SAATVA (7th) HAQQ - AAP SALLALLAHU ALAIHI WA SALLAM PAR DAROOD SHAREEF BHEJNA

SAATVA (7th) HAQQ - AAP SALLALLAHU ALAIHI WA SALLAM PAR DAROOD SHAREEF BHEJNA 

Bismillahirrahmanirraheem

ALLAH TA'ALA NE TAMAAM AHLE EMAAN KO AAP SALLALLAHU ALAIHI WA SALLAM PAR DAROOD SHAREEF BHEJNE KA HUKM DIYA HAI

"Beshak Allah Ta'ala, nabi par apni rahmatey nazil farmata hai aur farishte nabi k liye rahmat ki dua karte hai pas ae loogo, jo emaan laye ho! tum bhi nabi par darood bhejo aur salam kaho jis tarah salaam kehne ka haq hai". (Surah Ahzaab Surah no. 33 Ayat no. 56)


EK MARTABA DAROOD BHEJNE WALE PAR ALLAH TA'ALA DAS RAHMATEY NAZIL FARMATA HAI, DAR GUNAH MAAF KARTE HAI AUR DAS DARJAAT BULAND FARMATE HAI

Hazrat Anas Razi Allahu Anhu kehte hai k Rasool Allah Sallallahu Alaihi Wa Sallam ne farmaya "Jisne mujh par ek martaba darood bheja, Allah Ta'ala us par das rahmatey nazil farmayega uske das gunah maaf farmayega aur das darjey buland farmayega". (Sahih Sunan Nasaayi Hadees no. 1230)


DAS MARTABA SUBAH, DAS MARTABA SHAAM AAP PAR DAROOD BHEJNA QAYAMAT K ROOZ AAP SALLALLAHU ALAIHI WA SALLAM KI SHIFA'AT HASIL KARNE KA BAA'AS HAI

Hazrat Abu Darda Razi Allahu Anhu kehte hai k Rasool Allah Sallallahu Alaihi Wa Sallam ne farmaya "Jis ne das martaba subah, dar martaba shaam mujh par darood bheja usey rooz e qayamat meri shifa'at hasil hogi". (Sahih Jamey Sageer Hadees no. 6233)


DAROOD SHAREEF KA BA-KASRAT WAZEEFA QAYAMAT K ROOZ RASOOL ALLAH SALLALLAHU ALAIHI WA SALLAM KI QURBAT KA BAA'AS HOGA

Hazrat Abdullah bin Mas'ood Razi Allahu Anhu kehte hai k Rasool Allah Sallallahu Alaihi Wa Sallam ne farmaya "Jo shaks mujh par ba-kasrat darood bhejta hai, qayamat k rooz wo sabse ziyaadah mere qareeb hoga". (Tirmizi Abwabul Witr)


DAROOD SHAREEF KA KASRAT SE WAZEEFA GUNAAHO KI MAGHFIRAT AUR TAMAAM DUNYAVI DUKHON AUR MASAYIB WA AALAAM SE NIJAAT HASIL KARNE KA ZARIYA HAI

Hazrat Ubey bin Kaab Razi Allahu Anhu kehte hai mene Rasool Allah Sallallahu Alaihi Wa Sallam se arz kiya "Ae Allah k Rasool Sallallahu Alaihi Wa Sallam! mein Aap Sallallahu Alaihi Wa Sallam par kasrat se darood bhejta hu, apni dua mein kitna waqt darood k liye waqf karu?" Aap Sallallahu Alaihi Wa Sallam ne farmaya "Jitna tu chaahey" mene arz kiya "kya ek choothaayi sahih hai?" Aap Sallallahu Alaihi Wa Sallam ne farmaya "jitna tu chaahey" lekin agar is se ziyaadah kare to tere liye accha hai, mene arz kiya "Nisf waqt muqarrar karu?" Aap Sallallahu Alaihi Wa Sallam ne farmaya "jitna tu chaahey, lekin agar us se ziyaadah kare to tere liye accha hai" mene arz kiya "do tihaayi muqarrar karu?" Aap Sallallahu Alaihi Wa Sallam ne farmaya "jitna tu chaahey, lekin agar us se ziyaadah kare to tere liye behtar hai" mene arz kiya "Accha, mein apni saari dua ka waqt darood k liye waqf karta hu" us par Rasool Allah Sallallahu Alaihi Wa Sallam ne farmaya "ye tere saare dukhon aur ghamon k liye kaafi hoga aur tere gunaaho ki bakhshish ka baa'as hoga". (Sahih Sunan Tirmizi Juzz e Saani Hadees no. 1999)


JAB TAK DAROOD SHAREEF KA WAZEEFA KIYE JAYE TAB TAK FARISHTE DAROOD SHAREEF PADHNE WALE K LIYE RAHMAT KI DUA KARTE REHTE HAI

Hazrat Aamir bin Rabeeah Razi Allahu Anhu apne baap se riwayat karte hai k Nabi E Akram Sallallahu Alaihi Wa Sallam ne farmaya "Jab tak koi musalman mujh par darood bhejta rehta hai us waqt tak farishte uske liye dua e rahmat karte rehte hai ab jo chaahey kam padhey, jo chaahey ziyaadah padhey". (Ibne Maja Kitabul Iqamatus Salaat 1:739)


AAP SALLALLAHU ALAIHI WA SALLAM KA ISM E MUBARAK SUN KAR DAROOD NA BHEJNEY WALE K LIYE AAP SALLALLAHU ALAIHI WA SALLAM NE HALAAK HONE KI BAD-DUA FARMAAYI HAI

Hazrat Kaab bin Ujrah Razi Allahu Anhu kehte hai k ek rooz Rasool Allah Sallallahu Alaihi Wa Sallam ne mimbar laane ka hukm diya aur hum mimbar laaye, jab Aap Sallallahu Alaihi Wa Sallam pehli seedhi par chadhey to farmaya "Aameen" doosri seedhi par chadhey to farmaya "Aameen" teesri seedhi par chadhey to farmaya "Aameen" khutba se faarigh hone k baad jab Aap Sallallahu Alaihi Wa Sallam mimbar se nichey tashreef laye to Sahaba E Kiraam Razi Allahu Anhu ne arz kiya "Aaj Aap Sallallahu Alaihi Wa Sallam se humne aesi baat suni hai jo is se pehle nahi suni thi" Rasool Allah Sallallahu Alaihi Wa Sallam ne farmaya "Jibraeel Alaihis Salaam tashreef laye they aur unhone kaha "halakat hai us aadmi k liye jisne ramazaan ka maheena paya lekin apne gunaah na bakhash waaye" mene jawab mein kaha "Aameen" phir jab mein doosri seedhi par chadha to Jibreel Alaihis Salaam ne kaha "Halakat ho us aadmi k liye jiske saamne Aap Sallallahu Alaihi Wa Sallam ka naam liya jaye, lekin wo Aap Sallallahu Alaihi Wa Sallam par darood na bhejey" mene jawab mein kaha "Aameen" jab teesri seedhi par chadha to Jibraeel Alaihis Salaam ne kaha "Halakat hai us aadmi k liye jisne apne maa baap ya dono mein se kisi ek ko budhaapey ki umar mein paaya, lekin unki khidmat karke jannat hasil na ki" mene jawab mein kaha "Aameen". (Mustadrak e Haakim, Fazalus salaata ala nabi Sallallahu Alaihi Wa Sallam lil albaani hadees no. 19)


TARK E DAROOD SHAREEF JANNAT SE MEHROOMI KA BAA'AS HAI

Hazrat Abdullah bin Abbas Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jo mujh par darood shareef padhna bhool gaya usne jannat ka raasta khoo diya". (Sahih Sunan Ibne Maja Hadees no. 740)


DAROOD SHAREEF K BAGAIR MAANGI GAYI DUA QUBOOL NAHI HOTI

Hazrat Anas Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jab tak Nabi E Akram Sallallahu Alaihi Wa Sallam par darood na bheja jaye koi dua qubool nahi ki jaati". (Silsila Ahadees E Saheeya juzz e khamis Hadees no. 2035)


DAROOD SHAREEF K MASNOON ALFAAZ DARJ E ZAIL HAI

Hazrat Abdur Rahman bin Abu Laila Razi Allahu Anhu kehte hai mujhe Hazrat Kaab bin Ujrah Razi Allahu Anhu miley aur kehne lage "Kya mein tumhey wo cheez hadya na du jo mene Rasool Allah Sallallahu Alaihi Wa Sallam se suni hai?" mene kaha "kyu nahi, zarood do" Kaab bin Ujrah Razi Allahu Anhu kehne lage Sahaba E Kiraam Razi Allahu Anhum ne Rasool Allah Sallallahu Alaihi Wa Sallam se arz kiya "Ae Allah k Rasool Sallallahu Alaihi Wa Sallam! Allah Ta'ala ne hamey Aap Sallallahu Alaihi Wa Sallam par salaam bhejne ka tareeqa to bata diya hai hum Aap Sallallahu Alaihi Wa Sallam par aur Ahle bait par darood kese bhejey?" Rasool Allah Sallallahu Alaihi Wa Sallam ne farmaya "in alfaaz mein darood bheja karo, "ALLAHUMMA SALLI ALA MUHAMMADIN WA ALA AALI MUHAMMADIN KAMA SAL'LAITA ALA IBRAHEEMA WA ALA AALI IBRAHEEMA INNAKA HAMEEDUM MAJEED, ALLAHUMMA BAARIK ALA MUHAMMADIN WA ALA AALI MUHAMMADIN KAMA BAARAKTA ALA IBRAHEEMA WA ALA AALI IBRAHEEMA INNAKA HAMEEDUM MAJEED" Tarjuma: Ya Allah Muhammad Sallallahu Alaihi Wa Sallam aur Aal e Muhammad Sallallahu Alaihi Wa Sallam par usi tarah rahmat bhej jis tarah tooney Ibraheem Alaihis Salaam aur Aal e Ibraheem Alaihis Salaam par rahmat bheji hai, beshak to qabil e tareef aur hamesha ki buzurgi wala hai, ya Allah! Muhammad Sallallahu Alaihi Wa Sallam aur Aal e Muhammad Sallallahu Alaihi Wa Sallam par usi tarah barkat nazil farma jis tarah tooney Ibraheem Alaihis Salaam aur Aal e Ibraheem Alaihis Salaam par barkat nazil farmayi, tu buzurg hai aur apni zaat mein Aap mehdood hai". (Sahih Bukhari Kitabul Ambiya)


MUKHTASAR DAROOD SHAREEF K MASNOON ALFAAZ DARJ E ZAIL HAI

Hazrat Zaid bin Kharija Razi Allahu Anhu kehte hai k mene Rasool Allah Sallallahu Alaihi Wa Sallam se (darood k baare mein) sawal kiya to Aap Sallallahu Alaihi Wa Sallam ne irshad farmaya "Mujh par darood bheja karo aur dua mein mehnat karo aur yuh kaho "ALLAHUMMA SALLI ALA MUHAMMADIN WA ALA AALI MUHAMMAD" Tarjuma: "Ae Allah Muhammad Sallallahu Alaihi Wa Sallam aur Aal e Muhammad Sallallahu Alaihi Wa Sallam par apni rahmatey nazil farma". (Sahih Sunan Nasaayi Hadees no. 1225)

Wazahat: Yaad rahe Darood e Tunajjeena, Darood e Muqaddas, Darood e Maahi, Darood e Taaj, Darood e Lakhi aur Darood e Akbar wagairah k alaaz ahadees se sabit nahi.

CHATHA (6th) HAQQ - AAP SALLALLAHU ALAIHI WA SALLAM KA ADAB KARNA

CHATHA (6th) HAQQ - AAP SALLALLAHU ALAIHI WA SALLAM KA ADAB KARNA

Bismillahirrahmanirraheem

ALLAH TA'ALA NE TAMAAM AHLE EMAAN KO AAP SALLALLAHU ALAIHI WA SALLAM KA ADAB AUR EHTARAAM ARNE KA HUKM DIYA HAI

"Beshak humne tujhko gawahi dene wala, basharat dene wala aur daraane wala bana kar bheja hai takey tum loog Allah aur uske Rasool par emaan lao, uska saath do aur uska adab karo aur subah wa shaam Allah k naam ki tasbeeh karo". (Surah Fatah Surah no. 48 Ayat no. 8-9)

DUNYA K HAR INSAN SE BADH KAR AAP SALLALLAHU ALAIHI WA SALLAM KA ADAB AUR EHTARAAM KARNA WAJIB HAI

Hazrat Abu Hurairah Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Mein dunya aur aakhirat mein har momin k nazdeek daigar tamaam loogo ki nisbat muqaddam hu agar chaaho to quran majeed ki ye aayat padh lo "Nabi, Ahle emaan k liye unki apni jaano se bhi ziyaadah muqaddam hai". (Sahih Bukhari Kitabut Tafseer, Tafseer Surah Ahzaab)

AAP SALLALLAHU ALAIHI WA SALLAM KA ADAB NA KARNE WALO K SAARE NAIK AAMAAL ZAAYA HO JAATE HAI

"Ae loogo, jo emaan laye ho! apni aawaaz nabi ki aawaaz se buland na karo aur na hi nabi k saath unchi aawaaz se baat karo jis tarah tum aapas mein ek doosre se karte ho, aesa na ho k tumhare saare (naik) aamaal zaaya ho jaye aur tumhey khabar bhi na ho". (Surah Hujuraat Surah no. 49 Ayat no. 2)

AAP SALLALLAHU ALAIHI WA SALLAM KI RISALAT KA ADAB!

Hazrat Bara (bin Aajib) Razi Allahu Anhu kehte hai jab Nabi E Akram Sallallahu Alaihi Wa Sallam ko baitullah shareef jaane se rook diya gaya aur ahle makkah se sulah (hudaibiyah) tey pai gayi us waqt Aap Sallallahu Alaihi Wa Sallam ne sulah ki sharayit likhwate hue Hazrat Ali Razi Allahu Anhu se farmaya "Hamare darmiyan jo shart tey paayi hai wo likho, "Bismillahirrahmanirraheem........ye wo faisla hai jo Muhammad Rasool Allah Sallallahu Alaihi Wa Sallam ne kiya hai" is par mushrikeen e makkah ne kaha "Agar hum aapko Rasool maante to aapki bait kar lete, lihaza uski jagah Muhammad bin Abdullah likho" Rasool Allah Sallallahu Alaihi Wa Sallam ne Hazrat Ali Razi Allahu Anhu ko hukm diya k "Rasool Allah ka lafz mita do" Hazrat Ali Razi Allahu Anhu ne kaha "Wallah! mein ise kabhi nahi mitaunga" Rasool Allah Sallallahu Alaihi Wa Sallam ne farmaya "Accha mujhe uski jagah dikhao" Hazrat Ali Razi Allahu Anhu ne jagah dikhaayi to Aap Sallallahu Alaihi Wa Sallam ne khud usey mita diya. (Sahih Muslim Kitabul Jihad was Siyar)

AAP SALLALLAHU ALAIHI WA SALLAM KI RIHA'ISH-GAAH KA ADAB KARNA

Hazrat Abu Ayyub (Ansari) Razi Allahu Anhu kehte hai jab Rasool Allah Sallallahu Alaihi Wa Sallam (hijrat k baad) mere ghar tashreef laaye to makaan ki nichli manzil mein qayaam farmaya, mein aur ummey Ayyub makaan ki uper wali manzil mein thehrey, mene Rasool Allah Sallallahu Alaihi Wa Sallam se arz ki "Ya Rasool Allah Sallallahu Alaihi Wa Sallam! mere maa baap aap par qurban! mujhe ye baat sakht na-gawaar aur shaaq guzarti hai k mein Aap Sallallahu Alaihi Wa Sallam k uper rahu aur Aap Sallallahu Alaihi Wa Sallam nichey rahey, Aap uper wali manzil mein tashreef le aaye aur mein nichey wali manzil mein chala jata hu" Rasool Allah Sallallahu Alaihi Wa Sallam ne farmaya "Abu Ayyub! hamare liye aur hamare mulaqaatiyo k liye nichli manzil araam-deh hai" chunanchey Aap Sallallahu Alaihi Wa Sallam nichli manzil mein qayaam pazeed ho gaye aur mein makaan ki uper wali manzil mein qayaam pazeed ho gaya, ek rooz hamara paani ka ghada toot gaya, Ummey Ayyub ne wo kambal liya jiske alawah hamare paas koi cheez (sardi se bachne k liye) na thi aur hum us se paani khushk karne lage, hamey darr tha k kahi aesa na ho k paani ka koi qatrah nichey girey aur Rasool Allah Sallallahu Alaihi Wa Sallam ko us se koi takleef pahunchey, (agle rooz) mene Rasool Allah Sallallahu Alaihi Wa Sallam se arz ki "Ya Rasool Allah Sallallahu Alaihi Wa Sallam! mein is chatt par qayaam nahi karunga jiske nichey Aap Sallallahu Alaihi Wa Sallam riha'ish pazeed hai" chunanchey Rasool Allah Sallallahu Alaihi Wa Sallam uper wali manzil mein tashreef le gaye aur Hazrat Abu Ayyub Razi Allahu Anhu nichey wali manzil mein aa gaye. (Al Bidaya wan Nihaya li bin Kaseer, Fasal fi dakhool Alaihis salaam al Madeenah 3:215)

AAP SALLALLAHU ALAIHI WA SALLAM K LUAAB MUBARAK KA ADAB!

