLALLAHU ALAIHI WA SALLAM KI SUNNAT PAR MAZBOOTI SE JAMEY REHNA NIJAAT KA BAA'AS HOGA

Hazrat Arbaaz bin Sariya Razi Allahu Anhu kehte hai k ek rooz Rasool Allah Sallallahu Alaihi Wa Sallam ne hame namaz padhayi, namaz k baad hamari taraf tawajjah farmayi aur hame bada mosar waaz farmaya jis se loogo k aanso beh nikley aur dil kaanp uthey ek aadmi ne arz kiya "Ya Rasool Allah Sallallahu Alaihi Wa Sallam! aaj Aapne is tarah waaz farmaya hai jese ye Aapka aakhiri waaz ho, aese waqt mein Aap hamey kis cheez ki takeed farmate hai? hame kuch wasiyat bhi farma dijiye Rasool Allah Sallallahu Alaihi Wa Sallam ne farmaya: "Mein tumhe Allah ta'ala se darne, apne ameer ki baat sun'ne aur uski ita'at karne ki wasiyat karta hu, khawah tumhara ameer habshi gulam hi kyu na ho (aur yaad rakkho) jo loog mere baad zinda rahenge wo ummat mein bahut zayada ikhtalaaf dekhenge, aese halaat mein meri sunnat par amal karne  ko lazim bana lena aur hidayat yaafta khulafa e Rashideen k tareeqey ko thaamey rakhna aur uspar mazbooti se jamey rehna neez deen mein paida ki gayi nayi nayi baato (bida'ato) se bachna kyunki deen mein har nayi cheez bida'at hai aur har bida'at gumraahi hai". (Sahih Sunan Abu Dawood Hadees no. 3851)

SUNNAT E RASOOL SALLALLAHU ALAIHI WA SALLAM ZINDA KARNE WALE KO APNE SAWAB K ALAWA UN TAMAAM LOOGO KA SAWAB BHI MILTA HAI JO USKE BAAD US SUNNAT PAR AMAL KARTE HAI

Hazrat Kaseer bin Abdullah bin Umar bin Auof Muzni Razi Allahu Anhu farmate hai k mujhse mere baap ne, mere baap se mere dada ne riwayat kiya hai k Rasool Allah Sallallahu Alaihi Wa Sallam ne farmaya: "Jisne meri sunnato mein se koi ek sunnat zinda ki aur loogo ne us par amal kiya to sunnat zinda karne wale ko bhi utna hi sawab milega jitna us sunnat par amal karne wale tamaam loogo ko milega jabke loogo k apne sawab mein koi kami nahi ki jayegi aur jisne koi bida'at jaari ki aur phir uspar loogo ne amal kiya to bida'at jaari karne wale par un tamaam loogo ka gunah bhi hoga jo is bida'at par amal karenge bida'at par amal karne wale loogo k apne gunaho ki saza se koi cheez kam nahi hogi (yaani wo bhi poori poori saza payenge)". (Sahih Sunan Ibne Maja Hadees no. 173)

SUNNAT E RASOOL SALLALALHU ALAIHI WA SALLAM DOOSRE TAK PAHUNCHANE WALO K LIYE RASOOL ALLAH SALLALLAHU ALAIHI WA SALLAM KI DUAYE

Hazrat Abdur Rahman bin Abdullah Razi Allahu Anhu apne baap se aur wo Nabi E Akram Sallallahu Alaihi Wa Sallam se riwayat karte hai k Aap Sallallahu Alaihi Wa Sallam ne farmaya: "Allah ta'ala us aadmi ko tar o taaza rakkhey jisne humse hadees suni aur use (juh ka tuh) aagey pahuncha diya (kyunki) aksar wo looog jinko hadees pahunchayi gayi ho, wo sun'ne walo se zayada yaad rakhne wale hote hai". (Sahih Sunan Ibne Maja Hadees no. 189)

Hazrat Abdullah bin Masood Razi Allahu Anhu kehte hai mene Rasool Allah Sallallahu Alaihi Wa Sallam ko farmate hue suna hai "Allah ta'ala us shaks ko tar o taaza rakhhey jisne hum se koi baat suni aur usko usi tarah doosro tak pahuncha diya jis tarah suni thi (kyunki) bahut se pahunchaye jaane wale sun'ne walo se zayada yaad rakhne wale hote hai". (Sahih Sunan Tirmizi Hadees no. 2140)

SUNNAT QURAN MAJEED KI ROSHNI MEIN

SUNNAT QURAN MAJEED KI ROSHNI MEIN

Bismillahirrahmanirraheem

DEEN K MAAMLEY MEIN RASOOL E AKRAM SALLALLAHU ALAIHI WA SALLAM K HUKM KI ITA'AT KARNA FARZ HAI

Ae loogo jo emaan laye ho! Allah ta'ala aur uske Rasool ki ita'at karo aur baat sun lene k baad us se muh na moodo. (Surah Anfaal Surah no. 8 Ayat no. 20)

Namaz qayam karo, zakaat do aur Rasool ki ita'at karo, ummeed hai k tum par raham kiya jaye. (Surah Noor Surah no. 24 Ayat no. 56)

Jisne Rasool ki ita'at ki usne dar'asal Allah ta'ala ki ita'at ki aur jisne Rasool ki ita'at se muh phera (uska wabaal usi par hoga) humne Aapko unpar paasbaan (nigehbaan) bana kar bheja hai. (Surah Nisa Surah no. 4 Ayat no. 80)

Humne jo bhi Rasool bheja hai wo is liye k Allah k hukm se uski ita'at ki jaye. (Surah Nisa Surah no. 4 Ayat no. 64)

Allah aur Rasool ki ita'at karo takey tum par raham kiya jaye. (Surah Ale Imran Surah no. 3 Ayat no. 132)

Ae loogo, jo emaan laye ho! Allah aur uske Rasool ki ita'at karo aur un loogo ki jo tum mein se sahib e amr ho, phir agar tumhare darmiyaan kabhi maamley mein ikhtalaaf paida ho jaye to use Allah aur uske Rasool ki taraf palta do agar tum waqayi Allah aur rooz e aakhirat par emaan rakhte ho yahi ek sahih tareeqa hai aur sawab k lihaz se bhi accha hai. (Surah Nisa Surah no. 4 Ayat no. 59)

Wazahat: Allah ta'ala ki taraf lootne ka matlab Quran paak ki taraf ruju karna hai aur Rasool ki taraf lootne ka matlab Aap Sallallahu Alaihi Wa Sallam ki hayaat e tayyaba mein Aap Sallallahu Alaihi Wa Sallam ki zaat e muqaddas thi, lekin Aap Sallallahu Alaihi Wa Sallam ki wafaat k baad is se muraad Aap Sallallahu Alaihi Wa Sallam ki sunnat e mutahhara aur Ahadees e mubaraka hai.

