SURMA KA BAYAN
Bismillahirrahamanirraheem
SURMA ISTEMAAL KARNA MUSTAHAB HAI
Hazrat Abdullah bin Abbas Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya: "Surma lagaya karo ye nazar ko taiz karta hai aur baalo ko badhata hai". (Tirmizi Abwabul Libas 2: 1438)
Wazahat: Raat ko soone se qabl Aap Sallallahu Alaihi Wa Sallam ka rozana daayi aur baayi aankh mein teen teen salaayi surma lagana sahih hadees se sabit hai.
SURMA TAAQ MARTABA AANKH MEIN DAALNA CHAHIYE
Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya: "Tum mein se jab koi shaks surma lagaye to taaq martaba lagaye aur jab koi khushbu ki dhooni le to taaq martaba le". (Musnad Ahmad, Silsila Ahadees E Saheeya Hadees no. 1260)
DAHNI AANKH MEIN TEEN MARTABA AUR BAAYI AANKH MEIN DO MARTABA SALAAYI DAALNA MUSTAHAB HAI
Hazrat Abdullah bin Umar Razi Allahu Anhu kehte hai jab Nabi E Akram Sallallahu Alaihi Wa Sallam surma lagate to dahini aankh mein teen martaba aur baayi aankh mein do martaba silaayi lagate aur saari tadaad e witr (yani paanch) banate. (Tabraani, Silsila Ahadees E Saheeya Hadees no. 1633)
ANGOOTHI KA BAYAN
Bismillahirrahamanirraheem
MARDO K LIYE SOONE (GOLD) KI ANGOOTHI PEHAN'NA MANA HAI
Hazrat Abu Hurairah Razi Allahu Anhu se riwayat hai k Nabi E Akram Sallallahu Alaihi Wa Sallam ne soone ki angoothi pehan'ne se (mardo) ko mana farmaya hai. (Sahih Bukhari Kitabul Libas)
JO SHAKS SOONE KI ANGOOTHI PEHANTA HAI WO DAR HAQEEQAT JAHANNAM KI AAG KA ANGAARAH HAATH MEIN LETA HAI
Hazat Abdullah bin Abbas Razi Allahu Anhu kehte hai Rasool Allah Sallallahu Alaihi Wa Sallam ne ek aadmi k haath mein soone ki angoothi pehne hue dekhi to Aap Sallallahu Alaihi Wa Sallam ne uske haath se utaar kar door phaink di aur irshad farmaya: "Tum mein se koi shaks aag k angaare ka qasad karta hai aur phir use haath mein leta hai" jab Aap Sallallahu Alaihi Wa Sallam tashreef le gaye to Sahaba E Kiram Razi Allahu Anhum ne us se kaha "Apni angoothi utha lo (use baich kar) faida hasil karo" us aadmi ne kaha "Allah ki qasam! jis angoothi ko Rasool Allah Sallallahu Alaihi Wa Sallam ne (gusse se) phainka hai mein use kabhi nahi uthaunga". (Sahih Muslim Kitabul Libas wal Zeenah)
Hazrat Abu Saeed Khudri Razi Allahu Anhu se riwayat hai k ek aadmi najraan k shehar se Rasool Allah Sallallahu Alaihi Wa Sallam ki khidmat mein hazir hua uske haath mein soone ki angoothi thi, Aap Sallallahu Alaihi Wa Sallam ne apna chehrah mubarak doosri taraf phair liya aur farmaya: "Tu mere paas apne haath mein aag ka angaarah le kar aya hai". (Nasayi Abwabuz Zeenah)
MARDO K LIYE CHAANDI KI ANGOOTHI PEHEN'NA JAYEZ HAI
Hazrat Anas bin Malik Razi Allahu Anhu kehte hai Aap Sallallahu Alaihi Wa Sallam ne jab Qaisar, Roam ko khat likhna chaha to Sahaba E Kiraam Razi Allahu Anhum ne Aap Sallallahu Alaihi Wa Sallam ko bataya k Ahle Roam mehar k bagair tehreer ka aetabaar nahi karte, chunanchey Aap Sallallahu Alaihi Wa Sallam ne chaandi ki angoothi banwayi aur us par Muhammadur Rasool Allah Sallallahu Alaihi Wa Sallam k alfaaz guda (yani ye alfaaf banwaye) they. (Sahih Bukhari Abwabuz Zeenah)
Hazrat Muhammad bin Ishaaq Rahimahullah kehte hai mene Salat bin Abdullah Razi Allahu Anhu ki daayi jagah par angoothi dekhi to poocha ye kya hai? unhone kaha "Mene Abdullah bin Abbas Razi Allahu Anhu ko isi tarah angoothi pehne dekha" aur angoothi k nageeney ko hatheli ki pusht par kar diya aur saath hi Salat bin Abdullah Razi Allahu Anhu ne ye kaha "Ye na samajhna k aesa sirf Abdullah bin Abbas Razi Allahu Anhu karte they balke Abdullah bin Abbas Razi Allahu Anhu bayan karte they k Rasool Allah apni angoothi is tarah pehante they". (Abu Dawood Kitabul Khatim 2: 3559)
RASOOL E AKRAM SALLALLAHU ALAIHI WA SALLAM APNI ANGOOTHI KA NAGEENAH HATHELI KI TARAF RAKHTE THEY
Hazrat Anas bin Malik Razi Allahu Anhu se riwayat hai k Rasool Allah Sallallahu Alaihi Wa Sallam chaandi ki angoothi pehne hue they jis mein habshi nageenah laga hua tha jise Aap Sallallahu Alaihi Wa Sallam apni hatheli ki jaanib rakhte they. (Ibne Maja Kitabul Libas 2: 2941)
ANGASHT SHAHADAT AUR DARMIYAANI UNGLI PAR ANGOOTHI PEHAN'NA MANA HAI