Hazrat Miswar bin Makhramah Razi Allahu Anhu kehte hai k Urwah (bin Mas'ood saqafi muzakiraat k baad) apne loogo (yaani quraish e makkah) k paas wapas gaya aur unse kaha "Loogo, Allah ki qasam! mein baadshaaho k darbaaro mein gaya hu aur qaisar wa kisra neez najjashi k darbaar bhi dekh kar aaya hu magar mene kisi baadshaah ko aesa nahi dekha k uske musahib uski itni izzat karte ho jitni Muhammad Sallallahu Alaihi Wa Sallam k As'haab Hazrat Muhammad Sallallahu Alaihi Wa Sallam ki izzat karte hai, Allah ki qasam! jab wo thookte hai to unka thook kisi na kisi k haath par padta hai aur wo usko apne chehrey aur jism par mal leta hai aur jab wo kisi baat ka hukm dete hai to foran unke hukm ki tameel karte hai aur wo wuzu karte hai to loog unke wuzu se bachey hue paani k liye ladte marte hai aur jab guftagu karte hai to unke saamne apni aawaazey past rakhte hai aur tazeem ki wajah se unki taraf nazar bhar kar nahi dekhte". (Sahih Bukhari Kitabul Sharoot baab Sharoot fil Jihad)

AAP SALLALLAHU ALAIHI WA SALLAM KI DAADHI MUBARAK KA ADAB!

Hazrat Miswar bin Makhramah Razi Allahu Anhu ek taweel hadees mein bayan karte hai k (sulah hudaibiyah k mouqey par numayindah e quraish) Urwah bin Mas'ood Saqafi, Nabi E Akram Sallallahu Alaihi Wa Sallam se baatey karne laga wo jab bhi guftagu karne lagta Aap Sallallahu Alaihi Wa Sallam ki daadhi mubarak ko haath lagata, Hazrat Mugheerah bin Shouba Razi Allahu Anhu apne sar par khoor pehney Nabi E Akram Sallallahu Alaihi Wa Sallam k paas khade they aur unke haath mein talwar thi jab bhi urwah apna haath Nabi E Akram Sallallahu Alaihi Wa Sallam ki daadhi mubarak ki taraf badhaata to Hazrat Mugheerah bin Shouba Razi Allahu Anhu apni talwar ka dasta uske haath par de maarte aur farmate "Apna haath Rasool Allah Sallallahu Alaihi Wa Sallam ki daadhi mubarak se door rakh". (Sahih Bukhari Kitabul Sharoot baab Sharoot fil Jihad)

AAP SALLALLAHU ALAIHI WA SALLAM KI AAWAAZ MUBARAK KA ADAB!

1. Hazrat Anas bin Malik Razi Allahu Anhu kehte hai jab ye aayat nazil hui "Ae loogo! jo emaan laaye ho! apni aawaaz Nabi E Akram Sallallahu Alaihi Wa Sallam ki aawaaz se unchi na karo" (Surah Hujuraat Surah no. 49 Ayat no. 2) to Hazrat Sabit bin Qais Razi Allahu Anhu apne ghar baith gaye (Hazrat Sabit Razi Allahu Anhu ki aawaaz qudrati taur par unchi thi) aur kehne lage "Mein to aagh walo mein se hu" aur Nabi E Akram Sallallahu Alaihi Wa Sallam se milna julna tark kar diya, Rasool E Akram Sallallahu Alaihi Wa Sallam ne Hazrat Saad bin Muaaz Razi Allahu Anhu se daryaft farmaya "Ae Abu Amar Razi Allahu Anhu! (Hazrat Saad Razi Allahu Anhu ki kunniyat) Sabit Razi Allahu Anhu kaha hai, kya beemar hai?" Hazrat Saad Razi Allahu Anhu ne arz kiya "Wo mera hamsaaya hai aur mere ilm ki hadd tak to beemar nahi" chunanchey Hazrat Saad Razi Allahu Anhu Hazrat Sabit Razi Allahu Anhu k ghar aaye aur Rasool Allah Sallallahu Alaihi Wa Sallam ki guftagu ka tazkirah kiya, Hazrat Sabit Razi Allahu Anhu kehne lage "Falah aayat nazil hui hai aur tum jaante ho k Rasool Allah Sallallahu Alaihi Wa Sallam k muqabiltey mein meri aawaaz tum sab loogo se ziyaadah unchi hai mein to jahannami ho gaya" Hazrat Saad Razi Allahu Anhu ne (wapas aa kar) Rasool Allah Sallallahu Alaihi Wa Sallam se uska zikr kiya to Rasool Allah Sallallahu Alaihi Wa Sallam ne farmaya "Nahi wo to jannati hai". (Sahih Muslim Kitabul Emaan)

2. Hazrat Abu Mulaika Rahimahullah kehte hai k qareeb tha k Nabi E Akram Sallallahu Alaihi Wa Sallam k saamney unchi aawaaz mein baat karne ki wajah se (hum mein se) do sabse behtar aadmi halaak ho jaate, hua ye k Aap Sallallahu Alaihi Wa Sallam ki khidmat mein qabeela e banu tameem k kuch loog aaye to Hazrat Abu Bakr aur Hazrat Umar Razi Allahu Anhuma mein se ek bani majashie k bhai Aqra'e bin Habis Razi Allahu Anhu ko ameer banaane ka (Nabi Sallallahu Alaihi Wa Sallam ko) mashwarah diya, doosre sahab ne ek aur aadmi ko ameer banaane ka mashwarah diya, Hazrat Nafey Rahimahullah kehte hai k mujhe us aadmi ka naam yaad nahi, Hazrat Abu Bakr Razi Allahu Anhu ne Hazrat Umar Razi Allahu Anhu se kaha "tumne sirf meri mukhalifat k liye ye mashwarah diya hai" Hazrat Umar Razi Allahu Anhu ne kaha "Mera iraadah tumhari mukhalifat ka na tha" is guftagu mein dono ki aawaazey buland ho gayi to Allah Ta'ala ne ye aayat nazil farmayi "Ae emaan walo! apni aawaazo ko Nabi ki aawaaz se buland na karo" (Surah Hujuraat Surah no. 49 Ayat no. 2) Hazrat Abdullah bin Zubair Razi Allahu Anhu kehte hai k is aayat k nuzool k baad Hazrat Umar Razi Allahu Anhu Nabi E Akram Sallallahu Alaihi Wa Sallam k saamne is qadar past aawaaz se baat karte k Aap Sallallahu Alaihi Wa Sallam ko baar baar puchna padta (tumne kya kaha?). (Sahih Bukhari Kitabut Tafseer, baab Tafseer Al Hujuraat)

AAP SALLALLAHU ALAIHI WA SALLAM KI WAHI KA ADAB!

Hazrat Ubadah bin Saamit Razi Allahu Anhu kehte hai jab Rasool Allah Sallallahu Alaihi Wa Sallam par wahi ka nuzool hua to Aap Sallallahu Alaihi Wa Sallam apna sab mubarak jhuka lete aur Sahaba E Kiraam Razi Allahu Anhum bhi apne sar jhuka lete jab wahi khatam ho jati to Rasool Allah Sallallahu Alaihi Wa Sallam apna sar mubarak utha lete (aur Sahaba E Kiraam Razi Allahu Anhum bhi apne sar utha lete). (Sahih Muslim Kitabul Fazail)

AAP SALLALLAHU ALAIHI WA SALLAM K JALAAL KA ADAB!

Hazrat Umar bin Aas Razi Allahu Anhu farmate hai mujhe Rasool Allah Sallallahu Alaihi Wa Sallam se ziyaadah kisi se muhabbat na thi na meri nigaah mein Rasool Allah Sallallahu Alaihi Wa Sallam se ziyaadah kisi ki shaan thi, Aap Sallallahu Alaihi Wa Sallam k jaaal ki wajah se Aap Sallallahu Alaihi Wa Sallam ko aankh bhar k dekhne ki mere andar himmat na thi agar koi mujhse Aap Sallallahu Alaihi Wa Sallam ka huliya mubarak puchey to mein bayan nahi kar sakta kyunki mein Aap Sallallahu Alaihi Wa Sallam ko aankh bhar kar kabhi nahi dekh sakta. (Sahih Muslim Kitabul Emaan)

AAP SALLALLAHU ALAIHI WA SALLAM KI UMAR SHAREEF KA ADAB!

Hazrat Usman bin Affan Razi Allahu Anhu se riwayat hai k unhone qabeela banu yamar bin lais k fard Qubaat bin Ashyam Razi Allahu Anhu se daryaft kiya "Tum bade ho ya Nabi E Akram Sallallahu Alaihi Wa Sallam bade hai?" Hazrat Subaat Razi Allahu Anhu ne farmaya "Nabi E Akram Sallallahu Alaihi Wa Sallam mujhse bade hai, lekin paida mein pehle hua tha". (Tirmizi Abwabul Manaqib Hadees no. 3619)

AAP SALLALLAHU ALAIHI WA SALLAM K FIQR WA FAAQAH KA ADAB!

Hazrat Abu Hurairah Razi Allahu Anhu se riwayat hai k unka guzar aese loogo par hua jinke saamne bhuni hui bakri rakkhi thi unhone Hazrat Abu Hurairha Razi Allahu Anhu ko bhi khaane ki dawat di lekin Hazrat Abu Hurairha Razi Allahu Anhu ne ye keh kar inkaar kar diya Rasool Alalh Sallallahu Alaihi Wa Sallam dunya se is haal mein rukhsat hue k joo ki rooti bhi pait bhar k nahi khaayi. (Sahih Bukhari Kitabul It'amah ma kaana Nabi Sallallahu Alaihi Wa Sallam wa As'haabihi yakiloon)

AAP SALLALLAHU ALAIHI WA SALLAM K AARAAM KA ADAB!

Hazrat Abdullah bin Umar Razi Allahu Anhu kehte hai mein aur (mere walid) Hazrat Umar Razi Allahu Anhu Rasool Allah Sallallahu Alaihi Wa Sallam se milne ki garz se hazir hue, lekin aap do-pahar k waqt soo rahe they, lihaza hum ghar wapas aa gaye. (Sahih Bukhari Kitabul Manaqibul Ansaar)

AAP SALLALLAHU ALAIHI WA SALLAM K DAST E MUBARAK KA ADAB!

Hazrat Imran bin Hussain Razi Allahu Anhu farmate hai Rasool Allah Sallallahu Alaihi Wa Sallam se bait karne k baad mene apna dahina haath kabhi sharm-gaah ko nahi lagaya. (Musnad Ahmad Hadees no. 19943)

AAP SALLALLAHU ALAIHI WA SALLAM KI NEEND KA ADAB!

Hazrat Abu Qatadah Razi Allahu Anhu kehte hai (ek safar mein) hum Rasool Allah Sallallahu Alaihi Wa Sallam k saath they, aadhi raat ka waqt ho gaya to Aap Sallallahu Alaihi Wa Sallam (sawari par) oonghney lage, mein Aap Sallallahu Alaihi Wa Sallam k pehlu mein (paidal) chal raha tha, Aap sawari se jhukne lage to mene Aap Sallallahu Alaihi Wa Sallam ko jagaaye bagair sahara diya hatta k Aap Sallallahu Alaihi Wa Sallam seedhey ho kar baith gaye hum chalte gaye hatta k raat ka kaafi hissa guzar gaya, Aap Sallallahu Alaihi Wa Sallam (ooungh ki wajah se) phir jhukne lage to mene Aap Sallallahu Alaihi Wa Sallam ko jagaaye bagair sahara diya hatta k Aap Sallallahu Alaihi Wa Sallam seedhey ho kar baith gaye, hum phir chalte gaye hatta k fajar ka waqt ho gaya, is baar Aap Sallallahu Alaihi Wa Sallam pehli dono martaba se bhi ziyaadah jhukey, qareeb tha k Aap Sallallahu Alaihi Wa Sallam sawari se gir padte, mene aagey badh kar phir Aap Sallallahu Alaihi Wa Sallam ko sahara diya, is baar Aap Sallallahu Alaihi Wa Sallam ne apna sar mubarak uthaya aur pucha "Kaun hai?" mene arz ki "Abu Qatadah hu" Aap Sallallahu Alaihi Wa Sallam ne pucha "Kab se mere saath is tarah chal rahe ho?" mene arz kiya "Ya Rasool Allah Sallallahu Alaihi Wa Sallam! raat bhar se Aap Sallallahu Alaihi Wa Sallam k saath isi tarah chal raha hu" Aap Sallallahu Alaihi Wa Sallam ne irshad farmaya "Allah Ta'ala isi tarah tumhari hifazat farmaye jis tarah tumne uske nabi ki hifazat ki hai". (Sahih Muslim Kitabul Masajid wa Mawazi us Salaat)

AAP SALLALLAHU ALAIHI WA SALLAM K RAAZ KA ADAB!

Hazrat Anas bin Malik Razi Allahu Anhu kehte hai Rasool E Akram Sallallahu Alaihi Wa Sallam ne mujhse raaz ki ek baat kahi mene wo kisi ko na bataayi hatta k (meri walidah) Ummey Saleem Razi Allahu Anha ne mujhse puchi to mene walidah ko bhi nahi bataayi. (Sahih Muslim Kitabul Fazail)

AAP SALLALLAHU ALAIHI WA SALLAM K BISTAR MUBARAK KA ADAB!