Ae Muhammad Sallallahu Alaihi Wa Sallam! tumhare rabb ki qasam, loog kabhi momin nahi ho sakte jab tak k apne (tamaam) baahami ikhtalafaat mein tum ko faisla karne wala na maan le phir jo bhi faisla tum karo us par apne dilo mein koi tangi mehsoos na kare balkey sar basar tasleem karle. (Surah Nisa Surah no. 4 Ayat no. 65)

Ae loogo! jo emaan laye ho! Allah aur uske Rasool ki ita'at karo (aur ita'at se muh mood kar) apne aamaal zaaya na karo. (Surah Muhammad Surah no. 47 Ayat no. 33)

Jo kuch Rasool tumhe de wo le lo aur jis cheez se tumhe rook de us se ruk jao aur Allah se daro beshak Allah sakht azaab dene wala hai. (Surah Hashr Surah no. 59 Ayat no. 7)


RASOOL E AKRAM SALLALLAHU ALAIHI WA SALLAM KI ITA'AT AUR ITTEBA, KAAMYABI KI ZAMANAT HAI

Jo loog Allah aur uske Rasool ki ita'at kare Allah se darey aur uski nafarmani se bachey, wahi kaamyaab hai. (Surah Noor Surah no. 24 Ayat no. 52)

Emaan laane walo ka kaam to ye hai k jab wo Allah aur uske Rasool ki taraf bulaye jaye takey Rasool unke maamlaat ka faisla kare to wo keh de humne baat sunli aur ita'at ikhtiyaar ki, aese loog hi kaamyaab hone wale hai. (Surah Noor Surah no. 24 Ayat no. 51)

Jisne Allah aur uske Rasool ki ita'at ki usne badi kaamyabi hasil ki. (Surah Ahzaab Surah no. 33 Ayat no. 71)

Jo shaks Allah aur uske Rasool ki ita'at karega Allah use aese baago mein dakhil karega jinke nichey nehrey behti hongi jaha wo hamesha rahega aur yahi sabse badi kaamyabi hai. (Surah Nisa Surah no. 4 Ayat no. 13)


ALLAH TA'ALA AUR RASOOL ALLAH SALLALLAHU ALAIHI WA SALLAM K HUKM K MUTABIQ KIYE GAYE AAMAAL KA BHARPOOR AJR WA SAWAAB MILEGA

Agar tum loog Allah aur uske Rasool ki ita'at karoge to tumhare aamaal k ajr wa sawaab mein koi kami nahi karega (ita'at karne walo k liye) Allah yaqeenan bakashne wala aur raham farmaaney wala hai. (Surah Hujraat Surah no. 49 Ayat no. 14)


GUNAHO KI MAGFIRAT RASOOL E AKRAM SALLALLAHU ALAIHI WA SALLAM K ITTEBA K SAATH MASHROOT HAI

Ae Nabi! un se keh do k agar tum (haqeeqat mein) Allah se muhabbat karte ho to meri itteba karo Allah tum se muhabbat karega aur tumhari khatao ko maaf farmayega, wo bada maaf karne wala aur raheem hai. (Surah Ale Imran Surah no. 3 Ayat no. 31)


ALLAH TA'ALA AUR RASOOL E AKRAM SALLALLAHU ALAIHI WA SALLAM KI ITA'AT KARNE WALE LOOG QAYAMAT K DIN NABIYO, SIDDEQO, SHAHEEDO AUR NAIK LOOGO K SATH HONGE

Jo loog Allah aur Rasool ki ita'at karenge wo (qayamat k din) un loogo k saath honge jin par Allah ta'ala ne inaam farmaya hai yaani ambiya, siddeqeen, shohda aur saliheen, in loogo ki rifaqat kitni acchi hai. (Surah Nisa Surah no. 4 Ayat no. 69)


ALLAH TA'ALA AUR RASOOL E AKRAM SALLALLAHU ALAIHI WA SALLAM PAR EMAAN LAANE K BA'WAJOOD BAAZ LOOG AMLAN ALLAH AUR RASOOL SALLALLAHU ALAIHI WA SALLAM KA HUKM NAHI MAANTE, AESE LOOG MOMIN NAHI

Loog kehte hai k hum Allah aur Rasool par emaan laye hai aur humne ita'at qubool ki hai phir (iqraar karne k baad) unmey se ek garooh (ita'at se) mooh phair leta hai, aese loog hargiz momin nahi (kyunki) jab unko Allah aur Rasool ki taraf bulaya jata hai takey Rasool unke baahami maamlaat ka faisla kare to unmey se ek fareeq katra jata hai. (Surah Noor Surah no. 24 Ayat no. 47, 48)

Jab unse kaha jata hai k aao us cheez ki taraf jo Allah ne nazil ki hai aur aao Rasool ki taraf to un munafiqo ko tum dekhte ho k tumhari taraf aane se ruk jaate hai. (Surah Nisa Surah no. 4 Ayat no. 61)

Ae Nabi! keh dijiye Allah aur Rasool ki ita'at karo aur agar loog Allah aur Rasool ki ita'at se mooh moodey (to unhe maloom hona chahiye k) Allah yaqeenan kaafiro ko pasand nahi karta. (Surah Ale Imran Surah no. 3 Ayat no. 32)


ALLAH TA'ALA AUR RASOOL E AKRAM SALLALLAHU ALAIHI WA SALLAM KI ITA'AT NA KARNE KA NATEEJA BAAHAMI INTASHAAR AUR LADAAYI JHAGDEY HAI

(Ae loogo, jo emaan laye ho) Allah aur uske Rasool ki ita'at karo aur aapas mein jhagda na karo warna tumhre andar kamzoori paida ho jayegi aur tumhari hawa ukhad jayegi, sabr se kaam lo Allah ta'ala yaqeenan sabr karne walo k saath hai. (Surah Anfaal Surah no. 8 Ayat no. 46)


RASOOL ALLAH SALLALLAHU ALAIHI WA SALLAM K HUKM KI MOJOODIGI MEIN KISI DOOSRE K HUKM PAR AMAL KARENE KI DEEN E ISLAM MEIN KOI GUNJAISH NAHI
ALLAH AUR RASOOL SALLALLAHU ALAIHI WA SALLAM KI NAFARMANI SAREEH GUMRAAHI HAI

Kisi momin mard aur aurat ko ye haqq nahi hai k jab Allah aur uske Rasool kisi maamley ka faisla kare to phir use apne maamley mein khud faisla karne ka ikhtiyaar hasil rahey aur jo koi Allah aur uske Rasool ki nafarmani karega wo sareeh gumraahi mein padd gaya. (Surah Ahzaab Surah no. 33 Ayat no. 36)


ALLAH TA'ALA AUR RASOOL E AKRAM SALLALLAHU ALAIHI WA SALLAM KI NAFARMANI KARNE WALE APNE ANJAAM K KHUD ZIMMEDAAR HONGEY

Loogo! Allah aur Rasool ki ita'at karo aur nafarmani se baaz aa jao lekin agar tumne hukm na maana to jaan lo k tumhare Rasool par saaf saaf paigaam pahuncha dene k alawa koi zimmedari nahi. (Surah Maida Surah no. 5 Ayat no. 92)

Allah aur Rasool ki baat mano aur agar na maanoge to yaad rakkho hamare Rasool par saaaf saaf haqq baat pahuncha dene ki zimmedaari hai. (Surah Tagabun Surah no. 64 Ayat no. 12)

(Ae Muhammad Sallallahu Alaihi Wa Sallam!) keh dijiye k Allah ki ita'at karo, Rasool ki ita'at karo aur agar nahi karte to khoob samajh lo k Rasool par jis (farz yaani risalat) ka boojh dala gaya hai wo sirf usi ka zimmedaar hai aur tum par jis (farz yaani ita'at) ka baar dala gaya hai uske zimmedaar tum ho agar Rasool ki ita'at karoge to hidayat paoge warna Rasool ki zimmedaari us se zayada kuch nahi k saaf saaf hukm pahunchade. (Surah Noor Surah no. 24 Ayat no. 54)


ALLAH TA'ALA AUR RASOOL E AKRAM SALLALLAHU ALAIHI WA SALLAM KI NAFARMANI KI SAZA JAHANNAM AUR RUSWA KUN AZAAB HAI

Jo shaks Allah aur uske Rasool ki ita'at karega use Allah un jannato mein dakhil dakhil farmayega jinke niche nehrey beh rehi hongi aur jo shaks Allah aur Rasool ki ita'at se muh phairega wo use dardnaak azaab dega. (Surah Fatah Surah no. 48 Ayat no. 17)

HEELEY AUR BAHANEY TALAASH KARKE ALLAH TA'ALA AUR RASOOL E AKRAM SALLALLAHU ALAIHI WA SALLAM K AHKAMAAT SE PEHLU TAHI KARNA DARDNAAK AZAAB KA BAA'AS HAI

