NAMAZ MEIN KHUSHU AUR KHUZU

NAMAZ MEIN KHUSHU AUR KHUZU 

Bismillahirrahmanirraheem

Allah ta'ala farmata hai: "QAD AFLAHAL MUMINOONAL LAZEENA HUM FI SALATIHIM KHASHI'OON" (Surah Mominoon Surah no. 23 Ayat no. 1,2)

Beshak momin kaamyaab ho gaye jo apni namaz khushu aur khuzu k saath ada karte hai.

Hazrat Umar bin Khattab Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya k "Ahsan ye hai k tu Allah ki ibadat us tarah (dil laga kar) kar jese tu usko dekh raha hai, aur agar ye na ho sake to ye khayal kar k Allah ta'ala tujhe dekh raha hai". (Sahih Bukhari Kitabul Emaan Hadees no. 50, Sahih Muslim Hadees no. 8)

Jab insan namaz mein ye tasawwur karega k mein Allah ta'ala ko dekh raha hu ya kam-az-kam Allah ta'ala mujhe dekh raha hai to uske dil mein Allah ta'ala ki hibat aur tazeem paida hogi, wo apni namaz khushu aur khuzu k saath ada karega namaz mein beja harkaat wa siknaat nahi karega, be-adbi aur bad-tahzeebi k sath namaz ada nahi karega, namaz sukoon aur itminaan ka naam hai.

Hazrat Ubada bin Saamit Razi Allahu Anhu riwayat karte hai k humne Rasool Allah Sallallahu Alaihi Wa Sallam ko ye farmate hue suna "Allah ta'ala ne paanch namazey farz ki hai, pas jisne accha wuzu kiya unko khushu k saath padha aur unka ruku poora kiya to us namazi k liye Allah ta'ala ka ahad hai k wo usko baksh dega aur jo aesa na kare Allah ka koi ahad nahi chahey baksh de chahey azaab de". (Abu Dawood Kitabus Salaat Hadees no. 425, Imam Ibne Hibban ne ise sahih kaha)

Jo shaks namaz mein ye tasawwur kare k wo ahkamul hakimeen k saamne khada hai to wo poori dil-jami’e aur huzoor e qalb k saath namaz ada karega, ye mumkin hi nahi k uska jism harkat karta rahe, kabhi ek pair par zoor de kabhi doosre pair par, kabhi daadhi se khelna shuru kare aur kabhi bagair zaroorat khujli karta rahe, kabhi qamees ki salwatey door kare aur kabhi sar k rumaal ko hilata rahe.

Allah ta'ala irshad farmata hai: "WA QOOMU LILLAHI QANITEEN"

"Aur Allah k saamne (namaz mein) adab se khade raho". (Surah Baqarah Surah no. 2 Ayat no. 238)

Bila zaroorat harkat karna adab aur tazeem k manaafi hai.

Rasool Allah Sallallahu Alaihi Wa Sallam ne ye taleem di hai k namazi k saamne koi aesi cheez nahi honi chahiye jo uski tawajjoh se hata de aur is tarah uske huzoor e qalb mein farq aaye.

Ummum Momineen Hazrat Ayesha Razi Allahu Anha se riwayat hai k Rasool Allah Sallallahu Alaihi Wa Sallam ne ek chadar mein namaz padhi jis mein naqsh wa nigaar they, phir farmaya "Meri is chadar ko Abu Jaham k paas le jao aur uski chadar mere paas le aao, us (chadar ki dhariyon) ne mujhe namaz mein khushu se gafil kar diya". (Sahih Bukhari Kitabus Salaat Hadees no. 373, Sahih Muslim Kitabul Masajid Hadees no. 556)

Ummum Momineen Hazrat Ayesha Razi Allahu Anha ne ghar mein ek pardah latka rakkha tha Rasool Allah Sallallahu Alaihi Wa Sallam ne farmaya "Ye pardah hata do, iski tasweerey namaz mein mere saamne aati hai". (Sahih Bukhari Kitabus Salaat Hadees no. 374)

In Ahadees e Mubaraka se ye baat nikli hai k namaz mein kamaal e huzoor aur khuzu laazmi hai aur jo cheez aadmi ko namaz mein apni taraf mutawajjah kare usko door kar dena chahiye, magar afsoos aaj masjido mein mobile ki mauseeqi wali aawazey goonjti hai hatta k khana kaba bhi is mauseeqi se mehfooz nahi raha is tarah ye loog apni aur doosre loogo ki bhi namazo k khushu aur khuzu ko kharab karte hai alawah azee masjido k mehraab aur deewaro ko aaraasta kiya jata hai, un par naqsh wa nigaar banaye jate hai, masjid ki qaleen aur jaye-namaz par naqsh wa nigaar banaaye jate hai, halankey masajid saadgi ka namoona honi chahiye takey namaz mein sakoon aur itminaan ho aur poori tawajjah k saath ek musalman namaz ada kar sakey.

Rasool Allah Sallallahu Alaihi Wa Sallam ne farmaya "Mujhe ye hukm nahi diya gaya k mein masjido ko muzayyan (sajaaon) karu" Ibne Abbas Razi Allahu Anhu farmate hai: Albatta tum bhi masajid ki zeenat karoge jese unko yahood o nasara ne muzayyan (sajana hua) kiya. (Abu Dawood Kitabus Salaat Hadees no. 448, Ibne Hibban ne ise sahih kaha)

Nabi Rahmat Sallallahu Alaihi Wa Sallam ne farmaya "Qayamat ki nishaniyo mein se ek nishani ye hai k loog masjido par fakhar karengey". (Abu Dawood Hadees no. 449, Ibne Khuzaima 3:281 Hadees no. 1322 ne ise sahih kaha)

Namaz padhte hue nigaahey nichi honi chahiye, ye baat namaz mein Allah k saamne adab se khade hone k khilaf hai k namazi nazro ko uncha kare ya idhar udhar dekhey.

Ummul Momineen Hazrat Ayesha Razi Allahu Anha bayan karti hai k mene Rasool Allah Sallallahu Alaihi Wa Sallam se namaz mein idhar udhar dekhne k baare mein sawal kiya to Aap Sallallahu Alaihi Wa Sallam ne farmaya "Namaz mein idhar udhar dekhna bande ki namaz mein shaitaan ka hissa hai". (Sahih Bukhari Kitabul Azaan Hadees no. 751)

Hazrat Anas bin Malik Razi Allahu Anhu bayan karte hai k Rasool Allah Sallallahu Alaihi Wa Sallam ne farmaya "Loogo ka kya haal hai k wo namaz mein apni nigaahey uper uthaate hai" aapne sakht tambiyah karte hue farmaya "Loog aesa karne se baaz aa jaye warna unki nazrey achak li jayegi". (Sahih Bukhari Hadees no. 750)

Namaz mein tawajjah aur huzoor e qalb barqaraar rakhna itna zaroori hai k aapne neend ki shadeed talab ki mojoodgi mein nafil namaz padhne se mana farmaya - Hazrat Ayesha Razi Allahu Anha farmati hai k Rasool Allah Sallallahu Alaihi Wa Sallam ne farmaya "Jo shaks namaz mein unghey usey chahiye k lait jaye yaha tak k uski neend poori ho jaye, jo koi neend mein namaz padhega to usko maloom nahi ho sakta k wo Allah se ma'aafi maang raha hai ya apne aapko bad-dua de raha hai". (Sahih Bukhari Kitabul Wuzu Hadees no. 212, Sahih Muslim Kitabus Salaatul Musafireen Hadees no. 786)

Isi tarah agar bhook lagi ho aur khana bhi mojood ho to namaz mein khane ka khayal aa sakta hai, jiski wajah se dil-jami'e k saath namaz ada karna mushkil hota hai to Rasool Allah Sallallahu Alaihi Wa Sallam ne pehle khana khane ka hukm diya.

Hazrat Abdullah bin Umar Razi Allahu Anhu bayan karte hai k Rasool Allah Sallallahu Alaihi Wa Sallam ne farmaya "Jab tumhare saamne shaam ka khana rakkha jaye aur udhar namaz k liye jamaat bhi khadi ho jaye to pehle khana khao aur namaz k liye jaldi na karo yaha tak k khane se farigh ho jao. Ibne Umar Razi Allahu Anhu k liye khana laya jata aur jamaat bhi khadi ho jaati to wo namaz k liye nahi jaate they yaha tak k khane se farigh ho jaate, halankey wo imam ki qiraat ki aawaaz bhi sun rahe hote they". (Sahih Bukhari Kitabul Azaan Hadees no. 673, Sahih Muslim Hadees no. 559)

Namaz mein dil-jami'e hi ki khatir Aap Sallallahu Alaihi Wa Sallam ne hukm diya k pakhana ya paishab ki agar hajat ho to pehle us se faragat hasil karo.

Hazrat Ayesha Razi Allahu Anha bayan karti hai k Nabi Rahmat Sallallahu Alaihi Wa Sallam ne farmaya "Jab khana mojood ho ya pakhana wa paishab ki hajat ho to namaz nahi hoti". (Sahih Muslim Kitabul Masajid Hadees no. 560)

Bool wa baraaz k dabaow ki halat mein agar namaz padhega to namaz mein chain, khuzu aur itminaan hasil na hoga is liye Nabi Rahmat Sallallahu Alaihi Wa Sallam ne unse faraghat hasil karne ko muqaddam farmaya.

Rasool Allah Sallallahu Alaihi Wa Sallam ki namaz mein khashiyat e ilahi ka yuh muzahirah hota tha k "Aap namaz padhte to aapke roone ki wajah se aapke seeney se chakki k chalne ki si aawaaz aati thi". (Abu Dawood Kitabus Salaat Hadees no. 904, Nasayi 3:13, 1214)

Hamey bhi namaz mein ye tasawwur dil o dimaag mein bithana chahiye k hum Allah ta'ala ki baar-gaah mein khade hai, zahiri aur batini taur par Allah ki taraf tawajjah rehna chahiye aur agar shaitan hamey hamari namaz se gafil karna chahey to "A'OUZU BILLAH" keh kar baayi janib teen baar thuthkaar kar shaitan ko bhagana chahiye.

Hazrat Usman bin Abul Aas Razi Allahu Anhu ne Rasool Allah Sallallahu Alaihi Wa Sallam se daryaft kiya k Ae Allah k Rasool Sallallahu Alaihi Wa Sallam! shaitan meri namaz aur mari qira'at k darmiyaan hayil ho jata hai aur qira'at mein iltabaas paida karta hai, Aap Sallallahu Alaihi Wa Sallam ne farmaya "Us shaitan ka naam khanzab hai, jab tujhe uska khayal aaye to "A'OUZU BILLAH" k kalmaat padho aur baayi janib teen baar thuthkaaro" Hazrat Usman bin Abul Aas Razi Allahu Anhu bayan karte hai k mene aesa hi kiya, chunanchey Allah ta'ala ne use (shaitan ko) mujhse door kar diya. (Sahih Muslim Kitabus Salaam Hadees no. 2203)

Hamey namaz bahut hi khoobsurati k saath padhni chahiye baaz namazi rafulyadain karte hue haatho ko kandho tak buland nahi karte sirf haath ya ungliyo ko zara si harkat dena hi kaafi samajhte hai, baaz namaz ki halat mein kabhi aasteeney utaarte hai aur kabhi is halat mein namaz padhte hai k unki aasteeney uper chadhi hui hoti hai, garz namaz mein la ibaliyat aur be-adbi ka mukammal muzahirah kar rahe hote hai aur yahi loog dunyawi hukmaraano k saamne jab khade hote hai to bade adab aur ehtaraam se khade hote hai, kya Allah ta'ala k darbaar mein be-adbi jayez ho sakti hai?

Hazrat Abu Hurairah Razi Allahu Anhu bayan karte hai k Rasool Allah Sallallahu Alaihi Wa Sallam ne ek din namaz k baad farmaya "Ae falah! tum apni namaz husn wa khoobi k saath kyu ada nahi karte? namazi jab namaz padhta hai to wo is baat ko kyu madd-e-nazar nahi rakhta k wo kis tarah namaz padh raha hai? halankey namazi apne faidah k liye namaz padhta hai aur Allah ki qasam! mein jis tarah aagey dekhta hu usi tarah pichey bhi dekhta hu". (Sahih Muslim Kitabus Salaat Hadees no. 423)

NAMAZ: CHAND ZAEEF RIWAYAAT

NAMAZ: CHAND ZAEEF RIWAYAAT 

Bismillahirrahmanirraheem

Alhamdulillah Namaz e Nabwi mein sirf Ahadees e Saheeya se istadlaal kiya gaya hai.

Darj e zail riwayaat ko asar e hazir k azeem muhaddis Allama Muhammad Nasir ud Deen Albani Rahimahullah ne zaeef qaraar diya hai is liye namaz e nabawi mein un riwayaat ko shamil nahi kiya gaya hai agarchey ye riwayaat namaz ki baaz kitaabo mein mojood hai:

1. Hazrat Anas Razi Allahu Anhu se riwayat hai k "Nabi E Akram Sallallahu Alaihi Wa Sallam jab bait ul khula mein dakhil hote to apni angoothi utaar dete". (Abu Dawood Hadees no. 19, Tirmizi Hadees no. 1746)

Ye Riwayat zaeef hai is mein Ibne Jareej Mudallis hai aur wo An se riwayat karta hai.

2. Ummey Salma Razi Allahu Anha se riwayat hai k Rasool Allah Sallallahu Alaihi Wa Sallam se sawal kiya gaya k kya aurat kurte aur oudhni mein namaz padh le jabke tahband na ho? Aapne farmaya "Han! agar kurta lamba hai aur qadmo ki pusht ko dhaanpta hai". (Abu Dawood Hadees no. 640)

Iski sanad mein Muhammad bin Zaid bin Qunfaz ki maa Ummey Haraam Maj'hool hai, lihaza ye hadees marfoo aur moqoof dono zaeef hai.

3. Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jab koi namaz padhey to apne saamne koi cheez rakkhey, agar uske paas (rakhne k liye) asa na ho to khat khinchey phir jo bhi uske aagey se guzrega nuksaan na dega". (Abu Dawood Hadees no. 689)

Ye riwayat zaeef hai is mein Abu Umar wa bin Muhammad bin Harees aur uska dada dono maj'hool hai.

4. Hazrat Ibne Umar Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Ha'iza aur jumbi quran majeed na padhey". (Tirmizi Hadees no. 131)

Ye riwayat zaeef hai: Ismaeel bin Ayaash ahle hijaaz se munkir riwayaat bayan karta hai, uska ustaaz Mosa bin Uqba hijaazi hai.

5. Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Har baal k nichey janabat hai pas baalo ko dhoowo aur badan paak karo". (Abu Dawood Hadees no. 248)

Is riwayat mein Haris bin Wajyah hai jo zaeef hai.

6. Rasool Allah Sallallahu Alaihi Wa Sallam kulli karne k liye aur naak mein paani daalne k liye alag alag paani lete. (Abu Dawood Hadees no. 139)

Ye riwayat zaeef hai, is mein Lais bin abi Saleem Haleef mudallis hai aur wo An se riwayat karta hai.

7. Hazrat Uqba bin Aamir al Juhani Razi Allahu Anhu Rasool Allah Sallallahu Alaihi Wa Sallam se riwayat karte hai k "Jisne acchi tarah wuzu kiya phir apni nigaah aasmaan ki taraf utha kar shahadatain padha uske liye jannat k aatho darwaazey khool diye jaate hai". (Abu Dawood Hadees no. 170)

Ye riwayat zaeef hai, kyunki Abu Aqeel ka chacha-zaad bhai maj'hool hai.

8. Hazrat Abu Hurairah Razi Allahu Anhu se riwayat hai k "Koi shaks wuzu k bagair azaan na de". (Tirmizi Hadees no. 200, 201)

Is silsile ki dono riwayaat zaeef hai, ek riwayat mein Muawiyah bin Yahya Al Sadafi hai jo zaeef hai aur doosri riwayat munqatey hai, kyunki Ibne Shihaab Zahri ki Hazrat Abu Hurairah Razi Allahu Anhu se sima'at sabit nahi.

9. Ziyaad bin Haris Sadaayi bayan karte hai k Rasool Allah Sallallahu Alaihi Wa Sallam ne farmaya "Jo shaks azaan kahe wahi takbeer kahe". (Tirmizi Hadees no. 199, Abu Dawood Hadees no. 514)

Abdur Rahman bin Ziyaad Afreeqi k zaeef k bina par ye riwayat zaeef hai.

10. Hazrat Bilal Razi Allahu Anhu ne iqamat kahi jab "QADMA MATIS SALAAH" kaha to Rasool Allah Sallallahu Alaihi Wa Sallam ne "AQAMA HALLAHU WA ADAMAHA" kaha. (Abu Dawood Hadees no. 528)

Ye riwayat zaeef hai is riwayat mein "RAJULA MIN AHLISH SHAAM" maj'hool hai aur Muhammad bin Sabit zaeef hai.

11. Namaz e Payambar k musannif Dr. Muhammad Ilyas Faisal ne azaan aur takbeer k masa'il mein apne fiqhi maslak ki pairvi mein intihaayi be-insaafi se kaam liya.

Masnoon azaan k kalmaat k saboot mein Hazrat Abdullah bin Zaid Razi Allahu Anhu ki riwayat (Abu Dawood Hadees no. 499) paish ki lekin aadhi hadees ka zikr kiya, riwayat mein mojooda iqamat k alfaaz ka zikr tak nahi kiya kyunki takbeer k taaq kalmaat unke fiqhi maslak mein jayez nahi they.

Isi tarah iqamat k alfaaz k liye Hazrat Abu Mahzoorah Razi Allahu Anhu ki riwayat (Tirmizi Hadees no. 192) paish ki lekin aadhi, hadees k alfaaz mulahiza farmaiye:

Hazrat Abu Mahzoorah Razi Allahu Anhu riwayat karte hai k mujhe Rasool Allah Sallallahu Alaihi Wa Sallam ne azaan k 19 kalmaat aur takbeer k 17 kalmaat sikhaaye. (Tirmizi Hadees no. 192)

Afsoos Dr. Muhammad Ilyaas sahab ne fiqhi taasub ka saboot dete hue azaan k 19 kalmaat ka zikr tak nahi kiya kyunki azaan mein tarjee unke maslak mein jayez nahi hai.

Dr. Mosoof ne apni kitab mein jagah jagah intihaayi be-insaafi ka saboot diya, Ahadees e Saheeya ko zikr karne k bajaaye apne maslak ko sahih sabit karne k liye jayez na-jayez tareeqey ikhtiyaar kiye.

Ek hawala mulahiza farmaiye:

Hazrat Abdullah bin Umar aur Hazrat Abdullah ibne Abbas Razi Allahu Anhum chaar burd (48 kilometer) k lambe safar mein namaz qasar padhte aur rooza iftaar karte aur chaar burd 16 farsakh k barabar hote hai. (Sahih Bukhari)

Bukhari mein ye riwayat sanad k saath mojood nahi hai, Imam Bukhari Rahimahullah ne baab mein bila sanad is riwayat ka zikr kiya, inko Taaliqaat e Bukhari kaha jata hai, Bukhari ki Sahih riwayat mein inka shumaar nahi hota.

ye hawala bhi mulahiza farmaiye:

(Tashahud mein padhte hue) jab "ASH'HADU AN LA ILAHA" par pahunchey to haath ki badi ungli aur angoothey ka halqa banaye, shahadat ki ungli se isharah kare aur "ILLALLAH" par ungli ko nichey kare. (Safa no. 196)

Doraan e khutba sunnatey na padhey. (Safa no. 244)

Unhone apni baat ki koi daleel naqal nahi ki, aesa karna Ahadees e Saheeya se sabit nahi, balke ye baat sahih ahadees k khilaaf hai.

12. Hazrat Ali Razi Allahu Anhu se riwayat hai k sunnat ye hai k haath naaf k nichey rakkhey jaye. (Abu Dawood Hadees no. 756)

Ye riwayat zaeef hai kyunki Ziyad bin Zaid Maj'hool hai aur Abdur Rahman bin Is'haaq al Koofi ko jamhoor muhaddiseen ne zaeef kaha hai.

13. Hazrat Abu Hurairah Razi Allahu Anhu farmate hai k "Namaz mein hath naaf se nichey rakkho". (Abu Dawood Hadees no. 758)

Is riwayat mein bhi Abdur Rahman bin Is'haaq al Koofi hai jo zaeef hai.

Hazrat Ali Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Namaz mein apni ungliyo ko na chatkhaao". (Ibne Maja Hadees no. 965)

Iski sanad mein Haris bin Abdullah al aawad hai aur wo zaeef hai.

14. Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jo shaks "WAT TEENI WAZ ZAITOON" ki tilawat karte hue "ALAI SALLAHU BI AHKAMIL HAKIMEEN" kahe to use chahiye k kahe "BALA WA INNA ALA ZALIKA MINSH SHAHIDEEN" aur jab Surah Qiyaamah ki tilawat karte hue ye aayat "ALAISA ZALIKA BI QADIRIN ALA AYYUH YIYAL MAUTA" padhey to jawab mein kahe "BALA". (Abu Dawood Hadees no. 887, Tirmizi Hadees no. 3347)

Hazrat Abu Hurairah Razi Allahu Anhu se sun'ney wala aaraabi maj'hool hai, lihaza riwayat zaeef hai.

15. Hazrat Abdullah bin Mas'ood Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jo koi ruku mein teen baar "SUBHANA RABBI YAL AZEEM" kahe to uska ruku poora hoga aur ye adna darja hai aur jo koi sajdah mein teen baar "SUBHANA RABBI YAL AALA" kahe to uska sajdah poora ho gaya aur ye adna darja hai. (Tirmizi Hadees no. 261, Abu Dawood Hadees no. 886)

Riwayat zaeef hai kyunki Awan bin Abdullah ki Ibne Mas'ood Razi Allahu Anhu se mulaqaat sabit nahi, lihaza asnad munqatey hai aur Is'haaq bin Yazeed maj'hood hai.

16. Hazrat Wayel bin Hujar Razi Allahu Anhu se riwayat hai "Rasool Allah Sallallahu Alaihi Wa Sallam jab sajdah karte to apne ghutne apne haatho se pehle rakhte aur jab sajdey se uthtey to haatho ko ghutno se pehle uthaate". (Abu Dawood Hadees no. 736, 838, 839, Tirmizi Hadees no. 268)

Iski ek sanad mein Abdul Jabbaar bin Wayel hai, jisne apne walid se kuch nahi suna, doosri sanad mein Shareek al Qaazi hai jo zaeef aur mudallis hai aur An se riwayat karta hai.

17. Hazrat Abdullah bin Zaid Razi Allahu Anhu se riwayat hai k Rasool Allah Sallallahu Alaihi Wa Sallam (tashahud mein) apni ungli ko harkat nahi dete they. (Abu Dawood Hadees no. 989)

Muhammad bin Ajlaan mudallis hai aur An se riwayat karta hai.

18. Hazrat Abdullah bin Mas'ood Razi Allahu Anhu riwayat karte hai k Rasool Allah Sallallahu Alaihi Wa Sallam do rakaato k baad (tashahud mein) is tarah baithte goya k garam patthar par baithey hue hai yaha tak k khade ho jaate. (Abu Dawood Hadees no. 995, Tirmizi Hadees no. 366)

Iski sanad munqatey hai kyunki Abu Ubaidah ne apne walid se kuch nahi suna.

19. Rasool Allah Sallallahu Alaihi Wa Sallam ne farmaya "Jab tumhey namaz mein shak ho k teen padhi hai ya chaar aur ziyadah gumaan chaar rakaat ka ho to salaam pherne se pehle do sajde karo phir tashahud padho phir salaam phero". (Abu Dawood Hadees no. 1028)

Riwayat zaeef aur munqatey hai, Khusaif zaeef hai aur Abu Ubaidah ne apne baap se kuch nahi suna.

20. Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya k "Farz namaz har musalman k pichey wajib hai chahey naik ho ya badd aur chahey wo kabeerah gunah kare". (Abu Dawood Hadees no. 594)

Riwayat zaeef hai kyunki Mak'hool ne Hazrat Abu Hurairah Razi Allahu Anhu se kuch nahi suna.

21. Hazrat Sayib bin Yazeed Razi Allahu Anhu se riwayat hai k Jab Rasool Allah Sallallahu Alaihi Wa Sallam juma k din mimbar par baithey to masjid k darwazey par azaan di jaati. (Abu Dawood Hadees no. 1088)

Is riwayat mein Muhammad bin Is'haaq Mudallis hai aur An se riwayat karta hai, alawah azee ye mimbar k paas azaan dene ki mehfooz riwayat (Tabraani 7:146) k khilaaf bhi hai.

22. Hazrat Abu Hurairah Razi Allahu Anhu bayan karte hai k Rasool Allah Sallallahu Alaihi Wa Sallam ne farmaya "Juma us shaks par farz hai jo juma padh kar raat ko wapas apne ahle o ayaal mein aa sakey". (Tirmizi Hadees no. 502)

Abdullah bin Saad al Maqbari matrook, Hijaaz bin Nasr aur Ma'aarak bin Ibaad zaeef hai.

23. Hazrat Abdullah bin Umar Razi Allahu Anhu se riwayat hai k "Juma us shaks par laazim hai jo azaan ki aawaaz suney". (Abu Dawood Hadees no. 1056)

Is riwayat mein Abu Salma bin Nabeeyah aur Abudllah bin Haroon Maj'hool hai.

24. Hazrat Abu Hurairah Razi Allahu Anhu se riwayat hai k "Eid k din barish thi is liye Rasool Allah Sallallahu Alaihi Wa Sallam ne masjid mein namaz e eid padhaayi". (Abu Dawood Hadees no. 1160)

Is riwayat mein Esa bin Abdul Aala maj'hool hai.

25. Takbeeraat e eid k alfaaz:

"ALLAHU AKBAR, ALLAHU AKBAR, LA ILAHA ILLALLAHU, WALLAHU AKBAR, ALLAHU AKBAR, WA LILLAHIL HAMD" k masnoon hone ki koi daleel nahi hai.

Daare Qutni mein in alfaaz ki sarahat aayi hai lekin Imam Zahbi ne ise sakht zaeef balke mouzu kaha hai.

26. Hazrat Bureedah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Witr haqq hai jo witr na padhey wo hum mein se nahi, aapne teen baar farmaya". (Abu Dawood Hadees no. 1419)

Is mein Abdullah bin Abdullah al Manka al Maroozi zaeef hai.

27. Hazrat Ayesha Razi Allahu Anha bayan karti hai k Rasool Allah Sallallahu Alaihi Wa Sallam witr ki do rakaat par salaam nahi phairte they. (Nasaayi Hadees no. 1698)

Is mein Qatadah mudallis hai jo An se riwayat karta hai.

28. Hazrat Ayesha Razi Allahu Anha se riwayat hai k Rasool Allah Sallallahu Alaihi Wa Sallam ne safar kiya aur poori namaz bhi padhi. (Sharah Sunnah, Daare Qutni, Behaqui)

Ek sanad mein Talha bin Umar hai jo zaeef hai, doosri sanad mein Saeed bin Muhammad bin Tawaab hai jiski jaraah wa tadeel mojood nahi.

29. Hazrat Abdullah bin abi Aufi Razi Allahu Anhu kehte hai k Rasool Allah Sallallahu Alaihi Wa Sallam ne farmaya "Jis shaks ko Allah ta'ala se ya kisi insaan se hajat ho to wuzu kare phir do rakaat padhey aur phir ye dua kare". (Tirmizi Hadees no. 479, Ibne Maja Hadees no. 1384)

Is mein Fayid bin Abdur Rahman matrook hai.

30. Maaqil bin Yasar Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Apne murdo par Surah Yaseen padho". (Abu Dawood Hadees no. 3121)

Abu Usman aur uska walid dono maj'hool hai.

