AZAAN AUR IQAMAT K MASA'IL

AZAAN AUR IQAMAT K MASA'IL

Bismillahirrahmanirraheem

1. Har namaz k liye Azaan deni chahiye: Rasool Allah Sallallahu Alaihi Wa Sallam ne farmaya "Jab namaz ka waqt aaye to tum mein se koi ek azaan kahe, aur tum mein se bada imamat karaaye". (Sahih Bukhari Kitabul Azaan Hadees no. 628, Sahih Muslim Kitabul Masajid Hadees no. 674)

2. Hazrat Bilal Razi Allahu Anhu azaan kehte hue kaano mein ungliya daalte they. (Sahih Bukhari Kitabul Azaan, Tirmizi Kitabus Salaat Hadees no. 197)

3. Hazrat Bilal Razi Allahu Anhu "HAIYYA ALAS SALAAH" kehte hue muh daayi janib phair lete they aur "HAIYYA ALAL FALAAH" kehte waqt baayi taraf. (Sahih Bukhari Kitabul Azaan Hadees no. 634, Sahih Muslim Kitabus Salaat Hadees no. 503)

4. Hazrat Usman bin Abul Aas Razi Allahu Anhu ki riwayat hai k Nabi E Akram Sallallahu Alaihi Wa Sallam ne unko unki quam ka imam muqarrar kiya aur farmaya "Muazzin wo muqarrar kar jo apni azaan par mazdoori na le". (Abu Dawood Kitabus Salaat Hadees no. 531, Tirmizi Kitabus Salaat Hadees no. 2091, ise Hakim 1:199, 201 aur Zahbi ne sahih kaha)

5. Muazzin wo muqarrar karna chahiye jo buland aawaaz wala ho: Hazrat Abdullah bin Zaid Razi Allahu Anhu kehte hai k Rasool Allah Sallallahu Alaihi Wa Sallam ne unhey farmaya "Bilal ko azaan sikhaao kyunki wo tum se buland aawaaz hai". (Abu Dawood Hadees no. 499, Tirmizi Hadees no. 189)

6. Ek Sahabiya Razi Allahu Anha farmati hai k masjid k qareeb tamaam gharo se mera makaan uncha tha aur Hazrat Bilal Razi Allahu Anhu us (makaan) par (khade ho kar) fajar ki azaan dete they. (Abu Dawood Kitabus Salaat Hadees no. 519, Ise Ibne Hajar ne sahih kaha)

7. Hazrat Abdullah bin Umar Razi Allahu Anhu riwayat karte hai k Rasool Allah Sallallahu Alaihi Wa Sallam ne ek aadmi ko farmaya "Jesa muazzin kehta hai tu bhi usi tarah jawab de phir jab to jawab se farigh ho jaye to (dua) maang! to diya jayega". (Abu Dawood Kitabus Salaat Hadees no. 524, ise Imam Ibne Hibban  295 ne sahih kaha)

8. Rasool Allah Sallallahu Alaihi Wa Sallam ne farmaya "Azaan aur takbeer k darmiyaan Allah ta'ala dua radd nahi farmata". (Abu Dawood Kitabus Salaat Hadees no. 521, Tirmizi Hadees no. 312, ise Imam Tirmizi ne hasan kaha)

9. Bimaariyo aur waba k moqey par loog ghar gahr azaaney dete hai ye sunnat se sabit nahi, kyunki is silsiley mein paish ki jaane wali tamaam riwayaat zaeef hai.

10. "AS SALAATU KHAIRUM MINAN NAUM" k alfaaz siwaaye fajar k kisi aur azaan mein nahi kehne chahiye.