Musalmano! Rasool k bulane ko apne darmiyan ek doosre ko bulane ki tarah na samjh baitho, Allah un loogo ko khoob jaanta hai jo tum mein se ek doosre ki aadh lete hue chipkey se khisak jaate hai, Rasool k hukm ki khilaaf warzi karne walo ko darna chahiye k wo kisi fitney mein giraftaar na ho jaye ya unpar dardnaak azaab na aa jaye. (Surah Noor Surah no. 24 Ayat no. 63)

SUNNAT KI TAREEF

SUNNAT KI TAREEF

Bismillahirrahmanirraheem

SUNNAT KA LUGVI MANA TAREEQA YA RAASTA HAI. (KHAWAH ACCHA HO YA BURA)

Hazrat Juhaifah Razi Allahu Anhu kehte hai k Rasool Allah Sallallahu Alaihi Wa Sallam ne farmaya: "Jis shaks ne koi accha tareeqa jaari kiya aur uske baad us par amal kiya gaya to jaari karne wale ko apne amal ka sawab bhi milega aur us acche tareeqey par chalne wale doosre loogo k amal ka sawab bhi milega jabke amal karne wale loogo k apne sawab mein koi kami nahi ki jayegi aur jis shaks ne koi bura tareeqa jaari kiya jis par uske baad amal kiya gaya to uspar apna gunah bhi hoga aur un loogo ka gunah bhi jihone uspar amal kiya jabke bure tareeqey par amal karne wale loogo k apne gunaho se koi kami nahi ki jayegi". (Sahih Sunan Ibne Maja Hadees no. 172)

SHARI ISTALAH MEIN SUNNAT KA MATLAB RASOOL E AKRAM SALLALLAHU ALAIHI WA SALLAM KA TAREEQA HAI

Hazrat Anas bin Malik Razi Allahu Anhu kehte hai k Rasool Allah Sallallahu Alaihi Wa Sallam ne farmaya: "Jisne mere tareeqey par chalne se guraiz kiya wo mujh se nahi". (Sahih Bukhari Kitabun Nikah)

Hazrat Talha bin Abdullah bin Auof Razi Allahu Anhu kehte hai k mene Hazrat Abdullah bin Abbas Razi Allahu Anhu k pichey namaz e janaza padhi, to unhone usmey Surah Fatiha padhi aur farmaya: "(Mene ye is liye padhi hai takey) loogo ko ilm ho jaye k ye Nabi E Akram Sallallahu Alaihi Wa Sallam ka tareeqa hai". (Sahih Bukhari Kitabul Janaiz)

SUNNAT KI TEEN QISMEY HAI 1. SUNNAT E QAULI, 2. SUNNAT E FAILI, 3. SUNNAT E TAQREERI
RASOOL E AKRAM SALLALLAHU ALAIHI WA SALLAM KI ZUBANI IRSHAD E MUBARAK "SUNNAT E QAULI" KEHLATI HAI

Hazrat Huzaifah Razi Allahu Anhu kehte hai k Rasool Allah Sallallahu Alaihi Wa Sallam ne farmaya: "Aagar khana khane se pehle "BISMILLAH" na padhi jaye to shaitan us khaane ko apne liye halal samajh leta hai. (Sahih Muslim Kitabul It'amah)

RASOOL E AKRAM SALLALLAHU ALAIHI WA SALLAM K AMAL MUBARAK KO "SUNNAT E FAILI" KEHTE HAI

Hazrat Nauman bin Basheer Razi Allahu Anhu farmate hai jab hum namaz k liye khade hote to Rasool Allah Sallallahu Alaihi Wa Sallam hamari safey durust farmate, jab hum sidhey khade ho jate to "ALLAHU AKBAR" keh kar namaz shuru farmatey. (Sahih Sunan Abu Dawood Hadees no. 619)

RASOOL E AKRAM SALLALLAHU ALAIHI WA SALLAM KI MOJOODGI MEIN JO KAAM KIYA GAYA HO AUR AAP SALLALLAHU ALAIHI WA SALLAM NE KHAMOOSHI IKHTIYAAR FARMAYI HO YA US PAR IZHAAR PASANDEEDGI KIYA HO, USE "SUNNAT E TAQREEQI" KEHTE HAI

Hazrat Qais bin Umar Razi Allahu Anhu kehte hai Nabi E Akram Sallallahu Alaihi Wa Sallam ne ek aadmi ko subah ki namaz k baad 2 rakaatey padhte dekha to farmaya: "Subah ki namaz to 2 rakaat hai" us aadmi ne jawab diya "Mene farz namaz se pehle ki 2 rakaatey nahi padhi thi lihaza ab padhi hai" Rasool Allah Sallallahu Alaihi Wa Sallam ye jawab sun kar khamoosh ho gaye (yaani uski ijazat de di). (Sahih Sunan Abu Dawood Hadees no. 1128)

IBLEES (SHAITAN) FARISHTA YA JINN?

IBLEES (SHAITAN) FARISHTA YA JINN?

Bismillahirrahmanirraheem

Quran Majeed mein muta'addad muqamaat par kaha gaya hai k iblees ek farishta tha lekin Surah Kahaf mein farmaya hai k iblees ek jinn tha, kya ye baat Quran mein tazaad ko zahir nahi karti?

Quran E Kareem mein mukhtalif muqamaat par Aadam Alaihis Salaam aur iblees ka qissa bayan kiya gaya hai, Surah Baqarah mein Allah ta'ala ne farmaya: Humne farishto se kaha k Aadam ko sajdah karo, so un sabne sajdah kiya siwaye iblees k. (Surah Baqarah Surah no. 2 Ayat no. 34)

is baat ka tazkira hasb e zail ayaat mein bhi kiya gaya hai:

1. Surah Aaraaf Surah no. 7 Ayat no. 11
2. Surah Hijr Surah no. 15 Ayat no. 28-31
3. Surah Bani Israeel Surah no. 17 Ayat no. 61
4. Surah Taha Surah no. 20 Ayat no. 116
5. Surah Saad Surah no. 38 Ayat no. 71-74

Lekin Surah Kahaf Surah no. 18 Ayat no. 50 kehti hai: Aur jab humne farishto se kaha: Aadam ko sajdah karo to un sabne sajdah kiya siwaye iblees k wo jinno mein se tha, pas usne apne rabb k hukm ki nafarmaani ki. (Surah Kahaf Surah no. 18 Ayat no. 50)

TAGLEEB KA KALYAH

Surah Baqarah ki mazkoorah bala Ayaat k pehle hisse se hame ye taasir milta hai k iblees farishta tha, Quran E Kareem arbi zubaan mein nazil hua hai arbi grammar mein ek kalya tagleeb k naam se maroof hai jinke mutabiq agar aksariyat se khitab kiya ja raha ho to aqleet bhi khud ba khud usme shamil hoti hai, misal k taur par mein 100 talib e ilmo par mushtamil ek aesi class se khitab kar raha hu jisme ladko ki tadaad 99 aur ladki ki sirf 1 hai, aur mein arbi zuban mein ye kehta hu k sab ladkey khade ho jaye to uska itlaaq ladki par bhi hoga, mujhe alag taur par us se mukhatib hone ki zarurat nahi hogi.

Isi tarah Quran k mutabiq jab Allah ta'ala ne farishto se khitab kiya to iblees bhi waha mojood tha, ta'hum is amr ki zarurat nahi thi k uska zikr bhi alag se kiya jata, lihaza Surah Baqarah aur degar Surato ki ibarat k mutabiq iblees farishta ho ya na ho lekin 18vi Surah Kahaf ki 50vi aayat k mutabiq iblees ek jinn tha, Quran Kareem mein kahi ye nahi kaha gaya k iblees ek farishta tha, isi liye Quran e Kareem mein is hawaley se koi tazaad nahi.