Hazrat Abdullah bin Abi Salmah Razi Allahu Anhu kehte hai Abu Sufyaan (makkah se sulah hudaibiyah ki shara'it ki tajdeed k iraade se) nikla aur Rasool Allah Sallallahu Alaihi Wa Sallam se mulaqaat k liye madeena pahuncha, apni beti Ummul Momineen Hazrat Ummey Habeeba Razi Allahu Anha k ghar gaya jab wo Rasool Allah Sallallahu Alaihi Wa Sallam k bistar par baithne laga to Ummul Momineen Razi Allahu Anha ne foran bistar lapait diya, Abu Sufyaan kehne laga "Beti! kya tumne is bistar ko mere laayiq nahi samjha ya mein is bistar k laayiq nahi?" Ummul Momineen Razi Allahu Anha ne (bila tamil) jawab diya "Ye Rasool Allah Sallallahu Alaihi Wa Sallam ka bistar hai aur tu ek mushrik napaak aadmi hai is liye mein ye pasand nahi karti k tu is bistar par baithey". (Al Bidaya wan Nihaya li bin Kaseer juzz e rabee Safa no. 675)

AAP SALLALLAHU ALAIHI WA SALLAM K AHAD KA ADAB KARNA

Hazrat Anas Razi Allahu Anhu farmate hai k Sayyedna Salman Faarsi Razi Allahu Anhu beemar ho gaye aur Hazrat Saad bin Waqaas Razi Allahu Anhu Aapki iyadat k liye aaye to unhey rootey hue dekha Hazrat Saad Razi Allahu Anhu ne pucha Salman! mere bhai kyu rootey ho? kya tumhey Rasool Allah Sallallahu Alaihi Wa Sallam ki sohbat hasil nahi rahi? kya Allah ne tumhey falah falah naimat se nahi nawaza? Hazrat Salman Razi Allahu Anhu ne farmaya mein dono baato mein se kisi baat par nahi roota na dunya choodne ki wajah se na aakhirat ko bura samajhne ki wajah se balkey Rasool Allah Sallallahu Alaihi Wa Sallam ne mujhse ek ahad liya tha aur mujhe mehsoos hota hai k mene wo ahad poora nahi kiya Hazrat Saad Razi Allahu Anhu ne daryaft farmaya wo ahad kya tha? Hazrat Salman Razi Allahu Anhu ne bataya k Rasool Allah Sallallahu Alaihi Wa Sallam ne mujhse ye ahad liya tha k dunya se bas itna hi maal lena jitna ek musafir apne saath leta hai ab mein dekhta hu k mene us ahad ki paasdaari nahi ki pas ae Saad! (mein tumhey waseeyat karta hu "k jab koi faisla karo to Allah se dar kar karo jab maal taqseem karo to Allah se dar kar karo jab kisi bhi kaam ka iraadah karo to Allah se dar kar karo) Hazrat Sabit Razi Allahu Anhu likhte hai Hazrat Salman Faarsi Razi Allahu Anhu jab faut hue to unke 20 se kuch ziyaadah dirham mojod they jo unhoney apni zarooriyaat k liye rakkhey hue they". (Ibne Maja Kitabuz Zuhad Hadees no. 2:3312)

AAP SALLALLAHU ALAIHI WA SALLAM KI TALWAR KA ADAB!

Ibne Is'haaq se riwayat hai k Hazrat Abu Dajanah Razi Allahu Anhu kehte hai "Mene (maidaan e uhad mein) ek aadmi ko dekha jo bade zoor shoor se loogo ko joosh dila raha hai mene usey qatal karne ka iraadah kiya, jab mene talwar se hamla karna chaaha to usne cheekh pukaar shuru kardi, wo koi aurat thi, mene Rasool Allah Sallallahu Alaihi Wa Sallam ki talwar k ehtaraam mein us aurat ko qatal karna pasand na kiya. (Al Bidaya Wan Nihaya li bin Kaseer Juzz e Saalis Safa no. 393)

AAP SALLALLAHU ALAIHI WA SALLAM KI SAWARI KA ADAB!

Hazrat Abdullah bin Umar Razi Allahu Anhu se riwayat hai k wo ek safar mein Rasool Allah Sallallahu Alaihi Wa Sallam k saath they aur unke paas Hazrat Umar Razi Alalhu Anhu ka ek muhzoor ounth tha jo baar baar Nabi E Akram Sallallahu Alaihi Wa Sallam k ounth se aagey nikal jata, ye dekh kar Hazrat Umar Razi Allahu Anhu ne apne baite Abdullah ko aawaaz di "Abdullah! Nabi E Akram Sallallahu Alaihi Wa Sallam se aagey koi na badhey". (Sahih Bukhari Kitabul Hibah)

AAP SALLALLAHU ALAIHI WA SALLAM KI MASJID SHAREEF KA ADAB!

Hazrat Sayib bin Yazeed Razi Allahu Anhu kehte hai mein masjid e nabawi mein khada tha kisi aadmi ne mujh par kankar phenka, mene idhar dekha to Hazrat Umar bin Khattab Razi Allahu Anhu they, farmane lagey "Jao un dono aadmiyo ko mere paas pakad ka lao" mene un dono aadmiyo ko Hazrat Umar Razi Allahu Anhu k paas le kar aaya, Hazrat Umar Razi Allahu Anhu ne unse pucha "tum loog kaun ho? ya aapne daryaft farmaya tum dono kaha se aaye ho?" unhone bataya "Hum Tayif se aaye hai" Hazrat Umar Razi Allahu Anhu ne farmaya "Agar tum madeena munawwarah se hote to mein tumhey masjid e nabawi mein aawaazey buland karne par saza deta". (Sahih Bukhari Kitabus Salaat)

Wazahat: Haramain Sharafain mein kisi se ladaayi jhagda karna, gaali galooch karna, qitaal karna, kisi ko khoof zadah karna, kisi jaanwar ka shikar karna ya shikar karne k liye jaanwar ko bhagana, koi giri padi cheez uthana, ghaans ya darakht kaatna mana hai.

AAP SALLALLAHU ALAIHI WA SALLAM KI HADEES SHAREEF KA ADAB

1. Hazrat Ma'an bin Isa Rahimahullah kehte hai Hazrat Malik bin Anas Rahimahullah jab Hadees E Rasool bayan karne ka iraadah farmate to pehle ghusal karte phir awad ki dhooni lete, khushboo lagate aur agar koi Hazrat Malik bin Anas Rahimahullah k paas is doraan unchi aawaaz se baat karta to farmate "Apni aawaaz past karo" Allah Ta'ala irshad farmate hai "Ae loogo, jo emaan laye ho! apni aawaazey Nabi ki aawaaz se unchi na karo" (Surah Hujuraat Surah no. 49 Ayat no. 2) pas jisne Hadees E Rasool sunte hue unchi aawaaz se koi baat ki usne gooya Rasool Allah Sallallahu Alaihi Wa Sallam ki aawaaz se apni aawaaz unchi ki. (Siyar Aala Min Nubala li bin Jauzi 9:154)

2. Hazrat Ibne Abu Uwais Rahimahullah kehte hai k Imam Malik Rahimahullah raaste mein khade khade ya jaldi mein hadees bayan karna bura samajhte they aur farmate they k mein chahta hu k jo kuch Rasool Allah Sallallahu Alaihi Wa Sallam se bayan karu usey acchi tarah samjha jaye. (Aezan li bin Jauzi 9:201)

3. Hazrat Abdur Rahman bin Mahdi Rahimahullah jab Hadees E Rasool padhte to hazireen ko mukammal sakoot aur khamooshi ka khum dete, koi kisi se baat na karta, qalam taraashta na muskurata aur na hi koi khada nazar aata, loog is tarah tawajjah se hadees sunte jese unke siron par parindey baithey hai ya wo namaz padh rahe hai, aur agar kisi shaks ko Abdur Rahman Mahdi baat karte ya muskuraate dekh lete to (naraaz ho kar) apna joota pehante aur waha se chale jaate. (Siyar Aala Min Nubala 7:460)

4. Hazrat Abu Salma Khuzaayi Rahimahullah kehte hai Hazrat Malik bin Anas Rahimahullah jab dars e Hadees k liye ghar se nikalte to namaz ki tarah ka wuzu farmate, behtareen kapde zaib-tan farmate, sar par topi rakhte, apni daadhi mein kanghi farmate, is ehtamaam k baare mein jab unse pucha gaya to farmaya "Is se maqsood Rasool Allah Sallallahu Alaihi Wa Sallam ki Ahadees ka adab aur ehtaraam hai". (Jamey Bayanal Ilm wa Fazlah 2:350)

5. Hazrat Abu Zinaad Rahimahullah kehte hai Hazrat Saad bin Musayyab Rahimahullah beemari ki halat mein Hadees bayan karna chahte to farmate "Mujhe utha kar bitha do, mujhe ye baat sakht na-gawaar guzarti hai k mein lait kar Hadees E Rasool bayan karu". (Aezan 2:350)

6. Hazrat Malik bin Anas Rahimahullah ka Hazrat Abu Hazim Rahimahullah par guzar hua aur wo dars e Hadees de rahe they, lekin Hazrat Malik Rahimahullah (Hadees suney bagair) aagey nikal gaye aur farmaya "Mujhe baithne ki jagah nahi mili aur mein khade ho kar Hadees E Rasool sun'na pasand nahi karta". (Jamey li bin Khateeb 2:53, Huqooq un Nabi Sallallahu Alaihi Wa Sallam Man Ajlaal wal Akhlaal)

7. Hazrat Is'haaq Rahimahullah kehte hai mene Hazrat A'amash Rahimahullah ko dekha k jab wo Hadees bayan karna chahte aur wuzu na hota to tayammum kar lete. (Sharhish Shifaa 2:72, Huqooq un Nabi Sallallahu Alaihi Wa Sallam Man Ajlaal wal Akhlaal)

8. Hazrat Urwah bin Zubair Razi Allahu Anhu ne kisi masla mein Hazrat Abdullah bin Abbas Razi Allahu Anhu se kaha k Hazrat Abu Bakr Razi Allahu Anhu aur Hazrat Umar Razi Allahu Anhu to aesa nahi karte they, Abdullah bin Abbas Razi Allahu Anhu ne (Urwah bin Zubair se) kaha "Wallah! mujhe lagta hai tum us waqt tak baaz nahi aaogey jab tak tumhey Allah azaab na de daale hum tumhare saamne Nabi E Akram Sallallahu Alaihi Wa Sallam ki Hadees bayan karte hai aur tum Abu Bakr Razi Allahu Anhu aur Umar Razi Allahu Anhu ki baat karte ho". (Jamey Bayanal ilm wa Fazlah 2:1209-1210 raqam 2377, Huqooq un Nabi Sallallahu Alaihi Wa Sallam Safa no. 129)

PAANCHVA (5th) HAQQ - AAP SALLALLAHU ALAIHI WA SALLAM K DEEN KI NUSRAT KARNA

PAANCHVA (5th) HAQQ - AAP SALLALLAHU ALAIHI WA SALLAM K DEEN KI NUSRAT KARNA

Bismillahirrahmanirraheem

Aap Sallallahu Alaihi Wa Sallam k deen ki nusrat k chaar marahil hai, har musalman ko in marahil par amal karne ki bharpoor koshih karni chahiye, awwalan deen ka ilm hasil karna, saniyan hasil kardah ilm k mutabiq amal karna, salisan deen ki tableegh aur nashr o isha'at karna aur deen k liye zubaan, maal aur jaan k saath jadd o jahad karna.


DEEN KI NASHR O ISAH'AT K LIYE APNE MAALO JAANO AUR ZUBAANO SE JADD O JAHAD KARNA TAMAAM AHLE EMAAN PAR WAJIB HAI

"Aur Allah dekhna chahta hai k kaun bin dekhey uski aur uske rasoolo ki madad karta hai beshak Allah Ta'ala bahut quwwat aur ghalbey wala hai". (Surah Hadeed Surah no. 57 Ayat no. 25)

Hazrat Anas Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Mushriko se jihaad karo, apne maalo k saath, apni jaano k saath aur apni zubaano k saath". (Sahih Sunan Abu Dawood Hadees no. 2186)


UMMAT K BA-SHA'OOR AFRAAD KO DEENI MARAKIZ SE ILM HASIL KARNE K BAAD APNE APNE MULKO YA APNE APNE SHEHRO MEIN JA KAR DEEN KI NASHR O ISHA'AT KA KAAM KARNA CHAHIYE

"Phir aesa kyu na hua k ahle emaan ki aabaadi k har hissey se kuch loog (deeni marakiz ki taraf) nikalte, deen ki samajh paida karte aur wapas ja kar apne ilaaqey k bashindo ko khabar karte takey wo kufr wa shirk se baaz aa jate". (Surah Tauba Surah no. 9 Ayat no. 122)

"Tum mein se ek garooh aesa zaroor hona chahiye jo loogo ko bhalaayi ki dawat deta rahey, neki ka hukm kare aur buraayi se rookta rahe, aese loog hi falah paani wale hai". (Surah Aal E Emraan Surah no. 3 Ayat no. 104)

Hazrat Abdullah bin Umar Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Meri taraf se deen ki baatey doosro tak pahunchao, khawah ek aayat hi ho". (Sahih Bukhari Kitabul Ambiya)


HAJJATUL WIDA K MOQEY PAR AAP SALLALLAHU ALAIHI WA SALLAM NE HAZIREEN KO DEEN KI BAATEY DOOSRO TAK PAHUNCHANE KA HUKM DIYA

Hazrat Abu Bakrah Razi Allahu anhu kehte hai k (Mina mein 10 zill hijjah ko) Rasool Allah Sallallahu Alaihi Wa Sallam apne ounth par tashreef farma hue, ek aadmi ounth ki muhaar thamey hue tha, Aap Sallallahu Alaihi Wa Sallam ne irshad farmaya "Jo yaha hazir hai wo gayib tak ye ahkaam pahuchaye mumkin hai k jo shaks hazir hai wo kisi aese aadmi tak ye ahkaam pahunchaye jo pahunchane wale se ziyaadah yaad rakhne wala ho". (Sahih Bukhari Kitabul ilm)


DEEN KA ILM HASIL KARNE WALE WAFD KO RASOOL ALLAH SALLALLAHU ALAIHI WA SALLAM NE HUKM DIYA K WO WAPAS JA KAR YE ILM DOOSRE LOOGO TAK PAHUNCHAYE

Hazrat Ibne Abbas Razi Allahu Anhu kehte hai k wafd Abdul Qais Rasool Allah Sallallahu Alaihi Wa Sallam ki khidmat mein hazir hua, Aap Sallallahu Alaihi Wa Sallam ne unhey chaar baaton ka hukm diya aur chaar baaton se mana farmaya aur unhey hidayat farmayi "Un ahkaam ko acchi tarah yaad karlo aur (wapas ja kar) doosre loog ko bhi unse aagah karo". (Sahih Bukhari Kitabul Ilm)

Wazahat: Jin chaar baaton ka Aap Sallallahu Alaihi Wa Sallam ne hukm diya wo ye thi:
1. Toheed aur Risalat ki gawahi
2. Namaz aur Zakaat ki adayigi
3. Ramazaan k Roozey
4. Maal e ghanimat se paanchva hissa Bait ul Maal mein jama karna.

Jin chaar baaton se Aap Sallallahu Alaihi Wa Sallam ne mana farmaya wo ye thi:
1. Kaddo se banaya hua bartan
2. Mitti se banaya hu wo bartan jise laakh ya goond se rogan kiya gaya ho
3. Mitti se banaya hua wo bartan jise taarkool se rogan kiya gaya ho
4. Lakdi se banaya hua bartan, bartano ki ye tamaam iqsaam sharaab banane ya peene k liye istemaal hoti thi, Aap Sallallahu Alaihi Wa Sallam ne unke istemaal se mana farma diya.