Hazrat Ali Razi Allahu Anhu farmate hai k mujhe Rasool Allah Sallallahu Alaihi Wa Sallam ne un doo ungliyo mein angoothi pehan'ne se mana farmaya hai, angasht shahadat aur darmiyaani ungli. (Nasayi Kitabuz Zeenah 3: 48007)
LOOHEY (IRON) KI ANGOOTHI PEHAN'NA BHI MANA HAI
Hazrat Umar bin Shuyeb Razi Allahu Anhu apne baap se aur wo apne dada se riwayat karte hai k Nabi E Akram Sallallahu Alaihi Wa Sallam ne soone aur loohe ki angoothi pehan'ne se mana farmaya hai. (Sunan Behaqui, Silsila Ahadees E Saheeya Hadees no. 1242)
KHUSHBU KA BAYAN
Bismillahirrahamanirraheem
KHUSHBU LAGANA MUSTAHAB HAI
Hazrat Ayesha Razi Allahu Anha farmati hai k ahraam baandhney se pehle mein Rasool Allah Sallallahu Alaihi Wa Sallam ko mayassar behtareen khushbu lagati thi. (Sahih Bukhari Kitabul Libas)
RASOOL ALLAH SALLALLAHU ALAIHI WA SALLAM KI PASANDEEDAH KHUSHBU MUSK THI
Hazrat Abu Saeed Khudri Razi Allahu Anhu kehte hai Rasool Allah Sallallahu Alaihi Wa Sallam ne farmaya "Bani israeel ki ek aurat ne sooney ki ek angoothi banayi aur usme usne musk ki khushbu bhari" Aap Sallallahu Alaihi Wa Sallam ne irshad farmaya: "Musk behtareen khushbu hai". (Nasayi Abwabuz Zeenah 3: 4736)
MARKAB KHUSHBU LAGANA BHI MUSTAHAB HAI
Hazrat Ayesha Razi Allahu Anha farmati hai k mene hajjatul wida mein ahraam khoolte aur baandhte hue apne haatho se Nabi E Akram Sallallahu Alaihi Wa Sallam ko zareerah (markab khushbu ka naam hai) lagayi. (Sahih Bukhari Kitabul Libas)
Hazrat Anas bin Malik Razi Allahu Anhu apne baap se riwayat karte hai k Nabi E Akram Sallallahu Alaihi Wa Sallam k haan markab khushbu thi jo Aap Sallallahu Alaihi Wa Sallam istemaal farmate they. (Tirmizi, Mukhtasar Shamail Muhammadiya Hadees no. 185)
JUMA K ROOZ KHUSHBU LAGANA MASNOON HAI
Hazrat Abu Saeed Khudri Razi Allahu Anhu apne baap se riwayat karte hai k Rasool Allah Sallallahu Alaihi Wa Sallam ne farmaya: "Juma k rooz har baalig musalman ko gusal karna chahiye, miswaak karni chahiye, aur jitni khushbu mayassar aa sake lagani chahiye". (Sahih Muslim Kitabul Juma)
KHUSHBU KA TOHFA QUBOOL KARNA MUSTAHAB HAI
Hazrat Anas Razi Allahu Anhu khushbu ka tohfa kabhi wapas na karte aur farmate k Nabi E Akram Sallallahu Alaihi Wa Sallam ne kabhi khushbu ka tohfa wapas nahi kiya. (Sahih Bukhari Kitabul Libas)
Hazrat Abu Hurairah Razi Allahu Anhu kehte hai Rasool Allahu Sallallahu Alaihi Wa Sallam ne farmaya: "Jise khushbu ka tohfa paish kiya jaye use wapas nahi karna chahiye is liye k khushbu khushgawaar aur boojh kam hai". (Abu Dawood Kitabut Tarjal 2: 3515)
MARDO KO NUMAYA KHUSHBU AUR GAIR NUMAYA RANG WALE ATR ISTEMAAL KARNE CHAHIYE JABKE AURATO KO NUMAYA RANG AUR GAIR NUMAYA KHUSHBU WALE ATR ISTEMAAL KARNE CHAHIYE
Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya: "Mardo ki khushu wo hai jo numaya ho aur rang makhfi ho aur aurato ki khushbu wo hai jis ka rang numaya ho aur booh makhfi ho". (Nasayi Abwabuz Zeenah 3: 4734)
TAIZ KHUSHBU K SAATH GHAR SE NIKAL KAR GAIR MAHRAM MARDO K PAAS SE GUZARNE WALI AURAT ZANIYA K HUKM MEIN HAI
Hazrat Abu Moosa Razi Allahu Anhu kehte hai Rasool Allah Sallallahu Alaihi Wa Sallam ne farmaya: "Har aankh zaani hai, aurat jab khushbu laga kar mardo ki mehfil k paas se guzarti hai to wo aesi aur aesi hai yaani zaniya hai". (Tirmizi Abwabul Adab man Rasool Allah Sallallahu Alaihi Wa Sallam 2: 2237)
HINNA (MEHNADI) KA BAYAN
Bismillahirrahmanirraheem
AHLE JANNAT KI KHUSHBUWO MEIN SE SAB SE ZAYADA ACCHI KHUSHBU MEHANDI KI HOGI
Hazrat Abdullah bin Umar Razi Allahu Anhu kehte hai Rasool Allah Sallallahu Alaihi Wa Sallam ne farmaya: "Ahle jannat ki khushbuwo ki sardaar mehandi hogi". (Tarbaani, Silsila Ahadees E Saheeya Hadees no. 1420)
KATAM K SAATH MEHNADI MILA KAR BAALO KO KHIZAAB LAGANA MUSTAHAB HAI
Hazrat Abuzar Razi Allahu Anhu kehte hai Rasool Allah Sallallahu Alaihi Wa Sallam ne farmaya: "Safaid baalo ko badalne k liye behtareen khizaab mehndi aur wasmah hai". (Ibne Maja Kitabul Libas 2: 2919)
Wazahat: "Katam" ya "Wasmah" ek booti hai jo bazaat khud siyaah rang deti hai lekin mehnadi k saath mil kar bhoora rang deti hai jise Aap Sallallahu Alaihi Wa Sallam ne pasand farmaya.
