IBTADA'AN JANNAT SE MEHROOM REHNE WALE LOOG

IBTADA'AN JANNAT SE MEHROOM REHNE WALE LOOG

Bismillahirrahmanirraheem

JHOOTI QASAM KHA KAR DOOSRE KA HAQQ MAARNE WALA JANNAT MEIN NAHI JAYEGA

Hazrat Abu Umama Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jis shaks ne (jhooti) qasam kha kar kisi musalman ka haqq maar liya Allah ne uske liye jahannam wajib kardi aur jannat haraam kardi" ek aadmi ne arz kiya "Ya Rasool Allah Sallallahu Alaihi Wa Sallam! khawah wo mamooli si cheez ho?" Aap Sallallahu Alaihi Wa Sallam ne irshad farmaya "Khawah paid ki ek tehni hi kyu na ho". (Sahih Muslim Kitabul Emaan)


HARAAM TAREEQEY SE MAAL KAMAANE AUR KHAANE WALA JANNAT MEIN NAHI JAYEGA

Hazrat Abu Bakr Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jo jism haraam giza se palta hai wo jannat mein nahi jayega". (Sunan Behaqui, Mishkatul Masabeeh Hadees no. 2: 2787)


WALEDAYN KA NA-FARMAAN, DAYYOOS AUR MARD KI MUSHABIHAT KARNE WALI AURAT JANNAT MEIN NAHI JAYEGI

Hazrat Abdullah bin Umar Razi Allahu Anhu kehte hai Rasool Allah Sallallahu Alaihi Wa Sallam ne farmaya "Teen aadmi jannat mein dakhil nahi honge waledayn ka na-farmaan, dayyoos aur mard ki mushabihat karne wali aurat jannat mein nahi jayengey". (Mustadrak E Haakim, Sahih Jamey Sageer Hadees no. 3058)


QATA RAHMI KARNE WALA JANNAT MEIN NAHI JAYEGA

Hazrat Muhammad bin Jubair bin Mut'im Razi Allahu Anhu apne baap se riwayat karte hai k Rasool Allah Sallallahu Alaihi Wa Sallam ne farmaya "Qata Rahmi karne wala jannat mein nahi dakhil hoga". (Sunan Tirmizi Abwabul Birr Wa Silah)


APNI RIAAYA KO DHOOKA DENE WALA HAKIM JANNAT MEIN NAHI JAYEGA

Hazrat Maqil bin Yasaar Razi Allahu Anhu se riwayat hai k mene Nabi E Akram Sallallahu Alaihi Wa Sallam ko farmate hue suna hai "Musalman raeeyat par hakumat karne wala hakim agar is haal mein mara k wo apni raeeyat se dhooka kar raha tha to Allah ta'ala us par jannat haraam kar dega". (Sahih Bukhari Kitabul Ahkaam)


EHSAAN JATLAANE WALA, WALEDAYN KA NA-FARMAAN AUR HAMESHA SHARAAB PEENE WALA JANNAT MEIN DAKHIL NAHI HOGA

Hazrat Abdullah bin Umar Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Ehsaan jatlaane wala, waledayn ka na-farmaan aur hamesha sharaab peene wala (yaani boodha sharaabi) jannat mein nahi jayega". (Sunan Nasayi Hadees no. 3: 5241)


HAMSAAYE KO AZEEYAT PAHUNCHANE WALA JANNAT MEIN NAHI JAYEGA

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jis shaks ka hamsaaya uske sharr se mehfooz na ho wo jannat mein dakhil na hoga". (Sahih Muslim Kitabul Emaan)


BAD-ZUBAAN AUR BAD-MIJAAZ AADMI JANNAT MEIN NAHI JAYEGA

Hazrat Haarsa bin Wahhab Razi Allahu Anhu kehte hai Rasool Allah Sallallahu Alaihi Wa Sallam ne farmaya "Bad-zubaan aur bad-mijaaz aadmi jannat mein nahi jayega". (Sunan Abu Dawood Kitabul Adab)


TAKABBUR KARNE WALA JANNAT MEIN NAHI JAYEGA

Hazrat Abdullah (bin Mas'ood) Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jis shaks k dil mein ratti barabar takabbur ho wo jannat mein nahi dakhil hoga". (Sahih Muslim Kitabul Emaan)