11. Iqamat, azaan k fauran baad nahi honi chahiye kyunki Nabi E Akram Sallallahu Alaihi Wa Sallam ne farmaya "Azaan aur takbeer k darmiyaan nafil namaz hai, Aapne teen baar ye kalmaat kahe phir farmaya jiska dil chaahye (namaz padhey)". (Sahih Bukhari Kitabul Azaan Hadees no. 624, Sahih Muslim Kitabus Salatul Musafireen Hadees no. 838)

12. Subah sadiq se kuch dair pehle bhi ek azaan hai Nabi Rahmat Sallallahu Alaihi Wa Sallam ne farmaya "Tumhey Bilal ki azaan sehri khaane se na rookey kyunki wo raat ko azaan dete hai takey tahajjud padhne wala lout aaye aur sooney wala khabardaar ho jaye". (Sahih Bukhari Kitabul Azaan Hadees no. 621, Sahih Muslim Kitabus Siyaam Hadees no. 1093)

13. Is azaan aur namaz e fajar ki azaan mein itna waqfa nahi hota tha jitna k aaj kal kiya jata hai, Hazrat Abdullah bin Umar Razi Allahu Anhu farmate hai dono muazzino k darmiyaan sirf is qadar waqfa hota tha k ek azaan de kar utarta aur doosra azaan k liye chadh jata. (Sahih Muslim Hadees no. 1092)

14. Nabi Rahmat Sallallahu Alaihi Wa Sallam ne farmaya "Jab iqamat ho jaye to farz namaz k alawa koi namaz nahi hoti". (Sahih Muslim Kitabus Salaatul Musafireen Hadees no. 710)

Agar koi jamaat ki parwaah na karte hue sunnatey padhega to phir "Naiki barbaad gunah laazim" wala muhawara poora ho jayega, lihaza namaziyo ko chahiye k agar wo tashahud k qareeb na pahunchey hue ho fauran sunnatey tood kar jamaz k saath shamil ho jaye han agar koi shaks yahi namaz us se pehle jamat k saath ada kar chuka ho to phir wo sunnatey jaari rakh sakta hai. Wallahu Aalam

15. Rasool Allah Sallallahu Alaihi Wa Sallam ne farmaya "Jab iqamat kahi jaaye to saff mein shamil hone k liye na bhaago balkey waqaar k saath chalte hue aao jo namaz tum (imam k saath) paa lo aur jo reh jaaye usey baad mein poora karo". (Sahih Bukhari Kitabul Azaan Hadees no. 636, Sahih Muslim Hadees no. 602)

16. Ek shaks azaan sun kar masjid se nikla Hazrat Abu Hurairah Razi Allahu Anhu ne farmaya k beshak us shaks ne Abul Qasim Sallallahu Alaihi Wa Sallam ki nafarmaani ki. (Sahih Muslim Kitabul Masajid Hadees no. 655)

Shari uzr ya namaz ki tayyari k silsiley mein bahar jaana padey to jayez hai

17. Nabi E Akram Sallallahu Alaihi Wa Sallam ne farmaya "Jo namaz ka iraadah kare to goya wo namaz hi mein hai". (Sahih Muslim Kitabul Masajid Hadees no. 602)

Yaani agar wo bila wajah susti se kaam na le to jab tak wo namaz nahi padh leta, usey namaz ka sawab musalsal mir raha hota hai. (Wallahu Aalam)

18. Hameed riwayat karte hai k mene Sabit Banaani se pucha: Kya namaz ki iqamat ho jaane k baad imam batey kar sakta hai? to unhoney mujhe Hazrat Anas bin Malik Razi Allahu Anhu ki hadees bayan ki k ek martaba namaz ki iqamat ho chuki thi, itne mein ek shaks aaya aur iqamat ho jaane k baad Nabi Rahmat Sallallahu Alaihi Wa Sallam se baatey karta raha. (Sahih Bukhari Kitabul Azaan Hadees no. 643, Sahih Muslim Hadees no. 376)

19. Ek dafa namaz ki iqamat ho gayi, logo ne safey barabar karli, itne mein Rasool Allah Sallallahu Alaihi Wa Sallam ko yaad aaya k aap junbi hai aapne loogo se kaha, apni jagah khade raho, phir aapne (ghar ja kar) gusal farmaya aur jab aap wapas tashreef laaye to aapke sar se paani tapak raha tha phir aapne namaz padhaayi. (Sahih Bukhari Kitabul Azaan Hadees no. 640, Sahih Muslim Kitabul Masajid Hadees no. 605)

Bhool jana insaani kamzoori hai Aap Sallallahu Alaihi Wa Sallam bashar they isi liye bhool gaye ye bhi sabit hua k bhoolna shaan e khilafat k khilaf nahi hai.