ESAAL E SAWAB K TAREEQEY

ESAAL E SAWAB K TAREEQEY 

Bismillahirrahmanirraheem

1. Hazrat Abu Hurairha Razi Allahu Anhu kehte hai k Rasool Allah Sallallahu Alaihi Wa Sallam ne farmaya "Marne k baad insaan k aamaal k sawab ka silsila munqatey (toot) ho jata hai lekin teen cheezo ka sawab mayyit ko milta rehta hai:

1. Sadqa e Jaariya
2. Loogo ko faida dene wala ilm
3. Naik aulaad jo mayyit k liye dua kare. (Sahih Muslim Kitabul Waseeyah Hadees no. 1631)

Rasool Allah Sallallahu Alaihi Wa Sallam ne farmaya "Momin ko marne k baad jin aamaal aur naikiyo ka sawab milta rehta hai us mein:

1. Wo ilm jo usne loogo ko sikhaya aur phailaya
2. Naik aulaad hai jo usne apne pichey choodi
3. Quran ki taleem jo loogo ko sikhaayi
4. Masjid jo tameer karaayi
5. Musafir-khana
6. Wo sadqa jo sehat ki halat mein usne nikala, us sabka sawab marne k baad milta rehta hai". (Ibne Maja Kitabul Muqadmah Hadees no. 242)

2. Hazrat Abdullah bin Abbas Razi Allahu Anhu se riwayat hai k Hazrat Saad bin Ubadah Razi Allahu Anhu ne Rasool Allah Sallallahu Alaihi Wa Sallam se apni maa ki nazar k baare mein sawal kiya jise poora karne se pehle wo faut ho gayi thi, Aapne farmaya "Apni maa ki taraf se tum nazar poori karo". (Sahih Bukhari Kitabul Wasaaya Hadees no. 2761, Sahih Muslim Kitabun Nazar Hadees no. 1638)

Hazrat Ibne Abbas Razi Allahu Anhu se riwayat hai k qabeela juhaina ki ek aurat Nabi E Akram Sallallahu Alaihi Wa Sallam ki khidmat mein hazir hui aur arz kiya k meri maa ne hajj ki nazar maani thi lekin hajj karne se pehle hi faut ho gayi kya mein uksi tarf se hajj karu, Aapne farmaya "Han! uski taraf se hajj karo, agar tumhari walidah par qarz hota to kyu tum ada karti?" usne arz ki han! Aapne farmaya "Allah ka qarz yaani nazar ada karo, Allah ta'ala ziyaadh haqdaar hai k uska qarz ada kiya jaye". (Sahih Bukhari Kitabul Jaza us said Hadees no. 1852)

3. Hazrat Ayesha Razi Allahu Anha se riwayat hai k Rasool Allah Sallallahu Alaihi Wa Sallam ne farmaya k "Jo shaks faut ho jaye aur uske zimmey roozey baaqi ho to uska waris roozey rakkhey". (Sahih Bukhari Kitabus Saum Hadees no. 1956, Sahih Muslim Kitabus Siyaam Hadees no. 1147)

4. Hazrat Abu Hurairah Razi Allahu Anhu se riwayat hai k ek shaks ne Rasool allah Sallallahu Alaihi Wa Sallam se arz kiya k mera baap faut ho gaya hai aur usne kuch maal chooda hai lekin koi waseeyat nahi ki agar mein uski taraf se khairaat karu to kya ye uske gunaho ka kaffarah banega? Aapne farmaya "Han". (Sahih Muslim Kitabul Wasiyah Hadees no. 1630)

Hazrat Ayesha Razi Allahu Anha se riwayat hai k ek shaks (Saad bin Ubadah) ne Rasool Allah Sallallahu Alaihi Wa Sallam se arz kiya k meri maa achanak mar gayi aur mera gumaan hai k agar wo baat karti to kuch sadqa khairaat karti, ab agar mein uski taraf se khairaat karu to kya usko kuch sawab milega? Aaapne farmaya "Han". (Sahih Bukhari Kitabul Jana'iz Hadees no. 1388, Sahih Muslim Kitabuz Zakaat Hadees no. 1004)

5. Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmya ak "Momin ki rooh qarz k saath mu'allaq rehti hai jab tak wo ada na kar diya jaye". (Tirmizi Kitabul Jana'iz Hadees no. 1078)

Baaz loog mayyit ko sawab pahunchane k liye teesre din, daswey din ya chaleesvey din khane ka ehtamaam karte hai, baaz har jumeraat ya har saal barsi mana kar khana taqseem karte hai, baaz quran-khuwani karwaate hai, yani quran padh kar sawab murdo mein taqseem karte hai baaz chadar bicha kar guthliyo par sawa laakh martaba "LA ILAHA ILLALLAH" ya Darood Shareef padhte hai, aur uska sawab mayyit ko pahunchte hai in baato ka Rasool Allah Sallallahu Alaihi Wa Sallam aur Sahaba Razi Allahu Anhum se koi saboot nahi lihaza ye bidaat hai, inse bachna wajib hai aur esaal e sawab k wahi tareeqey ikhtiyaar karne chahiye jinka saboot Ahadees E Rasool Sallallahu Alaihi Wa Sallam mein mojood hai.

Ibne Umar Razi Allahu Anhu k saamne ek aadmi ko cheenk aayi to usne "ALHAMDU LILLAHI WAS SALAATU WAS SALAAMU ALA RASOOLILLAH" kaha ye sun kar Ibne Umar Razi Allahu Anhu farmane lage "Mein bhi "ALHAMDU LILLAHI WAS SALAATU WAS SALAAMU ALA RASOOLILLAH" keh sakta hu magar Rasool Allah Sallallahu Alaihi Wa Sallam ne is mouqey par hamey ye taleem nahi di balke ye farmaya k cheenk aaney par "ALHAMDU LILLAHI ALA KULLI HAAL" padha jaye. (Tirmizi Kitabul Adab Hadees no. 2738, Imam Hakim 4:265, 266 aur Imam Zahbi ne ise sahih kaha)

Hazrat Ayesha Razi Allahu Anha se riwayat hai k Rasool Allah Sallallahu Alaihi Wa Sallam ne farmaya "MAN AHDASA FI AMRINA HAZA MA LAISA MINHU FA HUWA RADD" Jisne hamare is deen mein koi aesi baat shamil ki jo is mein se nahi hai to wo mardood hai. (Sahih Bukhari Kitabus Sulah Hadees no. 2697, Sahih Muslim Kitabul Aqzeeyah Hadees no. 1718)

Maloom hua k deen mein apni taraf se kisi qism ki ziyadati nahi karni chahiye.

QABRO KI ZIYARAT

QABRO KI ZIYARAT 

Bismillahirrahmanirraheem

Rasool Allah Sallallahu Alaihi Wa Sallam ne farmaya "Mene tumhey qabro ki ziyarat se mana kiya tha, ab tum unki ziyarat kiya karo". (Sahih Muslim Kitabul Jana'iz Hadees no. 977)

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne apni walidah ki qabr ki ziyarat ki, khud bhi rooye aur jo aapke saath they wo bhi rooye phir aapne farmaya "Mene apni walidah ki bakhshish ki dua karne k liye Allah ta'ala se ijazat maangi, mujhe ijazat nahi mili, phir mene uski qabr ki ziyarat karne ki ijazat maangi pas mujhe ijazat de di gayi pas tum bhi qabro ki ziyarat kiya karo kyunki qabro ki ziyarat maut ki yaad dilati hai". (Sahih Muslim Hadees no. 9766)

Sheikh Albani farmate hai Nabi E Akram Sallallahu Alaihi Wa Sallam ne qabro ki ziyarat karne wali aurato par lanat ki, magar uske baad aapne ijazat de di to usme mard wa aurat dono shamil hai.

Rasool Allah Sallallahu Alaihi Wa Sallam ek aesi aurat par se guzrey jo qabr par baithi roo rahi thi aapne usey Allah se darne aur sabr karne ka hukm diya. (Sahih Bukhari Kitabul Jana'iz Hadees no. 1252, Sahih Muslim Kitabul Jana'iz Hadees no. 926)

Agar aurato ka qabristan jana jayez hota to aap usko qabristan mein aaney se bhi mana kar dete.

Ummul Momineen Hazrat Ayesha Razi Allahu Anha apne bhai Abdur Rahman ki qabr ki ziyarat ko gayi unse kaha gaya, kya Nabi Rahmat Sallallahu Alaihi Wa Sallam ne (aurato ko) is se mana nahi kiya tha? to Hazrat Ayesha Razi Allahu Anha ne farmaya pehle kiya tha phir ijazat de di thi. (Mustadrak E Hakim 1:376, ise Hafiz Zahbi ne sahih aur Hafiz Aeraaqi ne jaid kaha)

Hazrat Ayesha Razi Allahu Anha farmati hai mene Nabi Rahmat Sallallahu Alaihi Wa Sallam se pucha jab mein qabristan mein jau to konsi dua padhu? aapne dua sikhaayi. (Sahih Muslim Kitabul Jana'iz Hadees no. 974)
is se bhi maloom hua k aurato ka qabristan jana jayez hai.

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne kasrat se qabro ki ziyarat karne wali aurato par lanat farmayi hai. (Tirmizi Kitabul Jana'iz Hadees no. 1056, Imam Tirmizi aur Ibne Hibban ne ise sahih kaha)

Kyunki inme sabr ka maada kam hota hai neez wo shirkiya umoor mein bhi taiz hoti hai, ye qabro ki ziyarat is liye mashroo nahi k waha ja kar shirk wa bidaat k kaam kiye jaye balke qabro ki ziyarat se maut ko yaad karna maqsood hai.

Maloom hua k aurato k liye ba-kasrat ziyarat to mana hai magar kabhi kabhaar jayez hai.

Rasool Allah Sallallahu Alaihi Wa Sallam ne farmaya "Murdo ko bura na kaho wo to aagey bhejey hue (aamaal) ki taraf chale gaye hai". (Sahih Bukhari Kitabul Jana'iz Hadees no. 1393)


AHLE QUBOOR K LIYE DUA KARTE WAQT HAATH UTHANA

Hazrat Ayesha Razi Allahu Anha farmati hai k "Ek raat Rasool Allah Sallallahu Alaihi Wa Sallam ghar se nikle aur (madeena k qabristan) baqee pahunchey aur dair tak waha khade rahe phir aapne dono haath utha kar dua ki, aapne teen baar aesa kiya phir wapas aaye, phir aapne Hazrat Ayesha Razi Allahu Anha ko bataya k mere paas Hazrat Jibraeel Alihis Salaam aaye aur kaha k tumhara rabb tumhey hukm farmata hai k tum baqee k qabristan jao aur unke liye maghfirat ki dua karo, Hazrat Ayesha Razi Allahu Anha ne arz kiya k mein unke liye kese dua karu to aapne farmaya yuh kaho:

"ASSALAAMU ALA AHLID DIYAARI MINAL MOOMINEENA WAL MUSLIMEENA WA YAR HAMULLAHUL MUSTAQDIMEENA MINNA WAL MUSTAAKHIREENA WA INNA IN SHA ALLAHU BI KUM LALAHIQOON"

"Momin aur musalman ghar walo par salamati ho, hum mein se aagey jaane walo aur pichey rehne walo par Allah ta'ala raham farmaye aur agar Allah ne chaha to hum bhi anqareeb tum se milne wale hai". (Sahih Muslim Kitabul Jana'iz Hadees no. 974)

Muslim hi ki ek riwayat mein ye alfaaz bhi hai:

"AS ALULLAHA LANA WALAKUMUL AAFIYAAH"

"Mein Allah ta'ala se apne aur tumhare liye aafiyat ki dua karta hu". (Sahih Muslim Hadees no. 975)

QABRO KO PUKHTA BANANE KI MUMANIYAT

QABRO KO PUKHTA BANANE KI MUMANIYAT 

Bismillahirrahmanirraheem

Qabro ko uncha karna, pukhta banana, un par gumbad aur qubbey banana haraam hai.

Rasool Allah Sallallahu Alaihi Wa Sallam ne pukhta qabrey aur un par imarat (gumbad wagairah) banaane se mana kiya aapne qabr par baithne aur unki taraf muh karke namaz padhne se (bhi) mana farmaya hai. (Sahih Muslim Kitabul Jana'iz Hadees no. 972)

Chahey koi shaks mujawar ban kar baithey ya chillah kashi k liye, sab na-jayez hai.

Rasool Allah Sallallahu Alaihi Wa Sallam ne qabro par likhne se bhi mana farmaya hai. (Abu Dawood Kitabul Jana'iz Hadees no. 3226, Hakim 1:370 aur Hafiz Zahbi ne ise sahih kaha)

Hazrat Ali Razi Allahu Anhu bayan karte hai k mujhe Rasool Allah Sallallahu Alaihi Wa Sallam ne hukm diya k mein har tasweer mita du aur har unchi qabr barabar kardu. (Sahih Muslim Kitabul Jana'iz Hadees no. 949)

Hazrat Ummey Habeeba aur Ummey Salma Razi Allahu Anha ne Rasool Allah Sallallahu Alaihi Wa Sallam se ek girjey (church) ka zikr kiya k us mein tasweerey lagi thi, Aapne farmaya k "Jab un loogo ka koi naik shaks mar jata to wo uski qabr par masjid banate aur waha tasweerey banaate, qayamat k din ye loog Allah k nazdeek badtareen makhlooq honge". (Sahih Bukhari Kitabus Salaat Hadees no. 427, Sahih Muslim Hadees no. 528)

Rasool Allah Sallallahu Alaihi Wa Sallam ne aakhri beemari (marazul maut) mein farmaya "Allah ta'ala yahood o nasara par laanat kare jinhone apne paighambaro ki qabro ko masjidey bana liya" Hazrat Ayesha Razi Allahu Anha ne farmaya "Agar is baat ka darr na hota k loog aapki qabr ko masjid bana lenge to aapki qabr khuli jagah mein hoti". (Sahih Bukhari Kitabul Jana'iz Hadees no. 1390, Sahih Muslim Kitabul Masajid Hadees no. 529)

QABR PAR NAMAZ E JANAZAH

QABR PAR NAMAZ E JANAZAH

Bismillahirrahmanirraheem

Hazrat Abu Hurairah Razi Allahu Anhu se riwayat hai k siyah rang ki ek khatoon Masjid (nabvi) mein jhaadu phaira karti thi, wo mar gayi aur Nabi E Akram Sallallahu Alaihi Wa Sallam ko uski maut ka ilm na hua, ek din Aap Sallallahu Alaihi Wa Sallam ne uske baare mein pucha, Sahaba Razi Allahu Anhum ne bataya k wo faut ho gayi hai, Aapne farmaya "Tumne mujhe ittela kyu na di? mujhe uski qabr batao" Sahaba Razi Allahu Anhum ne aapko uski qabr bataayi, phir aapne qabr par namaz e janazah padhi aur farmaya "Ye qabrey tareeki aur zulmat se bhari hui hai, meri namaz k sabab Allah ta'ala inko roshan kar deta hai". (Sahih Bukhari Kitbaul Jana'iz Hadees no. 1337, Sahih Muslim Kitabul Jana'iz Hadees no. 956)

Is se maloom hua k masjid ki safaayi karne ki badi fazilat hai neez ye bhi maloom hua k Allah ta'ala ne Nabi E Akram Sallallahu Alaihi Wa Sallam ko har qism ki ghaibi khabrey ata nahi ki thi.