CHUGAL KHOOR JANNAT MEIN NAHI JAYEGA

Hazrat Huzaifa Razi Allahu Anhu kehte hai Rasool Allah Sallallahu Alaihi Wa Sallam ne farmaya "Chugal khoor jannat mein dakhil nahi hoga". (Sunan Abu Dawood Kitabul Adab)


APNE AAPKO JAANTE BOOJHTE GAIR BAAP SE MANSOOB KARNE WALA JANNAT MEIN NAHI JAYEGA

Hazrat Saad bin Abi Waqaas Razi Allahu Anhu se riwayat hai k mene Nabi E Akram Sallallahu Alaihi Wa Sallam ko farmate hue suna hai k "Jo shaks jaante bhoojte apne baap k alawah kisi doosre ko apna baap bataaye uspar jannat haraam hai". (Sahih Bukhari Kitabul Fara'iz)


BILA WAJAH TALAAQ MAANGNE WALI AURAT JANNAT MEIN NAHI JAYEGI

Hazrat Sobaan Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jis aurat ne apne shohar se bila wajah talaaq maangi us par jannat ki khushboo haraam hai". (Sahih Sunan Tirmizi Hadees no. 948)


KAALE RANG KA KHIZAAB LAGAANE WALA JANNAT MEIN NAHI JAYEGA

Hazrat Abdullah ibne Abbas Razi Allahu Anhu kehte hai Rasool Allah Sallallahu Alaihi Wa Sallam ne farmaya "Aaakhiri zamaane mein kuch loog kabootar k seene jesa siyaah rang ka khizaab lagayenge aese loog jannat ki khushboo tak na payengey". (Sunan Abu Dawood Kitabul Libaas)

JANNAT MEIN DAKHIL HOONE WALE LOOG PART 3 OF 3

JANNAT MEIN DAKHIL HOONE WALE LOOG PART 3 OF 3

Bismillahirrahmanirraheem

SHARIYAT KI HALAAL KARDAH CHEEZO KO HALAAL AUR HARAAM KARDAH CHEEZO KO HARAAM JAAN'NE WALA YAANI UN PAR AMAL KARE WALA JANNAT MEIN JAYEGA

Hazrat Jabir Razi Allahu Anhu se riwayat hai k ek aadmi ne Rasool Allah Sallallahu Alaihi Wa Sallam se sawaal kiya "Ya Rasool Allah Sallallahu Alaihi Wa Sallam agar mein farz namazey ada karu, ramazaan k roozey rakkhu (shariyat ki) halaal kardah cheezo ko halaal jaanu aur haraam kardah cheezo ko haraam jaanu lekin us se ziyaadah kuch na karu, to kya mein jannat mein chala jaunga?" Aap Sallallahu Alaihi Wa Sallam ne irshad farmaya "han". (Sahih Muslim Kitabul Emaan)


DO NA-BAALIGH BACCHO K FAUT HONE PAR SABR KARNE WALE WALEDAYN JANNAT MEIN JAYENGEY

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne ansaar ki aurato se farmaya "Tum mein jiske teen bacche faut ho jaye aur wo Allah ki raza k liye sabr kare to jannat mein jayegi ek aurat ne arz kiya ya Rasool Allah Sallallahu Alaihi Wa Sallam! agar do bacche mare to uske liye kya hukm hai?" Aap Sallallahu Alaihi Wa Sallam ne irshad farmaya "Agar do mare tab bhi yahi sawab hai". (Sahih Muslim Kitabul Birr Wa Silah)


HAR NAMAZ K BAAD AAYATAL KURSI PADHNE WALA JANNAT MEIN JAYEGA

Hazrat Abu Umama Razi Allahu Anahu kehte hai Rasool Allah Sallallahu Alaihi Wa Sallam ne farmaya "Jisne har namaz k baad aayatal kursi padhi use maut k siwa koi cheez jannat mein jaane se nahi rook sakti". (Tabraani, Ibne Hibban, Sunan Nasaayi, Silsila Ahadees E Saheeya Hadees no. 972)