IRADAH WA IKHTIYAAR JINNO KO MILA, FARISHTO KO NAHI

Is silsiley mein doosri aham baat ye hai k jinno ko irada wa ikhtiyaar diya gaya hai aur wo chaahe to ita'at se inkaar bhi kar sakte hai, lekin farishto ko iradah wa ikhtiyaar nahi diya gaya aur wo hamesha Allah ki ita'at baja laate hai, lihaza is baat ka sawal hi paida nahi hota k koi farishta Allah ki nafarmani bhi kar sakta hai, is haqeeqat se is baat ki mazeed ta'eed hoti hai k iblees ek jinn tha, farishta nahi tha.

JANNAT MEIN MARDO KO HOOREY MILENGI TO AURATO K LIYE KYA?

JANNAT MEIN MARDO KO HOOREY MILENGI TO AURATO K LIYE KYA?

Bismillahirrahamanirraheem

Quran E Kareem k mutabiq koi shaks jannat mein dakhil hoga to use hoor, yaani khoobsurat doshizah di jayegi, sawal ye hai k koi aurat jannat mein jayegi to use kya diya jayega?

Lafz Hoor quran e kareem mein kam az kam 4 mukhtalif muqamaat par istemaal hua hai

1. Yuh hi hoga aur hum unka nikah kar denge badi badi aankho wali hooro se. (Surah Dukhan Surah no. 44 Ayat no. 54)

2. Aur hum unka nikah badi badi aur roshan aankho wali hooro se kar denge. (Surah Taur Surah no. 52 Ayat no. 20)

3. Khaimo mein thehraayi gayi hoorey. (Surah Rahman Surah no. 55 Ayat no. 72)

4. Aur unke liye khoobsurat aankho wali hoorey hongi, aesi haseen jese chipa kar rakkhey hue mooti. (Surah Waqiyah Surah no. 56 Ayat no. 22,23)

HOOR KA MATLAB

Quran E Kareem k bahut se mutarjameen ne lafz e Hoor ka tarjuma khasusan urdu tarajim mein khoobsurat doshizaye ya ladkiya kiya hai, is surat mein wo sirf mardo k liye hongi, tab jannat mein jaane wali aurato k liye kya hoga?

Laft "Hoor" fi al waqey Ahwar (mardo k liye qabil e itlaaq) aur hoora'a (aurato k liye qabil e itlaaq) dono ka saigah jama hai aur ye ek aese shaks ki taraf ishara karta hai jiski aankhey hoor se mutasaf ho jo jannat mein jaane wale mardo aur khawateen ki saleh arwaah ko bakhshi jane wali khasusi sifat hai aur ye rohaani aankh k safaid hissey ki intihayi ujli rangat ko zahir karti hai.

Doosri kayi aayat mein quran e kareem mein farmaya gaya hai k jannat mein tumhare azwaaj, yani joodey honge, aur tumhe tumhara jooda ya pakeezah saathi ata kiya jayega,

irshad e bari ta'ala hai: Aur (Ae paigambar!) jo loog is kitab par emaan laye aur naik amal kare, unhe khushkhabri de do k unke liye aese baag hai jinke nichey nehrey behti hongi, jab bhi unmey se koi phal unhe khane ko diya jayega to wo kahenge k ye to wahi hai jo is se pehle humko dunya mein diya jata tha, unke liye waha pakeezah beewiya hongi aur wo waha hamesha rahenge. (Surah Baqarah Surah no. 2 Ayat no. 25)

Aur jin loogo ne hamari aayaat ko maan liya aur naik amal kiye, unko hum aese baago mein dakhil karenge jinke nichey nehrey behti hongi jaha wo hamesha rahenge, aur unko pakeezah beewiya milengi aur unhe hum ghani chaao mein rakkhenge. (Surah Nisa Surah no. 4 Ayat no. 57)

AURATO K LIYE KHASUSI INAAM

Bahut se ulama ka khayaal hai k quran mein jo lafz "Hoor" istemaal hua hai us se muraad sirf khawateen hai kyunki uske baare mein khitab mardo se kiya gaya hai, uska wo jawab jo sab qism k loogo k liye laziman qabil e qubool ho, hadees mubarak mein iska jawab diya gaya hai:

Allah ta'ala ne farmaya mene apne bando k liye wo kuch tayyar kar rakkha hai jise unki aankho ne dekha hai na unke kaano ne suna hai aur na kisi insaan k dil mein uska khayal guzra hai. (Sahih Bukhari Hadees no. 4779)

Hadees k lafz Ibaad mein mard aur aurat dono shamil hai albatta is silsiley mein sheikh Nasiruddin Albani Rahimahullah ne silsila saheeya mein ek hadees naqal ki hai k (jannat mein) aurat (dunya k lihaz se) aakhiri khawind k saath hogi. (Silsila Ahadees E Saheeya Hadees no. 1281)

Is se maloom hota hai k dunya mein shadi shuda aurat jannat mein bhi apne khawind hi k saath hogi, albatta jinki shadi na hui ya jinke khawind kafir hai unko jannat mein mardo k saath biyaah diya jayega. (Tafseer Ruhul Ma'aani 14/207)

AHLE HADEESO PAR EK AETRAAZ AUR USKA JAWAAB

AHLE HADEESO PAR EK AETRAAZ AUR USKA JAWAAB

Bismillahirrahmanirraheem

Bida'ati hazraat kehte hai k Ahle Hadees to kal paida hue hai, uske jawab mein kaha ja sakta hai k Aalam e islaam ka ek mash'hoor mu'arrikh Allama Ahmad bin Bashaar Maqdasi ne 1375 hijri mein Hindustaan k Sindh ka safar kiya tha, Sindh k mashoor muqaam mansoora k mutalliq wo kehta hai, "KANA AKSARUHUM AHLUL HADEES" yaani mansoora sindh k aksar musalman baashindey Ahle Hadees they. (Tareekh E Sindh Safa no. 375)

Allama Maqdasi k mazkoora bayan se saaf zaahir hota hai k chooti (4th) sadi hijri mein mansoora k aksar musalman Tahreek Ahle Hadees k alambardaar they aur Quran o Hadees par barahe raast amal karne waale Ahle Hadees they.

Mash'hoor Mua'rrikh Allama Abu Mansoor Abdul Qaadir Bagdaadi kehta hai: Rome, Aljeria, aazerbaijan baabul abwaab wagairah k tamaam musalman Ahle Hadees maslak par they aesa hi Africa, Spain aur bahar magrib k sarhadi musalman baashindey sab k sab Ahle Hadees they aur aesa hi habsha k sarhadi ilaaqey yaman k tamaam musalmaan Ahle Hadees they.

Allama Bagdaadi ka ye wazey aur waashgaaf bayan babanag dehal kehlaata hai k Ahle Hadees jis tarah muhadiseen k khaas garooh ko kehte hai isi tarah Ahle Hadees se muraad wo aam loog bhi hai jo barahe raast Quran o Hadees ko maante hai aur tahreek E Ahle Hadees ka jhanda lehraate hai

jis Mua'rrikh ka ye bayan hai uski wafaat 460 hijri mein hui ab khuda ka khauf kar k aur tassub chood kar ye bataye k wo tamaam Sahaba E Kiraam Razi Allahu Anhum wa A'imma E Kiraam wa Tabaeen E Azaam wa Mua'rrakheen jinke bayanaat abhi guzarey kya wo kal k hai?

Muqadma bin Khaaldoon “FAZLUN FI ILMIL FIQHA” mein Allama Ibne Khaaldoon Rahimahullah Sahaba E Kiraam Razi Allahu Anhum k baad k zamaane k baare mein likhte hai k unme fiqah 2 tareeqo mein taqseem ho gayi

Ahle Raaye wa Qayaas ka tareeq aur wo Ahle Iraaq hai
Aur Ahle Hadees ka tareeq aur wo Ahle Hijaaz hai

Insaaf se bataiye k Allama Ibne Khaldoon Rahimahullah jo Ahle Hijaaz ko Ahle Hadees keh rahe hai kya ye bhi kal ki baat hai?