ISLAM KI DAWAT AUR ISHA'AT K LIYE RASOOL E AKRAM SALLALLAHU ALAIHI WA SALLAM, SAHABA E KIRAAM RAZI ALLAHU ANAHUM KO DOOSRE SHEHRO MEIN BHI BHEJTE THEY

Hazrat Anas Razi Allahu Anhu se riwayat hai k yaman k loog Rasool Allah Sallallahu Alaihi Wa Sallam ki khidmat mein hazir hue aur arz ki "Deen aur islam sikhaane k liye hamare saath aadi rawana farmaye" Aap Sallallahu Alaihi Wa Sallam ne Hazrat Abu Ubaidah bin Jarrah Razi Allahu Anhu ka haath pakda aur farmaya (ise le kar jao) ye us ummat ka aeman hai. (Sahih Muslim Kitabul Fazail)


DEEN KI DAWAT AUR ISHA'AT KI KHATIR 70 SAHABA E KIRAAM RAZI ALLAHU ANHUM NE APNI JAANO KA NAZRAANA PAISH KIYA

Hazrat Anas Razi Allahu Anhu kehte hai kuch loog Rasool Allah Sallallahu Alaihi Wa Sallam ki khidmat mein hazir hue aur darkhuwast ki "Hamare saath kuch aadmi bhej de jo kitab o sunnat ki taleem de" Rasool Allah Sallallahu Alaihi Wa Sallam ne Ansar mein se 70 aadmi unke saath bhej diye, unhey "Qurrah" kaha jata tha un mein mere khalo Hazrat Haraam Razi Allahu Anhu bhi shamil they wo loog quran majeed ki tilawat karte aur raat k waqt quran majeed ka ilm seekhte, din k waqt paani laate aur masjid mein (wuzu wagairah k liye) rakh dete uske alawah ye lakdiya kaat kar laate aur unhey baich kar ahle suffah aur daigar qurrah k liye khana khareedte, Rasool Allah Sallallahu Alaihi Wa Sallam ne un qurrah ko unke saath bhej diya lekin unhone raaste mein un par hamla kar diya aur thikaane par pahunchane se pehle hi unko qatal kar dala (qatal hone se pehle) qurrah ne Allah Ta'ala se dua ki "Ya Allah! hamare Nabi ko khabar pahunchade k hum tere paas is haal mein pahunch chukey hai k hum tujh se raazi hai aur tu humse raazi hai" Raavi kehte hai k ek aadmi Hazrat Anas Razi Allahu Anhu k khalu Hazrat Haraam Razi Allahu Anhu k paas peechey se aaya aur (unki gardan mein) naizah maara jo paar ho gaya, Hazrat Haraam Razi Allahu Anhu ne kaha "Rabb e Kaaba ki qasam! mein kaamyaab ho gaya". (Sahih Muslim Kitabul Imaraat)


ISLAMI RIYASAT MEIN HUKKAM E BAALA KO DEEN KI NASHR O ISHA'AT KA MUQADDAS FAREEZAH KHUD SAR-ANJAAM DENE KA EHTAMAAM KARNA CHAHIYE

Hazrat Umar bin Abdul Azeez Rahimahullah ne (Qaazi e Madeena) Abu Bakr bin Hazam Rahimahullah ko likha k Rasool Allah Sallallahu Alaihi Wa Sallam ki ahadees ko likh lo mujhe darr hai k kahi ilm mit na jaye aur ulama (dunya se) utha jaaye aur (yaad rakkho) Nabi E Akram Sallallahu Alaihi Wa Sallam ki ahadees k alawah koi doosri baat (kisi ummati ka qaul ya raaye wagairah) qabool na karna, ulama ko chahiye k wo ilm ko phelaye, musnad e ilm par baithey takey jiske paas deen ka ilm nahi wo ilm hasil kar sake, ilm waha se khatam ho jata hai jaha uski nashr o isha'at na ho. (Sahih Bukhari Kitabul Ilm)


KHUTOOT, DASTAVEZAAT, RASAYIL AUR KUTUB K ZARIYE BHI DEEN E ISLAM KI NASHR O ISHA'AT KA KAAM KARNA CHAHIYE

Hazrat Anas Razi Allahu Anhu se riwayat hai k Nabi E Akram Sallallahu Alaihi Wa Sallam ne Kasra, Qaisar, Najjashi aur tamaam baadshahon k naam khat likhey jin mein unhey Allah Ta'ala ki taraf dawat di. (Sahih Muslim Kitabul Jihad was Siyar)

Wazahat: 1. Yaad rahe Kasra Iran k baadshah ko, Qaisar Roam k baadshah ko aur Najjashi Habshah k baadshah ko kaha jata hai.
2. Islam ki nashr o isha'at k liye wo tamaam qadeem aur jadeed zaraaye iblaagh e istemaal karne chahiye jin mein shariyat k kisi hukm ki khilaf-warzi na paayi jati ho.


HAZRAT ABDULLAH BIN MAS'OOD RAZI ALLAHU ANAHU NE DEEN KI DAWAT AUR TABLEEGH K LIYE JUMERAAT KA DIN MUQARRAR KAR RAKKHA THA

Hazrat Abu Wayel Razi Allahu Anhu kehte hai k Abdullah (bin Mas'ood) Razi Allahu Anhu har jumeraat loogo ko waaz wa naseehat kiya karte they, ek aadmi ne unse kaha "Ae Abu Abdur Rahman! (Hazrat Abdullah bin Mas'ood Razi Allahu Anhu ki kunniyat) meri khuwahish hai k tum hamey rozana waaz wa naseehat karo" Hazrat Abdullah Razi Allahu Anhu ne farmaya "Uski wajah ye hai k mein ye baat na-pasand karta hu k tum waaz sunte sunte thak jao". (Sahih Bukhari Kitabul Ilm)


SAHABA E KIRAAM RAZI ALLAHU ANHUM, TABAAYI AUR TABA TABAAYI E AZAAM RAHIMAHULLAH DEEN KI NASHR O ISHA'AT K LIYE MADEENA MUNAWWARAH, MAKKA MUKARRAMAH, YAMAN, MISR, SHAAM, BASRAH AUR KOOFA JESE DOOR DARAAZ SHEHRO MEIN JA KAR RIHAYISH PAZEER HO GAYE

Imam Ahmad bin Hambal Rahimahullah k betey Hazrat Abdullah Rahimahullah kehte hai k mene apne walid Rahimahullah se daryaft kiya k ilm hasil karne wale shaks k baare mein Aap ki kya raaye hai k wo ek hi ilm se likhey padhey ya ilm k mukhtalif marakiz mein ja kar (mukhtalif ulama se) ilm hasil kare? Imam Ahmad bin Hambal Rahimahullah ne farmaya k "Talib e ilm ko chahiye k wo koofa, basrah, madeena aur makkah k ulama se ilm hasil kare (aur unke alawah) daigar ahle ilm ko bhi talaash kare aur unse ilm ki sima'at kare". (Al Rahlatu fi Talabul Hadees, Khateeb Baghdaadi, Matbooa darul kutub ilmiyah bairoot Safa no. 88)

Imam Ahmad ibne Hambal Rahimahullah farmate hai Abdullah ibne Mubarak k zamaane mein husool e ilm k liye unse badh kar koi doosra shaks mehnat aur mashakkat karne wala nahi tha, unhoney yaman, misr, shaam, basrah aur koofa ka safar kiya halankey wo khud ilm k raaviyo mein se they aur wo waaqayi uske ahal they. (Al Rahlatu fi Talabul Hadees Khateeb Baghdaadi matbooa darul kutub ilmiya bairoot Safa no. 91)


DEEN KI NASHR O ISHA'AT KA SAWAB INSAN KO MARNE K BAAD BHI MILTA REHTA HAI

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jab insan marta hai to uska amal teen cheezo k alawah munqatey ho jata hai:
1. Sadqa E Jaariyah
2. Ilm jiske zariye loogo ko nafa hasil ho
3. Naik aulaad ko marne wale k liye dua kare. (Sahih Muslim Kitabul Waseeyah)


DEEN KI NASHR O ISHA'AT KARNE WALO K LIYE RASOOL ALLAH SALLALLAHU ALAIHI WA SALLAM NE TARO TAAZA AUR KHUSH WA KHURRAM REHNE K LIYE DUA FARMAAYI

Hazrat Abdur Rahman bin Abdullah Razi Allahu Anhu apne baap se aur wo Nabi E Akram Sallallahu Alaihi Wa Sallam se riwayat karte hai k Aap Sallallahu Alaihi Wa Sallam ne farmaya "Allah Ta'ala us aadmi ko tar o taaza rakkhey jisne humse hadees suni aur usey (joh ka toh) aagey pahuncha diya (kyunki) aksar wo loog jinko hadees pahunchaayi gayi ho, wo sunney walo se ziyadah yaad rakhne wale hote hai (Sahih Sunan Ibne Maja Hadees no. 189)


KHAWATEEN KO BHI DEEN KI NASHR O ISHA'AT AUR DAWAT WA TABLEEGH KA KAAM KARNA CHAHIYE

Hazrat Abu Saeed Khudri Razi Allahu Anhu se riwayat hai k aurato ne Rasool E Akram Sallallahu Alaihi Wa Sallam ki khidmat mein arz ki "Ya Rasool Allah Sallallahu Alaihi Wa Sallam! mard aapse ilm hasil karne mein humse aagey badh gaye hai, Aap hamari taleem k liye bhi ek din muqarrar farma dijiye" Rasool Allah Sallallahu Alaihi Wa Sallam ne aurato ko ek din taleem dene ka wada farma liya us din Aap Sallallahu Alaihi Wa Sallam ne aurato ko waaz farmaya aur ahkaam batlaaye jo ahkaam Aap Sallallahu Alaihi Wa Sallam ne aurato ko batlaaye un mein se ye bhi tha k tum mein se jo aurat apne teen bacchey aagey bhejey (yaani faut ho jaye aur sabar kare) to wo uske liye dozakh se bachne k liye ba'as banengey, aur aurat ne arz ki "agar koi aurat do bhejey" Aap Sallallahu Alaihi Wa Sallam ne irshad farmaya "do bhi". (Sahih Bukhari Kitabul Ilm)

CHOOTHA (4th) HAQQ - AAP SALLALLAHU ALAIHI WA SALLAM KA DIFA KARNA

CHOOTHA (4th) HAQQ - AAP SALLALLAHU ALAIHI WA SALLAM KA DIFA KARNA 

Bismillahirrahmanirraheem

Aap Sallallahu Alaihi Wa Sallam ki hayaat e tayyeba mein ghalba e islam ki jaddo jehad mein Aap Sallallahu Alaihi Wa Sallam ki hifazat karna neez qaulan aur fa'alan har tarah se Aap Sallallahu Alaihi Wa Sallam ki himayat karna, Aap Sallallahu Alaihi Wa Sallam ki mudah mein naat kehna, kuffar wa mushrikeen ki taraf se Aap Sallallahu Alaihi Wa Sallam pa lagaaye gaye ilzamaat ka jawab dena, Aap Sallallahu Alaihi Wa Sallam ki toheen aur gustaakhi ka badla lena, ye saari baatey Aap Sallallahu Alaihi Wa Sallam k difa mein shamil hai, Aap Sallallahu Alaihi Wa Sallam ki hayaat e tayyeba k baad Aap Sallallahu Alaihi Wa Sallam ki zaat ki hifazat ka maamla to baaqi nahi raha albatta baaqi saare umoor par amal karna har musalman mard aur aurat par apni istata'at k mutabiq wajib hai.


GHALBA E ISLAM KI JADDO JEHAD MEIN RASOOL E AKRAM SALLALLAHU ALAIHI WA SALLAM KI HIMAYAT AUR HIFAZAT KARNA TAMAAM AHLE EMAAN PAR WAJIB HAI

"Jo loog Rasool par emaan laye uski himayat aur madah (tareef) ki aur us noor (yaani quran majeed) ki pairvi ki jo uske saath nazil kiya gaya hai wahi falah paane wale hai". (Surah Aaraaf Surah no. 7 Ayat no. 157)


RASOOL E AKRAM SALLALLAHU ALAIHI WA SALLAM KI IZZAT KA DIFA KARNA TAMAAM AHLE EMAAN PAR WAJIB HAI

Hazrat Ayesha Razi Allahu Anha se riwayat hai k Rasool Allah Sallallahu Alaihi Wa Sallam ne farmaya "Quraish ki hujoo karo kyunki unhey hujoo, teero ki bochaadh se bhi ziyaadah nagawaar hai" pehle Aap Sallallahu Alaihi Wa Sallam ne ek aadmi Hazrat Abdullah bin Rawaha Razi Allahu Anhu k paas bheja aur unhey hukm diya "Tum quraish ki hujoo karo" (Hazrat Abdullah Razi Allahu Anhu ne hujoo ki) lekin Aap Sallallahu Alaihi Wa Sallam ko pasand na aayi, phir Aap Sallallahu Alaihi Wa Sallam ne Hazrat Kaab bin Malik Razi Allahu Anhu k paas aadmi bheja (unki hujoo bhi pasand na aayi to Hazrat Hassan bin Sabit Razi Allahu Anhu ko bula bheja), Hazrat Hassan bin Sabit Razi Allahu Anhu hazir e khidmat hue aur arz ki "Ab Aap Sallallahu Alaihi Wa Sallam ne us sher ko bula bheja hai jo apni dum se dushmano ko maarta hai apni zubaan bahar nikaali aur usey hila kar farmaya "Us zaat ki qasam jisne Aap Sallallahu Alaihi Wa Sallam ko haqq k saath bheja hai mein kafiro ko apni zubaan se is tarah tehas nehas karunga jis tarah chamde ko (chadi se) cheera phaada jata hai". (Sahih Muslim Kitabul Fazail)


AAP SALLALLAHU ALAIHI WA SALLAM K FAZAIL BAYAN KARNA AUR AAP SALLALLAHU ALAIHI WA SALLAM PAR LAGAAYE GAYE ILZAMAAT AUR AETRAZAAT KA NASR YA ASH'AAR MEIN JAWAB DENA AHLE EMAAN PAR WAJIB HAI

Hazrat Bara Razi Allahu Anhu kehte hai Nabi E Akram Sallallahu Alaihi Wa Sallam ne Hazrat Hassan Razi Allahu Anhu se farmaya "Mushriko ki hujoo kar ya farmaya us hujoo ka jawab de (jo unhone mere baare mein ki hai) aur Jibraeel Alaihis Salaam tere saath hai". (Sahih Bukhari Kitabaul Badd ul Khalq)

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya "(Ae Hassan!) meri taraf se mushriko ko jawab de, Ya Allah! Hassan ki rooh ul qudos (Hazrat Jibraeel Alaihis Salaam) k saath madad farma". (Sahih Muslim Kitabul Fazail)


RASOOL E AKRAM SALLALLAHU ALAIHI WA SALLAM KI TOHEEN AUR GUSTAAKHI KA BADLA LENA AHLE EMAAN PAR WAJIB HAI

Hazrat Abu Barzah Razi Allahu Anhu kehte hai mein Hazrat Abu Bakr Siddeque Razi Allahu Anhu k paas baitha tha aur wo ek aadmi par sakht izhaar e naraazi farma rahe they, mene arz kiya "Ae Khaleefa E Rasool Sallallahu Alaihi Wa Sallam! mujhe ijazat dijiye mein uski gardan uda du" mere in kalmaat se Hazrat Abu Bakr Razi Allahu Anhu ka sara gussa door ho gaya, Aap Razi Allahu Anhu apni jagah se uthey aur andar chale gaye aur (thodi dair baad) mujhe bula bheja aur pucha "tuney mujhe kya kaha tha?" mene arz kiya "mujhe ijazat dijiye mein uski gardan uda du" Hazrat Abu Bakr Siddeque Razi Allahu Anhu ne pucha "agar mein ijazat de deta to kya tum aesa kar guzartey?" mene arz kiya "han!" Hazrat Abu Bakr Siddeque Razi Allahu Anhu ne farmaya "Wallah! toheen k jurm mein qatal ki saza Muhammad Sallallahu Alaihi Wa Sallam k baad kisi aadmi k liye jayez nahi". (Abu Dawood Kitabul Hudood Hadees no. 3:3666)


