IBLEES (SHAITAN) FARISHTA YA JINN?
Bismillahirrahmanirraheem
Quran Majeed mein muta'addad muqamaat par kaha gaya hai k iblees ek farishta tha lekin Surah Kahaf mein farmaya hai k iblees ek jinn tha, kya ye baat Quran mein tazaad ko zahir nahi karti?
Quran E Kareem mein mukhtalif muqamaat par Aadam Alaihis Salaam aur iblees ka qissa bayan kiya gaya hai, Surah Baqarah mein Allah ta'ala ne farmaya: Humne farishto se kaha k Aadam ko sajdah karo, so un sabne sajdah kiya siwaye iblees k. (Surah Baqarah Surah no. 2 Ayat no. 34)
is baat ka tazkira hasb e zail ayaat mein bhi kiya gaya hai:
1. Surah Aaraaf Surah no. 7 Ayat no. 11
2. Surah Hijr Surah no. 15 Ayat no. 28-31
3. Surah Bani Israeel Surah no. 17 Ayat no. 61
4. Surah Taha Surah no. 20 Ayat no. 116
5. Surah Saad Surah no. 38 Ayat no. 71-74
Lekin Surah Kahaf Surah no. 18 Ayat no. 50 kehti hai: Aur jab humne farishto se kaha: Aadam ko sajdah karo to un sabne sajdah kiya siwaye iblees k wo jinno mein se tha, pas usne apne rabb k hukm ki nafarmaani ki. (Surah Kahaf Surah no. 18 Ayat no. 50)
TAGLEEB KA KALYAH
Surah Baqarah ki mazkoorah bala Ayaat k pehle hisse se hame ye taasir milta hai k iblees farishta tha, Quran E Kareem arbi zubaan mein nazil hua hai arbi grammar mein ek kalya tagleeb k naam se maroof hai jinke mutabiq agar aksariyat se khitab kiya ja raha ho to aqleet bhi khud ba khud usme shamil hoti hai, misal k taur par mein 100 talib e ilmo par mushtamil ek aesi class se khitab kar raha hu jisme ladko ki tadaad 99 aur ladki ki sirf 1 hai, aur mein arbi zuban mein ye kehta hu k sab ladkey khade ho jaye to uska itlaaq ladki par bhi hoga, mujhe alag taur par us se mukhatib hone ki zarurat nahi hogi.
Isi tarah Quran k mutabiq jab Allah ta'ala ne farishto se khitab kiya to iblees bhi waha mojood tha, ta'hum is amr ki zarurat nahi thi k uska zikr bhi alag se kiya jata, lihaza Surah Baqarah aur degar Surato ki ibarat k mutabiq iblees farishta ho ya na ho lekin 18vi Surah Kahaf ki 50vi aayat k mutabiq iblees ek jinn tha, Quran Kareem mein kahi ye nahi kaha gaya k iblees ek farishta tha, isi liye Quran e Kareem mein is hawaley se koi tazaad nahi.
IRADAH WA IKHTIYAAR JINNO KO MILA, FARISHTO KO NAHI
Is silsiley mein doosri aham baat ye hai k jinno ko irada wa ikhtiyaar diya gaya hai aur wo chaahe to ita'at se inkaar bhi kar sakte hai, lekin farishto ko iradah wa ikhtiyaar nahi diya gaya aur wo hamesha Allah ki ita'at baja laate hai, lihaza is baat ka sawal hi paida nahi hota k koi farishta Allah ki nafarmani bhi kar sakta hai, is haqeeqat se is baat ki mazeed ta'eed hoti hai k iblees ek jinn tha, farishta nahi tha.
JANNAT MEIN MARDO KO HOOREY MILENGI TO AURATO K LIYE KYA?
Bismillahirrahamanirraheem
Quran E Kareem k mutabiq koi shaks jannat mein dakhil hoga to use hoor, yaani khoobsurat doshizah di jayegi, sawal ye hai k koi aurat jannat mein jayegi to use kya diya jayega?