AZAAN K BAAD KI DUWAYE

AZAAN K BAAD KI DUWAYE

Bismillahirrahmanirraheem


1. Hazrat Abdullah bin Umar bin Aas Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Jab tum muazzin (ki aawaaz) suno to tum muazzin ko jawab do aur jab azaan khatam ho jaye to phir mujh par darood bhejo pas jo mujh par ek baar darood bhejta hai Allah us par das baar rahmat bhejta hai". (Sahih Muslim Kitabus Salaat Hadees no. 384)

Pas sab musalman mardo aur aurato ko chahiye k jab muazzin azaan khatam kare to ek baar darood shareef padh le

"ALLAHUMMA SALLI ALA MUHAMMADIN WA ALA AALI MUHAMMADIN KAMA SAL'LAITA ALA IBRAHEEMA WA ALA AALI IBRAHEEMA INNAKA HAMEEDUM MAJEED, ALLAHUMMA BAARIK ALA MUHAMMADIN WA ALA AALI MUHAMMADIN KAMA BAARAKTA ALA IBRAHEEMA WA ALA AALI IBRAHEEMA INNAKA HAMEEDUM MAJEED" "Ya Allah rahmat bhej Muhammad Sallallahu Alaihi Wa Sallam aur aal e Muhammad Sallallahu Alaihi Wa Sallam par jese rahmat bheji tooney Ibraheem Alaihis Salaam aur aal e Ibraheem Alaihis Salaam par beshak to tareef kiya gaya, buzurgi wala hai, Ya Allah barkat bhej Muhammad Sallallahu Alaihi Wa Sallam aur aal e Muhammad Sallallahu Alaihi Wa Sallam par jese barkat bheji tooney Ibraheem Alaihis Salaam aur aal e Ibraheem Alaihis Salaam par beshak to tareef kiya gaya, buzurgi wala hai". (Sahih Bukhari Kitabul Ahadeesul Anbiya Hadees no. 3370, Sahih Muslim Hadees no. 406)

2. Hazrat Jabir Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Jo shaks (azaan ka jawab de aur phir) azaan khatam hoone par ye dua padhey uske liye qayamat k din meri shifa'at wajib ho jati hai:

"ALLAHUMMA RABBA HAZIHID DAAWATIT TAMMATI WAS SALATIL QA'IMATI AATI MUHAMMADAL WASEELATA WAL FAZEELATA WAB ASAHU MAQAMAN MAHMOODAL LAZI WA ATTAH" "Is poori pukaar (azaan) k aur (qayamat tak) qayam rehne wali namaz k rabb! Muhammad Sallallahu Alaihi Wa Sallam ko waseela aur buzurgi ata farma aur unhey Maqaam e Mahmood mein pahuncha jiska tooney unse waada kiya hai". (Sahih Bukhari Kitabul Azaan Hadees no. 614)


WASEELA KI TASHREEH

Waseela k mutalliq khud Rasool Allah Sallallahu Alaihi Wa Sallam ne farmaya "Tehqeeq waseela bahisht mein ek darja hai jo sirf ek bandey k layak hai aur mein ummeed rakhta hu k wo bandah mein hi hu, pas jisne (azaan ki dua padh kar) Allah se mere liye waseela maanga uske liye (meri) shifa'at wajib ho gayi". (Sahih Muslim Kitabus Salaat Hadees no. 384)

Nabi Rahmat Sallallahu Alaihi Wa Sallam k irshad se maloom hua k waseela bahisht mein ek buland wa bala darje ka naam hai.