BAIT E UQBA SAANIYA K MOUQEY PAR HAZRAT BARA BIN MAAROOR RAZI ALLAHU ANHU NE AAP SALLALLAHU ALAIHI WA SALLAM KI HAR QEEMAT PAR HIFAZAT KARNE KA WAADA FARMAYA

Hazrat Kaab bin Malik Razi Allahu Anhu kehte hai (bait e uqba saani k moqey par) hum sab ghaati mein ikatthey hue aur Rasool Allah Sallallahu Alaihi Wa Sallam ka intazaar karne lage phir Aap tashreef le aaye us waqt Aapke saath aapke chacha Abbaas bin Abdul Muttalib Razi Allahu Anhu bhi they wo abhi tak apne aabaayi deen par qayim they unhone loogo se mukhatib ho kar kaha tumhey maloom hai k Muhammad Sallallahu Alaihi Wa Sallam ka hamare darmiyaan kya maqaam aur martaba hai aur humne unhey un loogo se ab tak mehfooz rakkha hai jo (deeni nuqta e nazar se) hamare jesi raaye rakhte hai lihaza wo apni qaum mein izzat k saath aur apne shehar mein hifazat k saath reh rahe hai loogo ne arz kiya Abbaas! Aapne jo kuch kaha humne sun liya Ya Rasool Allah Sallallahu Alaihi Wa Sallam! ab aap irshad farmaiye apne liye aur apne rabb k liye jo hum se ahad wa paimaan lena chahte hai wo lijiye, Rasool Allah Sallallahu Alaihi Wa Sallam ne pehle quran majeed ki tilawat farmayi, Allah azz wa jall ki taraf dawat di aur islaam ki ragbat dilaayi aur farmaya mein tum se us baat par bait leta hu k tum har us cheez se meri hifazat karoge jis se apne aurato aur baccho ki hifazat karte ho, us par Bara bin Maroor Razi Allahu Anhu ne Aap ka dast e mubarak pakda aur arz ki "han, us zaat ki qasam jisne aapko haqq k saath bheja hai hum yaqeenan us cheez se aap ki hifazat karengey jis se hum apni jaano ki hifazat karte hai lihaza Ae Allah k Rasool Sallallahu Alaihi Wa Sallam! Aap humse bait le hum jang k baite hai aur hathyaaro se khoob waqif hai ye wirasat hamey baap dada se mili hai". (Musnad Ahmad Hadees no. 15798)


ANSAAR E MADEENA NE AAP SALLALLAHU ALAIHI WA SALLAM KO MADEENA MEIN PANAH DE KAR AAP SALLALLAHU ALAIHI WA SALLAM KI HIFAZAT AUR REHNUMAAYI KA HAQQ ADA KIYA

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Agar ansaar kisi wadi ya ghaati mein chale to mein bhi us mein chalunga agar mene hijrat na ki hoti (jis wajah se muhajir kehlaata hu) to mein ansaar mein se ek fard hota (yaani ansari kehlana pasand karta) Hazrat Abu Hurairah Razi Allahu Anhu kehte hai "Mere maa baap Aap Sallallahu Alaihi Wa Sallam par qurbaan! Aap Sallallahu Alaihi Wa Sallam ne aesa beeja nahi farmaya kyunki ansaar ne Aap Sallallahu Alaihi Wa Sallam ko madeena mein panah di aur Aap Sallallahu Alaihi Wa Sallam ki madad farmayi". (Sahih Bukhari Kitabul Manaqib)


HAZRAT SAAD BIN ABI WAQAAS RAZI ALLAHU ANHU NE RAAT BHAR PEHRAH DE KAR AAP SALLALLAHU ALAIHI WA SALLAM KI HIFAZAT FARMAYI

Ummul Momineen Hazrat Ayesha Razi Allahu Anha kehti hai k ek raat Rasool Allah Sallallahu Alaihi Wa Sallam ki aankh khul gayi aur neend achaat ho gayi, Aap Sallallahu Alaihi Wa Sallam ne farmaya kaash mere As’haab mein se koi naik bakht aaj ki raat meri hifazat karta, Hazrat Ayesha Razi Allahu Anha kehti hai "itne mein hamey hathyaaro ki aawaaz sunayi di Rasool Allah Sallallahu Alaihi Wa Sallam ne pucha kaun hai? Aawaaz aayi Saad bin Abi Waqaas hu ya Rasool Allah Sallallahu Alaihi Wa Sallam! Mein Aap Sallallahu Alaihi Wa Sallam ki khidmat mein pehrah dene k liye hazir hu" Hazrat Ayesha Razi Allahu Anha kehti hai k phir Aap Sallallahu Alaihi Wa Sallam araam se soo gaye yaha tak k mene aapke kharaato ki aawaaz suni. (Sahih Muslim Kitabul Fazail)


JANG E BADAR K MOQEY PAR HAZRAT SAAD BIN MUAAZ RAZI ALLAHU ANHU KA AAP SALLALLAHU ALAIHI WA SALLAM KI HIFAZAT K LIYE AHAD

Hazrat Anas Razi Allahu Anhu se riwayat hai k Rasool Allah Sallallahu Alaihi Wa Sallam ne Abu Sufyaan k lashkar ki ittela milne par Sahaba E Kiraam Razi Allahu Anhum se mashwarah kiya to Hazrat Saad bin Muaaz Razi Allahu Anhu khade ho gaye aur farmaya "Hamare amwaal aapke saamne hai unke baare mein jo chaahey faisla farmaaye (yaani kitne lene hai aur kitne choodne hai) aur ye hamare loog bhi Aap Sallallahu Alaihi Wa Sallam k saamne hazir hai agar aap hamey saath le kar samundar mein koodna chahengey to hum aapke saath kood jayengey, aapke aagey pichey daaye aur baaye har taraf se ladengey. (Ibne Hishaam Kitabul Huqooq un Nabi Sallallahu Alaihi Wa Sallam Safa no. 71)


JANG E BADAR MEIN AAP SALLALLAHU ALAIHI WA SALLAM KI HIFAZAT K LIYE MIQDAAD BIN ASWAD RAZI ALLAHU ANHU KA DAAYE, BAAYE, AAGEY, PICHEY HAR TARAF SE LADNE KA AHAD

Hazrat Abdullah bin Mas'ood Razi Allahu Anhu kehte hai k mene Hazrat Miqdaad bin Aswad ka ek aesa kaarnama dekha hai jise hasil karna mere liye dunya ki har cheez se mehboob hai wo Nabi E Akram Sallallahu Alaihi Wa Sallam ki khidmat mein us waqt hazir hue jab Aap Sallallahu Alaihi Wa Sallam mushriko k liye bad-dua farma rahe they Hazrat Miqdaad Razi Allahu Anhu ne arz ki "Hum Musa Alaihis Salaam ki qaum ki tarah aapse ye nahi kahengey k tu aur tera rabb jaye aur ladey hum to Aap Sallallahu Alaihi Wa Sallam k daaye baaye aagey pichey har taraf se ladengey" Hazrat Abdullah bin Mas'ood Razi Allahu Anhu kehte hai mene in alfaaz k baad dekha k Aap Sallallahu Alaihi Wa Sallam ka chehrah mubarak khushi se chamak utha aur Aap Sallallahu Alaihi Wa Sallam masroor ho gaye. (Sahih Bukhari Kitabul Magaazi)


GAZWAH E UHAD MEIN TALHA BIN UBAIDULLAH RAZI ALLAHU ANHU NE AAP SALLALLAHU ALAIHI WA SALLAM KI KHOOB NUSRAT FARMAAYI

Hazrat Zubair Razi Allahu Anhu kehte hai gazwah e uhad k rooz Rasool Allah Sallallahu Alaihi Wa Sallam do zirhey pehne hue they Aap Sallallahu Alaihi Wa Sallam ne (panah hasil karne k liye) ek chattaan par chadhne ki koshish ki lekin na chadh sake, Aap Sallallahu Alaihi Wa Sallam ne Hazrat Talha Razi Allahu Anhu ko nichey bithaya aur un par sawaar ho gaye (Hazrat Talha Razi Allahu Anhu ne Aap Sallallahu Alaihi Wa Sallam ko uper uthaya) hatta k Aap Sallallahu Alaihi Wa Sallam chattaan k uper chadh gaye, Hazrat Zubair Razi Allahu Anhu kehte hai mene Nabi E Akram Sallallahu Alaihi Wa Sallam ko farmate hue suna k Talha k liye jannat wajib ho gayi. (Tirmizi Abwabul Manaqib)


GAZWAH E UHAD MEIN HAZRAT ABU TALHA RAZI ALLAHU ANHU NE AAP SALLALLAHU ALAIHI WA SALLAM KA US TARAH DIFA KIYA JIS TARAH DIFA KARNE KA HAQQ THA

Hazrat Anas bin Malik Razi Allahu Anhu kehte hai uhad k rooz shikast khane ki wajah se Sahaba E Kiraam Razi Allahu Anhum Rasool Allah Sallallahu Alaihi Wa Sallam se alag ho gaye, sirf Abu Talha Razi Allahu Anhu Aap Sallallahu Alaihi Wa Sallam k paas reh gaye wo apni dhaal Aap Sallallahu Alaihi Wa Sallam k uper kiye hue they Hazrat Abu Talha zabardast teer andaaz they us rooz unke haatho do ya teen kamaaney tooti, jab koi Sahabi teero ka tarkash le kar nikalta to Rasool Allah Sallallahu Alaihi Wa Sallam us se farmaate "ye teer Abu Talha Razi Allahu Anhu k liye rakh do" jab Rasool Allah Sallallahu Alaihi Wa Sallam apna sar uper karke kafiro ki taraf dekhte to Abu Talha Razi Allahu Anhu farmate Ae Allah k Nabi Sallallahu Alaihi Wa Sallam! Mere maa baap aap par qurbaan aap apna sar mubarak uncha na kare kahi kisi kafir ka teer aapko na lagey, mera seena aapke seeney k aagey hai. (Sahih Muslim Kitabul Jihad)

GAZWAH E UHAD MEIN SAAT MADANI SAHABA E KIRAAM RAZI ALLAHU ANHUM NE APNI JAANO KA NAZRAANA PAISH KARKE AAP SALLALLAHU ALAIHI WA SALLAM KA DIFA FARMAYA

Hazrat Anas bin Malik Razi Allahu Anhu se riwayat hai k gazwah e uhad k doraan ek mouqey par Rasool E Akaram Sallallahu Alaihi Wa Salllam sirf saat Ansari aur quraishi sahaba k saath saare lashkar se alag ho gaye to kafiro ne (qatal karne k liye) Aap Sallallahu Alaihi Wa Salllam par zabardast chadhaayi kardi, Aap Sallallahu Alaihi Wa Salllam ne irshad farmaya "kaun un kafiro ko humse door karta hai uske liye jannat hai ya Aap Sallallahu Alaihi Wa Salllam ne farmaya wo jannat mein mera rafeeq hoga" Ansaar mein se ek aadmi aagey badha, Aap Sallallahu Alaihi Wa Salllam ka difa kiya hatta k shaheed ho gaya, kuffar ne Aap Sallallahu Alaihi Wa Salllam par dobarah chadhaayi ki, Aap Sallallahu Alaihi Wa Salllam ne phir wahi baat dohraayi "Kaun hai jo inhey humse door kare uske liye jannat hai, ya farmaya jannat mein wo mera rafeeq hoga" ek aur Ansaari aagey badha, muqabalah kiya aur maara gaya, isi taraf hota raha hatta k saato ansari baari baari shaheed ho gaye, Rasool E Akram Sallallahu Alaihi Wa Salllam ne (apne quraishi) saathiyo se farmaya "Humne apne ansari saathiyo se insaaf nahi kiya". (Sahih Muslim Kitabul Jihaad)

Wazahat: "Humne apne saathiyo se insaf nahi kiya" se muraad hai k quraishi jawano ko bhi aagey badhna chahiye tha ya us se ye bhi muraad ho sakta hai k jo Sahaba E Kiraam Razi Allahu Anhum apni jaan bachaney ki fikr mein titar bitar ho gaye, unhone meri hifazat karne wale sahaba k saath insaaf nahi kiya.


GAZWAH E UHAD MEIN HAZRAT SAAD BIN ABI WAQAAS RAZI ALLAHU ANHU NE AAP SALLALLAHU ALAIHI WA SALLAM KA DIFA KARNE KA HAQQ ADA FARMAYA

Hazrat Saad (bin Abi Waqaas) Razi Allahu Anhu se riwayat hai k gazwah e uhad k rooz Rasool Allah Sallallahu Alaihi Wa Salllam ne mere liye apne maa baap ko jama kiya (yaani yuh farmaya mere maa baap tujh par qurbaan ho) mushriko mein se ek shaks ne musalmano ko khoob qatal kiya, Rasool Allah Sallallahu Alaihi Wa Salllam ne farmaya "Saad! mere maa baap tujh par qurban, khoob teer maar, mene ek teer nikala jiske aagey nook nahi thi aur usey phenka to wo us mushrik ki pasli mein laga aur mushrik gir pada jis se uski sharmgaah khul gayi, Rasool Allah Sallallahu Alaihi Wa Salllam dekh kar hasey yaha tak k mene Aap Sallallahu Alaihi Wa Salllam ki daadhi dekhi". (Sahih Musim Kitabul Fazail)


GAZWAH E UHAD MEIN EK SHAIR DIL KHATOON HAZRAT UMMEY UMMARAH RAZI ALLAHU ANHA NE BHI AAP SALLALLAHU ALAIHI WA SALLAM KI JAAN BACHANE K LIYE TALWAAR CHALAAYI

Hazrat Ummey Saad bin Saad bin Rabee Razi Allahu Anha kehti hai k mein Ummey Ummarah Razi Allahu Anha k paas hazir hui aur arz ki "Khala Jaan! Mujhe gazwah e uhad mein apni khidmat k baare mein kuch bataiye Hazrat Ummey Ummarah Razi Allahu Anha ne farmaya mein din k pehle hissey mein nikli aur mujahideen ne jo maarka anjaam diya usey dekha mere paas paani ka mashkeezah tha (jis se mein mujahideen ko paani pilati thi) jab mera guzar Rasool Allah Sallallahu Alaihi Wa Sallam par hua to tab Aap Sallallahu Alaihi Wa Sallam apne Sahaba E Kiraam Razi Allahu Anhum ki hifazat mein they aur us waqt jang ki soorat e haal musalmano k haqq mein thi lekin jab musalman muntashir hue to mein Rasool Allah Sallallahu Alaihi Wa Sallam k qareeb pahunch gayi aur Aap Sallallahu Alaihi Wa Sallam k saamne seena sapar ho kar ladne lagi aur talwar se Aap Sallallahu Alaihi Wa Sallam ka difa kiya, Aap Sallallahu Alaihi Wa Sallam k difa k liye kamaan se teer phenkey hatta k mein khud bhi zakhmi hui, Hazrat Ummey Saad Razi Allahu Anha kehti hai mene Ummey Ummarah Razi Allahu Anha k kandhey par ek gehra zakham dekha to pucha, Aapko ye zakham kese laga? Unhoney farmaya "ibne qumah ne Allah usey zaleel kare" hua yuh k jab loog Rasool Allah Sallallahu Alaihi Wa Sallam se door chale gaye to ibne qumah ye kehte hue aagey badha k mujhe batao k Muhmmad kaha hai? mein khud marunga ya usey marunga ye sun kar mein aur Mus'ab bin Umair Razi Allahu Anhu aagey badhey aur kuch doosre loog jo Rasool Allah Sallallahu Alaihi Wa Sallam k saath sabit qadam rahe wo bhi aagey badhey, us waqt mujh par ibne qumah ne waar kiya mene uske jawab mein us par kayi waar kiye lekin us rooz Allah ka dushman do zirhey pehne hue tha (is liye bach nikla). (Ibne Hishaam 3:54)