Lafz Hoor quran e kareem mein kam az kam 4 mukhtalif muqamaat par istemaal hua hai
1. Yuh hi hoga aur hum unka nikah kar denge badi badi aankho wali hooro se. (Surah Dukhan Surah no. 44 Ayat no. 54)
2. Aur hum unka nikah badi badi aur roshan aankho wali hooro se kar denge. (Surah Taur Surah no. 52 Ayat no. 20)
3. Khaimo mein thehraayi gayi hoorey. (Surah Rahman Surah no. 55 Ayat no. 72)
4. Aur unke liye khoobsurat aankho wali hoorey hongi, aesi haseen jese chipa kar rakkhey hue mooti. (Surah Waqiyah Surah no. 56 Ayat no. 22,23)
HOOR KA MATLAB
Quran E Kareem k bahut se mutarjameen ne lafz e Hoor ka tarjuma khasusan urdu tarajim mein khoobsurat doshizaye ya ladkiya kiya hai, is surat mein wo sirf mardo k liye hongi, tab jannat mein jaane wali aurato k liye kya hoga?
Laft "Hoor" fi al waqey Ahwar (mardo k liye qabil e itlaaq) aur hoora'a (aurato k liye qabil e itlaaq) dono ka saigah jama hai aur ye ek aese shaks ki taraf ishara karta hai jiski aankhey hoor se mutasaf ho jo jannat mein jaane wale mardo aur khawateen ki saleh arwaah ko bakhshi jane wali khasusi sifat hai aur ye rohaani aankh k safaid hissey ki intihayi ujli rangat ko zahir karti hai.
Doosri kayi aayat mein quran e kareem mein farmaya gaya hai k jannat mein tumhare azwaaj, yani joodey honge, aur tumhe tumhara jooda ya pakeezah saathi ata kiya jayega,
irshad e bari ta'ala hai: Aur (Ae paigambar!) jo loog is kitab par emaan laye aur naik amal kare, unhe khushkhabri de do k unke liye aese baag hai jinke nichey nehrey behti hongi, jab bhi unmey se koi phal unhe khane ko diya jayega to wo kahenge k ye to wahi hai jo is se pehle humko dunya mein diya jata tha, unke liye waha pakeezah beewiya hongi aur wo waha hamesha rahenge. (Surah Baqarah Surah no. 2 Ayat no. 25)
Aur jin loogo ne hamari aayaat ko maan liya aur naik amal kiye, unko hum aese baago mein dakhil karenge jinke nichey nehrey behti hongi jaha wo hamesha rahenge, aur unko pakeezah beewiya milengi aur unhe hum ghani chaao mein rakkhenge. (Surah Nisa Surah no. 4 Ayat no. 57)
AURATO K LIYE KHASUSI INAAM
Bahut se ulama ka khayaal hai k quran mein jo lafz "Hoor" istemaal hua hai us se muraad sirf khawateen hai kyunki uske baare mein khitab mardo se kiya gaya hai, uska wo jawab jo sab qism k loogo k liye laziman qabil e qubool ho, hadees mubarak mein iska jawab diya gaya hai:
Allah ta'ala ne farmaya mene apne bando k liye wo kuch tayyar kar rakkha hai jise unki aankho ne dekha hai na unke kaano ne suna hai aur na kisi insaan k dil mein uska khayal guzra hai. (Sahih Bukhari Hadees no. 4779)
Hadees k lafz Ibaad mein mard aur aurat dono shamil hai albatta is silsiley mein sheikh Nasiruddin Albani Rahimahullah ne silsila saheeya mein ek hadees naqal ki hai k (jannat mein) aurat (dunya k lihaz se) aakhiri khawind k saath hogi. (Silsila Ahadees E Saheeya Hadees no. 1281)
Is se maloom hota hai k dunya mein shadi shuda aurat jannat mein bhi apne khawind hi k saath hogi, albatta jinki shadi na hui ya jinke khawind kafir hai unko jannat mein mardo k saath biyaah diya jayega. (Tafseer Ruhul Ma'aani 14/207)
KYA GAIR MUSLIM KO KAFIR KEHNA GAALI HAI?