AURATO K LIYE HAATHO YA PAO K NAKHUNO PAR MEHNADI LAGANA MUSTAHAB HAI
Hazrat Ayesha Razi Allahu Anha kehti hai kisi aurat ne, jiske haath mein kitab thi, pardeh k piche se Rasool Allah Sallallahu Alaihi Wa Sallam ki taraf irshad kiya to Rasool Allah Sallallahu Alaihi Wa Sallam ne apna haath piche kheench liya aur farmaya: "Mujhe maloom nahi ye haat mard ka hai ya aurat ka?" aurat ne arz ki "Ya Rasool Allah Sallallahu Alaihi Wa Sallam! aurat ka hai" Aap Sallallahu Alaihi Wa Sallam ne irshad farmaya: "Agar aurat hoti to apne nakhuno ka rang mehnadi se badal leti". (Abu Dawood Kitabut Tarjal 2: 3510)
MEHNADI SE ZAKHMO KA ILAAJ KARNA MUSTAHAB HAI
Hazrat Ali bin Ubaidullah Razi Allahu Anhu apni daadi se riwayat karte hai jo Rasool Allah Sallallahu Alaihi Wa Sallam ki khidmat par mamoor thi, wo kehti hai k Rasool Allah Sallallahu Alaihi Wa Sallam ko jab zakham ata ya kaanta chubhta to Aap Sallallahu Alaihi Wa Sallam mujhe waha mehnadi lagane ka hukm dete. (Tirmizi Kitabut Tibb 2: 1676)
KHIZAAB KA BAYAN
Bismillahirrahmanirraheem
MEHNDI YA USSE MILTE JULTE RANG KA KHIZAAB BAALO KO LAGANA MUSTAHAB HAI
Hazrat Sabit Razi Allahu Anhu kehte hai Hazrat Anas Razi Allahu Anhu se Nabi E Akram Sallallahu Alaihi Wa Sallam k khizaab k baare mein daryaft kiya gaya to unhone jawab diya "Aap Sallallahu Alaihi Wa Sallam k baalo mein itni safaidi nahi thi k Aap Sallallahu Alaihi Wa Sallam khizaab lagate agar mein chahta to Aap Sallallahu Alaihi Wa Sallam ki daadhi mubarak k safaid baal shumaar kar leta". (Sahih Bukhari Kitabul Libas)
Hazrat Abu Hurairah Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya: "Yahood wa Nasara khizaab nahi lagate, tum unki mukhalifat karo (aur khizaab lagao)". (Sahih Muslim Kitabul Libas)
ZARD RANG KA KHIZAAB ISTEMAAL KARNA BHI MUSTAHAB HAI
Hazrat Abdullah bin Umar Razi Allahu Anhu se riwayat hai k Nabi E Akram Sallallahu Alaihi Wa Sallam dabagat ki gayi khaal ka joota istemaal farmate aur apni daadhi mubarak ko wars aur zaafraan se zard karte, Hazrat Abdullah bin Umar Razi Allhau Anhu bhi aesa hi karte. (Abu Dawood Kitabut Tarjal 2: 3547)
MEHANDI AUR WASMAH MILA KAR KHIZAAB KARNA BHI MUSTAHAB HAI
Hazrat Abuzar Razi Allahu Anhu kehte hai Rasool Allah Sallallahu Alaihi Wa Sallam ne farmaya: "Safaid baalo ko badalne k liye behtareen khizaab mehndi aur wasmah hai". (Ibne Maja Kitabul Libas 2: 2919)
Wazahat: "Katam" ya "Wasmah" ek booti hai jo bazaat khud siyaah rang deti hai lekin mehnadi k saath mil kar bhoora rang deti hai jise Aap Sallallahu Alaihi Wa Sallam ne pasand farmaya.