DUA E AZAAN MEIN IZAAFA

Masnoon dua e azaan mein baaz loogo ne chand alfaaz badha rakkhey hai aur wo alfaaz murawajjah kutub e namaz mein bhi mojood hai, dua e masnoon k jumla (WAL FAZEELA) k baad (WAD DARAJATAR RAFEEAH) ki ziyadati karte hai aur aagey (WA ATTAHU) k khalis doodh mein (WAR ZUKNA SHAFA ATAHU YAUMAL QIYAAMAH) ka paani mila rakkha hai aur phir aakhir mein masnoon dua k andar (YA ARHAMAR RAHIMEEN) ki amaizish hai afsoos! Kya Nabi Sallallahu Alaihi Wa Sallam ki dua mein ye khamiya reh gayi thi jo baad k loogo ne apne izaafey se poori ki hai? musalmano ko Rasool Allah Sallallahu Alaihi Wa Sallam k farman paak mein kami ya baishi karne k tasawwur se kaanp uthna chahiye, Nabi E Akram Sallallahu Alaihi Wa Sallam ne raat ko ba-wuzu ho kar sooney se pehle padhne k liye ek dua batlaayi, Hazrat Bara bin Aazib Razi Allahu Anhu ne padh kar sunaayi to (BI NABEEYIKA) ki jagah (BI RASOOLIKA) yaani nabi ki jagah rasool kaha, to Nabi E Rahmat Sallallahu Alaihi Wa Sallam ne farmaya k mere bataye hue lafz Nabi ko Rasool se mat badlo balke (BI NABEEYIKA) hi kaho. (Sahih Bukhari Kitabul Wuzu Hadees no. 247, Sahih Muslim Kibuz Zikr wa Dua Hadees no. 2710)

Is se maloom hua k masnoon duwaye aur wird tofeeqi (Allah ki taraf se) hai aur unki haisiyat ibadat ki hai lihaza unme kami baishi jayez nahi lihaza (kisi qareena ya daleel k bagair) mutakallim k saigey ko jama k saigey se badalna durust nahi hai uski bajaaye behtar ye hai k mutakallim ka saiga hi bola jaye albatta niyat mein ye rakkha jaye k mein yahi dua fala fala k haqq mein bhi kar raha hu, neez masnoon duwaon k hoote hue khud-saakhta arbi duwaon wazeefo aur daroodo ka iltazaam karna durust nahi hai aur agar unke kuch alfaaz shirk, kufr ya bida'at par mushtamil ho to is soorat mein unka padhna qatai tour par haraam ho jata hai lekin afsoos k jahil loog rozana pabandi k saath darood e taaj, darood e lakhi aur darood e hazaari wagairah ki "Tilawat" karte hai, Allah hum sabko hidayat de. Aaameen

3. Hazrat Saad bin Abi Waqaas Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Jo shaks muazzin (ki azaan) sun kar ye dua padhey to uske gunah baksh diye jayengey, Dua ye hai:

"ASH'HADU AN LAA ILAHA ILLALLAHU WAHDAHU LA SHAREEKA LAHU WA ANNA MUHAMMADAN ABDUHU WA RASOOLUHU RAZEETU BILLAHI RABBAU WA BI MUHAMMADIR RASOOLAU WA BIL ISLAAMI DEENAN" "Mein gawahi deta hu k Allah k siwa koi (saccha) mabood nahi wo ek hai uska koi shareek nahi aur tehqeeq Muhammad Sallallahu Alaihi Wa Sallam uske bandey aur rasool hai, mein Allah k rabb hoone aur Muhammad Sallallahu Alaihi Wa Sallam k rasool hoone aur islam k deen hoone par raazi hu". (Sahih Muslim Kitabus Salaat Hadees no. 386)