Shaami Sharah Durre Mukhtaar mein hai k Qaazi Abu Bakr jo zajaani k ahad mein ek hanfi ne ek Ahle Hadees se uski ladki ka rishta maanga alfaaz ye hai: "INNA RAJULAN MIN ASHAABI ABI HANEEFATA KHATABA ILA RAJULIN MIN ASHAABIL HADEES" tu us Ahle Hadees ne inkaar kar diya magar is soorat mein k hanfi apna mazhab taqleed chood de, is hanfi ne wo baat manzoor karli to Ahle Hadees ne apni ladki us se biyah di.

Gaur fameinye yaha to teesri (3rd) sadi mein Ahle Hadees ka zikr mojood hai phir wo loog kitne mutassub aur kis qadar galti par hai jo kehte hai k Ahle Hadees to Naya Firqa hai abhi kal paida hua hai.

Sach farmaya imam Tahavi Hanfi Rahimahullah ne k "LA YUQALLIDU ILLA ASBIYUN AAU GABIYUN" k taqleed wahi karega jo tassub parast aur ahmaq ho. (Rasmul Mufti li ibne Aabideen Safa no. 32)

Hazrat Imam Tahavi Rahimahullah ne saaf faramaya k muqallid bada tassub parast aur bewakoof hota hai, ab aesa aadmi jitna awwal fa'al bakey kam hai.

Allah ta’ala musalmaano ko fiqr e mustaqeem ata farmaaye. (Aameen Ya Rabbal Alameen)

KYA AHLE HADEES KOI NAYA FIRQA HAI?

KYA AHLE HADEES KOI NAYA FIRQA HAI?

Bismillahirrahmanirraheem

Ahle Hadees murawwajah mazhabo ki tarha koi mazhab nahi, na mukhtalif firqo ki tarha koi firqa hai balke Ahle Hadees ek jamaat aur tehreer ka naam hai aur wo tehreer hai zindagi k har shobey mein Quran wa Hadees k mutabik amal karna aur dusro ko un dono par amal karne ki targeeb dilana ya yuh keh dijiye k Ahle Hadees ka nisb wa ayen Kitab o Sunnat ki dawat aur Ahle Hadees ka manshoor Quran o Hadees hai.

“DASTOOR E AHLE HADEES K 2 USOOL”
     “ATI ULLAHA WA ATIUR RASOOL”

Kyunki Allah ne apne Nabi ko huqm diya: “IT'TABI O MA OUHIYA ILAIKA MIR RABBIKA” - yani ae Nabi tumhare paas jo wahi ki gayi hai uski itteba karo aur Nabi k sath sath Allah ne Nabi k pairokaro ko bhi huqm farmaya: “IT'TABI O MA UNZILA ILAIKUM MIR RABBIKUM WALA TAT'TABI O MIN DOONIHI AU’LIYA” - yani ae ummat e Muhammadiya tum sirf us ki itteba karo jo tumhare paas tumhare perokaro ki taraf se nazil kiya gaya hai aur uske alawa degar waliyo ki pervi mat karo.
Mazkura bala dono ayato se wazey hota hai k har musalman ko Allah ki taraf se nazil shuda ahkaam ki pervi karna chahiye aur gair Allah ki baato par dhayan na dena chahiye.
yaha ek sawal paida ho sakta hai k Allah ki taraf se nazil shuda cheez kya hai?
iske jawab mein khud Allah ta'ala ne farmaya: “WA ANZALALLAHU ALAIKAL KITAABA WAL HIKMAH” - yaani Allah ne tum par kitab aur hikmat utari hai.
yaha ye bhi sawal paida ho sakta hai k kitab se muraad kya hai?, iski tafseer tabayi k sardaar Hasan Basri Rahimahullah aur Katadah Rahimahullah ne farmaya k kitab se muraad Quran aur hikmat se muraad Sunnat hai. (Tafseer ibne kaseer jild 1 safa no. 185)

Is k alawa ek mash'hoor tabayi Hazrat Hassan bin Ateeya Rahimahullah se marvi hai k Jibraeel Alahis Salaam jis tarah Quran le kar naazil hue they isi tarah Sunnat le kar bhi utrey they aur Aap Sallallahu Alaihi Wa Sallam ko hadees ki taleem is tarah dete they jis tarah Quran ki taleem dete they. (Al Kifayah fi ilmur riwayah safa no. 14)

Khud Aan Hazrat Sallallahu Alaihi Wa Sallam ne farmaya: “ALA INNI OOTEETUL QUR'AANA WA MISLAHU MA'A'HU”, yaani tum loog jaan lo k mujhe Quran aur isi k saath isi k manind ek cheez di gayi hai. (Abu Dawood wa Ibne Maja)

Mazkoora baala Hadees e paak aur Tabaeen E Azaam ki tasrihaat se ye baat wazey ho gayi k Quran wa hadees dono nazil shuda hai

AHLE HADEES KA MANA (MEANING)

Ahle Hadees do lafzo se mil kar bana hai ek hai Ahle dosra hai Hadees, Ahle ka maana hai "wala" aur Hadees a mana "Quran o Hadees" isliye Ahle Hadees ka mana hua "Quran o Hadees wala"
Lafz Hadees ka mana Quran bhi hai aur Hadees bhi, Hadees ka lafz dono ko shamil hai, Rasool Allah Sallallahu Alaihi Wa Sallam ne Quran ko Hadees kaha hai jese har khutbe mein Aap Sallallahu Alaihi Wa Sallam farmaate they: “FA INNA KHAIRAL HADEESI KITABULLAH”, k sab se behtar Hadees Allah ki kitaab hai

Allah k kalaam k alawa Nabi k qaul wa kalaam ko bhi Hadees kaha gaya hai, jese Quran mein hai: “WA IZ ASARRAN NABIYU ILA BAAZI AZWAJIHI HADEESA”, k jab Nabi Sallallahu Alaihi Wa Sallam ne apni baaz beewiyo se ek baat poshidah rakkhi yaha is ayat mein Hadees se muraad Rasool ki baat hai.

AHLE SUNNAT NAAM KI ZARURAT

Nabi paak ki rahmat k chabbees (26) saal k baad 37 hijri mein Ameer E Muaviya Razi Allahu Anhu aur Hazrat E Ali Razi Allahu Anhu mein bamuqaam Siffeen badi zabardast jang hui is jang mein jab Ameer E Muaviya Razi Allahu Anhu ki fouj haarne lagi to unhone Quran ko neezo par utha liya, aur Qur'aani faislo k mutabiq jang bandi ki tajweez paish ki is tajweez ko Hazrat Ali Razi Allahu Anhu ne qubool farma liya aur sulah k zariye ladayi khatam ho gayi, is jang se bezaar ho kar hamiyaan e Ali Razi Allahu Anhu k 1200 ifraad Hazrat Ali Razi Allahu Anhu ki jamaat tark karke jamaat se nikal gaye ye loog khaarji kehlaye, in loogo ne Quran ko maan'ne k saath saath Hadeese ghadna shuru kar diya is liye in loogo ko musalmaan naam k saath saath Ahle Bida'at ka laqab de diya gaya, aur jo loog Quran maan'ne k saath saath Sunnat ko maante rahe unka laqab Ahle Sunnat pad gaya jesa k mash'hoor tabayi Muhammad bin Seereen Rahimahullah farmaate hai: “FA YUNZARU ILA AHLIS SUNNATI FAYU KHAZU HADEESUHUM WA YUNZARU ILA AHLIL BID'ATI FALA YOKHAZU HADEESUHUM”, yaani Ahle Sunnat ko dekh kar unki Hadeese qubool ki jaati thi aur Ahle Bida'at ko dekh kar unki Hadeese qubool nhi ki jaati thi. (Muqadma Muslim)

Hazrat Peerane Peer Abdul Qadir Jeelaani Rahimahullah farmaate hai: “AHLUS SUNNATI LA ISLA LAHUM ILLA ISMUN WAAHIDUN WA HUA ASHAABUL HADEES”, yaani Ahle Sunnat ka ek hi naam hai aur wo hai Ahle Hadees. (Gunyatut Talibeen Matbua E Karachi Safa no. 710)

Bade peer sahab ki is tashreeh se pata chala k Ahle Sunnat ka doosra naam sirf aur sirf Ahle Hadees hai aur doosra koi naam nahi

Hazrat Umar Razi Allahu Anhu farmaate hai k tumhare paas shareer qaum ayegi, shubhaat e Quraan ko paish kar k jhagdegi tum unse Sunnat E Nabi Sallallahu Alaihi Wa Sallam k saath mubahasa karo, kyunki Ahle Hadees kitab Allah aur Sunnat E Rasoolullah Sallallahu Alaihi Wa Sallam se zayada aagah hai.