KHIZAAB LAGANA MUSTAHAB HAI WAJIB NAHI, JO CHAHE LAGAYE JO CHAHE NA LAGAYE
Hazrat Abu Haroon Ubaidi kehte hai k Hazrat Abu Saeed Khudri Razi Allahu Anhu khizaab nahi lagate they aur unki daadhi safaid thi, Abu ishaaq Razi Allahu Anhu kehte hai mene Hazrat Ali Razi Allahu Anhu ko mimbar par (khitab dete hue) dekha unke sar aur daadhi k baal safaid they wo izaar pehne hue they aur chadar oudhey hue they, Hazrat Hasan Razi Allahu Anhu kehte hai mene Hazrat Ubey bin Kaab Razi Allahu Anhu ko dekha unke sar aur daadhi k baal safaid they, Hazrat Adi Razi Allahu Anhu kehte hai mene Hazrat Jabir bin Abdullah ko dekha unke sar k baal aur daadhi k baal safaid they, Jareer bin Hazam Razi Allahu Anhu kehte hai mene Ata bin abi Ribaah, Raja bin Hayaat makhool aur Hakam bin Ateebah Rahimahullah ko dekha un sabki daadhi safaid thi. (Musannaf ibne Abdur Razzaq, Sharah Sunnah Kitabul Libas 12/93-94)
KAALE RANG KA KHIZAAB ISTEMAAL KARNA MANA HAI
Hazrat Abdullah bin Abbas Razi Allahu Anhu kehte hai Rasool Allah Sallallahu Alaihi Wa Sallam ne farmaya: "Aakhir zamane mein kuch loog kabootar k seene jese siyaah rang ka khizaab lagayenge wo jannat ki khushbu bhi nahi soonghenge". (Abu Dawood Kitabut Tarjal 2: 3548)
KANGHI KA BAYAN
Bismillahirrahmanirraheem
SAR K BAALO MEIN KANGHI KARNA MUSTAHAB HAI
Hazrat Ayesha Razi Allahu Anha farmati hai k mein haiz ki halat mein bhi Rasool Allah Sallallahu Alaihi Wa Sallam k sar mubarak mein kanghi karti thi. (Sahih Bukhari Kitabul Libas)
SAR K BAALO MEIN DAAYI JANIB SE KANGHI SHURU KARNA MUSTAHAB HAI
Hazrat Ayesha Razi Allahu Anha farmati hai Nabi E Akram Sallallahu Alaihi Wa Sallam wuzu karne, kanghi karne aur joote pehan'ne mein daayi taraf se ibtida pasand farmate. (Sahih Bukhari Kitabul Libas)
HAR WAQT KANGHI KARTE REHNA YA APNE AAP KO BANANE SAWAARNE MEIN WAQT ZAAYA KARNA MAKROOH HAI
Hazrat Abdullah bin Mugfal Razi Allahu Anhu kehte hai k Rasool Allah Sallallahu Alaihi Wa Sallam ne har rooz kanghi karne se mana farmaya hai. (Abu Dawood Kitabul Tarjal 2: 3505)
Hazrat Abdullah bin Bureedah Razi Allahu Anhu se riwayat hai k Sahaba E Kiram Razi Allahu Anhum se ek aadmi jiska naam Ubaid Razi Allahu Anhu tha, ne kaha k Rasool Allah Sallallahu Alaihi Wa Sallam ne zayada irfaah se mana farmaya hai, Hazrat Bureedah Razi Allahu Anhu se poocha gaya k irfaah ka kya matlab hai? unhone kaha: "Is k mafhoom mein (degar baato k alawa) kanghi karna bhi shamil hai". (Nasayi Kitabuz Zeenah 3: 4834)
BAALO KA BAYAN
Bismillahirrahmanirraheem
SAR K BAAL KAANO AUR KANDHO K DARMIYAAN TAK RAKHNE MUSTAHAB HAI
Hazrat Qatadah Razi Allahu Anhu kehte hai k mene Hazrat Anas Razi Allahu Anhu se Rasool Allah Sallallahu Alaihi Wa Sallam k baalo k baare main pucha to Hazrat Anas Razi Allahu Anhu ne bataya "Rasool Allah Sallallahu Alaihi Wa Sallam k baal na to bilkul seedhey they na mukammal taur par ghunghraaley (balke zara kham liye hue) aur (lambayi mein) Aap Sallallahu Alaihi Wa Sallam k kaano aur kandho k darmiyaan tak they". (Sahih Bukhari Kitabul Libas)
Hazrat Anas Razi Allahu Anhu kehte hai Rasool Allah Sallallahu Alaihi Wa Sallam k baal kaano ki looh tak they. (Abu Dawood Kitabul Tarjal 2: 3524)
SAR K BAALO KI MAANG DARMIYAAN SE NIKAALNI MUSTAHAB HAI
Hazrat e Ayesha Razi Allahu Anha farmati hai mein Rasool Allah Sallallahu Alaihi Wa Sallam k baalo ki maang nikaana chaahti to sar mubarak k darmiyan se nikaati, dono aankho k darmiyaan se, aadhey baad idhar, aadhey baal udhar. (Abu Dawood Kitabul Tarjal 2: 3529)
BAALO MEIN TAIL LAGANA MUSTAHAB HAI
Hazrat Jabir bin Samurah Razi Allahu Anhu se Rasool E Akram Sallallahu Alaihi Wa Sallam k baalo ki safaidi k baare mein pucha gaya to unhone farmaya "Jab Rasool E Akram Sallallahu Alaihi Wa Sallam apne sar mubarak mein tail lagaate to safaidi maloom na hoti aur jab tail na lagate to safaidi maloom hoti". (Nasayi Abwabuz Zeenah 3: 4732)
Wazahat: Yaad rahe Rasool Allah Sallallahu Alaihi Wa Sallam k sar aur daadhi mubarak mein satrah se bees tak safaid baal they. (Tirmizi, Ibne Maja)
BAALO KO SAAF SUTHRA RAKHNA MUSTAHAB HAI
Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya: "Jin k baal ho wo unhe acchi tarah sawaar kar rakkhey". (Abu Dawood Kitabul Tarjal 2: 3509)
Hazrat Jabir bin Abdullah Razi Allahu Anhu kehte hai Nabi E Akram Sallallahu Alaihi Wa Sallam hamare paas tashreef laye aur ek aadmi ko dekha jiske baal purey gande they Aap Sallallahu Alaihi Wa Sallam ne irshad farmaya: "Kya us aadmi se itna bhi nhi ho sakta k apne baal hi theek karle". (Nasayi Kitabuz Zeenah 3: 4832)
SAR K BAAL UTARWAATE HUE PEHLE DAAYI TARAF PHIR BAAYI TARAF SE UTARWAANE MASNOON HAI
Hazrat Anas bin Malik Razi Allahu Anhu se riwayat hai k Rasool Allah Sallallahu Alaihi Wa Sallam ne (mazdalfah se mina aane k baad pehle) jumrah uqbah ko kankariya maari phir ountho ki taraf tashreef laye aur unhe zibah kiya (paas hi) hijaam baitha tha Aap Sallallahu Alaihi Wa Sallam ne use haath k ishare se sar moondhne ka hukm diya, usne sar ka daaya hissa moond diya, Aap Sallallahu Alaihi Wa Sallam ne baal nazdeek baithey hue loogo mein taqseem kar diye phir Aap Sallallahu Alaihi Wa Sallam ne hijaam ko sar ka baaya hissa moondhne ka hukm diya, phir poocha "Abu Talha Razi Allahu Anhu kaha hai?" (wo zahir hue to) Aap Sallallahu Alaihi Wa Sallam ne wo baal unko inayat farma diye. (Sahih Muslim Kitabul Hajj)
SAR K KUCH BAAL MOONDHWAANE AUR KUCH CHOOD DENE MANA HAI
Hazrat Abdullah bin Umar Razi Allahu Anhu se riwayat hai k Rasool Allah Sallallahu Alaihi Wa Sallam ne qaza'e se mana farmaya hai. (Sahih Bukhari Kitabul Libas)
Wazahat: "Qaza'e" ka matlab ye hai k ek jagah se baal kaate jaye aur doosri jagah se chood diye jaye jese latt wagaira banana.
SAR YA DAADHI SE SAFAID BAAL UKHADNA MAKROOH HAI
Hazrat Umar bin Shuyeb Razi Allahu Anhu apne baap se aur wo apne dada se riwayat karte hai k Rasool Allah Sallallahu Alaihi Wa Sallam ne farmaya: "Safaid baal mat ukhado, har musalman jiske halat e islam mein baal safaid hote hai wo qayamat k rooz uske liye noor honge" aur Yahya ki hadees mein hai, farmaya: "Allah ta'ala har safaid baal k badle mein uske nama e aamal mein ek naiki likhenge aur ek gunah maaf farmayenge". (Abu Dawood Kitabut Tarjal 2: 3539)
Hazrat Umar bin Shuyeb apne baap se aur wo apne dada se riwayat karte hai k Nabi E Akram Sallallahu Alaihi Wa Sallam ne hame safaid baal nikaalne se mana famaya aur Aap Sallallahu Alaihi Wa Sallam ka irshad e mubarak hai k "Safaid baal momin ka noor hai". (Ibne Maja Kitabul Adab 2: 2998)
SAR K BAAL KAANO KI LOO SE BADHANA NAHOOSAT HI NAHOOSAT HAI
Hazrat Wayeb bin Hujar Razi Allahu Anhu kehte hai k mein Nabi E Akram Sallallahu Alaihi Wa Sallam ki khidmat mein hazir hua us waqt mere sar k baal lambe they, jab Rasool E Akram Sallallahu Alaihi Wa Sallam ne mujhe dekha to farmaya: "Nahoosat hi nahoosat" Hazrat Wayel bin Hujar Razi Allahu Anhu kehte hai mein usi waqt wapas aya aur apne baal kaat kar choote kiye aur doosre rooz phir khidmat e aqdas mein hazir hua to Aap Sallallahu Alaihi Wa Sallam ne farmaya: "Mene tere saath burayi nahi ki aur ab baal acche hai". (Abu Dawood Kitabut Tarjal 2: 3530)
NOO MOLOOD K BAAL SAATVI ROOZ MOONDHNA MASNOON HAI
Hazrat Samurah Razi Allahu Anhu kehte hai Rasool Allah Sallallahu Alaihi Wa Sallam ne farmaya: "Baccha aqeeqah k badle rahan hota hai lihaza uski taraf se saatvi rooz jaanwar zibah kiya jaye, uska naam rakkha jaye aur uska sar moondha jaye". (Sahih Sunan Tirmizi Hadees no. 1229)
AURAT KA SAR K BAAL KAATNA MANA HAI
Hazrat Abdullah bin Abbas Razi Allahu Anhu kehte hai Rasool Allah Sallallahu Alaihi Wa Sallam ne aurato se mushabahat ikhtiyaar karne wale mardo par aur mardo se mushabiyat ikhtiyaar karne wali aurato par lanat farmayi hai. (Sahih Bukhari Kitabl Libas)
Hazrat Abdullah bin Abbas Razi Allahu Anhu kehte hai Rasool Allah Sallallahu Alaihi Wa Sallam ne farmaya "(umrah ya hajj k baad) aurato k liye sar moondhaana nahi balke baal (ek poor k barabar) kaatna hai". (Abu Dawood Kitabul Manasik 1: 1748)
SAR K BAAL UTAARTE WAQT YA UTAARNE K BAAD KOI DUA MAANGNA SUNNAT SE SABIT NAHI
BAAL KAATNE K BAAD UNHE ZAMEEN MEIN DAFAN KARNA SUNNAT SE SABIT NAHI.