"LA HAULA WA KUWWATA ILLAH BILLAH" KA KASRAT SE WAZEEFA KARNE WALA JANANT MEIN JAYEGA

Hazrat Abu Zarr Razi Allahu Anhu kehte hai k mujhe Rasool Allah Sallallahu Alaihi Wa Sallam ne farmaya "Kya mein tujhe jannat k khazaano mein se ek khazaane k baare mein aagaah na karu? mene arz kiya "Ya Rasool Allah Sallallahu Alaihi Wa Sallam zaroor aagaah farmaiye" Aap Sallallahu Alaihi Wa Sallam ne farmaya "LA HAULA WALA KUWWATA ILLAH BILLAH"(Tarjuma: Naiki karne aur buraayi se bachne ki taaqat Allah ki tofeeq k bagair nahi)". (Sahih Sunan Ibne Maja Hadees no. 3083)


"SUBHANALLAHI WA BI HAMDIHI" KA WAZEEFA KARNE WALA JANNAT MEIN JAYEGA

Hazrat Jabir Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jisne "SUBHANALLAHI WA BI HAMDIHI"(Tarjuma: Azmat wala Allah apni hamd k saath paak hai) kaha uske liye jannat mein khajoor ka ek darakht lagaaya jata hai". (Sahih Jamey Tirmizi Hadees no. 2757)


JO SHAKS APNE MAAL KI WAJAH SE BE-GUNAH QATAL KIYA GAYA WO JANNAT MEIN JAYEGA

Hazrat Abdullah bin Umar wa bin Aas Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jo shaks zulm k saath apne maal ki wajah se qatal kiya gaya uske liye jannat hai". (Sunan Nasaayi Kitabul Tahreemud Damm)


JIS AURAT NE HAMAL SAAQIT HONE PAR SABR KIYA WO JANNAT MEIN JAYEGI

Hazrat Muawiyah bin Jabal Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Us zaat ki qasam jiske haath mein meri jaan hai saaqit hamal baccha apni maa ko ungli se pakad kar jannat mein le jayega ba-shart k usne sawaab ki niyat se sabr kiya ho". (Sunan Ibne Maja Kitabul Jana'iz)


HAQQ K MUTABIQ FAISLA KARNE WALA QAAZI JANNAT MEIN JAYEGA

Hazrat Bureedah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Do qaazi jahannam mein jayengey aur ek qaazi jannat mein jayega, wo qaazi jisne haqq pehchana aur uske mutabiq faisla kiya wo jannat mein jayega aur wo qaazi jisne haqq pehchana aur jaante boojhte zulm kiya (yaani faisla haqq k khilaf kiya) aur wo qaazi jisne ilm (tehqeeq) k bagair faisla kiya dono jahannam mein jayenge". (Mustadrak E Haakim, Sahih Jamey Sageer Hadees no. 1474)


KISI MUSALMAN BHAI KI ADM MOJOODGI MEIN USKI IZZAT KA DIFA KARNE WALA JANNAT MEIN JAYEGA

Hazrat Asma bintey Yazeed Razi Allahu Anha kehti hai Rasool Allah Sallallahu Alaihi Wa Sallam ne farmaya "Jisne kisi bhai ki adm mojoodgi mein uski izzat se buraayi ko door kiya Allah par uska haqq hai k wo use aagh se aazaad kare". (Musnad Ahmad, Sahih Jamey Sageer Hadees no. 6116)


KISI SE SAWAAL NA KARNE WALA JANNAT MEIN JAYEGA

Hazrat Sobaan Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jo shaks mujhe is baat ki zamanat de k wo kisi se sawaal nahi karega mein use jannat ki zamanat deta hu". (Sunan Abu Dawood Kitabuz Zakaat)


GUSSA PEENE WALA JANNAT MEIN JAYEGA

Hazrat Abu Dardah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Gussa na kar tere liye jannat hai". (Tabraani, Sahih Jamey Sageer Hadees no. 7351)