Bismillahirrahmanirraheem
"Kafir" use kehte hai jo jhutlata ya inkaar karta hai, "Kafir" ka lafz "Kufr" se nikla hai jis ka mana hai: jhutlana ya chipana, islaami istalah mai "kafir" ka matlab hai jo islaam ki talimaat aur uski sacchai ko chipata ya jhutlata hai aur jo shaks islam ka inkaar karta hai usko gair muslim kehte hai.
KAFIR KI ISTALAH GAALI NHI
Agar koi gair muslim khud ko "gair muslim" ya "kafir" kahe jane ko gaali samajhta hai, jiska matlab ek hi hai, to ye is ki islam k baare mai galat fehmi ki wajah se hai, ise islam aur islaami istalahaat ko samajhne k sahi zaraye tak rasayi hasil karne ki koshish karni chahiye aur "kafir" kehe jane ko gaali nhi samajhna chahiye, "gair muslim" aur "kafir" k alfaaz gaali nhi hai balke musalmabo aur degar mazahib k pairokaaro k mabain mehaz khatte imtiyaaz khechne wali istelahaat hai is mai tahkeer ka koi pehlu nhi hai fark wa imtiyaaz kayam karne wali ek maroof islaah ko gaali karaar dena bilkul bhi sahi nhi hai.
ISLAM MAI ZIBAH KARNE KA TARIQA ZALIMAANA KYU?
Bismillahirrahmanirraheem
Musalman jaanwaro ko zalimaana tareeqey se dherey dherey kyu zibah karte hai? ye sawal gair muslimo ki taraf se aksar kiya jata hai.
Janwar zibah karne ka islami tarika "Zabiha" gair muslimo ki aksariyat k nazdeek tankeed ka ba'as (sabab) hai, agar koi mandarja zail nukaat ko jaan sakta hai k zibah karne ka ye tareeqa na sirf reham dilana hai balke science k lihaaz se bhi behtar hai.
ZIBAH KARNE KA ISLAMI TAREEQA
Islami tareeqe se janawar zibah karne k liye kuch shara'it ka khayal rakhna chahiye:
1. janwar ko taiz dhaar chaku ya churi se teezi se zibah karna chahiye taakey janwar ko kam se kam takleef ho.
2. "Zabiha" arbi lafz hai jiska matlab hai "zibah kiya gaya" janwar ko zibah karne ka amal uska gala, sans ki naali aur gardan mai mojood khoon ki naliya kaat kar anjaam dena chahiye.
3. sar utaarne se pehle khoon ko mukammal taur par beh jane dena chahiye, khoon ki beshtar mikdaar nikaalne ki wajah ye hai k khoon mai jaraseem nushu wa numa pa sakte hai, haraam magaz ko nhi kaatna chahiye kyunki dil ko jaane wale aasaab ko nuksaan pahunch sakta hai aur yu dil ki dhadkan ruk jane ki wajah se khoon mukhtalif naliyo mai munjamad ho jata hai.
KHOON MAI JARASEEM AUR BACTERIA
Khoon mukhtalif qism k jaraseem, bacteria ya aur zehro (Toxins) ki muntakli ka zariya hai, is liye musalmano ka zibah karne ka tariqa zayada sehatmand aur mehfooz hai kyunki khoon mai tamaam kism k jaraseem hote hai jo mukhtalif beemariyo ka sabab bante hai, lihaza jayada se jayada khoon jism se nikal dena chahiye.
ZABIHA GOOSHT KI TAAZGI
Janwar islami tareekey se zibah kiye jaye to khoon k mumkana had tak sharyaano se nikal jaane ki badolat goosht zibah karne k doosre tareeqo ki banisbat zayada dair tak taaza rehta hai.