KHATNAH KA BAYAN
Bismillahirrahmanirraheem
KHATNA KARNA MASNOON HAI
Hazrat Abu Hurairah Razi Allahu Anhu se riwayat hai k mene Rasool Allah Sallallahu Alaihi Wa Sallam ko ye farmate hue suna hai k "Paanch baatey insaan ki fitrat mein hai
1. Khatna Karana
2. Zair E Naaf Baal saaf karna
3. Moochey katarna
4. Nakhun Kaatna
5. Bagal k baal saaf karna". (Sahih Bukhari Kitabul Libas)
SAB SE PEHLE HAZRAT IBRAHEEM ALAIHIS SALAAM NE KHATNA KIYA THA
Hazrat Saeed bin Musayyab Razi Allahu Anhu kehte hai k Ibraheem Alaihis Sallam ne sabse pehle mehmaan ki ziyafat ki, sabse pehle khatna kiya, sabse pehle mooche katarwayi, sabse pehle safaid baal dekhey aur arz kiya: "Ya Allah! ye kya hai?" Allah Ta'ala ne irshad farmaya: "Ye izzat aur waqaar hai" Hazrat Ibraheem Alaihis Salaam ne farmaya "Mere Rabb! meri izzat aur waqaar mein izafa ata farma". (Muatta Imam Malik Kitab Sifatun Nabi Sallallahu Alaihi Wa Sallam)
NAKHUNO KA BAYAN
Bismillahirrahmanirraheem
NAKHUN KAATNA SUNNAT HAI
Hazrat Abu Hurairah Razi Allahu Anhu se riwayat hai k mene Rasool Allah Sallallahu Alaihi Wa Sallam ko ye farmate hue suna hai k "Paanch baatey insaan ki fitrat mein hai
1. Khatna Karana
2. Zair E Naaf Baal saaf karna
3. Moochey katarna
4. Nakhun Kaatna
5. Bagal k baal saaf karna". (Sahih Bukhari Kitabul Libas)
JUMA K ROOZ NAKHUN KAATNE MUSTAHAB HAI
Hazrat Abdullah bin Umar Razi Allahu Anhu se riwayat hai k wo har juma ko apne nakhun kaat'te aur moochey katarwatey. (Sharah Sunnah Kitabul Libas 12: 114)
Hazrat Muaviyaah bin Qurrah Razi Allahu Anhu se riwayat hai k unke 2 chacha jinhone Nabi E Akram Sallallahu Alaihi Wa Sallam ka zamana paya wo dono apni moochey aur nakhun juma k rooz kaat'te they. (Sharah Sunnah Kitabul Libas 12: 114)
Hazrat Abraheem Nakhey Rahimahullah (Imam Abu Haneefa Rahimahullah k ustaad) farmate hai juma k rooz aadmi ka nakhun kaatna mustahab hai. (Sharah Sunnah Kitabul Libas 12: 114)
40 DIN SE ZAYADA NAKHUN BADHANA MANA HAI
Hazrat Anas bin Malik Razi Allah Anhu kehte hai hamare liye moochey katane, nakhun kaatne, sar mudhaane aur bagal k baal saaf karne ki hadd 40 din muqarrar farmayi gayi hai k 40 din se zayada na badhne de. (Tirmizi Abwabul Istaazaan 2: 2216)
DHADHI KA BAYAN
Bismillahirrahmanirraheem
Hazrat Ayesha Razi Allahu Anha se riwayat hai k Nabi E Akram Sallallahu Alaihi Wa Sallam ne farmaya: "10 baate fitrat mai se hai"
1. Muchey katarna
2. Dadhi Badhana
3. Miswaak Karna
4. Naak mai paani daalna
5. Nakhoon kaatna
6. Ungliyo ki pusht saaf karna
7. Bagal k baal saaf karna
8. Zair E Naaf baal moondhna
9. Paani se istanja karna (Hadees k raavi) Hazrat Mus'ab Razi Allahu Anhu kethe hai dasvi baat mai bhool gaya mumkin hai wo
10. Kulli Karna ho. (Tirmizi Jild 2 hadees no. 2214)
DHADHI BADHANA AUR MOOCHEY KATARNA WAJIB HAI
MOOCHEY KATARWANA YA MOONDHNA DONO DURUST HAI
Hazrat Abdullah ibne Umar Razi Allahu Anhu kehte hai Rasool Allah Sallallahu Alaihi Wa Sallam ne moochey katarwane ya moondhane aur daadhi choodne ka hukm diya hai. (Abu Dawood Hadees no. 3537)
DAADHI MOODNA AUR MOOCHEY BADHANA MUSHRIKEEN AUR MAJOOS KA TAREEKA HAI, MUSALMANO KO UNKI MUSHABIHAT IKHTIYAAR NA KARNE KA HUKM HAI
Hazrat Abdullah bin Umar Razi Allahu Anhu kehte hai Rasool Allah Sallallahu Alaihi Wa Sallam k saamne majoos (aatish parast) ka zikr kiya gaya to Aap Sallallahu Alaihi Wa Sallam ne irshaad farmaya: "Ye loog moochey badhate hai aur daadhiya mudaatey (kaat'te) hai, inki mukhalifat kiya karo", Abdullah bin Umar Razi Allahu Anhu apni moochey is tarah kaat'te jis tarah bakri ya ounth (camel) ki awan (acchi tarah) kaati jati hai. (Ibne Hibban kitabuz zeenat wal tateeb hadees no. 5476)