Imam Khataabi Rahimahullah farmaate hai k Ashaab E Sunan Ahle Hadees hai. (Sheraani Meezan ul Kubra jild 1 safa no. 46)

Rasool Allah Sallallahu Alaihi Wa Sallam farmaate hai jab shaami loog fasaad karenge us waqt tum mein kuch bhi bhalayi nahi rahegi, meri ummat se ek jamaat hamesha haq par rahegi kisi ki mukhalifat usko nuksaan nahi pahuncha sakegi.
imam Ali bin Madeeni Rahimahullah (Imam Bukhari Rahimahullah K ustaad) farmaate hai k wo jamaat Ahle Hadees hai. (Tirmizi Baabul Fitan)



IMAM ABU HANIFA RAHIMAHULLAH KA MAZHAB

Kisi ne Sufyaan bin Uyeyna Rahimahullah se pucha k tum Ahle Hadees kese hue to unhone jawab diya k mujhe Imam Abu Hanifa Rahimahullah ne Ahle Hadees banaya. (Hada'iqul hanafiah)

mazkoora bala waqiya se ye maloom hua k jis raah par Hazoor Sallallahu Alaihi Wa Sallam aur Sahaba Razi Allahu Anhum chalte they Imam Sahab bhi usi raaste par gaamzan they aur doosro ko bhi usi raaste par chalne ki talqeen karte they.

IMAM SHAFA'I RAHIMAHULLAH KA MAZHAB

Imam Shafa'i Rahimahullah farmaate hai k Ahle Hadees har zamaney mein mojood rahenge maanind sahaba Razi Allahu Anhum k, aur farmaate they k jab mein Ahle Hadees ko dekhta hu to gooya Sahabi E Rasool Sallallahu Alaihi Wa Sallam ko dekhta hu. (Meezaanul Kubra Sheraani)

IMAM AHMAD BIN HAMBAL RAHIMAHULLAH KA MAZHAB

Rasool Allah Sallallahu Alaihi Wa Sallam ne farmaya: "LA TAZAALU TAA IFATUM MIN UMMATI MANSOOREENA LA YAZURRUHUM MANA KHAZA LAHUM HATTA TAQOOMAS SAA'AH" yani meri ummat mein se ek garoh hamesha gaalib rahega jo loog unko ruswa karna chahenge unko nuksaan nahi pahuncha sakenge. (Tirmizi Jild 2 Safa no. 42)

Is Hadees se maloom hua k Nabi Paak Sallallahu Alaihi Wa Sallam k daur e mubarak se qayamat tak ek jama'at haqq par qayam rahegi.

Ab sawaal paida hota hai k wo konsi jama'at hai?, Imam Hakim Rahimahullah ne Uloom E Hadees mein Sahih Sanad se Imam Ahamad bin Hambal Rahimahullah se naqal kiya hai k Imam mosoof Rahimahullah farmaate hai k agar us Hadees (FALA YAZAALU TAA IFATUN) se muraad Ahle Hadees nahi hai to mein nahi jaanta k wo kaun hai?

IMAM MAALIK RAHIMAHULLAH KA MAZHAB

Imam Ku-bani Rahimahullah kehte hai k Imam Malik Rahimahullah maut k waqt roone lage mene pucha k aap kyu roote hai kaha kyu na roouo mene bahut se fatwe apni raaye se de diye kaash mein aesa na karta aaj mujhe uska ranj hai mein pasand karta hu k har fatwe k badle jo mene apni raaye se diye ek ek maar kha kar choot jao. (Ibne Khalkaan jild 2 safa no. 11)

Hazrat Imam Malik Rahimahullah ye batana chahte they k raaye wa qayaas koi achhi cheez nahi, asal cheez Quran o Hadees hai isi par loogo ka amal hona chahiye aur un dono par amal karne wale Ahle Hadees na kahe jaye to aur kya kahe jaye?



IMAM ABU BAKR BIN AYAASH RAHIMAHULLAH KA FARMAAN

"WA KANA ABU BAKRIBNI AYAASHIN YAQOOLU AHLUL HADEESI FI KULLI ZAMAAB" k Abu Bakr bin Ayaash kehte hai k Ahle Hadees har zamaane mein mojood rahenge. (Meezaan Sheranai jild 1 safa no. 48)

BADE PEER SAHAB (ABDUL QADIR JEELANI RAHIMAHULLAH) KA FARMAAN

Hazrat Sheikh Abdul Qadir Jeelani Rahimahullah farmate hai k bida'atiyo ki nishaani ye hai k wo Ahle Hadees ki bad gumaani karte hai. (Gunyatut Talibeen)

Sun liya aapne shah jeelani Rahimahullah ki zubaani se k bida'ati loog Ahle Hadees k liye burey burey alqaab ghadhte hai, azrah bugz wa hasad kabhi unko wahabi, Najdi kaha jata hai kabhi la-mazhab aur Gair Muqallid kaha jata hai kabhi 24 number k laqab se pukara jata hai.

"TABSIRA JAB KISI PAR KIYA KIJIYE
AYEENA SAAMNE RAKH LIYA KIJIYE"

BISTAR KA BAYAN

BISTAR KA BAYAN

Bismillahirrahmanirraheem

RASOOL E AKRAM SALLALLAHU ALAIHI WA SALLAM KA TAKIYA AUR BISTAR DONO DABAGAT KIYE HUE CHAMDEY K THEY JISME KHAJOOR K PATTEY BHARE HUE THEY

Hazrat Ayesha Razi Allahu Anha farmati hai k Rasool Allah Sallallahu Alaihi Wa Sallam ka takiya jis par Aap Sallallahu Alaihi Wa Sallam raat ko neend farmate, dabagat kiye hue chamdey ka tha jisme khajoor k pattey bhare hue they. (Abu Dawood Kitabul Libas 2: 3493)

Hazrat Ayesha Razi Allahu Anha farmati hai k Rasool Allah Sallallahu Alaihi Wa Sallam ka bistar chamdey ka tha jisme khajoor k pattey bhare hue they. (Sahih Bukhari Kitabur Riqaaq)

TAKIYE KA ISTEMAAL MUSTAHAB HAI

Hazrat Jabir bin Samurah Razi Allahu Anhu kehte hai mene Nabi E Akram Sallallahu Alaihi Wa Sallam ko takiye k saath taik lagaye hue dekha. (Tirmizi Abwabul Adab 2: 2223)

BILA IJAZAT KISI KA TAKIYA ISTEMAAL KARNA JAYEZ NAHI

Hazrat Abu Masood Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya: "Ijazat k bagair koi aadmi doosre ki jagah imamat na karaye aur na hi ijazat k bagair kisi ki musnad par baithey". (Tirmizi Abwabul Adab an Rasool Allah Sallallahu Alaihi Wa Sallam 2: 2224)