AZAAN KA JAWAB

AZAAN KA JAWAB

Bismillahirrahmanirraheem

Hazrat Umar Farooq Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Jab muazzin kahe "ALLAHU AKBAR" pas tum kaho "ALLAHU AKBAR" phir jab muazzin kahe "ASH'HADU AN LAA ILAHA ILLALLAH" tum bhi kaho "ASH'HADU AN LAA ILAHA ILLALLAH" phir jab muazzin kahe "ASH'HADU ANNA MUHAMMADAR RASOOLULLAH" tum bhi kaho "ASH'HADU ANNA MUHAMMADAR RASOOLULLAH" phir jab muazzin kahe "HAIYYA ALAS SALAAH" to tum kaho "LA HAULA WALA QUWWATA ILLAH BILLAH" phir jab muazzin kahe "HAIYYA ALAL FALAAH" to tum kaho "LA HAULA WALA QUWWATA ILLAH BILLAH" phir jab muazzin kahe "ALLAHU AKBAR" to tum kaho "ALLAHU AKBAR" phir jab muazzin kahe "LA ILAHA ILLALLAH" to tum kaho "LA ILAHA ILLALLAH", Jo shaks apne sadq e dil se muazzin k kalmaat ka jawab dega to (jawaab ki barkat se) bahisht (jannat) mein dakhil ho jayega. (Sahih Muslim Kitabus Salaat Hadees no. 385)

Hafiz ibne Hajar Rahimahullah farmate hai "ASSALATU KHAIRUM MINAN NAUM" k jawab mein "SADAQTA WA BARARTA" k alfaaz ki koi asal nahi, lihaza fajar ki azaan mein "ASSALATU KHAIRUM MINAN NAUM" k jawab mein bhi yahi kalma kehna chahiye yaani "ASSALATU KHAIRUM MINAN NAUM".

Takbeer k doraan ya baad mein "AQAMAHALLAHU WA ADAAMAHA" kehne wali Abu Dawood ki riwayat ko Imam Nawawi Rahimahullah ne Al Majmua mein zaeef kaha hai, ise hafiz ibne Hajar Rahimahullah ne bhi zaeef kaha hai.

AZAAN K FAZA'IL

AZAAN K FAZA'IL

Bismillahirrahmanirraheem

Hazrat Abu Saeed Khudri Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Jab tum bhaid bakriyo mein ho ya daihaat mein to namaz k liye azaan do aur apni aawaaz buland karo kyunki muazzin ki aawaaz ko jinnaat insaan aur jo jo cheez sunti hai wo qayamat k din uske liye gawahi degi". (Sahih Bukhari Kitabul Azaan Hadees no. 609)

Nabi E Akram Sallallahu Alaihi Wa Sallam ne farmaya "Muazzin k liye sawaab hai us shaks k sawaab k barabar jisne (azaan sun kar) namaz padhi". (Nasayi 2:31, 646 Kitabul Azaan, ise Munzari ne jaid kaha hai)

Mafhoom ye hua k muazzin ki awaaz sun kar jitne aadmi masjid mein aa kar namaz padhengey, un sabko apni apni namaz ka poora sawaab milega magar muazzin tamaam namaziyo k sawab k barabar mazeed ajar payega, kyunki usne unko namaz ki taraf bulaya tha.