TADFEEN WA ZIYARAT

Hazrat Uqba bin Aamir Razi Allahu Anhu kehte hai k "Rasool Allah Sallallahu Alaihi Wa Sallam ne teen auqaat mein namaz padhne aur murdo ko dafan karne se mana farmaya:

1. Tulu aaftaab k waqt hatta k wo buland ho jaye.
2. Jab Sooraj do-pehar k waqt aen sar par ho hatta k dhal jaye.
3. Ghuroob aaftaab k waqt hatta k ghuroob ho jaye". (Sahih Muslim Kitabus Salaatul Musafireen Hadees no. 831)

Hazrat Ibne Umar Razi Allahu Anhu se riwayat hai k namaz e janazah, namaz e fajr aur namaz e asar k baad ada ki ja sakti hai. (Muatta Imam Malik Kitabul Jana'iz 1:229)

Jang e uhad k din Rasool Allah Sallallahu Alaihi Wa Sallam ne Sahaba Razi Allahu Anhum se farmaya "Qabr gehri khood do aur usey hamwaar aur saaf rakkho". (Tirmizi Kitabul Jihaad Hadees no. 1713, Abu Dawood Kitabul Jana'iz Hadees no. 3215, Imam Tirmizi ne ise sahih kaha)

Hazrat Abdullah bin Yazeed Razi Allahu Anhu ne haaris ka namaz e janazah padhaaya phir mayyit ko pao ki taraf se qabr mein dakhil kiya aur farmaya k ye sunnat hai. (Abu Dawood Kitabul Jana'iz Hadees no. 3211, Imam Behaqui ne ise sahih kaha)


MAYYIT KO QABR MEIN RAKHTE WAQT KI DUA

Hazrat Ibne Umar Razi Allahu Anhu se riwayat hai k Nabi E Akram Sallallahu Alaihi Wa Sallam jab mayyit ko qabr mein rakhte to kehte:

"BISMILLAHI WA ALA SUNNATI RASOOLILLAHI SALLALLAHU ALAIHI WA SALLAM"

"Allah k naam se aur Rasool Allah Sallallahu Alaihi Wa Sallam k mazhab aur tareeqey par (ise dafan karte hai)". (Abu Dawood Kitabul Jana'iz Hadees no. 3213, ise Imam Hakim aur Imam Zahbi ne sahih kaha)

Afsoos k ye sunnat bhi mit'ti chali ja rahi hai kyunki loogo ne iska mutbadil dhoond rakkha hai yaani wahi naarah kalma e shahadat "ASH'HADU ALLAH ILAHA ILLALLAH"

Hazrat Saad bin Abi Waqaas Razi Allahu Anhu ne wasiyat ki k mere liye luhad banana aur us par kuch eentey lagana jese Rasool Allah Sallallahu Alaihi Wa Sallam k liye kiya gaya tha. (Sahih Muslim Kitabul Jana'iz Hadees no. 966)

Aap Sallallahu Alaihi Wa Sallam ki qabr ounth ki kohaan jese thi. (Sahih Bukhari Kitabul Jana'iz Hadees no. 1390)

Hazrat Usman bin Affaan Razi Allahu Anhu se riwayat hai k Nabi E Akram Sallallahu Alaihi Wa Sallam jab mayyit k dafan se faarigh ho jaate to qabr par khade hue farmate "Apne bhai k liye bakhshish aur sabit qadmi ki dua karo kyunki ab us se sawal wa jawab ho rahe hai". (Abu Dawood Kitabul Jana'iz Hadees no. 3221, Hakim 1:370 aur Hafiz Zahbi ne ise sahih kaha)


QABR PAR BA-TAUR E ALAMAT PATTHAR NASB KARNA

Hazrat Anas bin Malik Razi Allahu Anhu se riwayat hai k "Nabi E Akram Sallallahu Alaihi Wa Sallam ne Hazrat Usman bin Maz'oon Razi Allahu Anhu ki qabr par alamat k taur par ek patthar nasb farmaya". (Ibne Maja Kitabul Jana'iz Hadees no. 1561)


QABR PAR MITTI DAALNA

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne janazah ki namaz padhi phir qabr k paas aaye aur sar ki taraf se teen lap mitti daali. (Ibne Maja Kitabul Jana'iz Hadees no. 1565)

GHAYIBAANA NAMAZ E JANAZAH

GHAYIBAANA NAMAZ E JANAZAH

Bismillahirrahmanirraheem

Jis Din Najjashi faut hua, Rasool Allah Sallallahu Alaihi Wa Sallam Sahaba k saath nikle, saff-bandi ki aur chaar takbeeraat k saath (namaz e janazah) ada ki. (Sahih Bukhari Kitabul Jana'iz Hadees no. 1254, Sahih Muslim Hadees no. 951)

Aur farmaya k "Apne bhai ki namaz e janazah ada karo kyunki arz e ghair (doosri zameen) mein faut hua". (Ibne Maja Kitabul Jana'iz Hadees no. 1537)

Hazrat Uqba bin Aamir Razi Allahu Anhu se riwayat hai k "Rasool Allah Sallallahu Alaihi Wa Sallam ek din bahar nikle aur uhad k shohda k liye is tarah namaz padhi jese mayyit par namaz padhte hai". (Sahih Bukhari Hadees no. 1343, Sahih Muslim Kitabul Fazail Hadees no. 2296)

Is se maloom hua k mayyit ki ghayibaana namaz e janazah padhi ja sakti hai Imam Shafi aur Imam Ahmad bin Hambal ka yahi maslak hai.

Magar Sahaba e Kiram Razi Allahu Anhum aur Tabaeen Rahimahullah mein ghayibaana namaz e janazah k mamool na hone ki sabse badi daleel ye hai k Khulafa e Rashideen ki ghayibaana namaz e janazah poori islami mamlakat mein ada ki jaati, magar aesa kisi se bhi manqool nahi hai, Ibne Qayyim, Ibne Taimiyah, Allama Nasiruddin Albani Rahimahullah aur muhaqqiqeen ki ek jamaat ghayibaan namaz e janazah ada karne ki qayil nahi hai.

Hafiz ibne Abdul Barr farmate hai "Agar ghayib par namaz e janazah jayez hoti to Nabi Rahmat Sallallahu Alaihi Wa Sallam apne Sahaba Razi Allahu Anhum ki ghayibaana namaz e janazah ada karte isi tarah sharq wa garb (mashriq wa maghrib) mein rehne wale musalman, khulafa e rashideen ki bhi ghayibaana namaz e janazah padhte, magar aesa kisi se bhi manqool nahi hai".

Ibne Qayyim Rahimahullah ne farmaya "Musalmano mein bahut se aese loog faut hue jo Nabi Rahmat Sallallahu Alaihi Wa Sallam se ghayib they magar aapne un mein se kisi ki ghayibaana namaz e janazah ada nahi ki".

JANAZAH K MASA'IL

JANAZAH K MASA'IL

Bismillahirrahmanirraheem

1. Nabi Rahmat Sallallahu Alaihi Wa Sallam ne farmaya "Jab tum janazah dekho to khade ho jao aur jo shaks janazah k saath jaye us waqt tak na baithey jab tak janazah na rakkha jaye". (Sahih Bukhari Kitabul Jana'iz Hadees no. 1310, Sahih Muslim Hadees no. 959)

2. Jab Hazrat Saad bin Abi Waqaas Razi Allahu Anhu ka intaqaal hua to Hazrat Ayesha Razi Allahu Anha ne farmaya k unka janazah masjid mein lao takey mein bhi namaz e janazah mein shareek ho jao loogo ne tami kiya to unhone farmaya k Allah ki qasam Rasool Allah Sallallahu Alaihi Wa Sallam ne Hazrat Suhail Razi Allahu Anhu aur unke bhai ki namaz e janazah masjid mein padhaayi. (Sahih Muslim Kitabul Jana'iz Hadees no. 973)

Siddeque Akbar Razi Allahu Anhu ki namaz e janazah bhi masjid mein padhi gayi neez Farooq e Aazam Razi Allahu Anhu ki namaz e janazah Suhaib Razi Allahu Anhu ne masjid mein padhaayi. (Behaqui 4:52)

3. Jis janazey k saath khilaf e shari kaam ho uske saath jana mana hai. Hazrat Abdullah bin Umar Razi Allahu Anhu farmate hai k "Rasool Allah Sallallahu Alaihi Wa Sallam ne us janazey k saath jaane se mana farmaya jiske saath noha aur matam karne wali aurate ho". (Ibne Maja Kitabul Jana'iz Hadees no. 1583)

4. Hazrat Mugheera bin Shoba Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Sawaar janazey k pichey rahe aur paidal chalne wale janazey k qareeb rahte hue aagey, pichey daaye aur baaye chal sakte hai". (Abu Dawood Kitabul Jana'iz Hadees no. 3180, Imam Tirmizi ne hasan kaha)

NAMAZ E JANAZAH

NAMAZ E JANAZAH

Bismillahirrahmanirraheem

Rasool Allah Sallallahu Alaihi Wa Sallam ne farmaya "Emaan ki halat mein sawab ki niyat se jo kisi musalman k janazah k saath jata, uske saath rehta, uska janazah padhta aur usko dafan karke farigh hota hai to uske liye do qeeraat sawab hai, har qeeraat uhad pahaad k barabar hai aur jo (sirf) janazah padh kar wapas aa jata hai to uske liye ek qeeraat hai". (Sahih Bukhari Kitabul Emaan Hadees no. 47, Sahih Muslim Kitabul Jana'iz Hadees no. 945)

Rasool Allah Sallallahu Alaihi Wa Sallam ne farmaya "Jis musalman k janazah mein aese 40 aadmi shamil ho jo Allah k saath shirk na karte ho to Allah ta'ala us (mayyat k haqq) mein unki sifarish qabool karta hai". (Sahih Muslim Kitabul Jana'iz Hadees no. 948)

Rasool Allah Sallallahu Alaihi Wa Sallam ne farmaya "4 musalman jis musalman ki tareef kare aur acchi shahadat de, Allah usko jannat mein dakhil karega, humne arz kiya "aur 3?" Aapne farmaya "3 bhi" humne arz kiya "aur 2?" aapne farmaya "2 bhi, phir humne ek k baare mein nahi pucha". (Sahih Bukhari Kitabul Jana'iz Hadees no. 1368)

Yaha un musalmano ki gawahi muraad hai jin ka aqeedah wa amal aur akhlaaq wa kirdaar kitab o sunnat k mutabiq ho. (Wallahu Aalam)

Namaz e janazah padhne k liye mayyat ki chaar-paayi is tarah rakkhey k mayyat ka sar shimaal ki simt aur pao junoob ki jaanib ho, phir ba-wuzu ho kar safey baandhey.

Hazrat Anas bin Malik Razi Allahu Anhu ne ek mard ka janazah padhaya to wo (uske) sarke saamne khade hue phir ek aurat ka janazah laya gaya to wo uske darmiyaan khade hue aur farmaya k Rasool Allah Sallallahu Alaihi Wa Sallam aesa hi karte they. (Tirmizi Kitabul Jana'iz Hadees no. 1034, Abu Dawood Kitabul Jana'iz Hadees no. 3194, Imam Tirmizi ne ise hasan kaha)

Phir dil mein niyat karke dono haath kandho ka kaano tak uthaaiye aur pehli takbeer keh kar surah fatiha padhey.


JANAZAH MEIN SURAH FATIHA

Hazrat Abu Umama bin Sahal Razi Allahu Anhu se riwayat hai k namaz e janazah mein sunnat tareeqa ye hai k pehli takbeer kahi jaye, phir fatiha padhi jaye, phir Nabi Rahmat Sallallahu Alaihi Wa Sallam par darood aur mayyat k liye dua (ki jaaye) uske baad salaam (phera jaye). (Musannaf Abdur Razzaaq Hadees no. 6428, 3:489, 490, Hafiz ibne Hajar ne ise sahih kaha)

Hazrat Talha bin Abdullah bin Aouf Razi Allahu Anhu kehte hai k mene Ibne Abbas Razi Allahu Anhu k pichey namaz e janazah padhi to aapne Surah Fatiha padhi, aur farmaya "Mene ye is liye kiya k takey tum jaan lo k ye sunnat hai". (Sahih Bukhari Kitabul Jana'iz Hadees no. 1335)

Is se jahri qiraat bhi sabit hui, tajjub hai jo loog uth'te baith'te "Fatiha" ka naam lete hai wo namaz e janazah mein ise padhte hi nahi.