SUBAH AUR FAJAR KI NAMAZ BA-QAIDAGI SE ADA KARNE WALA JANNAT MEIN JAYEGA

Hazrat Abu Bakr bin Moosa Ash'ari Razi Allahu Anhu apne baap se riwayat karte hai k Rasool Allah Sallallahu Alaihi Wa Sallam ne farmaya "Jisne thande waqt ki do namazey padhi wo jannat mein dakhil hua". (Sahih Muslim Kitabus Salaat)


ZUHAR SE QABL CHAAR RAKAAT SUNNAT PAR MUDAWAMAT IKHTIYAAR KARNE WALA JANNAT MEIN JAYEGA

Hazrat Ummey Habeeba Razi Allahu Anha kehti hai Rasool Allah Sallallahu Alaihi Wa Sallam ne farmaya "Jisne zuhar se pehle chaar rakaat ada ki Allah ta'ala us bande k liye jahannam ki aagh haraam kar dengey". (Sunan Tirmizi Kitabus Salaat)


MUSALSAL CHALEES ROOZ TAK TAKBEER E AULA K SAATH PANCHO NAMAZEY PADHNE WALA JANNAT MEIN JAYEGA

Hazrat Anas bin Malik Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jisne chalees din tak (paancho namazey) takbeer e aula k saath ba-jamaat ada ki uske liye do cheezo se aazaadi likhi jaati hai aagh se aur nifaaq se". (Sunan Tirmizi Abwabus Salaat)


DARJ E ZAIL SAAT AADMI JANNAT MEIN JAYENGEY
1. AADIL HAKIM, 2. JAWANI KI UMAR MEIN IBADAT KI RAGBAT RAKHNE WALA, 3. ZIYAADAH WAQT MASJID MEIN GUZAARNE WALA, 4. ALLAH K LIYE DOOSRE SE MUHABBAT KARNE WALA, 5. TANHAAYI MEIN ALLAH K DARR SE ROONE WALA, 6. ALLAH K DARR SE HASEEN WA JAMEEL AURAT KI DAWAT E GUNAH SE RUKNE WALA, 7. ALLAH KI RAAH MEIN KHUFYA KHARCH KARNE WALA

Hazrat Abu Saeed Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jis rooz koi saaya nahi hoga us rooz Allah ta'ala saat aadmiyo ko apne (arsh) k saaye taley jagah dega:
1. Aadil hakim,
2. Allah ki ibadat mein mashgool nojawan
3. Wo shaks jiska dil masjid se nikalne k baad wapas aane tak masjid mein latka rahe
4. Allah k liye ek doosre se muhabbat karne wale jinka milna aur alag hona khalis Allah k liye hi ho
5. Wo shaks jisne tanhaayi mein Allah ko yaad kiya aur uski aankho se aansu beh nikle
6. Wo shaks jiske unchey khandaan ki khoobsurat aurat ne dawat e gunah di aur usne kaha "Mein Allah azz wa jall se darta hu"
7. Wo shaks jisne is tarah chipa kar sadqa kiya k baaye haath tak ko pata na chale k daaye ne sadqa kiya hai". (Sunan Tirmizi Kitabuz Zuhad)


DOOSRO KO MAAF KARNE WALA JANNAT MEIN JAYEGA

Hazrat Muaaz bin Anas Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jo shaks intaqaam lene par poori tarah qadir tha lekin (intaqaam na liya aur) gussa pee gaya (qayamat k din) Allah ta'ala use saari makhlooq k saamne bulayenge aur use hoor e aaeyn muntakhab karne ka ikhtiyaar diya jayega k jis se chaahe nikah karle". (Musnad Ahmad, Sahih Jamey Sageer Hadees no. 6394)


TAKABBUR, KHAYANAT, QARZ SE PAAK SHAKS JANNAT MEIN JAYEGA

Hazrat Sobaan Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jo shaks takabbur, khayanat aur qarz se paak mara wo jannat mein dakhil hoga". (Sunan Tirmizi Baab Galool)


AZAAN KA JAWAB DENE WALA JANNAT MEIN DAKHIL HOGA

Hazrat Abu Hurairah Razi Allahu Anhu kehte hai hum Rasool Allah Sallallahu Alaihi Wa Sallam k saath they Hazrat Bilaal Razi Allahu Anhu khade hue aur azaan di jab Hazrat Bilaal Razi Allahu Anhu khamoosh hue to Aap Sallallahu Alaihi Wa Sallam ne irshad farmaya "Jisne mu'azzin jese kalmaat yaqeen k saath dohraaye wo jannat mein dakhil hoga". (Sunan Nasaayi Kitabul Azaan)

The End.