Hazrat Muawiyah Razi Allahu Anhu se riwayat hai k mene Rasool Allah Sallallahu Alaihi Wa Sallam se suna "Qayamat k din azaan dene walo ki gardaney lambi hongi (Yaani Allah ka naam buland karne ki wajah se wo numaaya hongey)". (Sahih Muslim Kitabus Salaat Hadees no. 387)

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jab namaz k liye azaan di jaati hai to shaitan peeth phair kar bhaag jata hai, jab azaan khatam ho jati hai to phir aa jata hai aur namazi k dil mein waswasa daalta hai, fala fala baat yaad kar yaha tak k aadmi ko pata nahi chalta k usne kis qadar namaz padhi". (Sahih Bukhari Kitabul Azaan Hadees no. 608, Sahih Muslim Kitabus Salaat Hadees no. 389)

Hazrat Uqba bin Aamir Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Tumhara parwardigaar bakriya charaane wale par tajjub karta hai jo pahaad ki chooti par reh kar azaan deta hai aur namaz padhta hai" Allah ta'ala farmata hai "Mere bande ko dekho jo namaz k liye azaan deta hai aur iqamat kehta hai aur mujhse darta hai mene usko baksh diya aur jannat mein dakhil kiya". (Abu Dawood Kitabus Salatus Safar Hadees no. 1203, ise Ibne Hibban ne Sahih kaha)

AZAAN - IBTIDA, DOHRI AUR IKHARI IQAMAT, AZAAN KE KALMAAT JAFT AUR DOHRI AZAAN

 AZAAN - IBTIDA, DOHRI AUR IKHARI IQAMAT, AZAAN KE KALMAAT JAFT AUR DOHRI AZAAN

Bismillahirrahmanirraheem


Azaan Ki Ibtida:
Rasulullah Sallallahu Alaihi Wa Sallam jab Madina tashreef laye to sawal paida hua k namaz k aukaat ka elaan kese kiya jaye? kuch loogo ne ye tajweez di k namaz k waqt buland makaam par aag roshan ki jaye ya nakoos bajaya jaye!
Hazrat Ibne Anas Razi Allahu Anhu ne farmaya: "Baaz Sahaba ne kaha aag jalana ya nakoos bajana yahood wa nasara ki mushabihat hai, phir Bilal Razi Allahu Anhu ko huqm diya gaya k Azaan k kalmaat 2,2 baar aur takbeer (Iqamat) k kalmaat 1,1 baar kahe siwaye "QADQA MATIS SALAH" ke". (Bukhari Kitabul Azaan Hadees No. 603, Muslim Kitabus Salaat Hadees No. 378)

Azaan k Jaft kalmaat aur Takbeer k taaq kalmaat:
Hazrat Abdullah Bin Zaid Razi Allahu Anhu bayan karte hai k Rasulullah Sallallahu Alaihi Wa Sallam ne nakoos tayyar karne ka huqm diya takey loogo ko Namaz k liye jama kiya ja sake mai soya hua tha k mene Khawab mai ek Aadmi ko dekha jo nakoos uthay hue tha mene kaha Ae Allah k bande! kaya tu nakoos bajayega usne pucha k tum uska kya karoge, mene kaha hum Namaz k liye loogo ko jama karege, usne kaha mai tujhe aesi baat na sikhao jo us se behtar ho, mene kaha kyu nahi? usne kaha yu kaho: "ALLAHU AKBAR ALLAHU AKBAR ALLAHU AKBAR ALLAHU AKBAR, ASH'HADU ALLAH ILAHA ILLALLAH ASH'HADU ALLAH ILAHA ILLALLAH, ASH'HADU ANNA MUHAMMADAR RASULULLAH ASH'HADU ANNA MUHAMMADAR RASULULLAH, HAIYYA ALAS SALAH HAIYYA ALAS SALAH, HAIYYA ALAL FALAH HAIYYA ALAL FALAH, ALLAHU AKBAR ALLAHU AKBAR, LA ILAHA ILLALLAH". Tarjuma: "Allah sab se bada hai Allah sab se bada hai Allah sab se bada hai Allah sab se bada hai, Mai gawahi deta hu k Allah k siwa koi (saccha) mabood nahi Mai gawahi deta hu k Allah k siwa koi (saccha) mabood nahi, Mai gawahi deta hu k Muhammad (Sallallahu Alaihi Wa Sallam) Allah k Rasool hai Mai gawahi deta hu k Muhammad (Sallallahu Alaihi Wa Sallam) Allah k Rasool hai, Namaz ki taraf aao Namaz ki taraf aao, Nijaat ki taraf aao Nijaat ki taraf aao, Allah sab se bada hai Allah sab se bada hai, Allah k siwa koi mabood nahi" Phie jab takbeer kaho to yu kaho: "ALLAHU AKBAR ALLAHU AKBAR, ASH'HADU ALLAH ILAHA ILLALLAH, ASH'HADU ANNA MUHAMMADAR RASULULLAH, HAIYYA ALAS SALAH, HAIYYA ALAL FALAH, QADQA MATIS SALAH QADQA MATIS SALAH, ALLAHU AKBAR ALLAHU AKBAR, LA ILAHA ILLALLAH".
Mai subah ko Nabi Kareem Sallallahu Alaihi Wa Sallam k paas aya aur apna khawab sunaya, Aap ne farmaya: "Tum Bilal Razi Allahu Anhu k sath khade ho aur usko batlao jo tumne dekha wo buland awaaz wala hai" jab Bilal RA ne Azaan di to Hazrat Umar Razi Allahu Anhu jaldi se Masjid aye aur arz ki Ae Allah k Rasool Sallallahu Alaihi Wa Sallam! us zaat ki kasam jis ne aap ko haq k sath bheja hai maine bhi khawab mai uski manind dekaha hai, Rasulullah Sallallahu Alaihi Wa Sallam ne Allah ki tareef ki. (Abu Dawood Kitabus Salaat Hadees No. 499, Ibne Maja Kitabul Azaan Hadees No. 706, Ise Imam Ibne Habaan Hadees No. 287, Imam Tirmizi aur Imam Noowi ne sahi kaha)