RESHAM K BISTAR, GADDEY, TAKIYE WAGAIRAH BANANA JAYEZ NAHI

Hazrat Huzaifah Razi Allahu Anhu kehte hai Nabi E Akram Sallallahu Alaihi Wa Sallam ne hame soone aur chandi k bartano mein khane peene se mana farmaya, resham aur debaaj (bareek raishmi kapde ki umdah qism) pehan'ne se aur us par baithne se mana farmaya. (Sahih Bukhari Kitabul Libas)

ZARURAT SE ZAYID BADHAYI AUR SHOHRAT KI KHATIR BISTAR BANANA MANA HAI

Hazrat Jabir Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya: "Ek bistar mard k liye, ek bistar beewi k liye aur ek bistar mehmaan k liye kaafi hai, chootha bistar (yaani zarurat se zaayid) shaitan k liye hai". (Sahih Muslim Kitabul Libas Waz Zeenah)

BISTAR PAR LAITNE K BAAD SOONE SE QABL DARJ ZAIL DUAYE MAANGNA MASNOON HAI

Hazrat Huzaifah Razi Allahu Anhu se riwayat hai k Nabi E Akram Sallallahu Alaihi Wa Sallam jab raat k waqt apne bistar par tashreef laate to apna haath (daahine) rukhsaar k niche rakhte aur farmate ("ALLAHUMMA BISMIKA AMOOTU WA AHYA" Tarjuma: "ya Allah! mein tere naam se marta (yaani soota hu) aur zinda hota (yaani jaagta) hu") aur jab jaagte to farmate ("ALHAMDU LILLAHIL LAZI AHYAANA BAADA MA AMAATANA WA ILAIHIN NUSHOOR" Tarjuma "Us Allah ka shukr hai jisne hame marne (yani soone) k baad zindah kar diya (yani jaga diya) aur marne k baad usi k huzoor hazir hona hai"). (Mukhtasar Sahih Bukhari Hadees no. 3073)

Hazrat Hafsa Razi Allahu Anha se riwayat hai k Rasool Allah Sallallahu Alaihi Wa Sallam soone ka irada farmate to daaya haath rukhsaar k nichey rakhte aur teen martaba ye kalmaat padhte ("ALLAHUMMA QINI AZAABAKA YAUMA TAB'ASU IBADAKA" Tarjuma "Ya Allah! jis rooz tu apne bando ko uthyega mujhe apne azaab se bachaye rakhna") (Sahih Sunan Abu Dawood Hadees no. 4218)

Hazrat Abu Hurairah Razi Allahu Anhu kehte hai k Rasool Allah Sallallahu Alaihi Wa Sallam ne farmaya: "Jab tum mein se koi apne bistar par aye to (pehle) apne tahband k koone se bistar ko jhaade kyunki use maloom nahi k bistar par kya pada hai? phir ye dua padhey ("BISMIKA RABBI WAZAATU JAMBI WA BIKA ARFA'UHU IN AMSAKTA NAFSI FARHAMHA WA IN ARSALTAHA FAHFAZHA BIMA TAHFAZU BIHI IBADAKAS SAALIHEEN" Tarjuma "Ae mere Rabb! tere naam se (bistar par) lait'ta hu aur tere naam se uthunga agar tune meri jaan (apne paas) rook li to us par raham farma aur agar wapas bhej di to uski wesi hi hifazat farma jese tu naik bando ki hifazat farmata hai")". (Al loo loo wal Marjaan Hadees no. 4218)

WUZU K SAATH BISTAR PAR SOONE WALE K LIYE FARISHTO KI DUAYE

Hazrat Abdullah bin Umar Razi Allahu Anhu kehte hai Rasool Allah Sallallahu Alaihi Wa Sallam ne farmaya k "Jo shaks wuzu ki halat mein soota hai uske saath ek farishta raat basr karta hai wo shaks jab bhi neend se baidaar hota hai to farishta uske liye ye dua maangta hai "Ya Allah! apne is bande k gunah maaf farma yaqeenan wo taharat ki halat mein sooya tha". (Sahih ibne Hibban Hadees no. 1051)

RAAT KO WUZU KI HALAT MEIN ZIKR KARTE HUE APNE BISTAR PAR SOONE WALE SHAKS K BAIDAAR HONE PAR MAANGI HUI HAR DUA QUBOOL HOTI HAI - IN SHA ALLAH

Hazrat Muaaz bin Jabal Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jab koi musalman halat e taharat mein zikr karte hue soota hai to baidaar hone par Allah ta'ala se dunya wa aakhirat ki jo bhi bhalayi talab kare Allah ta'ala usko ata farmata hai". (Abu Dawood Abwabun Naum 3: 4216)

MOOZO (SOCKS) KA BAYAN

MOOZO (SOCKS) KA BAYAN

Bismillahirrahmanirraheem

MOOZEY PEHAN'NA MUSTAHAB HAI

Hazrat Mugeera bin Shubah Razi Allahu Anhu se riwayat hai k Hazrat Dahyah kalbi Razi Allahu Anhu ne Rasool Allah Sallallahu Alaihi Wa Sallam ko moozo ka tohfa bheja jinhe Aap Sallallahu Alaihi Wa Sallam ne istemaal farmaya. (Tirmizi Abwabul Libas 2: 1448)

Hazrat ibne Buraidah Razi Allahu Anhu apne baap (Hazrat Buraidah Razi Allahu Anhu) se riwayat karte hai k najashi (shah habsh) ne Rasool Allah Sallallahu Alaihi Wa Sallam k liye do saada siyaah rang k mooze tohfatan bheje, Aap Sallallahu Alaihi Wa Sallam ne wo istemaal farmaye. (Ibne Maja Abwabul Libas 2: 2917)

MOOZO PAR MASAAH KARNA JAYEZ HAI

Hazrat Jafar bin Umar Razi Allahu Anhu apne baap se riwayat karte hai k unhone kaha mene Nabi E Akram Sallallahu Alaihi Wa Sallam ko pagdi aur moozo par masaah karte hue dekha. (Sahih Bukhari Kitabul Wuzu)

Hazrat Mugeerah Razi Allahu Anhu apne baap se riwayat karte hai k Nabi E Akram Sallallahu Alaihi Wa Sallam ne moozo par, paishani par aur pagdi par masaah kiya. (Sahih Muslim Kitabut Taharah)

Hazat Bilal Razi Allahu Anhu se riwayat hai k Rasool Allah Sallallahu Alaihi Wa Sallam ne moozo aur pagdi par masaah kiya. (Sahih Muslim Kitabut Taharah)

JOOTO (SHOES) KA BAYAN

JOOTO (SHOES) KA BAYAN

Bismillahirrahmanirraheem

JOOTA PEHAN'NA MUSTAHAB HAI

Hazrat Jabir Razi Allahu Anhu kehte hai mene Nabi E Akram Sallallahu Alaihi Wa Sallam ko ek gazwah k safar mein ye farmate hue suna hai "Joota kasrat se pehna karo, jab tak aadmi joota pehanta rahe wo sawaar hai". (Sahih Muslim Baab Istajaab labsan naal wama fi manaha)

Wazahat: "Sawaar rehne" se muraad ye hai jis tarah janwar par sawar aadmi zameen k moozi keedo makoodo se mehfooz rehta hai usi tarah joota pehan'ne wala bhi gooya sawaar ki tarah hai jo zameen k keedo makoodo aur azeeyat dene wali cheezo se mehfooz rehta hai. (Wallahu Aalam bis Sawab)

PEHLE DAAYE PAO KA JOOTA PEHAN'NA CHAHIYE PHIR BAAYE PAO KA

Hazrat Ayesha Razi Allahu Anha farmati hai Nabi E Akram Sallallahu Alaihi Wa Sallam wuzu karne, kanghi karne aur joota pehan'ne mein daayi taraf se ibtida pasand farmate. (Sahih Bukhari Kitabul Libas)