JANWAR KO TAKLEEF NHI HOTI
Gardan ki sharyaani tezi k saath kaatne se dimaag k us asb (Nerve) ki taraf khoon ka bahaav ruk jata hai jo ehsaas dard ka zimmedaar hai, yu janwar ko dard mehsoos nahi hota janwar jab marte waqt tadapta hai ya taagey hilaata aur maarta hai to ye dard ki wajah se nhi balke khoon ki kami k ba'as azlaat k phelne aur sukadne ki wajah se hota hai aur khoon ki kami ka sabab khon ka jism se bahar ki taraf bahao hota hai.
SUWAR KA GOOSHT HARAAM KYU?
Bismillahirrahmanirraheem
Suwar ka goosht khana islam mai kyu mana hai ? Ye bhi gair muslimo ki taraf se khaas kar isayo ki tarf se ek sawal hai
Islam mai suwar ka goosht haraam hai ye haqeeqat bahut wazay hai, mandarja zail nukaat is ki wazahat karte hai k ye kyu haraam hai.
QURAN MAI SUWAR K GOOSHT KI MUMANIYAT
Quran mai suwar ka goosht khane se kam wa baish chaar jagah mana farmaya gaya hai, ye mumaniyat in ayaat: surah no. 2 ayat no. 173, surah no. 5 ayat no. 3, surah no. 6 ayat no. 145 aur surah no. 16 ayat no. 115 mai ayi hai, Irshaad e baari ta'ala hai: tumhare liye haraam kiya gaya hai murda jaanwar aur khoon aur suwar ka goosht aur jis par Allah k siwa kisi aur ka naam liya gaya ho. (Surah Maida surah no. 5 ayat no. 3)
ye baat musalmano ko mutmaeen karne k liye kaafi hai k suwar ka goosht kyu mana kiya gaya hai, taahum isayi apni mazhabi kitaab k hawale se qayal ho sakte hai.
BIBLE MAI SUWAR K GOOSHT KI MUMANIYAT
Bible k ahad naama aeteek ki kitab ahbaar (Leviticus) mai likha hai: "aur suwar na khana kyunki uske pao (foot) alag aur jude hue hai, har chand wo jugaali nhi karta, wo tumhare liye napaak hai, tum un ka goosht na khana aur unki laasho (deadbody) ko bhi na choona wo tumhare liye napaak hai". (Ahbaar:11/7-8)
suwar ka goosht bible ki kitab istashna (Deuteronomy) mai bhi mana kiya gaya hai: "aur suwar tumhare waaste is liye napaak hai k uske paao to chirey hue hai magar wo jugaali nhi karta, tum unka goosht na khana na unki laash ko choona". (Istashna: 14/8)
isi tarha bible ki kitab yeesah (Isaiah) baab 65 fukrah 2 ta 5 mai bhi suwar ka goosht khane se mana kiya gaya hai
SUWAR KA GOOSHT 70 BIMARIYO KA SABAB BANTA HAI
Dusre gair muslim aur doohre is haqeeqat ko usi waqt ko tasleem karenge jab unko akli daleel aur science ki bunyaad par samjhaya jaye k suwar ka goosht mukhtalif kism ki kam az kam 70 bimariyo ka ba'as banta hai ise khane wale k maadey aur aanto mai kayi kism k keedey paida ho sakte hai jese pait k keede wagaira in mai se sab se khatarnaak “Taenia Solium” hai jis ko aam zubaan mai kudwadana kehte hai ye aanto mai hota hai aur bahut lamba hota hai, is ka anda khoon mai shamil ho kar takreeban tamaam aazaa tak pahunch jata hai agar ye dimaag mai chala jaye to yaad dasht ko nuksaan pahuncha sakta hai, agar dil mai pahunch jaye to dil k doorey ka sabab banta hai, agar aankh mai dakhil ho jaye to andha pan paida kar sakta hai, agar jigar mai dakhil ho jaye to jigar ko nuksaan pahuncha sakta hai, ye jism k takreeban hisso ko nuksaan pahuncha sakta hai.