Hazrat Abdullah Bin Umar Razi Allahu Anhu farmate hai k Rasulullah Sallallahu Alaihi Wa Sallam k zamane mai Azaan k kalmaat 2,2 martaba aur taqbeer k kalmaat 1,1 baat they siwaye iske k Muazzin "QADQA MATIS SALAH" do baar kehta tha. (Abu Dawood Kitabus Salaat Hadees No. 510, 511, Nasai 668, Darmi 280/1, Hakim 198/1, 198, Imam Zehbi aur Imam Noowi ne ise sahi kaha)

Dohri Azaan Aur Dohri Iqamat:
Azaan mai shahadat k charo kalmaat pehle dhimi awaaz se kehna aur phir dobara bulanad awaaz se kehna Tarjih kehlata hai, Abu Mahzura Razi Allahu Anhu se riwayat hai k Rasulullah Sallallahu Alaihi Wa Sallam ne bazaat khud mujhe Azaan sikhai, Aap ne unhi Azaan k 19 aur iqamat k 17 kalmaat sikhaye, pas Nabi Kareem Sallallahu Alaihi Wa Sallam ne farmaya (Azaan is tarha) Kaho: "ALLAHU AKBAR ALLAHU AKBAR ALLAHU AKBAR ALLAHU AKBAR, ASH'HADU ALLAH ILAHA ILLALLAH ASH'HADU ALLAH ILAHA ILLALLAH, ASH'HADU ANNA MUHAMMADAR RASULULLAH ASH'HADU ANNA MUHAMMADAR RASULULLAH,
Phir dobara kaho "ASH'HADU ALLAH ILAHA ILLALLAH ASH'HADU ALLAH ILAHA ILLALLAH, ASH'HADU ANNA MUHAMMADAR RASULULLAH ASH'HADU ANNA MUHAMMADAR RASULULLAH, HAIYYA ALAS SALAH HAIYYA ALAS SALAH, HAIYYA ALAL FALAH HAIYYA ALAL FALAH, ALLAHU AKBAR ALLAHU AKBAR, LA ILAHA ILLALLAH".
Aur Iqamat yu kaho: "ALLAHU AKBAR ALLAHU AKBAR ALLAHU AKBAR ALLAHU AKBAR, ASH'HADU ALLAH ILAHA ILLALLAH ASH'HADU ALLAH ILAHA ILLALLAH, ASH'HADU ANNA MUHAMMADAR RASULULLAH ASH'HADU ANNA MUHAMMADAR RASULULLAH, HAIYYA ALAS SALAH HAIYYA ALAS SALAH, HAIYYA ALAL FALAH HAIYYA ALAL FALAH, QADQA MATIS SALAH QADQA MATIS SALAH, ALLAHU AKBAR ALLAHU AKBAR, LA ILAHA ILLALLAH". (Muslim Kitabus Salat Hadees No. 379, Abu Dawood Kitabus Salaat Hadees No. 502)