Hazrat Talha bin Abdullah kehte hai k mene Ibne Abbas Razi Allahu Anhu k pichey namaz e janazah padha unhone Surah Fatiha aur ek aur Surah padhi aur buland aawaaz se qiraat ki hatta k humne suna, jab farigh hue to farmaya "Ye sunnat aur haqq hai". (Nasaayi Kitabul Jana'iz Hadees no. 1987, 4:74-75, Ibne Tarkumani ne sahih kaha)


NAMAZ E JANAZAH KA SIRRAN PADHNA SUNNAT HAI

Hazrat Abu Umama bin Sahal Razi Allahu Anhu se riwayat hai k namaz e janazah mein sunnat tareeqa ye hai k imam pehli takbeer k baad Surah Fatiha sirran (aahista awaaz se) padhey phir teen takbeeraat kehe aur aakhiri takbeer k sath salaam phaira jaya. (Nasayi 4:75, 1989, Hafiz ibne Hajar ne ise sahih kaha)

Buland aawaaz se bhi janazah padhaya ja sakta hai, chunanchey Hazrat Aouf bin Malik Razi Allahu Anhu farmate hai k, Nabi Sallallahu Alaihi Wa Sallam ne namaz e janazah mein ek dua padhi jo mene yaad karli aur mene tamanna ki kaash k ye mera janazah hota. (Sahih Muslim Kitabul Jana'iz Hadees no. 963)


JANAZAH KI TAKBEERAAT

Hazrat Abu Hurairah Razi Allahu Anhu se riwayat hai k beshak Nabi Rahmat Sallallahu Alaihi Wa Sallam ne najjashi k janazah mein 4 takbeeraat kahi. (Sahih Bukhari Kitabul Jana'iz Hadees no. 1333, Sahih Muslim Kitabul Jana'iz Hadees no. 951)

Hazrat Zaid bin Arkam Razi Allahu Anhu namaz e janazah par 4 takbeeraat kehte, ek janazah par unhone 5 takbeeraat kahi aur farmaya k Rasool Allah Sallallahu Alaihi Wa Sallam is tarah bhi karte they. (Sahih Muslim Kitabul Jana'iz Hadees no. 957)

MAYYAT PAR ROONA

MAYYAT PAR ROONA

Bismillahirrahmanirraheem

Agar mayyat ko dekh kar roona aaye aur aansu jaari ho to mana nahi, is liye k ye be-ikhtiyaar rona hai jo jayez hai, Nabi Rahmat Sallallahu Alaihi Wa Sallam Saad bin Ubada ki behoshi par rooye Sahaba bhi aapko dekh kar rooye pas aapne farmaya suno "Allah t'ala aankh k roone aur dil k pareshan hone ki wajah se azaab nahi karta balke zuban (k chalane aur wa waila karne) se azaab karta hai. (Sahih Bukhari Kitabul Jana'iz Hadees no. 1304, Sahih Muslim Kitabul Jana'iz Hadees no. 924)
Nabi Rahmat Sallallahu Alaihi Wa Sallam ne farmaya (Allah k han) wo sabr motabar hai jo sadmey k shuru mein ho. (Sahih Bukhari Kitabul Jana'iz Hadees no. 1302, Sahih Muslim Kitabul Jana'iz Hadees no. 926)
Yaani ba baila aur bain karne k baad sabr karna, sabr nahi hai, asal sabr ye hai k museebat k waqt tasleem wa raza ka muzahirah kiya jaye aur izhaar e gham k fitri tareeqey k alawah aur kuch na kiya jaye.
Hazrat Abdullh bin Mas'ood Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Wo hum mein se nahi hai jo rukhsar peetey, girebaan phaade aur jahiliyat ki pukar pukaare"(yaani nooha aur wa baila kare). (Sahih Bukhari Kitabul Jana'iz Hadees no. 1294, Sahih Muslim Kitabul Emaan Hadees no. 103)
Nabi Rahmat Sallallahu Alaihi Wa Sallam ne farmaya "Mein bezaar hu us se jo (mayyat ki museebat mein) sar k baal nochey aur chilla kar rooye aur apne kapde phaade". (Sahih Bukhari Kitabul Jana'iz Hadees no. 1296, Sahih Muslim Kitabul Emaan Hadees no. 104)
Rasool Allah Sallallahu Alaihi Wa Sallam ne farmaya: Allah ta'ala farmata hai "Mere (us) momin bande k liye bahisht hai jiske piyaare ko mein ahle dunya se qabz karta hu aur wo (uski maut par) sabr karta hai". (Sahih Bukhari Kitabur Riqaaq Hadees no. 6424)
Rasool Allah Sallallahu Alaihi Wa Sallam ne farmaya "Jahiliyat k chaar kaam aese hai jinhey meri ummat k loog bhi karengey:
1. (Apne) hasb par fakhar karna
2. (Doosre k) nasb par taan karna
3. Sitaaro k zariye paani talab karna
4. Nooha karna, (aur ye bhi farmaya) "Agar nooha karne wali aurat marne se pehle tauba na kare to qayamat k din us par gandhak ka kurta aur kharish ki oudhni hogi". (Sahih Muslim Kitabul Jana'iz Hadees no. 934)
Ahle Jahiliyat ka aqeedah tha k sitaaro ki naqal wa harkat aur tulu wa ghuroob ka barish aur daigar zameeni waqiyaat wa hawadas k saath gehra talluq hai aaj kal ilm e nujoom bhi inhi shirkiya khurafaat se ibarat hai, Allah ta'ala mehfooz rakkhey. (Aameen)
Rasool Allah Sallallahu Alaihi Wa Sallam k baite Ibraheem jab halat e naza mein they to aapne usey uthaya aur farmaya "Aankh aansu baha rahi hai aur dil ghamgeen hai magar uske ba-wajood hum kuch nahi kahenge siwa e us (baat) k jis se hamara rabb raazi ho, aur Allah ki qasam ae Ibraheem! hum teri judaayi k sabab ghamgeen hai". (Sahih Bukhari Kitabul Jana'iz Hadees no. 1303, Sahih Muslim Kitabul Fazail Hadees no. 2315)
Maloom hua k Allah ta'ala mehboob ki muhabbat mein aa kar apne faisle nahi badalta balke jo chahta hai so karta hai, wo kisi ki taaqat se mar'oob hota hai na kisi ki muhabbat se maghloob, gafoor ur raheem hai tu har ek k liye aur agar be-niyaaz hai to sabke liye.
Rasool Allah Sallallahu Alaihi Wa Sallam ka nawasa faut hua to aapki aankho se aansu jaari ho gaye, Hazrat Saad bin Ubada Razi Allahu Anhu ne arz ki ya Rasool Allah Sallallahu Alaihi Wa Sallam! ye kya hai? aapne farmaya "Ye wo rahmat hai jo Allah ne apne bando k dilo mein paida ki hai aur Allah apne bando mein se rahmat karne walo par hi rahmat karta hai". (Sahih Bukhari Kitabul Jana'iz Hadees no. 1284, Sahih Muslim Kitabul Jana'iz Hadees no. 923)
Nabi Rahmat Sallallahu Alaihi Wa Sallam ne farmaya "Jis aurat k teen bacchey mar jaaye aur wo Allah ki raza-mandi ki khatir sabr kare to wo jahannam ki aag se aadh banenge ek aurat ne pucha agar do bacchey mar jaye to? aapne farmaya "do bacchey bhi" Hazrat Abu Hurairah Razi Allahu Anhu se riwayat hai k us se muraad wo bacchey hai jo abhi baligh na hue ho". (Sahih Bukhari Kitabul Ilm Hadees no. 101, Sahih Muslim Kitabur Birr wa silah Hadees no. 2633, 2634)
Ek riwayat mein hai k wo apne maa baap se milenge phir unka kapda ya haath pakdenge aur unko na choodenge yaha tak k Allah unko aur unke baapo ko jannat mein dakhil kar dega. (Sahih Muslim Kitabur Birr wa Silah Hadees no. 2635)
Ek aur riwayat mein hai k Allah ta'ala un baccho par (apni) rahmat aur fazal k sabab us shaks ko (yaani unke walid ko) jannat mein dakhil karega. (Sahih Bukhari Kitabul Jana'iz Hadees no. 1248) ba-shart k walid ka aqeedah durust ho.
ACHANAK MAUT
Hazrat Ubaid bin Khalid Salmi Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Achanak maut (kafir k liye) Allah ta'ala ki ghazab ki pakad hai". (Abu Dawood Kitabul Jana'iz Hadees no. 311, Musnad Ahmad 4:219)
MAUT K WAQT PAISHANI PAR PASEENA
Hazrat Bureedah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Maut k waqt momin ki paishani par paseena aa jata hai". (Tirmizi Kitabul Jana'iz Hadees no. 982, Imam Tirmizi ne ise hasan kaha)
JIS GHAR MEIN WAFAAT HO UNKE HAN KHANA PAKA KAR BHEJNA
Hazrat Abdullah bin Jafar Razi Allahu Anhu farmate hai k jab Hazrat Jafar Razi Allahu Anhu ki wafaat ki khabar aayi to Rasool Allah Sallallahu Alaihi Wa Sallam ne farmaya "Aale jafar k liye khana tayyar karo un loogo par aesi museebat aayi hai jis mein wo khana nahi paka sakengey". (Abu Dawood Kitabul Jana'iz Hadees no. 3132, Ibne Maja Hadees no. 1610)
Kitni buri aur na-munasib baat hai k baaz ahle mayyat doosro k liye khane ka intazaam karte hai.
TAZIYAT K MASNOON ALFAAZ
"INNA LILLAHI MA AKKHARA WA LAHU MA AATAA WA KULLU SHAI'IN INDAHU BI AJALIN MUSAMMAN FAL TASBIR WAL TAHTASIB"
"Yaqeenan Allah ka (maal) hai jo usne le liya aur usi ka hai jo usne de rakkha hai uske han har cheez (k fana hone) ka waqt muqarrar hai (lihaza) sabr karke uska ajr o sawab hasil karo". (Sahih Bukhari Hadees no. 1284, Sahih Muslim Hadees no. 923)

MAYYAT KA SOOG

MAYYAT KA SOOG

Bismillahirrahmanirraheem

Hazrat Zainab binte Jahash Razi Allahu Anha k bhai ka inteqaal ho gaya, teen din baad unhone khushbu mangwaayi aur usko mala, phir kaha mujhe khushbu ki zaroorat nahi thi magar mene Rasool Allah Sallallahu Alaihi Wa Sallam se suna k jo aurat Allah t'ala aur qayamat par emaan rakhti ho uske liye halaal nahi k teen din se ziyaadah kisi mayyat par soog kare, siwaye shohar k jiska soog chaar maah das din hai. (Sahih Bukhari Kitabul Jana'iz Hadees no. 1282, Sahih Muslim Hadees no. 1487)

Hazrat Ummey Ateeya Razi Allahu Anha ka ladka faut ho gaya, teesre din unhone zardi mangwa kar badan par mali aur kaha "Hamare liye shohar k alawah kisi aur (ki wafaat) par teen din se ziyaadah soog karna mamnoo hai". (Sahih Bukhari Hadees no. 1279)

MAYYAT KA KAFAN

MAYYAT KA KAFAN 

Bismillahirrahmanirraheem

MARD KO 3 KAPDO MEIN KAFAN DENA MASNOON HAI

Rasool Allah Sallallahu Alaihi Wa Sallam ko teen (safaid) kapdo mein kafan diya gaya us mein kurta tha na amama. (Sahih Bukhari Kitabul Jana'iz Hadees no. 1264, Sahih Muslim Hadees no. 941)

Aurat k kafan mein 5 kapde istemaal hote hai Hasan Basri Rahimahullah farmate hai k aurat k kafan ka paanchva kapda wo hai jo qamees k nichey rehta hai, us se aurat ka satar aur raaney baandhi jaati hai. (Sahih Bukhari Kitabul Jana'iz)

Ibne Abbas Razi Allahu Anhu se riwayat hai k Ahram ki halat mein ek shaks ki gardan uske ounth ne tood daali to aapne farmaya k "Usko paani aur bairi k patto se ghusal do aur do kapdo mein use kafan do". (Sahih Bukhari Hadees no. 1265, Sahih Muslim Hadees no. 1206)

Aur ye do kapde wo hai jin mein usne ahraam bandha hua tha. (Nasayi Kitabul Jana'iz Hadees no. 1904)

Hazrat Jabir Razi Allahu Anhu se riwayat hai k Rasool Allah Sallallahu Alaihi Wa Sallam ne uhad k shohda k baare mein hukm diya k unko khoon aalood (kapdo samait) dafan kiya jaye aur na wo ghusal diye gaye aur na hi unki namaz e janazah padhi gayi. (Sahih Bukhari Kitabul Jana'iz Hadees no. 1343)

MARNE SE PEHLE APNA KAFAN TAYYAR KARNA JAYEZ HAI

Hazrat Sahal bin Saad Razi Allahu Anhu se riwayat hai k ek aurat Rasool Allah Sallallahu Alaihi Wa Sallam k paas ek buni hui haashiye daar chadar tohfa mein laayi, aapko us waqt chadar ki zaroorat thi aapne le li aur uska tahband banaya, ek Sahabi (Abdur Rahman bin Aouf) kehne lage kya umdah chadar hai aap mujhko de dijiye, aapne chadar unhey de di, loogo ne kaha k tumne Rasool Allah Sallallahu Alaihi Wa Sallam se chadar maang kar accha nahi kiya aapko khud zaroorat thi, Abdur Rahman kehne lage: Allah ki qasam mene pehan'ne k liye nahi maangi balke mein usko apna kafan banaunga, phir wo chadar unka kafan bani. (Sahih Bukhari Kitabul Jana'iz Hadees no. 1277)

MAYYAT KA GHUSAL

MAYYAT KA GHUSAL 

Bismillahirrahmanirraheem

Hazrat Ummey Ateeya Razi Allahu Anha ne kaha, hum Rasool Allah Sallallahu Alaihi Wa Sallam ki beti zainab ko nehla rahe they to aapne farmaya "Usko 3, 5 ya 7 baar pani aur bairi k patto se ghusal do aur aakhiri baar (pani mein) kuch kafoor bhi mila lo, aur ghusal se faraghat par mujhe ittela kar dena ghusal daayi taraf aaza e wuzu se shuru karo" (Ummey Ateeya kehti hai) humne (ghusal k baad) uske baalo ki teen chotiyo goondhi aur unko pichey daal diya. (Sahih Bukhari Kitabul Jana'iz Hadees no. 1258, Sahih Muslim Kitabul Jana'iz Hadees no. 939)

Is hadees se maloom hua k aurat ko auratey hi ghusal degi.