Hazrat Abdullah bin Umar Razi Allahu Anhu se riwayat hai k Nabi E Akram Sallallahu Alaihi Wa Sallam ne irshad farmaya: "Mushrikeen ki mukhalifat karo, daadhi badhao aur moochey katarwao". (Sahih Bukhari Kitabul Libaas)
Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne irshad farmaya: "Moochey kartarwao aur daadhi badhao aur majoosiyo ki mukhalifat karo". (Sahih Muslim Kitabul Taharah)
DAADHI KARTARNA AUR MOOCHEY BADHANA YAHOOD WA NASARA KA TAREEQA HAI LIHAZA MUSALMANO KO UNKI MUSHABIHAT IKHTIYAAR KARNE SE AAP SALLALLAHU ALAIHI WA SALLAM NE MANA FARMAYA HAI
Hazrat Abu Umama Razi Allahu Anhu kehte hai humne arz ki "Ya Rasool Allah Sallallahu Alaihi Wa Sallam! ahle kitab (yaani yahood wa nasara) apni daadhiya chooti karte hai aur moochey badhate hai" Aap Sallallahu Alaihi Wa Sallam ne irshad farmaya: "Tum apni moochey katarwao aur daadhi badhao aur ahle kitab ki mukhalifat karo". (Musnad Ahmad 36: 613 tehqeeq shuyaib arnaoot Hadees no. 22283)
DAADHI MOONDHNE WALO K LIYE "WAIL" HAI
Hazrat Zaid bin Habeeb Razi Allah Anhu (kasra k naam dawat naama irsaal karne k waqiya mein bayan karte hai k khusro parvaiz k numaindey Rasool Allah Sallallahu Alaihi Wa Sallam ko giraftaar karne k liye madeena munawwara gaye) jab wo dono Rasool Allah Sallallahu Alaihi Wa Sallam ki khidmat mein hazir hue to Aap Sallallahu Alaihi Wa Sallam ne un dono ki taraf dekhna pasand na farmaya kyunki dono ne apni daadhiya mundhaa rakkhi thi, Aap Sallallahu Alaihi Wa Sallam ne irshad farmaya: "Tum dono k liye wail hai kisne tumhe daadhi moondhane aur moochey badhane ka hukm diya hai? dono ne jawab mein kaha hame hamare rabb yaani kasra ne hukm de rakkha hai Rasool E Akram Sallallahu Alaihi Wa Sallam ne irshad farmaya: mere rabb ne mujhe apni daadhi badhane aur moochey katraane ka hukm diya hai". (Al bidaya wan nihaya safa no. 663)
Wazahat: Wail jahannam ki ek waadi ka naam hai aur uska mana "halakat aur barbaadi" hai, dono aetabaar se anjaam ek hi hai "Jahannam"
MOOCHEY BADHAANE WALA HUM MEIN SE NAHI
Hazrat Zaid bin Arkam Razi Allahu Anhu se riwayat hai k Rasool Allah Sallallahu Alaihi Wa Sallam ne irshad farmaya: "Jo moochey na katarwaye wo hum mein se nahi". (Tirmizi Abwabul Adab an Rasoollullah Sallallahu Alaihi Wa Sallam Hadees no. 2: 2217)
DAADHI KO BALL DE KAR CHOTA ZAHIR KARNA BHI MANA HAI
Hazrat Ruwaif bin Saabit Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya: "Ae Ruwaif! mumkin hai mere baad teri zindagi lambi ho lihaza logo ko bata dena jisne apni daadhi ko girhey (gaanth lagayi, ya mooda) di (taakey chooti nazar aye) ya ghoode k gale mein dhaga baandha (takey nazar na lage) ya kisi jaanwar ki leed ya haddi se istanja kiya, us se Muhammad Sallallahu Alaihi Wa Sallam baizaar hai". (Sunan Nasayi Kitabuz Zeenat Hadees no. 3: 4692)
JUMA K DIN MOOCHEY KATARNA MUSTAHAB HAI
Hazrat Abdullah bin Umar Razi Allahu Anhu se riwayat hai k wo har juma ko apne nakhoon kaat'te aur moochey katarwaate. (Sharah Sunnah Kitabul Libaas 12: 114)
DAADHI K BAAL CHOOTE KARNE MEIN EK MAUZU (MANGHADAT) HADEES
Hazrat Umar bin Shuyeb apne baap se aur wo apne dada se riwayat karte hai k Nabi E Akram Sallallahu Alaihi Wa Sallam apni raish mubarak k taul aur arz se baal chootey farmaya karte they. (Tirmzi Abwabul Istaazaan wal adab)