Ek galat khayal ye hai k agar suwar ka goosht acchey tareeke se paka liya jaye to mazr keedo k andey mar jaate hai, America mai ek tehqeeqi jaize se pata chala k 24 ifraad jo "Trichura-Tichurasis" naami beemari mai mubtala hue, unme se 22 ne suwar ka goosht acchi tarah pakaya tha, is se saabit hota hai k uske goosht mai mojood jaraseem k andey taiz darja hararat par pakaane se bhi nahi marte.
SUWAR KA GOOSHT CHARBI PAIDA KARTA HAI
Suwar k goosht mai azlaat saaz mada kam aur had se zayada charbi hoti hai, ye charbi khoon ki baaliyo mai jam jaati hai jo faalij aur dil k doorey ka sabab banti hai, ye koi hairaan kun baat nahi k 50 kaisar ameriki high blood pressure ka shikaar hai.
ZAMEEN KA GAIZ TAREEN (GANDA) JANWAR
Suwar rooye zameen ka gaiz tareen janwar hai, ye goobar aur gandagi par phalta phoolta hai, ise Allah ta'ala ne gilazat khoor aur sab se zayada gandagi par guzara karne wala janwar banaya hai, dihaat (village) mai amooman toilet aur baitul khula nahi hote, is liye loog khuli jagaho par rafa e haajat karte hai aur aksar is galazat ko suwar hi chatt (saaf) karte hai, koi ye daleel de sakta hai k turkey ya fatah mumalik jese australia wagaira mai suwar ko badi saaf suthri jagah pala jata hai in saaf jagaho par bhi unke baado mai rakha jata hai haqeeqat ye hai k suwaro ko kitni hi saaf suthri jagah rakha jaye us se kuch fark nhi padta, ye fitratan gandey hai wo na sirf apna balke apne saath wale ka fazla bhi kha jate hai.
SUWAR BESHARAM JANWAR HAI
Khinzeer zameen par paya jane wala sabe se jayada besharam janwar hai, ye wahid janwar hai jo degar suwaro ko targeeb deta hai k wo uski saathi suwarni se jinsi faal kare, america mai aksar loog uska goosht khate hai kai dafa mehfil (dance party) k baad wo apni biwiya badal lete hai aur kehte hai "tum meri biwi k sath so jao aur mai tumhari biwi k sath hambistar hunga" zahir si baat hai jo loog suwar ka goosht khayenge wo usi tarha karenge.
Allah ta'ala hamari hifazat farmaye. (Aameen Ya Rabbal Alameen)
MARD AUR AURAT KI GAWAHI MAI MUSAWAAT (BARABARI) KYU NHI?
Bismillahirrahmanirraheem
"2 aurto ki gawahi 1 mard ki gawahi k barabar kyu hai" ye ilzaam gair muslimo ki taraf se islam par lagaya jata hai k islam mai mard aur aurat barabar nhi hai islam is k baare mai kya kehta hai zara dekh lete hai.