Miya beewi ek doosre ko ghusal de sakte hai: Rasool Allah Sallallahu Alaihi Wa Sallam ne Hazrat Ayesha Razi Allahu Anha se kaha k "Agar tum mujhse pehle mar gayi to mein tumhey ghusal dunga, kafan pehnaunga aur tum par namaz e janazah padhunga aur tumhey dafan karunga". (Ibne Maja Kitabul Jana'iz Hadees no. 1465)

Yaad rahe k ghusal e mayyat ka bhi taqreeban ghusal janabat wala hai albatta ghusal k doraan mayyat ka bahut khayal rakhna chahiye, tafseel darj zail hai:

1. Wafaat k foran baad mayyat ka muh aur aankhey band ki jaye, baazu, taangey aur hath paon ki ungliya bhi seedhi kardi jaye neez qamees aur banyaan wagairah utaar kar chadar se mayyat ka badan dhaanp diya jaye, mayyat k baazu, galey, ya pindli mein koi taweez dhaaga ya kada wagairah ho to use utaar de.
2. Paani aur bairi k pattey ubaal liye jaaye phir neem garam pani istemaal kiya jaye lakdi ka takhta aesi jagah rakkha jaye jaha pani ka nikaas, aur gandagi ko thikaane lagaana aasaan ho, mayyat ko us takhte par lita liya jaye, naaf se ghutno tak ki jagah kapde se dhaanp di jaye aur doraan e ghusal, siwa e majboori k mayyat ki sharm-gaah par nazar pade aur na hi kapde k bagair usey hath lagaaye.
3. Agar jism zakhmi hua aur us par pattiya bandhi hui ho to ehtiyaat se pattiya khool kar ruyi aur neem garam pani se aahista aahista zakham dhoye jaye, har kaam ki ibteda daayi taraf se kare siwa e iske k sirf baayi janib tawajjoh ki mustahiq ho.
4. Naaf ki janib se mayyat ka pait 2 ya 3 dafa dabaya jaye (takey andar ki gandagi imkaani hadd tak kharij ho jaye) phir baaye hath par kapde ka dastana wagairah (jo kafan k saath banaya jata hai) pehan kar pehle mitti k teen dhailo aur phir paani se uska istanja kare, agar zair e naaf baalo ki safaayi baaqi ho to karli jaye.
5. Naak, daant, muh ka khayal aur kaano mein acchi tarah geeli rooyi phair kar unki alag se safaayi karli jaye takey baad mein wuzu k doran teen dafa se ziyadah na dhona pade.
6. Bismillah padh kar mayyat ko masnoon wuzu karaya jaye (sar ka masah aur pao rehne de)teen dafa acchi tarah sar dhooye.
7. Hasb e zaroorat sabun istemaal karte hue poore jism ko teen ya paanch ya saat martaba acchi tarah dhooye, akhiri dafa nehlaate waqt paani mein kuch kafoor mila le, sabse aakhir mein pao dhooye. (Muhammad Abdul Bazzar Afi Allahu Anhu)

AHKAAM E JANA'IZ - TAJ'HEEZ WA TAKFEEN

AHKAAM E JANA'IZ - TAJ'HEEZ WA TAKFEEN

Bismillahirrahmanirraheem

Hazrat Abu Qatadah Razi Allahu Anhu se riwayat hai k Rasool Allah Sallallahu Alaihi Wa Sallam k paas ek janazah guzra aapne farmaya "Rahat paane wala hai ya us se auron ne rahat paayi" momin bandah dunya k ranj wa museebat se rahat pata hai aur us aeza se Allah ki rahmat ki taraf aaraam pata hai aur faji bandah se insan, shehar, darakht aur janwar rahat paate hai". (Sahih Bukhari Kitabur Riqaaq Hadees no. 6512, Sahih Muslim Hadees no. 950)

AALAM E NAZA MEIN TALQEEN

Nabi Rahmat Sallallahu Alaihi Wa Sallam ne farmaya "Un loogo ko jo marne k qareb ho (LA ILAHA ILLALLAH) ki talqeen karo". (Sahih Muslim Kitabul Jana'iz Hadees no. 916, 917)

Yaani unke qareeb (LA ILAHA ILLALLAH) padho takey usey sun kar wo bhi padhey lekin afsoos k zohla zindah, qareeb ul marg ko to uski talqeen nahi karte albatta maut k baad chaar-paayi ko kandha dete waqt kehte jate hai "kalma e shahadat" halankey khair ul quroon k musalmano mein se kisi ne bhi ye kaam nahi kiya phir ye aaj hamare deen ka hissa kese ban sakta hai?

Aap Sallallahu Alaihi Wa Sallam ne farmaya k "Jiska aakhir kalaam "LA ILAHA ILLALLAH" ho wo janat mein dakhil hoga". (Abu Dawood Kitabul Jana'iz Hadees no. 3116, ise Hakim 1:351, 500 aur Zahbi ne sahih kaha)

Kyunki usne aasaar e maut dekh kar nahi balke Allah se darr kar (LA ILAHA ILLALLAH) padha lekin chand hi lamho baad Allah ki qaza aa gayi aur (LA ILAHA ILLALLAH) uski zindagi ka aakhiri kalaam ban gaya, Allah ta'ala sabko iski tofeeq de Aameen.

Rasool Allah Sallallahu Alaihi Wa Sallam ne farmaya "Jab tum beemar ya mayyat k paas jao to bhalaayi ki baat kaho kyunki us waqt tum jo kuch kehte h farishte us par aameen kehte hai". (Sahih Muslim Kitabul Jana'iz Hadees no. 919)

ALLAH TA'ALA K BAARE MEIN NAIK GUMAAN RAKHNA WAJIB HAI.

Rasool Allah Sallallahu Alaihi Wa Sallam ne farmaya "Tumhey is haal mein maut aani chahiye k tum Allah ta'ala k saath accha gumaan rakhte ho". (Sahih Muslim Kitabul Jannah Hadees no. 2877)

MAKKAH AUR MADEENA MEIN MARNE KI TAMANNA KARNA

Hazrat Hafsa Razi Allahu Anha riwayat karti hai k mene Hazrat Umar Farooq Razi Allahu Anhu ko ye dua karte hue suna:

"ALLAHUMMAR ZUQNI SHAHADATAN FI SABEELIKA WAJ'AL MAUTI FI BALADI RASOOLIKA"

"Ae Allah! mujhe shahadat ki maut de aur mujhe madeena e Rasool mein maut de". (Sahih Bukhari Abwabul Fazail E Madeena Hadees no. 890)

MAUT KI AARAZU KI MUMANIYAT

Rasool Allah Sallallahu Alaihi Wa Sallam ne farmaya "Maut ki aarazu na karo, agar tum naik ho to shayad ziyadah naiki kar sakoge aur agar bad-kaar ho to shayad tauba karke Allah ko raazi kar sakoge". (Sahih Bukhari Kitabul Tamanna Hadees no. 7235)

Nabi Rahmat Sallallahu Alaihi Wa Sallam ne farmaya "Na maut ki aarazu karo na maut ki dua karo, kyunki jab koi shaks mar jata hai to uski (naiki karne ki) ummeed khatam ho jati hai aur momin ki lambi umar se uski naikiya badhti hai". (Sahih Muslim Kitabul Zikr wa Dua Hadees no. 2682)

Ibne Umar Razi Allahu Anhu farmate hai Rasool Allah Sallallahu Alaihi Wa Sallam ne mera kandha pakad kar farmaya "Dunya mein is tarah reh goya k tu musafir balke raahi hai" chunanchey Ibne Umar Razi Allahu Anhu farmaya karte they jab shaam ho to subah ka intazaar na karo, jab subah ho to shaam ka intazaar na karo, tandrusti ko beemari aur zindagi ko maut se pehle ghaneemat jaan. (Sahih Bukhari Kitabur Riqaaq Hadees no. 6416)

KHUD KHUSHI SAKHT GUNAH HAI

Nabi E Akram Sallallahu Alaihi Wa Sallam ne farmaya "Jo shaks apne aapko gala ghoont kar maar daalta hai wo jahannam mein apna ghoot'ta rahega aur jo shaks naizah chubho kar apni jaan deta hai wo jahannam mein apne aapko naizah maarta rahega aur wo jahannam mein hamesha hamesha rahega". (Sahih Bukhari Kitabul Jana'iz Hadees no. 1365, Sahih Muslim Hadees no. 109)

Rasool Allah Sallallahu Alaihi Wa Sallam ne farmaya "Allah ta'ala ne farmaya: Mere bande ne apni jaan khud li is liye mene us par jannat haraam kardi". (Sahih Bukhari Hadees no. 3463, Sahih Muslim Kitabul Emaan Hadees no. 113)

Hazrat Jabir bin Samurah Razi Allahu Anhu se riwayat hai k "Rasool Allah Sallallahu Alaihi Wa Sallam ne us shaks ki namaz e janazah nahi padhi jisne khud khushi ki thi". (Sahih Muslim Kitabul Jana'iz Hadees no. 978)

Lihaza mu'azzaz ahle ilm uski namaz e janazah mein shareek na ho takey baaqi logo ko ibrat hasil ho.

MAYYAT KO BOOSA DENA

Jiska koi qareebi dost, azeez faut ho jaye to usko mayyat ka fart e muhabbat se boosa lena jayez hai kyunki Abu Bakr Siddeque Razi Allahu Anhu ne Rasool Allah Sallallahu Alaihi Wa Sallam ki wafaat par aapka boosa liya tha. (Sahih Bukhari Kitabul Jana'iz Hadees no. 1241)

MAYYAT PAR CHADAR DAALNA

Hazrat Ayesha Razi Allahu Anha farmati hai k "Jab Rasool Allah Sallallahu Alaihi Wa Sallam faut hue to ek dhaari-daar yamni chadar se aapko dhaanp diya tha". (Sahih Bukhari Kitabul Jana'iz Hadees no. 1241)

FAUT HONE WALE K DOOSTO AUR RISHTEDAARO KO USKE MARNE KI ITTELA DENA

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne habsha k baadshah najjashi k marne ki us din khabar di jis din wo faut hua. (Sahih Bukhari Hadees no. 1245)

Hazrat Anas bin Maalik Razi Allahu Anhu se riwayat hai k Rasool Allah Sallallahu Alaihi Wa Sallam ne ghazwa e mutah mein pehle Zaid phir Jafar aur phir Abdullah bin Rawaha Razi Allahu Anhum ki shahadat ki ittela di aur aapki aankho se aansu jaari they. (Sahih Bukhari Kitabul Jana'iz Hadees no. 1246)

MAYYAT KI AANKHEY BAND KARNA

Hazrat Ummey Salma Razi Allahu Anha se riwayat hai k Rasool Allah Sallallahu Alaihi Wa Sallam Abu Salma Razi Allahu Anha ki iyadat ko aaye aur unki aankhey khuli reh gayi thi, phir aapne unko band kiya aur farmaya "K jab jaan nikalti hai to aankhey uske pichey lagi rehti hai". (Sahih Bukhari Kitabul Jana'iz Hadees no. 920)

MAYYAT KO JALD DAFAN KARNA

Rasool Allah Sallallahu Alaihi Wa Sallam ne farmaya "Mayyat ko jald dafan karo, agar wo naik hai to jis taraf tu usey bhej rahe ho wo uske liye fayedah mand hai aur agar wo bura hai to usko apni gardano se utaar dogey". (Sahih Bukhari Kitabul Jana'iz Hadees no. 1315, Sahih Muslim Kitabul Jana'iz Hadees no. 944)

IYADAT KI DUWAYE

IYADAT KI DUWAYE

Bismillahirrahmanirraheem

Jab mareez ki iyadat k liye jaye to Rasool Allah Sallallahu Alaihi Wa Sallam ki zuban e mubarak se nikli hui mardarja zail duwaye uske haqq mein kare:


PEHLI (1ST) DUA

Rasool Allah Sallallahu Alaihi Wa Sallam ne farmaya "Jo shaks apne musalman bhai ki timaardaari k liye jata hai aur uske sar ke paas baith kar 7 martaba ye kalmaat padhta hai to wo shifayaat ho jata hai illa ye k uski maut ka waqt hi aa chuka ho"

"AS ALULLAHAL AZEEMA RABBAL ARSHIL AZEEMI AY-YASH FIYAKA"

"Mein azeem wa bartar Allah, arsh e azeem k rabb se sawab karta hu k mujhe shifa se nawazey". (Abu Dawood Kitabul Jana'iz Hadees no. 3102, ise Ibne Hibban, Imam Hakim 1:342, 4:416, aur Imam Nawawi ne sahih kaha)


DOOSRI (2ND) DUA

Rasool Allah Sallallahu Alaihi Wa Sallam ek aarabi ki iyadat k liye tashreef le gaye aur us se ye kalmaat kahe:

"LA B'ASA ZUHOORUN IN SHA ALLAH"

"Dar nahi (gham na kar) agar Allah ne chaha to (yahi beemari tujhe gunaho se) paak karne wali hai". (Sahih Bukhari Kitabul Marz Hadees no. 5656)


TEESRI (3RD) DUA

Hazrat Ayesha Siddeqa Razi Allahu Anha farmati hai k Nabi Rahmat Sallallahu Alaihi Wa Sallam mareez (k jism) par apna daaya hath pherte aur ye dua padhte they:

"AZHIBIL B'ASA RABBAN NAASI WASHFI ANTASH SHAAFI LA SHIFA'A ILLA SHIFA'UKA SHIFA'AN LA YUGHADIRU SAQAMA"

"Ae insan k rabb! beemari ko door kar aur shifa de, tu hi shifa dene wala hai, teri shifa k siwa koi shifa nahi aesi shifa (de) jo kisi beemari ko nahi choudti". (Sahih Bukhari Kitabut Tibb Hadees no. 5750, Sahih Muslim Kitabus Salaam Hadees no. 2191)

Rasool Allah Sallallahu Alaihi Wa Sallam ne farmaya "Jab kisi musalman ko takleef (museebat ya nuksan) pahunchey to ye dua kahe:

"INNA LILLAHI INNA ILAIHI RAJI'OON, ALLAHUMMA AJOONI FI MUSEEBATI WA AKHLIF LI KHAIRAN MINHA"

"Hum sab Allah k liye hai aur usi ki taraf laut kar jaane wale hai, Ae Allah mujhe meri museebat mein ajr aur namul badal (dono) ata farma, to Allah ta'ala uske badle mein us se acchi cheez inayat farma deta hai". (Sahih Muslim Kitabul Jana'iz Hadees no. 918)


CHOUTHI (4TH) DUA - MAUZAAT KA DAMM

Ummul Momineen Hazrat Ayesha Razi Allahu Anha riwayat karti hai k Nabi E Akram Sallallahu Alaihi Wa Sallam beemar hote to apne aap par mauzaat se (quran ki aakhiri do suratey) damm karte aur apne jism par apna haath pherte, jab aap bahut beemar hue to mein mauzaat padh kar Rasool Allah Sallallahu Alaihi Wa Sallam par beemari ki halat mein phoonkti aur aap hi ka haath aap par phair deti kyunki aapke haath mubarak mein mere haath se ziyaadah barkat thi. (Sahih Bukhari Kitabul Fazail E Quran Hadees no. 5016, Sahih Muslim Kitabus Salaam Hadees no. 2192)


PAANCHVI (5TH) DUA

Hazrat Usman bin Abul Aas Razi Allahu Anhu se riwayat hai k unhoney Nabi E Akram Sallallahu Alaihi Wa Sallam se jism k dard ki shikayat ki, aapne farmaya: Apna haath dard ki jagah par rakkho phir BISMILLAH kaho aur 7 dafa ye kalmaat padho:

"A'OUZU BILLHI WA QUDRATIHI MIN SHARRI MA AJIDU WA UHAZIRU"

"Mein Allah aur uski qudrat k saath panah maangta hu us cheez ki buraayi se jo mein paata (mehsoos karta) ho aur us se darta hu"