Wazahat: Is hadees ko sheikh muhammad nasiruddin al baani Rahimahullah ne zaeef sunan tirmizi mein mauzu kaha hai safa no. 331 hadees no. 525
MISWAAK KA BAYAN
Bismillahirrahmanirraheem
MISWAAK TAMAAM AMBIYA KI SUNNAT HAI
Hazrat Ayesha Razi Allahu Anha se riwayat hai k Nabi E Akram Sallallahu Alaihi Wa Sallam ne farmaya: "10 baate fitrat mai se hai"
1. Muchey katarna
2. Dadhi Badhana
3. Miswaak Karna
4. Naak mai paani daalna
5. Nakhoon kaatna
6. Ungliyo ki pusht saaf karna
7. Bagal k baal saaf karna
8. Zair E Naaf baal mundhna
9. Paani se istanja karna (Hadees k raavi) Hazrat Mus'ab Razi Allahu Anhu kethe hai dasvi baat mai bhool gaya mumkin hai wo
10. Kulli Karna ho. (Tirmizi Jild 2 hadees no. 2214)
MISWAAK KARNE SE ALLAH TA'ALA KHUSH HOTE HAI
Hazrat Ayesha Razi Allahu Anha se riwayat hai k Nabi E Akram Sallallahu Alaihi Wa Sallam ne farmaya: miswaak muh ko saaf rakhti hai aur Allah ta'ala ki raza ka ba'as hai. (Nasai Kitabut Taharah Hadees no. 5)
RASOOL E AKRAM SALLALLAHU ALAIHI WA SALLAM NE KHUWAHISH K BAWAJOOD SAHOOLAT KI KHATIR UMMAT KO HAR NAMAAZ K LIYE WUZU K SAATH MISWAAK KARNE KA HUKM NHI DIYA
Hazrat Abu Huraira Razi Allahu Anhu se riwayat hai k Rasool E Akram Sallallahu Alaihi Wa Sallam ne farmaya: Agar mai ummat k liye takleef na samajhta to unhe har namaaz k saath miswaak karne ka hukm deta. (Sahih Muslim Kitabut Taharah Baab Miswaak)
SO KAR UTHNE K BAAD SABSE PEHLE RASOOL E AKRAM SALLALLAHU ALAIHI WA SALLAM MISWAAK FARMAATE
Hazrat Huzaifa Razi Allahu Anhu kehte hai k Rasool Allah Sallallahu Alaihi Wa Sallam jab tahajjud k liye uthte to apna muh miswaak se saaf farmaate. (Sahih Muslim Kitabut Taharah Baab Miswaak)
RASOOL E AKRAM SALLALLAHU ALAIHI WA SALLAM JAB BHI BAHAR SE GHAR TASHREEF LAATE TO PEHLE MISWAAK FARMATEY
Hazrat Ayesha Razi Allahu Anha se riwayat hai k Nabi E Akram Sallallahu Alaihi Wa Sallam jab bhi ghar tashreef laate to sab se pehle miswaak farmaate. (Sahih Muslim Kitabut Taharah Baab Miswaak)
JUMA K ROOZ MISWAAK KARNA MASNOON HAI
Hazrat Abu Saeed Khudri Razi Allahu Anhu apne baap se riwayat karte hai k Rasool Allah Sallallahu Alaihi Wa Sallam ne farmaya: juma k rooz har baalig ko gusal karna chahiye, miswaak karni chahiye aur jitni khushbu mayassar a sake lagaani chahiye. (Sahih Muslim Kitabul Juma)
HAYAAT E TAYYABA KA AKHIRI AMAL MISWAAK KARNA THA
Hazrat Ayesha Razi Allahu Anha farmati hai, mai Rasool Allah Sallallahu Alaihi Wa Sallam ko sahara diye hue thi k (mera bhai) Abdur Rahmaan hamare ghar aya uske haath mai miswaak thi mene dekha Aap Sallallahu Alaihi Wa Sallam ki nazare miswaak par lagi hai, mujhe maloom tha k Aap Sallallahu Alaihi Wa Sallam miswaak kis kadar pasand farmaate hai, mene arz kiya "kya Aap Sallallahu Alaihi Wa Sallam k liye miswaak le lu?" Aap Sallallahu Alaihi Wa Sallam ne sar k ishare se farmaya: "han le lo", mene wo miswaak le kar Aap Sallallahu Alaihi Wa Sallam ko di lekin Aap Sallallahu Alaihi Wa Sallam bimaari ki sakhti ki wajah se chaba na sake, mene arz kiya, kya miswaak naram kar du?, Aap Sallallahu Alaihi Wa Sallam ne sar k ishare se farmaya "han", mene use muh se naram kiya to Aap Sallallahu Alaihi Wa Sallam me wo miswaak istemaal farmayi. (Bukhari Kitabul Magaazi)
Allah ta'ala hame is amal ko karne ki tofeek ata farmaye (Aameen Ya Rabbal Alameen)