JANNAT MEIN DAKHIL HOONE WALE LOOG PART 2 OF 3

JANNAT MEIN DAKHIL HOONE WALE LOOG PART 2 OF 3

Bismillahirrahmanirraheem

MUTTAQI AUR ACCHEY AKHLAAQ WALE LOOG JANNAT MEIN JAYENGEY

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam se daryaft kiya gaya kaun sa amal sabse ziyaadah loogo k jannat mein jaane ka sabab banega? Aap Sallallahu Alaihi Wa Sallam ne irshad farmaya "Taqwa aur accha akhlaaq" phir Aap Sallallahu Alaihi Wa Sallam se arz kiya gaya "Kaun sa amal sabse ziyaadah loogo k aagh mein jaane ka ba'as banega?" Aap Sallallahu Alaihi Wa Sallam ne irshad farmaya "mana aur sharm-gaah". (Sunan Tirmizi Kitabul Birr wa Silah)

YATEEM KI KIFALAT KARNE WALA JANNAT MEIN JAYEGA

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Yateem ki kifalat karne wala khawah yateem ka hi rishtedaar ho ya koi aur ho, aur mein jannat mein un do ungliyo ki tarah (saath saath) hongey imam Malik Rahimahullah ne angisht aur shahadat aur darmiyaani ungli se isharah kar ke bataya". (Sahih Muslim Kitabuz Zuhad)

HAJJ E MABROOR ADA KARNE WALA HAAJI JANNAT MEIN JAYEGA

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Umrah un tamaam gunaaho ka kaffarah hai jo mojoodah aur guzishta umraah k darmiyaan sarzad hue ho aur hajj e mabroor ka badla to jannat hi hai". (Muttafiqun Alaih, Kitabul Umrah)

MASJID BANAANE WALA JANNAT MEIN JAYEGA

Hazrat Usman bin Affan Razi Allahu Anhu kehte hai mene Rasool Allah Sallallahu Alaihi Wa Sallam ko farmate hue suna hai "Jisne Allah k liye masjid banaayi Allah ta'ala uske liye usi tarah ka ghar jannat mein banayega". (Sahih Muslim Kitabul Zuhad)

SHARM-GAAH AUR ZUBAAN KI HIFAZAT KARNE WALE JANNAT MEIN JAYENGEY

Hazrat Sahal bin Saad Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jo shaks mujhe zamanat de us cheez ki jo do cheezo k darmiyaan hai (yaani zubaan) aur us cheez ki jo do taango k darmiyaan hai (yaani sharmgaah ki) mein use jannat ki zamanat deta hu". (Sahih Bukhari Kitabur Riqaaq)

HAMSAAYA (PADOOSI) SE HUSN E SALOOK KARNE WALA JANNAT MEIN JAYEGA

Hazrat Abu Hurairah Razi Allahu Anhu kehte hai ek aadmi ne Rasool E Akram Sallallahu Alaihi Wa Sallam ki khidmat mein arz kiya ya Rasool Allah Sallallahu Alaihi Wa Sallam! falah aurat din ko roozey rakhti hai aur raat ko qayaam karti hai lekin hamsiyo ko azeeyat pahunchati hai Aap Sallallahu Alaihi Wa Sallam ne irshad farmaya "Ye aurat jahannam mein hai" phir Sahaba E Kiraam Razi Allahu Anhum ne (ek doosri aurat k baare mein) arz kiya "falah aurat sirf farz namaz ada karti hai aur mamooli khaane peene ki cheez sadqa karti hai lekin hamsiyo ko azeeyat nahi pahunchati" Aap Sallallahu Alaihi Wa Sallam ne irshad farmaya "Ye aurat jannati hai". (Musnad Ahmad tamalul minhu bayanul khisal al mojbata bil jannah Hadees no. 136)