JOOTA UTAARTE WAQT PEHLE BAAYA PHIR DAAYA JOOTA UTAARNA CHAHIYE
RASOOL E AKRAM SALLALLAHU ALAIHI WA SALLAM K NAALAIN MUBARAK MEIN DO DO TASMEY THEY

Hazrat Anas Razi Allahu Anhu se riwayat hai k Nabi E Akram Sallallahu Alaihi Wa Sallam k joote mein do do tasmey they. (Sahih Bukhari Kitabul Libas)

Wazahat: Doosri hadees mein ek tasmey ka zikr bhi hai. (Bukhari)

KHADE HO KAR JOOTA PEHEN'NA MANA HAI

Hazrat Jabir Razi Allahu Anhu kehte hai Rasool Allah Sallallahu Alaihi Wa Sallam ne khade ho kar joota pehan'ne se mana farmaya hai. (Abu Dawood Kitabul Libas 2: 3483)

Wazahat: Joota tang ho ya aesa joota jise khade ho kar pehan'ne mein waqt aur dushwari ho ya girne ka khatra ho, aesa joota khade ho kar pehan'ne se mana farmaya gaya hai, sendal ya chappal wagairah aasani se pehne jaane wale joote khade ho kar pehan'ne jayez hai. (Wallahu Aalam bis Sawaab)

SIRF EK PAO MEIN JOOTA PEHAN KAR CHALNA MANA HAI

Hazrat Abu Hurairah Razi Allahu Anhu kehte hai k tum mein se koi shaks ek pao mein joota pehan kar na chale balkey dono pehan kar ya dono utaar kar chale. (Sahih Bukhari Kitabul Libas)

MARDANA JOOTO KI SAAKHAT WALE JOOTE PEHAN'NE WALI AURAT MAL'OON HAI, ZANANA JOOTO KI SAAKHAT WALE JOOTE PEHAN'NE WALE MARD MAL'OON HAI

Hazrat Abu Mulaikah Razi Allahu Anhu kehte hai Hazrat Ayesha Razi Allahu Anha se daryaft kiya gaya k "Jo aurat mardo ka joota pehne uske baare mein kya hukm hai? Hazrat Ayesha Razi Allahu Anha ne kaha "Rasool Allah Sallallahu Alaihi Wa Sallam ne mard banne wali aurat par laanat farmayi hai". (Abu Dawood Kitabul Libas 2: 3455)

JOOTA PEHANTE YA UTARATE WAQT KOI DUA SUNNAT SE SABIT NAHI

Hazrat Abu Hurairah Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Tum mein se jab koi shaks joota pehne to pehle daaya joota pehne aur jab joota utare to pehle baya pao utare yani pehan'ne mein daaya pehle aur utarne mein baaya pehle". (Sahih Bukhari Kitabul Libas)

SURMA KA BAYAN

SURMA KA BAYAN

Bismillahirrahamanirraheem

SURMA ISTEMAAL KARNA MUSTAHAB HAI

Hazrat Abdullah bin Abbas Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya: "Surma lagaya karo ye nazar ko taiz karta hai aur baalo ko badhata hai". (Tirmizi Abwabul Libas 2: 1438)

Wazahat: Raat ko soone se qabl Aap Sallallahu Alaihi Wa Sallam ka rozana daayi aur baayi aankh mein teen teen salaayi surma lagana sahih hadees se sabit hai.

SURMA TAAQ MARTABA AANKH MEIN DAALNA CHAHIYE

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya: "Tum mein se jab koi shaks surma lagaye to taaq martaba lagaye aur jab koi khushbu ki dhooni le to taaq martaba le". (Musnad Ahmad, Silsila Ahadees E Saheeya Hadees no. 1260)

DAHNI AANKH MEIN TEEN MARTABA AUR BAAYI AANKH MEIN DO MARTABA SALAAYI DAALNA MUSTAHAB HAI

Hazrat Abdullah bin Umar Razi Allahu Anhu kehte hai jab Nabi E Akram Sallallahu Alaihi Wa Sallam surma lagate to dahini aankh mein teen martaba aur baayi aankh mein do martaba silaayi lagate aur saari tadaad e witr (yani paanch) banate. (Tabraani, Silsila Ahadees E Saheeya Hadees no. 1633)

ZAIVRAAT KA BAYAN

ZAIVRAAT KA BAYAN

Bismillahirrahmanirraheem

SOONE K ZAIVRAAT MASALAN SOONE KI ANGOOTHI, SOONE KI ZANJEER, SOONE KA LOCKET, GHADI KI SOONE KI CHAIN, QAMEES K SOONE K BATAN WAGAIRAH MARDO K LIYE HARAAM HAI JABKE AURATO K LIYE JAYEZ HAI

Hazrat Abu Musa Ash'ari Razi Allahu Anhu se riwayat hai k Nabi E Akarm Sallallahu Alaihi Wa Sallam ne farmaya: "Meri ummat k mardo k liye raisham aur soona pehan'na haraam kiya gaya hai albatta aurato k liye jayez hai". (Tirmizi Abwabul Libas 2: 1404)

MARDO K LIYE SOONE KI ANGOOTHI PEHANNA HARAAM HAI

Hazrat Abu Hurairah Razi Allahu Anhu se riwayat hai k Nabi E Akram Sallallahu Alaihi Wa Sallam ne soone ki angoothi pehan'ne se (mardo) ko mana farmaya hai. (Sahih Bukhari Kitabul Libas wa Sahih Muslim Kitabul Libas Wal Zeenah)

SOONE KI ANGOOTHI, ZANJEER, LOCKET AUR BAALIYA WAGAIRAH PEHAN'NE WALE MARD (AURATO SE MUSHABAHAT KI WAJAH SE) MAL'OON HAI

Hazrat Abdullah bin Umar bin Aas Razi Allahu Anhu kehte hai mene Rasool Allah Sallallahu Alaihi Wa Sallam ko farmate hue suna hai k "Aurato mein se mardo ki mushabihat ikhtiyaar karne wali aurate aur mardo mein se aurato ki mushabihat ikhtiyaar karne wale mard hum mein se nahi". (Musnad Ahmad 11/461 tehqeeq shaubul arnaoot Hadees no. 6875)

AURATO K LIYE PAO MEIN AWAAZ DENE WALA ZAIWAR PEHAN'NA MANA HAI

Hazrat Ayesha Razi Allahu Anha farmati hai k mere paas ek ladki aayi jisne awaaz dene wale ghungru pao mein pehne hue they Hazrat Ayesha Razi Allahu Anha ne (uski walida se) kaha iske ghungru kaate bagair mere paas na laya karo is liye k mene Rasool Allah Sallallahu Alaihi Wa Sallam ko farmate hue suna hai k "Jis ghar mein ghanti ho us ghar mein farishte dakhil nahi hote". (Abu Dawood Kitabul Khatim 2: 3560)

JAB AURAT PAO MEIN GHUNGHRU PEHENTI HAI TO RAHMAT K FARISHTE US SE ALAG HO JAATE HAI

Hazrat Saalim Razi Allahu Anhu apne baap se riwayat karte hai k Nabi E Akram Sallallahu Alaihi Wa Sallam ne farmaya: "Farishte un loogo k saath nahi rehte jinke saath ghunghru ho". (Nasayi Kitabuz Zeenah 3: 4816)

SOONE AUR CHAANDI K BARTAN MEIN KHANA PEENA MARDO AUR AURATO DONO K LIYE HARAAM HAI

Hazrat Ummey Salma Razi Allahu Anha kehti hai k Rasool Allah Sallallahu Alaihi Wa Sallam ne farmaya: "Jo (mard wa aurat) soone ya chaandi k bartan mein peeta hai wo gooya jahannam ki aag apne pait mein utaarta hai". (Sahih Muslim Kitabul Libas Wal Zeenah)