GAZWAH E UHAD MEIN HAZRAT ABU DUJANAH RAZI ALLAHU ANHU NE APNI PUSHT PAR SAARE TEER ROOK KAR NABI E AKRAM SALLALLAHU ALAIHI WA SALLAM KA DIFA KIYA

Ibne Is'haaq kehte hai mein Hazrat Abu Dujanah Razi Allahu Anhu Rasool Allah Sallallahu Alaihi Wa Sallam k saamne dath kar khade ho gaye teer Aap Razi Allahu Anhu ki pusht par is haal mein baraste rahe k wo Nabi E Akram Sallallahu Alaihi Wa Sallam k uper jhukey hue they isi halat mein bahut se teer (unki pusth par) aa kar lagey. (Ibne Is'haaq 3:54)

JANG E AHZAAB MEIN HAZRAT HUZAIFA RAZI ALLAHU ANHU NE AAP SALLALLAHU ALAIHI WA SALLAM KI NUSRAT FARMAYI

Hazrat Huzaifa Razi Allahu Anhu kehte hai k jang e ahzaab mein hum Rasool Allah Sallallahu Alaihi Wa Sallam k saath they k us raat hawa bahut taiz chal rahi thi aur sardi bhi khoob thi, Aap Sallallahu Alaihi Wa Sallam ne Sahaba E Kiraam Razi Allahu Anhum se farmaya "Koi shaks hai jo ja kar kafiro ki khabar laae, Allah ta'ala usko qayamat k din mere saath rakkhega" ye sun kar hum loog khamoosh rahe aur kisi ne jawab na diya, phir Aap Sallallahu Alaihi Wa Sallam ne farmaya "koi shaks hai jo kafiro ki khabar mere paas laaye Allah ta'ala usko qayamat k din mere saath rakkhega" kisi ne jawab na diya sab khamosh rahe, phir Aap Sallallahu Alaihi Wa Sallam ne farmaya "Koi shaks hai jo kafiro ki khabar mere paas laye Allah ta'ala usko qayamat k din mere saath rakkhega" kisi ne jawab na diya, Aakhir Aap Sallallahu Alaihi Wa Sallam ne farmaya "Huzaifa (Razi Allahu Anhu)! tum utho aur ja kar kuffar ki khabar lao, jab Aap Sallallahu Alaihi Wa Sallam ne mera naam le kar hukm diya to mere liye uthey bagair koi chaara na tha, Aap Sallallahu Alaihi Wa Sallam ne mujhe rawana karte hue ye hidayat farmayi k kuffar ki khabar lao, lekin unhey ishta'aal dilaane wali koi harkat na karna, jab mein rawana hua to mujhe aesa maloom hua jese mein garam hammam mein chala ja raha hu (yaani Rasool Allah Sallallahu Alaihi Wa Sallam ki dua se sardi khatam ho gayi) jab mein kafiro k lashkar k paas pahuncha to dekha k Abu Sufyan apni kamar aagh se saik raha hai, mene usey teer marne k liye kamaan par chadhaaya to mujhe Rasool Allah Sallallahu Alaihi Wa Sallam ki hidayat yaad aa gayi k aesa koi kaam na karna jis se kuffar mushta'al ho jaye halankey agar mein teer maarta to yaqeenan Abu Sufyan ko lagta (aur wo mar jaata) mein kuffar ki khabar le kar wapas palta tab bhi mujhe aesa maloom hua jesa k mein garam hammam mein chal raha hu, Rasool Allah Sallallahu Alaihi Wa Sallam k paas wapas pahunch kar mene Aap Sallallahu Alaihi Wa Sallam ko saari soorat e haal se aagaah kiya us waqt mujhe phir sardi mehsoos hone lagi, Rasool E Akram Sallallahu Alaihi Wa Sallam ne mujhe apna ek zayid kambal inayat farma diya jise oudh kar Aap Sallallahu Alaihi Wa Sallam namaz padha karte they, mein usi kambal ko oudh kar sooya to (itni gehri neend aayi k) subah tak soota raha, jab subah hui to Aap Sallallahu Alaihi Wa Sallam ne farmaya "utho nomaan" (yaani bahut ziyaadah soone wale). (Sahih Muslim Kitabul Jihaad)


GAZWAH E BANU QURAIZAH K MOUQEY PAR HAZRAT ZUBAIR BIN AWAAM RAZI ALLAHU ANHU NE AAP SALLALLAHU ALAIHI WA SALLAM KI NUSRAT FARMAYI

Hazrat Abdullah bin Zubair Razi Allahu Anhu se riwayat hai k jang e ahzaab k din mujhe aur Umar bin Abi Salma Razi Allahu Anhu ko (kamsin hone ki wajah se) aurato mein choodh diya gaya, us rooz mene (apne walid) Hazrat Zubair Razi Allahu Anhu ko dekha k wo ghoodey par sawar hai aur unhone do teen baar quraizah k muhalley k chakkar lagaye (gazwah e banu quraizah k ikhtataam par) mene wapas aaney k baad (apne walid Hazrat Zuabir Razi Allahu Anhu se) pucha "Mene Aap ko baar baar idhar udhar aate jate dekha hai" Hazrat Zubair Razi Allahu Anhu ne kaha "Kya tooney waqayi mujhe dekha tha?" mene arz kiya "Han" Hazrat Zuabir Razi Allahu Anhu ne kaha "Asal baat ye thi k Rasool Allah Sallallahu Alaihi Wa Sallam ne farmaya "Banu Quraizah k khabar mujhe kaun la kar dega?" mein gaya aur jab khabar le kar wapas aaya to Rasool Allah Sallallahu Alaihi Wa Sallam ne (khush ho kar) apne maa baap ko ikattha karke farmaya "mere maa baap tum par qurbaan". (Sahih Bukhari Kitabul Manaqib)


HAZRAT SAAD BIN MUAAZ RAZI ALLAHU ANHU NE WAQIYA E AFAK MEIN AAP SALLALLAHU ALAIHI WA SALLAM KI NUSRAT FARMAYI

Hazrat Ayesha Razi Allahu Anha kehti hai (waqiya e afak k baad ek rooz) Rasool Allah Sallallahu Alaihi Wa Sallam ne mimbar par khade ho kar farmaya "Ae Musalmano! tum mein se kaun hai jo mujhe us shaks se bachaaye jisne mujhe meri beewi k muamaley mein azeeyat pahunchayi, Allah ki qasam! mein to apni beewi k baare mein khair hi khair jaanta hu aur jis shaks k baare mein tohmat lagaayi gayi hai uske baare mein bhi mein khair hi jaanta hu aur wo mere ghar mein kabhi akela nahi aaya mere saath hi aaya hai" (ye sun kar) Hazrat Saad bin Muaaz Ansari Razi Allahu Anhu khade hue aur kehne lage "Ya Rasool Allah Sallallahu Alaihi Wa Sallam! mein Aapko us shaks se bachata hu agar wo qabeela e ous ka fard hai to mein usey qatal karunga aur agar wo shaks hamare biradar qabeela khazraj se hai to phir aap hamey jo hukm karengey hum baja layenge". (Sahih Bukhari Kitabut Tafseer)


GAZWAH E HUNAIN MEIN SAHABA E KIRAAM RAZI ALLAHU ANHUM NE RASOOL ALLAH SALLALAHU ALAIHI WA SALLAM KA DIFA FARMAYA

Hazrat Abdullah bin Abbas Razi Allahu Anhu kehte hai "Jab (gazwah e hunanin mein) musalmano aur kafiro ka aamna saamna hua to musalman peeth phair kar bhaag nikle halankey Rasool Allah Sallallahu Alaihi Wa Sallam apne khacchar ko aedhi maarte hue kafiro ki taraf ja rahe they, Hazrat Abbas Razi Allahu Anhu kehte hai "Mein Aap Sallallahu Alaihi Wa Sallam k khacchar ki lagaam thamey usey taiz chalne se rook raha tha aur Abu Sufyan (bin Haris) Aap Sallallahu Alaihi Wa Sallam ki rikaab thamey hue they, Aakhir Rasool Allah Sallallahu Alaihi Wa Sallam ne farmaya "Ae Abbas! As'haab e samurah ko pukaro" Hazrat Abbas Razi Allahu Anhu ki aawaaz bahut buland thi, Hazrat Abbas Razi Allahu Anhu kehte hai mene buland awaaz se pukara "As'haab e samurah kaha hai?" Allah ki qasam! As'haab e samurah ye sunte hi aese lautey jese gaaye apne baccho k paas chali aati hai aur kehne lage "hum hazir hai, hum hazir hai" Rasool Allah Sallallahu Alaihi Wa Sallam ne farmaya kafiro ko qatal kardo. (Sahih Muslim Kitabul Jihad was Siyar)

Wazahat: Yaad rahe samurah ek jangli darakht ka naam hai, gazwah e hudaibiyah mein samurah darakht k nichey baith kar Aap Sallallahu Alaihi Wa Sallam ne Sahaba E Kiraam Razi Allahu Anhum se jihad ki bait li thi jise bait e rizwan bhi kaha jata hai, As'haab e samurah se muraad wahi Sahaba E Kiraam Razi Allahu Anhum hai jinhone bait e rizwan mein hissa liya tha".

TEESRA (3rd) HAQQ - AAP SALLALLAHU ALAIHI WA SALLAM SE MUHABBAT KARNA

TEESRA (3rd) HAQQ - AAP SALLALLAHU ALAIHI WA SALLAM SE MUHABBAT KARNA 

Bismillahirrahmanirraheem


RASOOL E AKRAM SALLALLAHU ALAIHI WA SALLAM K SAATH AESI MUHABBAT KARNA AHLE EMAAN PAR FARZ HAI JO ALLAH K ALAWAH BAAQI TAMAAM MUHABBATO PAR GHALIB HO

"Ae Nabi! keh do, agar tumhare baap, tumhare baite, tumhare bhai, tumhari beewiya, tumhare azeez wa aqarib, tumhare wo maal jo tumne kamaaye hai, tumhari tijarat jiske manda padne ka tumhey darr hai aur tumhare pasandeedah ghar, tumhey Allah uske Rasool aur Allah ki raah mein jihaad se ziyaadah mehboob hai to phir intazaar karo yaha tak k Allah ta'ala ka faisla aa jaye (aur yaad rakkho) Allah ta'ala aese fasiqo ki rehnumaayi nahi farmata". (Surah Tauba Surah no. 9 Ayat no. 24)

Hazrat Anas Razi Allahu Anhu kehte hai k Rasool Allah Sallallahu Alaihi Wa Sallam ne farmaya "Koi aadmi us waqt tak momin nahi ho sakta jab tak wo apne baite (aur betiyo), apne baap (aur maa) aur saare loogo se badh kar mere saath muhabat na kare". (Sahih Muslim Kitabul Emaan)


RASOOL E AKRAM SALLALLAHU ALAIHI WA SALLAM KI ZAAT E MUBARAK AHLE EMAAN K LIYE UNKI APNI JAANO SE BHI ZIYAADAH AZEEZ AUR MOHTARAM HAI

"Nabi ki zaat ahle emaan k liye unki apni jaano se bhi muqaddam hai aur nabi ki beewiya ahle emaan ki maayen hai". (Surah Ahzaab Surah no. 33 Ayat no. 6)


RASOOL E AKRAM SALLALLAHU ALAIHI WA SALLAM SE MUHABBAT KARNE WALA SACCHA MOMIN HAI

Hazrat Abbas bin Abdul Muttalib Razi Allahu Anhu kehte hai mene Rasool Allah Sallallahu Alaihi Wa Sallam ko ye farmate hue suna hai "Emaan ka maza us aadmi ne chakha jo Allah k rabb hone par raazi hua, islam k deen hone par raazi hua aur Hazrat Muhammad Sallallahu Alaihi Wa Sallam k Rasool hone par raazi hua". (Sahih Muslim Kitabul Emaan)


AAP SALLALLAHU ALAIHI WA SALLAM KI SEERAT E TAYYEBA KA MUTA'ALA KARNA, APNI MAJALIS MEIN AAP SALLALLAHU ALAHI WA SALLAM KA ZIKR KARNA AUR AAP SALLALLAHU ALAIHI WA SALLAM SE MUHABBAT KA IZHAAR KARNA AHLE EMAAN PAR WAJIB HAI

Hazrat Anas bin Malik Razi Allahu Anhu kehte hai Hazrat Abu Bakr Siddeque Razi Allahu Anhu aur Hazrat Abbas Razi Allahu Anhu ansaar ki ek majlis k paas se guzrey to dekha wo roo rahe hai, unhone pucha "kyu roo rahe ho?" unhone kaha hamey Rasool E Akram Sallallahu Alaihi Wa Sallam ki sohbatey yaad aa rahi hai ye sun kar wo dono Rasool Allah Sallallahu Alaihi Wa Sallam ki khidmat mein hazir hue (Aap Sallallahu Alaihi Wa Sallam ko ansaar ki baat bataayi) Aap Sallallahu Alaihi Wa Sallam apne sar par chadar baandhey hue bahar nikle (Aap Sallallahu Alaihi Wa Sallam k sar mubarak mein bahut dard tha) mimbar par chadhey bas ye Aap Sallallahu Alaihi Wa Sallam (ki hayaat e tayyeba) ka aakhiri khutba tha, Aap Sallallahu Alaihi Wa Sallam ne Allah ki hamd o sana farmayi, phir irshad farmaya "Loogo! mein tumko ansar k baare mein waseeyat karta hu wo to mere qalb wa jigar hai un par jo mera haqq tha wo ada kar chukey ab unka haqq (jannat) baaqi hai, un mein se jo koi naik ho uski qadar karna aur jo koi bura ho uske qasooro se darguzar karna". (Sahih Bukarhi Kitabul Manaqib al Ansar)


HAZRAT ABU BAKR SIDDEQUE RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

1. Hazrat Bara bin Aajib Razi Allahu Anhu kehte hai jab Rasool Allah Sallallahu Alaihi Wa Sallam ne madeena ki taraf hijrat farmayi to raaste mein Aap Sallallahu Alaihi Wa Sallam ko piyaas lagi, achanak raaste mein ek charwaaha mila, Hazrat Abu Bakr Siddeque Razi Allahu Anhu farmate hai, mene ek piyaala liya aur (charwaahe ki ijazat se) us mein thoda sa (bakri ka) doodh doohya aur Aap Sallallahu Alaihi Wa Sallam ki khidmat mein paish kiya, Aap Sallallahu Alaihi Wa Sallam ne itna doodh noosh farmaya k mera dil khush ho gaya. (Sahih Bukhari Kitabul Manaqib al Ansar)