2 aurto ki gawahi hamesha ek mard ki gawahi k barabar nhi, quran majeed mai 3 aayaat hai jin mai mard aur aurat ki tafreeq k bagair gawahi k ahkaam aye hai
1. Virasat k mutalliq wasiyat karte waqt 2 aadil ashkhaas ki gawahi ki zarurat hoti hai, Irshaad e bari ta'ala hai: Ae emaan walo jab tum mai se kisi ko maut aane lage to tumhare darmiyaan gawahi honi chahiye, tarke ki wasiyat k waqt 2 insaaf wale apne (musalmano) mai se gawah bana lo ya agar tum zameen mai safar par niklo aur (raaste mai) maut ki museebat paish aajaye to gair kaum k 2 (gawah bhi kaafi honge). (Surah Ma'ida surah no. 5 ayat no. 106)
2. Talaaq k maamle mai 2 aadil ashkhaas ko gawah banane ka huqm hai, Irshaad e baari ta'ala hai: aur tum apne mai se 2 ashkhaas ko gawah bana lo jo aadil ho aur Allah k liye gawahi de. (Surah talaaq surah no. 65 ayat no. 2)
3. Paak baaz aurat k khilaaf gawahi k liye 4 shahadate darkaar hai, Irshaad e baari ta'ala hai: aur jo loog paak baaz aurto par tohmat lagaye, phir wo 4 gawah paish na kar sakey (apne ilzaam ki tasdeek mai) to unko 80 koode maaro aur unki gawahi kabhi qubool na karo aur yahi loog nafarmaan hai. (Surah noor surah no. 24 ayat no. 4)
MAALI LAIN DAIN MAI AURAT KI GAWAHI
Ye sahi nahi k hamesha 2 aurto ki gawahi 1 mard k barabar hogi ye sirf chand maamlaat k liye hai quran mai 5 ayaat hai jin mai gawahi k baare mai mard aur aurat ki takhsees k bagair hukm diya gaya aur sirf 1 aayat hai jis mai kaha gaya hai k 2 aurato ki gawahi 1 mard k barabar hai, Irshaad e baari ta'ala hai: Ae emaan walo jab tum ek muqarrarh muddat k liye ek dusre se udhaar ka lain dain karo to use likh lo aur likhne wale ko chahiye k tumhare darmiyaan insaaf se likhey aur likhne wala likhne se inkaar na kare, jese Allah ne use sikhaya hai use likhna chahiye, aur wo shaks likhwaye jis k zimmey qarz ho aur use apne rabb, Allah se darna chahiye aur (likhwate waqt) wo (makrooz) us mai se koi cheez kam na kare, lekin agar wo fard jis k zimmey qarz ho, nadaan ya zaeef ho ya likhwa na sakta ho uska wali insaaf k sath likhwaye, aur tum apne musalman mardo mai se 2 gawah bana lo, phir agar 2 mayassar na ho to 1 mard aur 2 aurate jinhe tum gawaho k taur par pasand karo (ye is liye) k 1 aurat bhool jaye to unme se dusri use yaad dila de. (Surah baqara surah no. 2 ayat no. 282)
Quran ki ye ayat sirf maali maamlaat aur lain dain k liye hai is kism ki maamlaat mai ye naseehat ki gayi hai k mua'hide ko dono fareeqo k ma'bain likha jaye aur 2 gawah banaye jaye aur ye koshish ki jaye k wo sirf mard ho agar 2 mard na mil sakey to phir 1 mard aur 2 aurtey kaafi hai, islami shariyat mai maali maamlaat mai 2 mardo ko tarjeeh di jati hai, islam mard se khandaan ki kifalat ki tokeey karta hai chunkey iktasaadi zimmeydari mardo par hai, is liye ye tokeey ki jati hai k wo lain dain mai aurato ki nisbat zayada ilm wa aagahi rakhte hai, dusri surat mai 1 mard aur 2 aurate gawah hongi k agar ek galti par ho to dusri use yaad dila de, quran mai arbi lafz (TAZILLA) ka matlab hai "galti par hona" ya "bhool jana" isi wajah se sirf maali maamlaat mai 2 aurato ki gawahi 1 mard ki gawahi k barabar rakhi gayi hai.