Muslim ki Raiwayat mai shuru mai ALLAHU AKBAR do dafa hai jabke Abu Dawood ki riwayat mai ALLAHU AKBAR chaar dafa hai yani dohri azaan aur dohri iqamat sikhai magar afsoos k baaz loog mehaz apne Fiqhi maslak ki perwi mai intihai be insafi se kaam lete hue ek hi Hadees mai bayan shuda dohri iqamat par hamesha amal karte hai magar dohri azaan hamesha chood dete hai (kabhi nahi kehte) halanke Azaan wa iqamat ko dohra, ya ikhara kehna dono tarha sunnat se sabit hai. is se maloom hua k jab tak musalman kisi makhsoos Fiqah k Taqleedi bandhano se rihai nahi pata wo itaat e Rasool Sallallahu Alaihi Wa Sallam ka haq ada nahi kar sakta lihaza behtar ye hai k kisi masle mai mukhtalif Aimma k Dalail ka muwazana karke koi raye kayam ki jaye, mana k ek Talib e Ilm k liye aesa karna mushkil hai magar Ulma e Kiraam Muqallid ban kar tasweer ka sirf ek rukh loogo ko kyu dikhate hai? Zara Sochiye!

Fajar Ki Azaan Mai Izafa:
Abu Mahzura Razi Allahu Anhu kehte hai k Rasulullah Sallallahu Alaihi Wa Sallam ne unko azaan ki taleem di aru farmaya: "Fajar ki Azaan mai "HAIYYA ALAL FALAH" k baad do baar ye kalmaat zayada kahe: "ASSALATU KHAIRUM MINAN NAOU" Namaz Nind se behtar hai". (Abu Dawood Kitabus Salaat Hadees No. 501, Nasai Hadees No. 633, Ise Imam Ibne Khuzaima, Imam Habaan aur Imam Noowi ne sahi kaha)

Hazrat Anas Razi Allahu Anhu farmate hai k subah ki Azaan mai "HAIYYA ALAL FALAH" k baad "ASSALATU KHAIRUM MINAN NOUM" do dafa kehna sunnat hai. (Behiqi 423/1 Ise Imam Ibne Hajar ne hasan kaha)

Hazrat Ibne Abbas Razi Allahu Anhu ne Barish k din apne Muazzin se kaha k "HAIYYA ALAS SALAH" ki bajaye "AS SALATU FIRRIJAAL" ya "SALLU FI BUYUTIKUM" "Apne gharo mai namaz ada karo" kaho aur farmaya: Rasulullah Sallallahu Alaihi Wa Sallam ne aese hi kiya, Juma agar che farz hai magar mujhe pasand nahi k tum kichad aur mitti mai (Masjid) chalo. (Bukhari Kitabul Azaan Hadees No. 668, Muslim Kitabus Salaat Hadees No. 699)

Is se maloom hua k Azaan k kalmaat mai "ASSALATU KHAIRUM MINAN NAUM" kehna ya "ASSALATU FIRRIJAAL" kehna Azaan mai izafa nahi hai balke ehad nabuwat ki Sunnat hai lihaza ise Azaan k andar manpasand izafo ki daleel banana durust nahi hai.