ALLAH TA'ALA K 99 NAAM YAAD KARNE WALA JANNAT MEIN JAYEGA

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Allah ta'ala k 1 kam 100 yaani 99 naam hai jisne yaad kiye wo jannat mein dakhil huwa". (Muttafiqun Alaih, Al loo loo wal Marjaan Hadees no. 1714)

HAFIZ E QURAAN JANNAT MEIN JAYEGA

Hazrat Abu Saeed Khudri Razi Allahu Anhu kehte hai Rasool Allah Sallallahu Alaihi Wa Sallam ne farmaya "Hafiz E Quraan jab jannat mein dakhil hoga to use kaha jayega quraan ki tilawat karta ja aur darje par chadhta ja chunanchey wo har aayat k badle mein ek darja buland hota jayega hatta k aakhiri aayat tak pahunchega jo use yaad hogi aur wahi uska (mustaqil) darja hoga". (Sunan Ibne Maja Kitabul Adab)

KASRAT SE SALAAM KARNE WALE LOOG JANNAT MEIN DAKHIL HONGEY

Hazrat Abdullah bin Salaam Razi Allahu Anhu kehte hai Rasool Allah Sallallahu Alaihi Wa Sallam ne farmaya "Loogo! salaam phelao (yaani kasrat se kiya karo) (loogo ko) khana khilaao, aur jab (doosre) loog soo rahe ho to namaz padho (un aamaal k nateeje mein) salamati k saath jannat mein dakhil hongey". (Sunan Tirmizi Abwabul Sifatul Qiyaamah)

MAREEZ KI IYAADAT KARNE WALA JANNAT MEIN JAYEGA

Hazrat Sobaan Razi Allahu Anhu kehte hai Rasool Allah Sallallahu Alaihi Wa Sallam ne farmaya "Mareez ki iyadat karne wala jab tak wapas na aa jaye tab tak jannat k baagh mein rehta hai". (Sahih Muslim Kitabul Birr wa Silah)

ALLAH KI RAZA K LIYE DEEN KA ILM SEEKHNE WALA JANNAT MEIN JAYEGA

Hazrat Abu Hurairah Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jo shaks ilm e deen hasil karne k liye raasta tey kare Allah ta'ala uske liye jannat ka raasta (tey karna) aasaan farma dete hai". (Sahih Muslim Kitabul Zikr wa Dua)

ACCHI TARAH WUZU KARNE K BAAD KALMA E SHAHADAT PADHNE WALA JANNAT MEIN JAYEGA

Hazrat Umar bin Khattab Razi Allahu Anhu kehte hai Rasool E Akram Sallallahu Alaihi Wa Sallam ne farmaya "Tum mein se jo shaks acchi tarah poora wuzu kare phir kahe "ASH'HADU ALLA ILAHA ILLALLAHU WA ANNA MUHAMMADAN ABDUHU WA RASOOLUHU (yaani mein gawahi deta hu k Allah k siwa koi mabood nahi aur Muhammad Sallallahu Alaihi Wa Sallam Allah k bandey aur uske rasool hai)" uske liye jannat k aatho (8) darwaazey khool diye jaate hai jis se chaahey dakhil ho". (Sahih Muslim Kitabut Taharah)

SUBAH WA SHAAM SAYYADUL ASTAGFAAR PADHNE WALA SHAKS JANNAT MEIN DAKHIL HOGA

Hazrat Shaddad bin Aous Razi Allahu Anhu kehte hai k Rasool Allah Sallallahu Alaihi Wa Sallam ne farmaya "Sabse afzal astagfaar ye hai k tum kaho "Ae Allah! to mera rabb hai tere siwa koi ila nahi tooney hi mujhe paida kiya hai mein tera banda hu, tujh se kiye hue waadey par apni istata'at k mutabiq qayam hu, apne kiye hue burey kaamo k wabaal se teri panah chahta hu, mujh par tere jo ehsanaat hai unka aetaraaf karta hu aur apne gunaaho ka iqraar karta hu, mujhe bakhs de kyunki tere siwa koi bakhashne wala nahi" Rasool Allah Sallallahu Alaihi Wa Sallam ne farmaya "Jo shaks ye kalmaat yaqeen k saath din k waqt padhey aur shaam se qabl faut ho jaye to wo jannati hai aur jisne raat k waqt yaqeen k saath ye kalmaa kahe aur subah hoone se pehle faut ho gaya wo bhi jannati hai". (Mukhtasar Sahih Bukhari Hadees no. 2070)