2. Hazrat Bara bin Aajib Razi Allahu Anhu se riwayat hai k Hazrat Abu Bakr Siddeque Razi Allahu Anhu kehte hai "hum (hijrat k liye) rawana hue to loog hamare ta'aqub mein they un mein se sirf Surqa bin Malik bin Jushm ne apne ghoode par hamey paya mene arz kiya "Ya Rasool Allah Sallallahu Alaihi Wa Sallam! ta'aqub mein ye shaks hamare qareeb pahunch gaya hai" Aap Sallallahu Alaihi Wa Sallam ne irshad farmaya "gham na kar! Allah hamare saath hai" phir wo is qadar hamare qareeb aa gaya k hamare aur uske darmiyaan ek do ya teen naizo k barabar faasla reh gaya, mene arz kiya "Ya Rasool Allah Sallallahu Alaihi Wa Sallam! usne to hamey pakad liya aur mein rooney laga" Aap Sallallahu Alaihi Wa Sallam ne irshad farmaya "Abu Bakr Razi Allahu Anhu kyu roote ho?" mene arz kiya "Allah ki qasam mein apni jaan ko khatre mein dekh kar nahi roo raha hu balke mujhe Aap Sallallahu Alaihi Wa Sallam ki jaan ka khatra hai is liye roo raha hu, Hazrat Abu Bakr Siddeque Razi Allahu Anhu kehte hai Rasool Allah Sallallahu Alaihi Wa Sallam ne Surqa k liye bad-dua farmaayi "Ya Allah! tu hum dono k liye jese tu chaahey kaafi ho ja" chunanchey uske ghoode ki taangey sakht zameen mein pait tak phans gayi aur surqa ne ghoode se chalaang laga di. (Musnad Ahmad Hadees no. 3)

3. Hazrat Ayesha Razi Allahu Anha kehti hai mein (beemari k doraan) Hazrat Abu Bakr Siddeque Razi Allahu Anhu k paas gayi to unhone mujhse daryaft farmaya "Rasool Allah Sallallahu Alaihi Wa Sallam kaun se rooz faut hue they?" mene arz kiya "Somvaar ko" Hazrat Abu Bakr Siddeque Razi Allahu Anhu ne pucha "Aaj konsa din hai?" Hazrat Ayesha Razi Allahu Anha ne jawab diya "Aaj bhi somvaar hai" tab Abu Bakr Siddeque Razi Allahu Anhu ne farmaya "Mein ummeed rakhta hu k aaj raat tak kisi bhi waqt dunya e faani se kooch kar jaunga". (Sahih Bukhari Kitabul Jana'iz)

Wazahat: Yaad rahe Hazrat Abu Bakr Siddeque Razi Allahu Anhu ki wafaat mangal k rooz hui thi ye mehaz Rasool E Akram Sallallahu Alaihi Wa Sallam se muhabbat ka jazba tha k Aap Razi Allahu Anhu ne somvaar ko faut hone ki tamanna farmayi.


HAZRAT UMAR RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

1. Hazrat Abdullah bin Hishaam Razi Allahu Anhu kehte hai hum Nabi E Akram Sallallahu Alaihi Wa Sallam k saath they aur Aap Sallallahu Alaihi Wa Sallam ne Hazrat Umar Razi Allahu Anhu ka haath thama hua tha, Hazrat Umar Razi Allahu Anhu ne arz kiya "Ya Rasool Allah Sallallahu Alaihi Wa Sallam! Aap mujhe meri zaat k alawah baaqi har cheez se ziyaadah mehboob hai" Nabi E Akram Sallallahu Alaihi Wa Sallam ne farmaya "Nahi! qasam hai us zaat ki jiske haath mein meri jaan hai (tum us waqt tak momin nahi ho sakte) jab tak mere saath apni jaan se bhi ziyaadah muhabbat na karo" tab Hazrat Umar Razi Allahu Anhu ne arz kiya "Allah ki qasam! ab to aap mujhe apni jaan se bhi ziyaadah mehboob hai" Rasool E Akram Sallallahu Alaihi Wa Sallam ne farmaya "Ae Umar! ab tum poore momin ho". (Sahih Bukhari Kitabul Emaan wan Nuzoor)

2. Hazrat Umar bin Khattab Razi Allahu Anhu ne (Apni wafaat se qabl apne baite Hazrat Abdullah bin Umar Razi Allahu Anhu se) kaha "Abdullah! Ummul Momineen Hazrat Ayesha Razi Allahu Anha k paas jao aur unki khidmat mein hazir ho kar arz karna "Umar salaam arz karta hai aur han dekho, Ameer ul Momineen ka lafz istemaal na karna, kyunki aaj mein Ameer ul Momineen nahi hu, salaam arz karne k baad darkhuwast karna k Umar bin Khattab Razi Allahu Anhu apne dono saathiyo k saath dafan hone ki ijazat maangta hai, Hazrat Abdullah Razi Allahu Anhu ne hazir ho kar salaam arz kiya aur andar aaney ki ijazat maangi, ijazat milne k baad Hazrat Ayesha Razi Allahu Anha ki khidmat mein hazir hue to dekha k Hazrat Ayesha Razi Allahu Anha (Ameer ul Momineen ki beemari k gham mein) baithi roo rahi hai, Hazrat Abdullah Razi Allahu Anhu ne arz ki "Umar bin Khattab Razi Allahu Anhu salaam arz karte hai aur apne dono saathiyo k saath dafan hone ki ijazat maangte hai" Hazrat Ayesha Siddeqa Razi Allahu Anha ne farmaya "wo jagah mene apne liye rakkhi thi, lekin ab mein apni bajaaye Umar ko tarjeeh deti hu" Hazrat Abdullah Razi Allahu Anhu wapas lootey to loogo ne Hazrat Umar Razi Allahu Anhu ko bataya "Abdullah Razi Allahu Anhu aa gaye hai" Hazrat Umar Razi Allahu Anhu ne loogo se kaha "Mujhe utha kar baithao" ek aadmi ne Hazrat Umar Razi Allahu Anhu ko sahara diya, Hazrat Umar Razi Allahu Anhu ne pucha "Abdullah! kya khabar laaye ho? Hazrat Abdullah Razi Allahu Anhu ne arz kiya "Ameer ul Momineen jo aap chahte they, Hazrat Ayesha Razi Allahu Anha ne aapko ijazat de di hai" Hazrat Umar Razi Allahu Anhu ne kaha "Alhamdulillah! mere liye is se aham aur koi baat nahi". (Sahih Bukhari Kitabul Fazail E Sahaba)


HAZRAT ALI RAZI ALLAHU ANHU KI RASOOL E AKRAM SALLALLAHU ALAIHI WA SALLAM SE MUHABBAT

Hazrat Ali bin Abu Talib Razi Allahu Anhu se pucha gaya "Aap ki Rasool Allah Sallallahu Alaihi Wa Sallam se muhabbat kesi thi?" Hazrat Ali Razi Allahu Anhu ne farmaya "Wallah! Rasool Allah Sallallahu Alaihi Wa Sallam hamey apne maalo, aulaado, baapo, maao aur shadeed piyaas k waqt thandey paani se bhi ziyaadah mehboob they". (Sharah As Shifa Kitabul Huqooq un Nabi Sallallahu Alaihi Wa Sallam Safa no. 70)


HAZRAT SAAD BIN MUAAZ RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Hazrat Saad bin Muaaz Razi Allahu Anhu ne (jang e badar se qabl) arz ki "Ae Allah k Nabi Sallallahu Alaihi Wa Sallam! kya hum aapke liye ek uncha chappar na tameer karde jis mein aap qayaam farmaye aur hum aapke paas sawariya bhi tayyar rakkhey aur phir dushman se muqalabah kare? agar Allah ne hamey izzat bakshi aur dushman par ghalba ata farmaya to yahi wo cheez hai jo hum chahte hai aur agar soorat e haal uske bar-aks hui to aap apni sawariyo par baith kar hamari qaum k un loogo k paas pahunch jaaye jo pichey reh gaye hai, hum aapki muhabbat mein unse badh kar nahi agar unhey ilm hota k aapko jang se saabqa padega to wo kabhi aapse pichey na rehte, Allah unke zariye aapki hifazat farmayega wo loog aapse wafa karengey aur aapke saath mil kar jihaad karengey, Rasool Allah Sallallahu Alaihi Wa Sallam ne Hazrat Saad Razi Allahu Anhu ki is tajweez par unki tareef farmaayi aur unke liye dua e khair ki, phir Aap Sallallahu Alaihi Wa Sallam k liye ek "Areesh" (chappar) tameer kiya gaya jisme Aap Sallallahu Alaihi Wa Sallam ne (jang k doraan) qayaam farmaya. (Al Bidaya Wan Nihaya Juzz e Salis Safa no. 284)


HAZRAT KHUBAIB BIN ADI RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Hazrat Urwah bin Zubair Razi Allahu Anhu se riwayat hai k jin mushrikeen k aaba wa ajdaad badar mein qatal hue they wo jab Hazrat Khubaib Razi Allahu Anhu ko qatal karne lage to unhey qasam de kar pucha "Kya tumhey ye pasand hai k tumhari jagah Muhammad Sallallahu Alaihi Wa Sallam hote aur tum phaansi paane se bach jaate?" Hazrat Khubaib Razi Allahu Anhu ne farmaya "Nahi, Allah buzurg wa bartar ki qasam! mujhe to ye bhi gawarah nahi k meri jagah Aap Sallallahu Alaihi Wa Sallam k qadam mubarak mein kaanta bhi chubhey" is par mushrikeen ne kehkaha lagaya (hasne lage). (Tabraani Hadees no. 5284)


HAZRAT ZAID BIN HAARSA RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Hazrat Jablah bin Haarsa Razi Allahu Anhu kehte hai mein Rasool Allah Sallallahu Alaihi Wa Sallam ki khidmat mein hazir hua aur arz ki "Ya Rasool Allah Sallallahu Alaihi Wa Sallam! mere bhai Zaid bin Haarsa ko mere saath rawana farma de, Aap Sallallahu Alaihi Wa Sallam ne irshad farmaya "Zaid tumhare saamne mojood hai agar tumhare saath jana chahta hai to mein usey kabhi nahi rokunga" Hazrat Zaid Razi Allahu Anhu ne arz ki "Ya Rasool Allah Sallallahu Alaihi Wa Sallam! Allah ki qasam, mein Aap Sallallahu Alaihi Wa Sallam k muqabaley mein kisi doosre ko tarjeeh nahi dunga" Hazrat Jablah Razi Allahu Anhu kehte hai "Mere bhai ki raaye, meri raaye ki nisbat bahut behtar hai". (Tirmizi Abwabul Manaqib 3:2998)

Wazahat: Yaad rahe Hazrat Zaid bin Haarsa Razi Allahu Anhu Hazrat Khadeeja Razi Allahu Anha k ghulaam they, Hazrat Khadeeja Razi Allahu Anha ne Rasool Allah Sallallahu Alaihi Wa Sallam ko hibah kar diya tha, Aap Sallallahu Alaihi Wa Sallam ne Hazrat Zaid Razi Allahu Anhu ko aazaad karke apna muh boola baita bana liya tha, jab Hazrat Zaid Razi Allahu Anhu k ghar walo ko ilm hua k Zaid Rasool E Akram Sallallahu Alaihi Wa Sallam k paas hai to wo unhey lene aaye, lekin Hazrat Zaid Razi Allahu Anhu ne unke saath jaane se inkaar kar diya.

HAZRAT SAAD BIN RABEE RAZI ALLAHU ANHU KI RASOOL ALLAH SALLALLAHU ALAIHI WA SALLAM SE MUHABBAT

Hazrat Yahya bin Saeed Razi Allahu Anhu kehte hai uhad k rooz Rasool Allah Sallallahu Alaihi Wa Sallam ne farmaya "Mujhe Saad bin Rabee k baare mein kaun khabar la kar dega?" (wo maidaan e jang mein kis haal mein hai) ek aadmi (Hazrat Ubey bin Kaab Razi Allahu Anhu ya Zaid bin Sabit Razi Allahu Anhu) ne arz kiya "Ya Rasool Allah Sallallahu Alaihi Wa Sallam mein khabar lata hu" chunanchey wo gaya aur laasho mein Hazrat Saad bin Rabee Razi Allahu Anhu ko talaash karne laga, Hazrat Saad bin Rabee Razi Allahu Anhu ne (aadmi ko dekh kar) pucha "kise talash karte ho?" aadmi ne jawab diya "Mujhe Rasool Allah Sallallahu Alaihi Wa Sallam ne tumhari khabar lene k liye bheja hai, Hazrat Saad bin Rabee Razi Allahu Anhu ne kaha "Accha! wapas jao, Nabi E Akram Sallallahu Alaihi Wa Sallam se mera salaam arz karna aur bata dena k mujhe naizey k 12 zakam aaye hai jo meri jaan lene wale hai aur apni qaum se kehna "Yaad rakkho! agar tum mein se ek aadmi bhi zindah raha aur Rasool Allah Sallallahu Alaihi Wa Sallam shaheed kar diye gaye to Allah ta'ala k han tumhara koi uzr qabool nahi hoga". (Muatta Imam Malik Kitabul Jihaad)


HAZRAT ZIYAAD BIN SAKAN RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Ibne Is'haaq kehte hai (gazwa e uhad k din) jab dushmano ne Aap Sallallahu Alaihi Wa Sallam par hujoom kar liya to Aap Sallallahu Alaihi Wa Sallam ne irshad farmaya "Kaun hai jo hamare liye apni jaan deta hai?" Hazrat Ziyad bin Sakan Razi Allahu Anhu 5 ansariyo samait khade hue aur ek ek karke Rasool Allah Sallallahu Alaihi Wa Sallam ka difa karte hue shaheed ho gaye, sabse aakhir mein Hazrat Ziyaad Razi Allahu Anhu, Hazrat Umarah Razi Allahu Anhu tanha reh gaye aur wo akele ladte rahe yaha tak k zakhmo ne unhey gira diya phir musalmano ki ek jamaat palti aur unhone Hazrat Ziyaad Razi Allahu Anhu se dushmano ko hataya, Rasool Allah Sallallahu Alaihi Wa Sallam ne farmaya "Ise mere qareeb karo" loogo ne Hazrat Ziyaad Razi Allahu Anhu ko Nabi E Akram Sallallahu Alaihi Wa Sallam k qareeb kiya to Nabi E Akram Sallallahu Alaihi Wa Sallam ne apna qadam mubarak unki taraf badhaaya takey wo us par apna rukhsaar mubarak rakh sakey phir wo is halat mein faut hue k unke rukhsaar Rasool Allah Sallallahu Alaihi Wa Sallam k qadam mubarak par they. (As Seerat un Nabwiyah li bin Hishaam, Juzz e Saalis Safa no. 53)


BANU DEENAR KI EK KHATOON KI RASOOL E AKRAM SALLALLAHU ALAIHI WA SALLAM SE MUHABBAT

Hazrat Saad bin Abi Waqaas Razi Allahu Anhu se riwayat hai k (gazwah e uhad se waapsi par) Rasool E Akram Sallallahu Alaihi Wa Sallam ka banu deenar ki ek khatoon par guzar hua jiska shohar, bhai aur baap jang e uhad mein Rasool Allah Sallallahu Alaihi Wa Sallam k saath ladte ladte shaheed ho gaye they, jab loogo ne usey uske shohar, bhai aur baap ki shahadat ki khabar di to usne pucha "Rasool Allah Sallallahu Alaihi Wa Sallam ka kya haal hai? loogo ne jawab diya "Ummey falah! tumhari khawahish k mutabiq wo to Allah k fazal se bilkul theek hai" aurat ne kaha "Mujhe dikhao, jab tak mein apni aankho se dekh nahi leti, mujhe qaraar nahi aayega" loogo ne Nabi E Akram Sallallahu Alaihi Wa Sallam ki taraf isharah karke bataya k wo hai, jab usne apni aankho se Rasool Allah Sallallahu Alaihi Wa Sallam ko dekh liya to kehni lagi "Aap Sallallahu Alaihi Wa Sallam ko dekhne k baad saari museebatey door ho gayi". (Al Bidaya wan Nihaya juzz e rabee Safa no. 423)