KATAL K MUQADDAMAAT MAI NASWAANI GAWAHI
Is k bar’aks kuch loogo ki raaye hai k aurato ki shahadat qatal k maamle mai bhi dohri hai, yaani 2 aurato ki gawahi 1 mard ki gawahi k barabar hai, is kism k maamlaat mai aurat, mard ki nisbat zayada khoofzada hoti hai, wo apni jazbaati haalat ki wajah se pareshaan ho sakti hai, isi liye kuch loogo k nazdeek qatal k muqaddamaat mai bhi 2 aurato ki gawahi 1 mard ki gawahi k barabar hai
kuch ulama k nazdeek 2 aurato aur 1 mard ki gawahi ki barabari hamaam maamlaat k liye hai, is se ittefaaq nhi kiya ja sakta kyunki surah noor mai 1 mard aur 1 aurat ki gawahi k baarey mai wazey taur par bataya gaya hai, Irshaad e baari ta'ala hai: Aur jo loog apni biwiyo par ilzaam lagaye aur unke paas koi gawah na ho siwaye unki apni zaat k to unmai se har ek ki shahadat is tarha hogi k chaar baar Allah ki kasam kha kar kahe k beshak wo saccho mai se hai aur panchvi baar ye kahe: agar wo jhooto mai se ho to us par Allah ki laanat ho aur is aurat se saza tab talti hai k wo chaar baar Allah ki qasam kha kar kahe k bilashuba wo (is ka shohar) jhooto mai se hai aur panchivi baar ye kahe k agar wo (shohar) saccho mai se ho to us (aurat) par Allah ka gazab ho. (Surah noor surah no. 24 ayat no. 6 se 9 tak)
HAZRAT AYESHA RAZI ALLAHU ANHA KI GAWAHI
Hazrat ayesha razi Allahu anha se, jo hamare nabi Sallallahu Alaihi Wa Sallam ki biwi thi, kam wa baish 2220 k kareeb ahadees marvi hai jo sirf unki wahid shahadat ki badolat mustanad hai ye is amr ka wazey saboot hai k sirf 1 aurat ki gawahi bhi qabool ki ja sakti hai
Bahut se ulama is baat par muttafiq hai k 1 aurat ki gawahi pehli raat ka chand dekhne k liye bhi kaafi hai, andaaza kare k roza rakhne k liye jo islaam k arkaan mai se ek aham rukan hai, 1 aurat ki gawahi kaafi hai aur is ki gawahi par tamaam musalman mard aur aurate roza rakhte hai, kuch fukaha k nazdeek aagaaz e ramazaan k silsile mai ek gawahi darkaar hai jabke uske khatam hone k liye 2 gawahiya zaroori hongi, is se farq nhi padta k gawahi dene wale mard ho ya aurat.
BAAZ MAAMLAAT MAI AURATO HI KI GAWAHI KO TARJEEH HASIL HAI
Baaz maamlaat mai sirf khatoon gawaah darkaar hoti hai, misaal k taur par aurato k masail aurato ki tadfeen k waqt gusal k maamlaat mai sirf aurat hi ki gawahi mustanad hogi aese maamlaat mai mard ki gawahi qabool nhi ki ja sakti.
Maali maamlaat mai mard aur aurat ki gawahiyo mai nazar aane wali adm musawaat islaam k nazeed kisi sanfi adm musawaat ki bunyaad par nhi balke ye sirf mu'asharey mai aurato aur mardo ki mukhtalif noiyyat aur mukhtalif kirdaaro ki bina par hai jo islaam ne unke liye mutayyan kiye hai.
KYA MUSALMAN KAABA KI IBADAT KARTE HAI?
Bismillahirrahmanirraheem
QIBLA ITTEHAAD AUR ITTEFAAK KA ZARIYA HAI
Islam wahdat ka deen hai, chunanchey musalmano mai ittehad aur ittefaak peda karne k liye islam ne ek qibla mutayyan kiya hai aur unko huqm diya gaya hai k wo jaha kahi bhi ho, namaz k waqt kaaba ki taraf rukh kare, jo muslaman kaaba k magrib ki taraf rehte ho, wo apna rukh mashrik ki taraf karege aur jo mashrik ki taraf rehte ho, wo apna rukh magrib ki taraf karege.