JIS SHAKS KI BEENAAYI KHATAM HO JAYE AUR WO US PAR SABR KARE TO JANNAT MEIN JAYEGA

Hazrat Anas bin Malik Razi Allahu Anhu kehte hai mene Rasool Allah Sallallahu Alaihi Wa Sallam ko farmate hue suna hai k "Allah ta'ala farmata hai k jab mein apne bande ko uski do mehboob cheezo (aankho) se aazmaata hu aur wo us par sabr karta hai to uske badle mein use jannat deta hu". (Sahih Bukhari Kitabul Marz)

MAA BAAP KI KHIDMAT KARNE WALA JANNAT MEIN JAYEGA

Hazrat Abu Hurairah Razi Allahu Anhu Nabi E Akram Sallallahu Alaihi Wa Sallam se riwayat karte hai k Aap Sallallahu Alaihi Wa Sallam ne irshad farmaya "Us shaks ki naak khaak aalood ho ruswa aur zaleel ho halaak ho jisne apne waledayn mein se kisi ek ko budhaape mein paya phir (unko raazi karke) jannat mein dakhil na hua". (Sahih Muslim Kitabul Birr wa Silah)

MUSALMANO SE KISI PARESHANI YA TAKLEEF KO DOOR KARNE WALA SHAKS JANNAT MEIN JAYEGA

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Ek darakht musalmano ko takleef deta tha ek shaks aaya usne wo darakhat kaat diya aur jannat mein chala gaya". (Sahih Muslim Kitabul Birr Wa Silah)

BEEMARI PAR SABR KARNE WALA JANNAT MEIN JAYEGA

Hazrat Ata bin Abi Ribah Rahimahullah kehte hai Hazrat Abdullah bin Abbas Razi Allahu Anhu ne mujhse kaha kya mein tujhe jannati aurat na dikhao? mene arz kiya kyu nhi? Hazrat Abdullah bin Abbas Razi Allahu Anhu ne (ek aurat ki taraf irsharah karke) kaha ye kaali aurat Nabi E Akram Sallallahu Alaihi Wa Sallam ki khidmat mein hazir hui aur arz kiya mein mirgi ki mareez hu aur (mirgi k doraan) mera satar khul jata hai Aap Allah ta'ala se mere liye dua farmaiye (Allah mujhe sehat ata farmaye) Aap Sallallahu Alaihi Wa Sallam ne irshad farmaya "Agar tu chahey to sabr kar tere liye jannat hai aur agar tu chahey to Allah se tere liye dua karta hu wo tujhe sehat ata farma dega (is soorat mein jannat ka wada nahi karta) us aurat ne arz kiya mein sabr karungi lekin saath ye bhi arz kiya (mirgi k dooran) mera satar khul jata hai Allah ta'ala se dua farmaiye k mera satar na khuley Rasool E Arkam Sallallahu Alaihi Wa Sallam ne uske liye dua farmayi". (Sahih Bukhari Kitabus Sabr)

NABI, SHAHEED, SIDDEQUE, PAIDA HOTE HI FAUT HONE WALA BACCHA AUR ALLAH KI RAZA K LIYE APNE BHAAYI SE MULAQAAT KARNE WALA JANNAT MEIN JAYEGA
APNE SHOHAR SE MUHABBAT KARENE WALI, ZIYADAH BACCHO KO JANAM DENE KI TAKLEEF UTHAANE WALI AUR APNE SHOHAR K ZULM PAR SABR KARNE WALI KHATOORN JANNAT MEIN JAYEGI

Hazrat Kaab bin Ujrah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Kya mein tumhey jannat mein jaane wale mardo k baare mein na batlau? (suno!) Nabi jannati hai, shaheed jannati hai, siddeque jannati hai, paida hote hi faut hone wala baccha jannati hai, door daraaz se apne bhai ko mehaz Allah ki raza k liye milne wala jannati hai, kya mein tumhey jannat mein jaane wali aurato k baare mein na batlau? apne shohar se muhabbat karne wali, ziyaadah baccho ko janam dene (ki takleef uthaane) wali, aur wo naik aurat k jiska shohar us par zulam kare to kahe "Mera haath tere haath mein hai us waqt tak nahi sooungi jab tak to raazi na ho jaye". (Tabraani, Sahih Jamey Sageer Hadees no. 2601)

To Be Continued......