HAZRAT RABEEYA BIN KAAB ASLAMI RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Hazrat Rabeeya bin Kaab Aslami Razi Allahu Anhu kehte hai mein raat Nabi E Akram Sallallahu Alaihi Wa Sallam k han basar karta Aap Sallallahu Alaihi Wa Sallam k liye wuzu ka pani aur doosri zaroorat ki cheezey laya karta (ek rooz) Aap Sallallahu Alaihi Wa Sallam ne (khush ho kar) irshad farmaya "Koi cheez (maangna chaho) to maango" mene arz ki "Jannat mein Aap Sallallahu Alaihi Wa Sallam ki rifaqat chahta hu" Aap Sallallahu Alaihi Wa Sallam ne phir pucha "Kuch aur?" mene arz ki "bas yahi" Aap Sallallahu Alaihi Wa Sallam ne irshad farmaya "Kasrat e sujood k saath mari madad kar (takey tumhare liye sifarish karna mere liye aasaan ho jaye)". (Sahih Muslim Kitabus Salaat)


HAZRAT ABU HURAIRAH RAZI ALLHAU ANHU KI AAP SALLALLAHU ALAIHI WA SALLAM SE MUHABBAT

Hazrat Abu Hurairah Razi Allahu Anhu (ne Rasool Allah Sallallahu Alaihi Wa Sallam ko mukhatib karke) farmaya "Ya Rasool Allah Sallallahu Alaihi Wa Sallam! jab mein aapko dekhta hu to meri aankhey thandi ho jati hai aur dil khush ho jata hai lekin jab aap nazar nahi aatey to mera dil bujh jata hai ya aesa hi koi lafz kaha". (Bazzaar, Majmua uz Zawahid Kitabul Manaqib 9:604)


HAZRAT ABU AYYUB ANSARI RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Hazrat Abu Ayyub (Ansari Razi Allahu Anhu) se riwayat hai k Nabi E Akram Sallallahu Alaihi Wa Sallam (Madeena tashreef lane k baad) unke han mehmaan thehrey Rasool Allah Sallallahu Alaihi Wa Sallam ne nichli manzil mein qayaam farmaya aur Hazrat Abu Ayyub Razi Allahu Anhu uper wali manzil mein they.... Abu Ayyub Razi Allahu Anhu Aap Sallallahu Alaihi Wa Sallam k liye khana tayyar karte jab (khadim) khana wapas lata to Abu Ayyub Razi Allahu Anhu khadim se puchte "Rasool Allah Sallallahu Alaihi Wa Sallam ki ungliya khane par kaha kaha lagi hai?" Abu Ayyub Razi Allahu Anhu bhi usi jagah (apni ungliya rakh kar) khana khate. (Sahih Muslim Kitabul Ashrabah)


HAZRAT UMMEY HAANI RAZI ALLAHU ANHA KI AAP SALLALLAHU ALAIHI WA SALLAM SE MUHABBAT

Hazrat Ummey Haani Razi Allahu Anha kehti hai fatah makkah k rooz Hazrat Fatima Razi Allahu Anha Rasool E Akram Sallallahu Alaihi Wa Sallam ki baayi taraf aa kar baith gayi aur mein Aap Sallallahu Alaihi Wa Sallam ki daayi taraf, itne mein ek loondi bartan le kar aayi, jis mein peeney ki koi cheez thi, loogndi ne wo bartan Rasool Allah Sallallahu Alaihi Wa Sallam ko diya, Aap Sallallahu Alaihi Wa Sallam ne us bartan se piya, phir wo bartan mujhe diya, mene bhi us se piya aur kaha "Ya Rasool Allah Sallallahu Alaihi Wa Sallam! mera rooza tha mene (Aap Sallallahu Alaihi Wa Sallam ka jhoota pene k liye) rooza tood diya" Aap Sallallahu Alaihi Wa Sallam ne pucha "Kya tumne qaza rooza rakkha tha?" mene arz kiya "nahi" Aap Sallallahu Alaihi Wa Sallam ne irshad farmaya "Agar nafli rooza tha, to koi harj ki baat nahi". (Sahih Sunan Abu Dawood Hadees no. 2145)


HAZRAT BILAL RAZI ALLAHU ANHU KI AAP SALLALLAHU ALAIHI WA SALLAM SE MUHABBAT

Hazrat Muhammad bin Ibraheem Taemi Rahimahullah kehte hai k Rasool Allah Sallallahu Alaihi Wa Sallam ki wafat k baad abhi Aap Sallallahu Alaihi Wa Sallam ki tadfeen nahi hui thi, Hazrat Bilal Razi Allahu Anhu ne azaan di aur jab "ASH'HADU ANNA MUHAMMADAR RASOOLULLAH" par pahunchey to Sahaba E Kiram Razi Allahu Anhum phoot phoot kar roone lage, jab Aap Sallallahu Alaihi Wa Sallam ki tadfeen ho gayi to Hazrat Abu Bakr Razi Allahu Anhu ne Hazrat Bilal Razi Allahu Anhu se kaha azaan do, Hazrat Bilal Razi Allahu Anhu ne kaha "Agar aapne mujhe apni khatir aazaad kar diya hai to phir aapko ye hukm dene ka haqq hai, lekin agar aapne mujhe Allah ki raza k liye aazaad karaya hai to phir mujhe kuch na kahiye" Hazrat Abu Bakr Razi Allahu Anhu ne kaha "Mene tumhey sirf Allah ki raza k liye aazaad karaya hai" Hazrat Bilal Razi Allahu Anhu ne kaha "to phir Rasool Allah Sallallahu Alaihi Wa Sallam ki wafat k baad mein kisi doosre k liye azaan nahi kahunga" Hazrat Abu Bakr Razi Allahu Anhu ne farmaya "Accha, teri marzi". (Sifatus Safwah 1:200)


EK SAHABI KA SARMAYA E HAYAAT......HUBBEY RASOOL SALLALLAHU ALAHIH WA SALLAM

Hazrat Anas bin Malik Razi Allahu Anhu kehte hai ek aadmi Rasool Allah Sallallahu Alaihi Wa Sallam ki khidmat mein hazir hua aur arz ki "Ya Rasool Allah Sallallahu Alaihi Wa Sallam! qayamat kab aayegi?" Aap Sallallahu Alaihi Wa Sallam ne us se pucha "Tuney qayamat k liye kya tayyari ki hai?" Aadmi ne arz ki "Allah aur uske Rasool ki Muhabbat!" Aap Sallallahu Alaihi Wa Sallam ne irshad farmaya "(qayamat k rooz) yaqeenan tu uske saath hoga jiske saath tuney muhabbat ki" Hazrat Anas Razi Allahu Anhu kehte hai "Islam laane k baad hamey jitni khushi is baat se hui itni khushi kisi baat se nahi hui". (Sahih Muslim Kitabul Birr Wa Silah)

EK KHUSH-NASEEB SAHABI KI RASOOL ALLAH SALLALLAHU ALAIHI WA SALLAM SE MUHABBAT PAR QURAN MAJEED KA NUZOOL

Hazrat Ayesha Razi Allahu Anha kehti hai ek aadmi Nabi E Akram Sallallahu Alaihi Wa Sallam ki khidmat mein hazir hua aur arz ki "Ya Rasool Allah Sallallahu Alaihi Wa Sallam! mein aapse apni jaan se bhi jayada muhabbat karta hu apne baite se bhi ziyadah muhabbat karta hu jab ghar mein hota hu aur aapki yaad aati hai to us waqt tak sabr nahi aata jab tak hazir e khidmat ho kar Aap Sallallahu Alaihi Wa Sallam ka deedaar na karlu, lekin jab mujhe apni aur aapki maut yaad aati hai to jaanta hu k jannat mein dakhil hone k baad ambiya k saath buland maqaam par hongey aur mein jannat mein chala bhi gaya to (kam darja ki wajah se) darta hu k Aap Sallallahu Alaihi Wa Sallam ka deedaar nahi kar paunga" Nabi E Akram Sallallahu Alaihi Wa Sallam ne apne sahabi ki is baat ka us waqt tak koi jawab na diya jab tak Hazrat Jibraeel Alaihis Salaam ye aayat le kar na aa gaye (WA MAIY'YUTI ILLAHA....) "Aur jisne Allah aur uske Rasool Sallallahu Alaihi Wa Sallam ki ita'at ki wo (jannat mein) un loogo k saath honge jin par Allah ta'ala ne ina'am kiya hai ambiya mein se, siddeqeen mein se, shuhada mein se aur saliheen mein se, un loogo ki rifaqat kesi acchi hai (Surah Ambiya Surah no. 21 Ayat no. 69)". (Majmua uz Zawahid Kitabut Tafseer)


HAZRAT UMMEY AYEMAN RAZI ALLAHU ANHA KI AAP SALLALLAHU ALAIHI WA SALLAM SE MUHABBAT

Hazrat Anas Razi Allahu Anhu kehte hai Rasool Allah Sallallahu Alaihi Wa Sallam ki wafaat k baad Hazrat Abu Bakr Razi Allahu Anhu ne Hazrat Umar Razi Allahu Anhu se kaha "Chalo Ummey Ayeman Razi Allahu Anha se mil ka aaye, Rasool Allah Sallallahu Alaihi Wa Sallam bhi unhey milne jaya karte they" jab dono waha pahunchey to Ummey Ayeman Razi Allahu Anha roone lagi, Hazrat Abu Bakr Razi Allahu Anhu aur Hazrat Umar Razi Allahu Anhu ne pucha "Aap kyu rooti hai Allah k paas jo naimatey hai wo Rasool Allah Sallallahu Alaihi Wa Sallam k liye (dunya ki naimato se kahi ziyaadah) behtar hai" Hazrat Ummey Ayeman Razi Allahu Anha kehne lagi "Mein is liye nahi rooti k mujhe ye ilm nahi k Allah k paas apne Rasool k liye bahut kuch hai balke mein is liye rooti hu k ab wahi k aaney ka silsila band ho chuka hai" Hazrat Ummey Ayeman Razi Allahu Anha ki is baat se Hazrat Abu Bakr Razi Allahu Anhu aur Hazrat Umar Razi Allahu Anhu ko bhi roona aa gaya aur wo bhi Ummey Ayeman Razi Allahu Anha k saath roone lage. (Sahih Muslim Kitabul Fazail)


SAHABA E KIRAAM RAZI ALLAHU ANHUM KI RASOOL ALLAH SALLALLAHU ALAIHI WA SALLAM SE MUHABBAT

Hazrat Bara bin Aajib Razi Allahu Anhu kehte hai k sabse pehle hamare paas (madeena mein) Hazrat Mus'ab bin Umair Razi Allahu Anhu aur Abdullah bin Ummey Maktoom Razi Allahu Anhu (jo na-beena they) aaye, wo dono loogo ko quran padhaya karte they, phir Hazrat Bilal Razi Allahu Anhu, Hazrat Saad bin Abi Waqaas Razi Allahu Anhu aur Hazrat Ammaar bin Yasir Razi Allahu Anhu aaye, phir Hazrat Umar Razi Allahu Anhu 20 Sahaba E Kiraam Razi Allahu Anhum ko saath liye hue aaye phir Nabi E Akram Sallallahu Alaihi Wa Sallam (Hazrat Abu Bakr Razi Allahu Anhu aur Amir bin Fuhairah Razi Allahu Anhu ko saath le kar) tashreef laaye, mene madeena walo koi kisi baat se itna khush hote nahi dekha jitna Rasool Allah Sallallahu Alaihi Wa Sallam k tashreef laane se wo khush hue, loondiya tak kehne lagi "Allah k paighambar Sallallahu Alaihi Wa Sallam tashreef laaye hai". (Sahih Bukhari Kitabul Manaqib)

Hazrat Abu Juhaifa Razi Allahu Anhu kehte hai do-paahar k waqt Rasool Allah Sallallahu Alaihi Wa Sallam tasheef laye Aap Sallallahu Alaihi Wa Sallam ki khidmat mein wuzu ka paani paish kiya gaya jis se Aap Sallallahu Alaihi Wa Sallam ne wuzu farmaya Sahaba E Kiraam Razi Allahu Anhum Aap Sallallahu Alaihi Wa Sallam k wuzu se bacha hua paani le kar apne badan par malne lage. (Sahih Bukhari Kitabul Wuzu)

EK KAMSIN BACCHEY KI AAP SALLALLAHU ALAIHI WA SALLAM SE MUHABBAT

Hazrat Abdul Malak bin Umair Razi Allahu Anhu kehte hai Madeena Munawwarah mein ek ladka tha jiski kunniyat Abu Mus'ab thi, wo Nabi E Akram Sallallahu Alaihi Wa Sallam ki khidmat mein hazir hua Aap Sallallahu Alaihi Wa Sallam k dast e mubarak mein ek khoosha tha, Aap Sallallahu Alaihi Wa Sallam ne khoosha haatho mein mal kar uska chilka utara, phoonk maari aur uske daane ladke ko de diye, Ladke ne le kar kha liye, agarchey ansaar madeena usey accha na samjhte lekin jab Rasool Allah Sallallahu Alaihi Wa Sallam ne Abu Mus'ab Razi Allahu Anhu ko daane diye to usne Aap Sallallahu Alaihi Wa Sallam ko wapas na paltaaye, Abu Mus'ab Razi Allahu Anhu kehte hai k mein Nabi E Akram Sallallahu Alaihi Wa Sallam k paas se uth kar thodi door hi gaya tha k phir wapas palta aur Aap Sallallahu Alaihi Wa Sallam se arz ki "Ya Rasool Allah Sallallahu Alaihi Wa Sallam! Aap mere liye dua farmaye k Allah mujhe jannat mein Aap Sallallahu Alaihi Wa Sallam ki rifaqat ata farmaye" Aap Sallallahu Alaihi Wa Sallam ne us se pucha "Tumhey ye baat kisne sikhaayi?" Abu Mus'ab ne arz kiya "Kisi ne nahi" Aap Sallallahu Alaihi Wa Sallam ne farmaya "accha, mein dua karunga" jab mein wapas hone laga to Aap Sallallahu Alaihi Wa Sallam ne mujhe bulaya aur irshad farmaya "Kasrat e sujood se meri madad karna"....jab mein apni maa k paas wapas (ghar) aaya to maa ne daryaft kiya (itni dair kaha rahe?) mene bataya "mein Nabi E Akram Sallallahu Alaihi Wa Sallam ki khidmat mein hazir tha, Aap Sallallahu Alaihi Wa Sallam ek khoosha laaye apne dast e mubarak se uske daane nikaale aur apni phoonk mubarak se chilkey utaare aur mujhe diye, mene wapas karna munasib na samjha (aur le liye) Abu Mus'ab Razi Allahu Anhu ki maa ne kaha "Tuney bahut accha kiya" Anu Mus'ab Razi Allahu Anhu ne kaha phir mein Aap Sallallahu Alaihi Wa Sallam ki khidmat mein hazir hua aur Aap Sallallahu Alaihi Wa Sallam ne mere liye dua farmaayi. (Bazzaar, Majmua uz Zawahid Kitabul Manaqib 9:665)