ROOZO MAI RUKHSAT K MASA'IL

ROOZO MAI RUKHSAT K MASA'IL

Bismillahirrahmanirraheem

SAFAR MAI ROOZA RAKHNA AUR CHOODNA DONO DURUST HAI

Hazrat Ayesha Razi Allahu Anha se riwayat hai k Hamzah bin Umar Aslami Razi Allahu Anhu ne Nabi E Akram Sallallahu Alihi Wa Sallam se pucha: "kya mai safar mai rooza rakkhu?" aur wo kasrat se roozey rakhne wale they, Nabi E Akram Sallallahu Alihi Wa Sallam ne farmaya: "Agar chaahey to rakh chaahey to na rakh". (Sahih Bukhari wa Sahih Muslim)

Hazrat Abu Saeed Khudri Razi Allahu Anhu se riwayat hai k hum soohlavey (16th) roozey Nabi E Akram Sallallahu Alihi Wa Sallam k saath jihaad k liye nikle hum mai se baaz loogo ne rooza rakkha aur baaz loogo ne chood diya, na roozadaar ne be rooz par aetraaz kiya na be rooz ne roozadaar par aetraaz kiya. (Sahih Muslim, Mukhtasar Sahih Muslim Hadees no. 599)

HAIZ WA NIFAAS WALI AURAT KO MAZKOORA HAALAT MAI ROOZA NAHI RAKHNA CHAHIYE, HAIZ YA NIFAAZ KHATAM HONE K BAAD ROOZEY KI QAZA ADA KARNI HAI
DOODH PILAANE WALI AURAT HAMILA AURAT KO ROOZA NA RAKHNE KI RUKHSAT HAI BAAD MAI SIRF QAZA HOGI.

Hazrat Abu Saeed Khudri Razi Allahu Anhu ne kaha Nabi E Akram Sallallahu Alihi Wa Sallam ne farmaya: "Kya aesa nahi (yaani aesa hai) k aurat jab haiza hoti hai to na namaz padh sakti hai na rooza rakh sakti hai aur unke deen mai kami ki yahi wajah hai". (Sahih Bukhari Kitabus Siyaam)

Anas Ibne Maalik kaabee Razi Allahu Anhu se riwayat hai k Rasool Allah Sallallahu Alihi Wa Sallam ne farmaya: "Allah ta'ala ne musafir ko rooza mu'akkhar aur nisf namaz ki rukhsat de di hai jabke hamila aur doodh pilaane wali aurat ko rooza mu'akkhar karne ki rukhsat di hai". (Musnad Ahmad, Nasayi, Tirmizi, Ibne Maja, Sahih Sunan Tirmizi Hadees no. 575)

Hazrat Abu Zinaad Rahimahullah kehte hai masnoon aur sharayi ahkaam basa auqaat raaye k bar aks hote hai lekin musalmano par un ahkaam ki pairvi karna laazim hai, inhi ahkaam se ek ye bhi hai k haiza roozo ki qaza to de lekin namaz ki qaza na de. (Sahih Bukhari Kitabus Siyaam)

SAFAR YA JIHAAD MAI DUSHWAARI K PAISH E NAZAR ROOZA TARK KIYA JA SAKTA HAI AUR AGAR RAKKHA HO TO TOODA JA SAKTA HAI IS KI SIRF QAZA HOGI KAFFARA NAHI

Hazrat Abdullah bin Abbas Razi Allahu Anhu se riwayat hai k Nabi E Akram Sallallahu Alihi Wa Sallam ramazaan k maheene mai makka ki taraf (chadhayi k iraadey se nikle) jab muqaam e kadeed par pahunche to aapne rooza tood diya aur loogo ne bhi tood diya. (Sahih Bukhri wa Sahih Muslim, Al loo loo wal Marjaan Hadees no. 680)

BUDHAAPA YA AESI BIMAARI JIS K KHATAM HONE KI TOOKEY NA HO, KI WAJAH SE ROOZA RAKHNE KI BAJAAYE FIDYA ADA KIYA JA SAKTA HAI, EK ROOZA KA FIDYA EK MISKEEN KO 2 WAQT KA KHAANA KHILANA HAI

Hazrat Ibne Abbas Razi Allahu Anhu se riwayat hai k boodhey ko rooza na rakhne ki rukhsat di gayi hai lekin wo har rooz k badle ek miskeen ko (2 waqt ka) khana khilaye aur us par koi qaza nahi. (Daare Qutni wa Mustadrak E Haakim)

AESE TAMAAM UMOOR JINME ROOZEY KI RUKHSAT HAI MASALAN BIMARI, SAFAR, BUDHAAPA, JIHAAD, AURAT K MUAMALEY MAI HAMAL AUR IRZA'A (DOODH PILAANE WAALI) WAGAIRA K HOTE HUE BHI KOI SHOONK SE ROOZA RAKH LE LEKIN BAAD MAI ROOZA NIBHA NA SAKEY, TO USE ROOZA TOOD DENA CHAHIYE, IS SURAT MAI SIRF QAZA HOGI

Hazrat Jabir bin Abdullah Razi Allahu Anhu farmate hai Rasool Allahu Sallallahu Alihi Wa Sallam ne dooraan e safar loogo ka hujoom dekha loog ek aadmi par saaya kiye hue they, Rasool Allah Sallallahu Alihi Wa Sallam ne pucha: "kya baat hai?" loogo ne arz kiya "Roozadaar hai" Aap Sallallahu Alihi Wa Sallam ne irshaad farmaya: "Doraan e Safar (is haalat mai) Rooza rakhna naiki nahi hai". (Sahih Bukhari Wa Sahih Muslim, Al loo loo wal Marjaan Hadees no. 681)