(Hazrat Usman Razi Allahu Anhu farmate hai) mene isi tarah kiya to Allah ta'ala ne meri takleef door kardi. (Sahih Muslim Kitabus Salaam Hadees no. 2202)


CHATHI (6TH) DUA

Rasool Allah Sallallahu Alaihi Wa Sallam Hasan aur Hussain Razi Allahu Anhuma ko in alfaaz k saath damm kiya karte they:

"A'OUZU BI KALIMAA TILLAHIT TAAMMATI MIN KULLI SHAITAANIU WA HAAMMATIN WA MIN KULLI AYNIL LAAMMATIN"

"Mein tum dono ko Allah k poorey kalmaat k saath (uski) panah mein deta hu har shaitan aur zehriley jaanwar aur har nazar e badd ki buraayi se"

phir farmaya "Tumhare baap Hazrat Ibraheem Alihis Salaam (bhi) in kalmaat k saath Ismaeel aur Is’haaq Alaihis Salaam k liye (Allah ki) panah talab kiya karte they (unhey damm karte they)". (Sahih Bukhari Kitabul Ahadeesul Ambiya Hadees no. 3371)


SAATVI (7TH) DUA

Hazrat Abu Saeed Khudri Razi Allahu Anhu se riwayat hai k Hazrat Jibraeel Alaihis Salaam ne kaha ae Muhammad Sallallahu Alaihi Wa Sallam! kya aap beemar hai? aapne farmaya "han" to Hazrat Jibraeel Alaihis Salaam ne (ye) padh kar (aap par damm kiya):

"BISMILLAHI ARQEEKA MIN KULLI SHAI'IN YUZEEKA MIN SHARRI KULLI NAFSIN AU AYNIN HAASIDIN, ALLAHU YASHFEEKA BISMILLAHI ARQEEKA"

"Allah ta'ala ka naam le kar mein aap par damm karta hu har us cheez se jo aapko takleef de,har nafs aur har hasad karne wali aankh k sharr se, Allah ta'ala aapko shifa de, mein allah ka naam le kar aap par damm karta hu". (Sahih Muslim Kitabus Salaam Hadees no. 2186)


In Ahadees se maloom hua k:

1. Apne aap par khud damm karna
2. Jo damm karwaane aaye usey damm sikhana takey wo khud hi apne aap par damm kare
3. Mareez k mutalabey k baghair usey damm karna
4. Ya mareez ka kisi se damm karwana sab jayez hai
Lekin afsoos k musalman sirf aakhir jayez (damm karwaney) par hi amal karte hai apne aapko damm karne ki sunnat taqreeban mafqood ho chuki hai kyunki is mein ek aadh dua yaad karni padti hai, yaad rakhiye, barahe raast Allah ta'ala se maangana intihaayi sa'aadat ki baat hai, ye ayen ibadat hai aur mareez ki dua to wese bhi bahut qabool hoti hai lihaza usey chahiye k na sirf khud damm kare balkey astaghfaar ko mamool banaaye is se takleef se jald nijaat milegi ya darjaat badhenge neez khud duwaye kare Allah qabool karega In Sha Allah.

AHKAAM E JANA'IZ

AHKAAM E JANA'IZ

Bismillahirrahmanirraheem

BEEMAAR PURSI

Rasool Allah Sallallahu Alaihi Wa Sallam ne farmaya k "Musalman k musalman par 5 huqooq hai:

1. (Jab miley to usey salaam kahe ya uske) Salaam ka jawab de
2. Jab beemaar ho to uski iyadat kare
3. Jab mar jaye to uska janazah padhey
4. Jab dawat de to usey qabool kare
5. Agar wo cheenk par (ALHAMDULILLAH) kahe to jawab mein (YAR HAMU KALLAH) kahe". (Sahih Bukhari Kitabul Jaza'iz Hadees no. 1240, Sahih Muslim Kitabus Salaam Hadees no. 2162)

Hazrat Ali Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Jo musalman doosre musalman ki din k awwal hissey mein (dopahar se pehle) iyadat karta hai to 70 hazaar farishte uske liye shaam tak rahmat wa maghfirat ki dua karte hai aur jo musalman din k aakhiri hissey mein (dopahar k baad) iyadat karta hai to 70 hazaar farishte uske liye subah tak rahmat aur maghfirat ki dua karte hai neez uske liye bahisht mein baagh hai". (Tirmizi Kitabul Jana'iz Hadees no. 969, Abu Dawood Kitabul Jana'iz Hadees no. 3099, Ise Ibne Hibban 710, Imam Hakim 1:341, 342 aur Hafiz Zahbi ne sahih kaha)

Nabi Rahmat Sallallahu Alaihi Wa Sallam ne farmaya hai "Musalman jab apne musalman bhai ki timaardaari k liye jata hai to wo wapas lootney tak jannat k maivey chunta hai". (Sahih Muslim Kitabul Birr wa Silah Hadees no. 2568)

BEEMARI SE GUNAH DOOR HOTE HAI

Rasool Allah Sallallahu Alaihi Wa Sallam ne farmaya "Allah ta'ala jis shaks k saath bhalaayi ka iraadah karta hai usey takleef mein mubtala kar deta hai". (Sahih Bukhari Kitabul Marz Hadees no. 5645)

Aap Sallallahu Alaihi Wa Sallam ne farmaya "Musalman ko ranj, dukh, fikr aur gham pahunchta hai yaha tak k agar usey kaanta (bhi) lagta hai to wo takleef uske gunaho ka kaffarah ban jaati hai". (Sahih Bukhari Hadees no. 564, Sahih Muslim Kitabul Birr wa Silah Hadees no. 2572)

Rasool Allah Sallallahu Alaihi Wa Sallam ne farmaya "Jab koi musalman ko koi takleef pahunchti hai to Allah ta'ala uski wajah se uske gunaaho ko is tarah mita deta hai jis tarah darakht k pattey jhadte hai". (Sahih Bukhari Kitabul Marz Hadees no. 5647, Sahih Muslim Hadees no. 2571)

Nabi Rahmat Sallallahu Alaihi Wa Sallam ne farmaya "Bukhar (ho jaye to us) ko bura na kaho kyunki bukhar aadmi k gunah is tarah door karta hai jis tarah bhatti loohey k mail ko door karti hai". (Sahih Muslim Hadees no. 2575)

Nabi Rahmat Sallallahu Alaihi Wa Sallam ka irshad hai "Allah ta'ala musafir aur mareez ko un aamaal k barabar ajr deta hai jo wo ghar mein aur tandrusti ki halat mein kiya karta tha". (Sahih Bukhari Kitabul Jihad was Siyar Hadees no. 2996)

BEEMARI MEIN SABAR KI FAZILAT

Nabi Rahmat Sallallahu Alaihi Wa Sallam ne farmaya k Allah ta'ala farmata hai "Jab mein kisi bandey ko uski do mehboob cheezo (aankho) mein aazmata hu (usey beenaayi se mehroom karta hu) phir agar wo sabr kare to uske badley mein usey jannat dunga". (Sahih Bukhari Kitabul Marz Hadees no. 5653)

Ata riwayat karte hai k mujhe Ibne Abbas Razi Allahu Anhu ne kaha mein tujhe jannati aurat dikhlau? mene kaha dikhlao to Ibne Abbas Razi Allahu Anhu ne farmaya k Rasool Allah Sallallahu Alaihi Wa Sallam k paas ye kaali aurat aayi aur arz kiya k mujhe mirgi ka doorah padta hai aur mera satar khul jata hai, aap mere liye Allah se dua kare, Aapne farmaya "Agar tu sabar karegi to tere liye jannat hai aur agar chaahey to dua kiye deta hu" wo kehne lagi "mein sabar karungi" phir kaha "mera satar khul jata hai Allah ta'ala se dua kare k wo na khuley (takey mein be-pardah na ho jau) chunanchey Aap Sallallahu Alaihi Wa Sallam ne uske liye dua farmaayi". (Sahih Bukhari Kitabul Marz Hadees no. 5652, Sahih Muslim Kitabul Birr wa Silah Hadees no. 2576)

SALAATUT TAUBA AUR DAIGAR NAWAFIL

SALAATUT TAUBA AUR DAIGAR NAWAFIL

Bismillahirrahmanirraheem

Hazrat Abu Bakr Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jab aadmi koi gunah karta hai, phir wuzu karta hai aur do rakaat namaz padh kar Allah ta'ala se bakhshish ka talib hota hai to Allah Subhanahu wa ta'ala usko maaf kar deta hai". (Abu Dawood Kitabul Witr Hadees no. 1521, Tirmizi Hadees no. 406, Imam Tirmizi ne ise hasan kaha)


LAILATUL QADR K NAWAFIL

Rasool Allah Sallallahu Alaihi Wa Sallam ne farmaya "Jisne lailatul qadr mein emaan aur sawab ki niyat k saath qayam kiya uske tamaam guzishta gunah maaf kar diye jayengey". (Sahih Bukhari Kitabul Emaan Hadees no. 35, Sahih Muslim Kitabus Salaatul Musafireen Hadees no. 760)


PANDARVI (15TH) SHABAAN K NAWAFIL

Pandarvi Shabaan ki raat (shab e baraat) k nawafil k liye qayam karne aur jaagne ka ehtamaam karna ahadees e saheeya se sabit nahi, isi tarah sirf 15 shabaan ko rooza rakhne wali riwayat sakht zaeef hai.

NAMAZ E TASBEEH

NAMAZ E TASBEEH

Bismillahirrahmanirraheem

Hazrat Abdullah bin Abbas Razi Allahu Anhu se riwayat hai k Nabi E Akram Sallallahu Alaihi Wa Sallam ne Hazrat Abbas bin Abdul Muttalib Razi Allahu Anhu se farmaya "Ae chacha Abbas! kya mein aapko kuch ata na karu? kya aapko kuch inayat na karu? kya mein aapko koi tohfa paish na karu? kya mein aapko (darj e zail amal ki wajah se) 10 acchi khaslatey wala na bana du? k jab aap ye amal kare to Allah ta'ala aapke agle pichle, purane naye, anjaane mein aur jaan boojh kar kiye gaye tamaam chootey bade, posheedah aur zahir gunah maaf farma de?

wo ye hai k:

Aap 4 rakaat nafil is tarah ada kare k har rakaat mein surah fatiha aur koi doosri surah padhey, jab aap is qiraat se farigh ho jaye to qayaam ki halat mein hi ye kamlmaat 15 baar padhey:

"SUBHANALLAHI WAL HAMDU LILLAHI WA LA ILAHA ILLALLAHU WALLHU AKBAR"

Phir aap ruku mein jaye (tasbeehaat ruku se farigh ho kar) ruku mein hi inhi kalmaat ko 10 baar dohraaye, phir aap ruku se uth jaye aur (SAMI ALLAHULIMAN HAMIDAH wagairah se farigh ho kar) 10 baar yahi kalmaat padhey, phir sajdey main jaye (sajdey ki tasbeehaat aur duwaye padhne k baad) yahi kalmaat 10 baar padhey, phir sajdey se sar uthaiye (aur us jalsa mein jo duwaye hai wo padh kar) 10 baar inhi kalmaat ko dohraiye aur phir (doosre) sajde mein chale jaiye (pehle sajde ki tarah) 10 baar phir is tasbeeh ko ada kare, phir sadah se sar utahiye (aur jalsa e istarahat mein kuch aur padhey baghair) 10 baar is tasbeeh ko dohraiye, ek rakaat mein kul 75 tasbeehaat hui isi tarah chaaro rakaat mein ye amal dohraiye.

Agar aap taqat rakhte ho to namaz e tasbeeh rozaana ek baar padhey, agar aap aesa na kar sakte ho to hafta mein ek baar padhey, ye bhi na kar sakte ho to maheeney mein ek baar padhey, ye bhi na kar sakey to saal mein ek baar, agar aap saal mein bhi ek baar aesa na kar sakte ho to zindagi mein ek baar zaroor padhey. (Abu Dawood Bab Salaatut Tasbeeh Hadees no. 1297, Ibne Maja Iqamatus Salaat Hadees no. 1386, Imam ibne Khuzaima Hadees no. 1216 aur Hakim 1:318 ne ise sahih kaha)

Hafiz ibne Hajar Rahimahullah farmate hai k ye hadees kasrat e tarq ki bina par hasan darja ki hai, Shaikh Albani farmate hai k Imam Hakim aur Hafiz zahbi ne is hadees ki taqwiyat ki taraf ishaarah kiya hai aur ye haqq hai kyunki iske bahut se tarq hai, Allama Mubarak poori aur Sheikh Ahmad Shakir ne bhi ise hasan kaha hai, jabke Khateeb Baghdaadi, Imam Nawawi aur Ibne Salaah ne ise sahih kaha.

Yaad rahe k is hadees shareef mein namaz e tasbeeh ko ba-jamaat ada karne ka zikr nahi hai sirf infiradi amal k taur par Nabi E Akram Sallallahu Alaihi Wa Sallam ne apne chacha jaan ko uski targheeb di hai lihaza jo musalmaan namaz e tasbeeh ada karna chahey usey chahiye k pehle namaz e tasbeeh ka tareeqa seekhey, phir isey tanhaayi mein akela padhey, aur ye rawaiyya bhi intihaayi mubarak hai k bandah farz namazo par to tawajjah na de magar namaz e tasbeeh (ba-jamaat) ada karne k liye hamesha betaab rahe, lihaza farz namazo k taarik ko pehle sacchi tauba karni chahiye phir wo namaz e tasbeeh padhey to usey yaqeenan faida hoga In Sha Allah ul Azeez.

Namaz e tasbeeh k baad padhi jaane wali dua ki sanad sakht zaeef hai uske raavi Abdul Quddoos bin Habeeb ko Hafiz Haishmi ne Matrook aur Abdullah bin Mubarak ne kazzaab kaha hai.

NAMAZ E ISHRAAQ WA CHAAST (ZUHA)

NAMAZ E ISHRAAQ WA CHAAST (ZUHA)

Bismillahirrahmanirraheem

Zuha k maana hai din ka chadhna aur ishraaq k maana hai tulu aaftaab, pas jab aaftaab tulu ho kar ek naizey k barabar ho jaye to us waqt nawafil ka padhna namaz e ishraaq kehlata hai.

Hazrat Zaid bin Arqam Razi Allahu Anhu se marvi hadees mein is namaz ko salaatul Awwabeen bhi kaha gaya hai (yaani Allah ta'ala ki taraf ruju karne walo ki namaz).