KAABA NAKSHA E AAM K WAST (CENTER) MAI HAI
Ye musalman hi they jinhone sab se pehle dunya ka naksha banaya, unke naksho mai junoob uper ki taraf tha aur shimaal nichey ki taraf aur kaaba darmiyaan mai tha, baad mai magribi naksha nigaaro ne jo nakshey banaye, unmai shimaal uper aur junoob nichey ki taraf dikhaya gaya jesa k aaj kal dunya k nakshey banaye jate hai behar haal alhamdulillah kaaba dunya k nakshey k takreeban wast (center) mai hai.
TAWAAF E KAABA
Jab musalman makka ki masjid e haraam mai jaate hai, wo kaaba k gird chakkar laga kar tawaaf karte hai, unka ye amal wahid sacchey mabood par emaan aur uski ibadat ki alamat hai, jese har da’yire (circle) ka ek hi markaz hota hai, usi tarha Allah ta'ala bhi ek hai jo ibadat k layak hai.
HAZRAT UMAR RAZI ALLAHU ANHU KI EK HADEES MAI AQEEDAH E TAUHEED
Jaha tak siya (black) patthar, yaani hajra e aswad ki hurmat ka talluq hai, hazrat umar razi Allahu anhu ki ek hadees se wazey hai, hazrat umar razi Allahu anhu ne hajra e aswad ko bosa diya aur kaha: "mai yakeenan janta hu k tu ek patthar hai, na tu koi faida pahuncha sakta hai na koi nuksaan, agar mene Nabi Sallallahu Alaihi Wa Sallam ko tujhey choomtey na dekha hota to mai tujhey kabhi na choomta". (Sahih Bukhari Kitabul Hajj Hadees No. 1597)
KAABA KI CHATT (ROOF) PAR AZAAN
Nabi Kareem Sallallahu Alaihi Wa Sallam k daur mai loog kaaba ki chatt (roof) k uper khade ho kar azaan dete they. (Tajalliyaat e nabuwat safa no. 226)
Ab jo loog ye aetraaz karte hai k musalman kaaba ko poojtey (ibadat) hai to bhala konsa butoo (murtiyo) ko poojne wala us butt (murti) k uper khada hota hai jiski wo pooja karta hai.
Islam mai poojne aur ibadat karne ka tasawwur zaat e baari ta'ala k liye hai, hajr, shajr, shaksiyaat ya isthaan (jagah wagaira) ki pooja ka tasawwur islam mai nhi paya jata, islam ne to aesi jagah par bhi ibadat se rook diya hai jaha Allah k alawa kisi aur ki ibaadat ka shuba (shak) paida ho sakta ho, masalan kabristaan mai namaz ada karna, ya aisi jagah ibadat karna jaha gair Allah ki ibadat ki jati ho, mamnoo (mana) hai, tareekh shahid hai k kisi daur mai koi ek misaal bhi nhi milti k musalmano ne kisi makaan ya imaarat ki ibadat ki ho, islam mai Allah k alawa kisi aur ki ibadat ka tasawwur hota to Muhammad Sallallahu Alaihi Wa Sallam is laayak they k aap ki qabar ko qibla banaya jata aur uski ibadat ki jaati, lekin aap Sallallahu Alaihi Wa Sallam ne is se sakhti se mana kar diya, isi tarha aap Sallallahu Alaihi Wa Sallam ne farmaya k Allah ta'ala k siwa kisi aur ko sajdah jayez hota to mai aurat ko huqum deta k wo apne khawind ko sajdah kare, phir ye baat bhi hai k butoo (murtiyo) k pujari to butkhane mai ja kar ibadat karte hai ya un butoo (murtiyo) k model bana kar saamne rakhte hai jab k musalman kabooliyat e ibadat k liye khana e kaaba jaane ko shart karaar dete hai na k us ka model apne saamne rakhna jayez samajhte hai, wo to hujjat e kaaba ko saamne rakh k kaaba k bajaye rabb e kaaba ki ibaadat karte hai.