Hazrat Zaid bin Arqam Razi Allahu Anhu ne kuch loogo ko zuha ki namaz padhte dekha to kaha beshak ye loog jaante hai k is waqt k alawah namaz padhna afzal hai Nabi E Akram Sallallahu Alaihi Wa Sallam ne farmaya k "Awwabeen ki namaz ka waqt wo hai jis waqt ounth k bacchey k pao garam ho". (Sahih Muslim Kitabus Salaatul Musafireen Hadees no. 748)

Maghrib aur isha k darmiyan padhi jaane wali namaz ko jis riwayat mein Salaatul Awwabeen kaha gaya hai wo riwayat mursal yaani zaeef hai.

Hazrat Abu Zarr Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Har aadmi par lazim hai k apne (jism k) har band (joodh) k badley sadqa khairaat kare, pas SUBHANALLAH kehna sadqa hai, ALHAMDULILLAH kehna sadqa hai LA ILAHA ILLALLAH kehna sadqa hai ALLAHU AKBAR kehna sadqa hai, naiki ka hukm dena sadqa hai aur buri baat se rook dena bhi sadqa hai aur in sab cheezo se zuha ki do rakaatey kifayat karti hai". (Sahih Muslim Kitbaus Salaatul Musafireen Hadees no. 720)

Rasool Allah Sallallahu Alaihi Wa Sallam ne farmaya "Allah ta'ala farmata hai! Ae Aadam k baitey khalis mere liye chaar rakaatey awwal din mein padh (yaani ishraaq ki) mein tujhko us din ki shaam tak kifayat karunga". (Abu Dawood Kitabut Tatvi Hadees no. 1289, Tirmizi Kitabus Salaat Hadees no. 474, Hafiz Zahbi ne ise hasan aur Imam Ibne Hibban ne sahih kaha)

Kifayat ka ek mafhoom ye bhi hai k tere kaam sawarunga. (Wallahu Aalam)

Hazrat Muaaz ne Ayesha Siddeqa Razi Allahu Anha se daryaft kiya Rasool Allah Sallallahu Alaihi Wa Sallam namaz e zuha ki kitni rakaatey padhte they? Hazrat Ayesha Razi Allahu Anha ne kaha "Chaar rakaatey aur jis qadar Allah ta'ala chahta aap (us se) ziyaadah (bhi) padhte". (Sahih Muslim Hadees no. 719)

Hazrat Ummey Haani Razi Allahu Anha farmati hai "Rasool Allah Sallallahu Alaihi Wa Sallam ne fatah makkah k din ghusal kiya aur 8 rakaat namaz e zuha padhi". (Sahih Bukhari Kitabut Tahajjud, Baab Salaatuz Zuha fis Safar Hadees no. 1176, Sahih Muslim Kitabul Haiz Hadees no. 336)

Maloom hua k chaasht (zuha) ki rakaatey do, chaar aur aath (8) hai.

Hazrat Abu Hurairah Razi Allahu Anhu ne farmaya "Mujhe mere piyaare doost Nabi Rahmat Sallallahu Alaihi Wa Sallam ne teen cheezo ki waseeyat ki, jab tak mein zindah rahunga unko nahi choodunga, har (arabi) maheena (mein 13, 14 aur 15) k teen roozey, chaast ki do rakaatey aur sooney se pehle witr padhna". (Sahih Bukhari Kitabut Tahajjud Hadees no. 1178, Sahih Muslim Hadees no. 721)

Ummul Momineen Hazrat Ayesha Razi Allahu Anha riwayat karti hai k Rasool Allah Sallallahu Alaihi Wa Sallam ek kaam ko chood dete halankey aapko uska karna pasand hota tha, aap us baat se darte they k aesa na ho k loog is kaam ko karne lag jaye phir wo un par farz ho jaye. (Sahih Bukhari Abwabut Tahajjud Hadees no. 128, Sahih Muslim Hadees no. 718)

Rasool Allah Sallallahu Alaihi Wa Sallam ki wafat k baad namaz e chaast k farz hone ka khauf khatam ho gaya, jis khauf ki bina par Rasool E Arkam Sallallahu Alaihi Wa Sallam kabhi chaast ki namaz ada karte aur kabhi na karte, ab ye namaz hamare liye mustahab hai.


FAJAR KI NAMAZ K BAAD MASJID MEIN BAITHNA AUR SOORAJ NIKALNE K BAAD DO RAKAAT PADHNA

Hazrat Anas bin Malik Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jisne fajar ki namaz jamaat se padhi phir sooraj nikalne tak baitha aur Allah ka zikr karta raha (sooraj nikalne k baad) do rakaat namaz padhi uske liye hajj aur umrah k barabar sawab hai" Aapne farmaya "Poorey hajj aur umrah ka, poorey hajj aur umrah ka, poorey hajj aur umrah ka. (Tirmizi Kitabuj Juma Hadees no. 576)

Hazrat Jabir bin Samurah Razi Allahu Anhu se riwayat hai k Rasool Allah Sallallahu Alaihi Wa Sallam jab farjar ki namaz ada karte to sooraj k tulu hone tak masjid mein baith'te, jab sooraj tulu hota to aap jaane k liye khade hote". (Sahih Muslim Hadees no. 670)

NAMAZ E ISTASQA

NAMAZ E ISTASQA

Bismillahirrahmanirraheem

Agar qahat sali ho jaye, barish na barsey to us waqt musalmano ko chahiye k ek din tajweez karke sooraj nikalte hi purane kapde pehan kar aajazi aur giryzari karte hue aabaadi se bahar kisi khuli jagah mein nikle aur mimber bhi rakkha jaye.

Hazrat Ibne Abbas Razi Allahu Anhu farmate hai "Rasool Allah Sallallahu Alaihi Wa Sallam purane kapde pehne, khushu aur aahistagi se chalte hue, aajazi aur giryazari karte hue nikle aur namaz (istasqa) ki jagah pahunchey". (Abu Dawood Kitabus Salaatul Istasqa Hadees no. 1165, Tirmizi Kitabuj Juma Hadees no. 557, Imam Tirmizi, Imam Ibne Khuzaima Hadees no. 1405, 1408, 1419, Imam Ibne Hibban Hadees no. 603, Imam Hakim 1:326 aur Imam Nawawi ne ise sahih kaha)

Hazrat Ayesha Siddeqa Razi Allahu Anha se riwayat hai k Sahaba E Kiraam Razi Allahu Anhum ne Aap Sallallahu Alaihi Wa Sallam se qahat saali ki shikayat ki to aapne eid-gaah mein mimbar rakhne ka hukm diya, jab sooraj ka kinaarah zahir hua to aap nikle aur mimbar par baithey, Allah ki badhaayi aur hamd bayan ki phir farmaya "Tumne apne ghulamo mein qahat saali aur bar waqt barish na hone ki shikayat ki hai, jabke Allah ta'ala ki taraf se tumko hukm hai k tum usko pukaro aur usne tumhari dua qabool karne ka wada kiya hai" phir farmaya:

"ALHAMDU LILLAHI RABBIL AALAMEEN AR-RAHMA NIR RAHEEM MALIKI YAUMID DEEN, LA ILAHA ILLALLAHU YAF'ALU MA YUREED, ALLHUMMA ANTA, ALLHU LA ILAHA ILLA ANTAL GHANEEYU WA NAHNUL FUQARA'U ANZIL ALAINAL GHAISA WAJ'AL MA ANZALTA LANA QUWWATAU WA BALAGHAN ILA HEEN"

"Sab tareef Allah k liye hai jo tamaam jahaano ka parwardigaar hai, bahut raham karne wala nihayat meharbaan hai, rooz e jaza ka malik hai, jo chahta hai wo karta hai, Ae Allah tu (saccha) mabood hai, tere siwa koi mabood nahi, tu sakhi aur be-parwah hai aur hum (tere) mohtaj aur faqeer (bande) hai hum par barish barsa aur jo barish tu nazil farmaye usey hamare liye ek muddat tak quwwat aur (maqasid tak) pahunchane ka zariya bana". (Abu Dawood Kitabul Istasqa Hadees no. 1173, Imam Hakim 1:268, ibne Hibban 604 aur Hafiz Zahbi ne ise sahih kaha)

Is se maloom hua k Sayyadul Mursaleen Sallallahu Alaihi Wa Sallam aur unke paak-baaz Sahaba Razi Allahu Anhum bhi apna sachi aur data sirf Allah hi ko samajhte they, wo usi k darr k mohtaj, usi se darne wale baraahe-raast usi se duwaye maangte rahe. Quran Majeed ne bhi isi aqeedey ki taleem di hai (Surah Fatir Surah no. 35 Ayat no. 14 aur 15) lihaza hum gunahgaaro ko bhi chahiye k kitab o sunnat k mutabiq sirf Allah hi ho apna sakhi aur daata maney aur us se baraahe raast duwaye maange, yahi Nabi E Akram Sallallahu Alaihi Wa Sallam se sacchi muhabbat aur unki ita'at ka taqaaza hai.

Hazrat Anas Razi Allahu Anhu farmate hai k Rasool Allah Sallallahu Alaihi Wa Sallam namaz e istasqa k alawah kisi dua mein apne dono haath nahi uthaate they, Aapne dono haath uthaaye, haatho ko daraaz kiya, hatta k baghley dikhaayi di. (Sahih Bukhari Kitabul Istasqa Hadees no. 1031, Sahih Muslim Kitabus Salaatul Istasqa Hadees no. 895)

Rasool Allah Sallallahu Alaihi Wa Sallam barish k liye dua kar rahe they aap khade hue they aur aapne apne haatho ko chehrey k saamne kiya hua tha aur haath sar se unhey nahi they. (Abu Dawood Kitabul Istasqa Hadees no. 1168, Imam Ibne Hibban Hadees no. 601 aur 602 ne ise sahih kaha)

Aap Sallallahu Alaihi Wa Sallam k haatho ki pusht aasmaan ki taraf thi. (Sahih Muslim Hadees no. 895)

Phir imam loogo ki taraf peeth karke qibla rukh ho jaye (aur haath uthaaye rakkhey) aur mandarja zail duwaye badi aajazi se roo roo kar padhey, aur sab loog bhi badey khuzu se aabadeedah ho kar haatho ko ulta karke uthaiye aur dua maangey dua ye hai:

"ALLHUM MASQINA, ALLHUM MASQINA, ALLHUM MASQINA"

"Ae Allah! hamey paani pila, Ae Allah! hamey paani pila, Ae Allah! hamey paani pila". (Sahih Bukhari Kitabul Istasqa Hadees no. 1013)

"ALLHUM MAQINA GHAISHAN MUGHEESHAN MAREE'AM MAREE'AN GHAIRA ZAAAARIN AAJILAN GHAIRA AAJILIN"

"Ae Allah! hamey paani pila, hum par aesi baarish nazil farma jo hamari tashnagi baja de, halki phuwaarey bin kar galla gaaney wali, nafa dene wali ho na k nuksan pahunchane wali, jald aaney wali ho na k dair lagaaney wali". (Abu Dawood Hadees no. 1169, Imam Ibne Khuzaima Hadees no. 1416, Imam Hakim 1:327 aur Zahbi ne ise sahih kaha)

"ALLAHUMMA ASQI IBADAKA WA BAHA IMAKA WA ANSHUR RAHMATAKA WA AHYI BALADAKAL MAYYITA"

"Ae Allah! apne badno aur janwaro ko sairaab kar, apni rahmat ko phela aur apne murda shehro ko zinda karde". (Abu Dawood Hadees no. 1176, iski sanad hasan hai)

Salaatul Istasqa mein ek aham masla chadar ka palatna hai, Hazrat Abdullah bin Zaid Razi Allahu Anhu se riwayat hai k Rasool Allah Sallallahu Alaihi Wa Sallam istasqa k liye eid-gaah ki taraf nikle, aapne apni peeth logoo ki taraf ki aur qibla rukh ho kar dua karne lage phir apni chadar ko palta phir unko do rakaatey namaz padhaayi aur us mein buland aawaaz se qiraat ki. (Sahih Bukhari Kitabul Istasqa Hadees no. 1025, Sahih Muslim Salaatul Istasqa Hadees no. 894)

Aap Sallallahu Alaihi Wa Sallam par siyaah chadar thi aapne uska nichla hissa uper lana chaha magar mushkil paish aayi to aapne usey apne kandho par hi ulat diya. (Abu Dawood Kitabus Salaatul Istasqa Hadees no. 1164, Imam Ibne Khuzaima Hadees no. 1416aur Imam Ibne Hibban ne ise sahih kaha)

Yaani chadar palat'te waqt chadar ka daaya kinaarah baaye kandhey par uar baaya kinaara daaye kandhey par daal diya.

Rasool Allah Sallallahu Alaihi Wa Sallam ne qibla rukh ho kar chadar ko palta, uske andar ka hissa bahar ki taraf kiya aur Sahaba E Kiraam Razi Allahu Anhum ne bhi aapke saath chaadaro ko palta. (Musnad Ahmad 4:41, 16579, Ibne Daqeeq ul eid ne ise sahih kaha)

Nabi E Akram Sallallahu Alaihi Wa Sallam ne namaz e eid ki tarah loogo ko do rakaatey namaz e istasqa padhaayi. (Tirmizi Kitabuj Juma Hadees no. 55, Abu Dawood Kitabul Istasqa Hadees no. 1165, ise Imam Tirmizi, Imam Ibne Khuzaima Hadees no. 1405 aur Imam Nawawi ne sahih kaha)

Hazrat Abdullah bin Zaid bin Aasim Maazani Razi Allahu Anhu se riwayat hai k Rasool Allah Sallallahu Alaihi Wa Sallam ne khutbey se pehle namaz padhaayi. (Musnad Imam Ahmad 4:16580)

Jamhoor ka amal isi par hai magar khutba namaz se pehle bhi jayez hai. (Ibne Khuzaima Jama Abwabus Salaatul Istasqa Hadees no. 1407)

Hazrat Adbullah bin Yazeed Ansari Razi Allahu Anhu riwayat karte hai k Rasool Allah Sallallahu Alaihi Wa Sallam ne do rakaatey (istasqa) ki padhaayi aur un mein tilawat buland aawaaz se ki aur namaz e istasqa baghair azaan aur iqamat k padhaayi. (Sahih Bukhari Kitabul Istasqa Hadees no.1022)

Ibne Bilal ne kaha k ulama ka is baat par ijma hai k namaz e istasqa mein azaan aur iqamat nahi hai.