JANNAT MEIN DAKHIL HOONE WALE LOOG PART 1 OF 3

JANNAT MEIN DAKHIL HOONE WALE LOOG PART 1 OF 3

Bismillahirrahmanirraheem

NARAM DIL, AAJIZ, MUNKASIRUL MIJAAZ HAR WAQT ALLAH SE DARNE WALE BE ZARAR AUR HALEEMUL TABEY LOOG JANNAT MEIN JAYENGEY

Hazrat Abu Hurairah Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jannat mein aese loog dakhil hongye jinke dil chidyo jese hongey". (Sahih Muslim Kitabul Jannah Wa Sifatun Naemaha)


JANNAT MEIN GAREEB, FAKEER, MOHTAAJ, MISKEEN AUR KAMZOOR LOOGO KI KASRAT HOGI

Hazrat Haarsa bin Wahhab Razi Allahu Anhu ne Nabi E Akram Sallallahu Alaihi Wa Sallam ko farmate hue suna hai k Aap Sallallahu Alaihi Wa Sallam ne irshad farmaya "Kya tumhey bataau jannat mein jaane wale loog kaun hai?" Sahaba Razi Allahu Anhum ne arz kiya "Kyu nahi" Aap Sallallahu Alaihi Wa Sallam ne irshad farmaya "har naatawa, loogo k nazdeek kamzoor (lekin Allah k nazdeek itna bargazeedah) agar (kisi muamale mein) Allah ki qasam kha le to Allah use saccha karde" phir farmaya "Kya mein tumhey jahannam mein jaane wale loogo k baare mein na bataau?" Sahaba E Kiraam Razi Allahu Anhum ne arz kiya "Kyu Nahi" Aap  ne irshad farmaya "har jhagdaalu, bad akhlaaq aur takabbur karne wala". (Sahih Muslim Kitabul Jannah wa Sifatun Naemaha)


NARAM DIL, SHAREEFUL NAFS, MUNKASIRUL MIJAAZ AUR HAR DIL AZEEZ SHAKS JANNATI HAI

Hazrat Abdullah bin Mas'ood Razi Allahu Anhu kehte hai Rasool Allah Sallallahu Alaihi Wa Sallam ne farmaya "Har wo shaks jo naram dil hai shareefun nafs hai, munkasirul mijaaz hai aur loogo se qareeb (yaani har dil azeez) hai us par jahannam ki aagh haraam hai". (Musnad Ahmad, Saheeh Jamey Sageer Hadees no. 313)


RASOOL ALLAH SALLALLAHU ALAIHI WA SALLAM KI ITA'AT KARNE WALE JANNAT MEIN JAYENGEY

Hazrat Abu Hurairah Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Meri tamaam ummat jannat mein dakhil hogi magar jisne mera inkaar kiya (wo jannat mein dakhil nahi hoga)" Sahaba E Kiraam Razi Allahu Anhum ne arz kiya "Ya Rasool Allah Sallallahu Alaihi Wa Sallam kisne inkaar kiya?" Aap Sallallahu Alaihi Wa Sallam ne irshad farmaya "Jisne meri ita'at ki wo jannat mein dakhil ho gaya aur jisne nafarmaani ki usne inkaar kiya". (Sahih Bukhari Kitabul Aetasaam bil Kitabis Sunnah)


ALLAH KI RAZA K LIYE JO SHAKS ROZAANA 12 RAKAAT NAMAZ (NAMAZ E FAJR SE QABL 2 RAKAAT, NAMAZ E ZUHAR SE QABAL 4 RAKAAT AUR BAAD MEIN 2 RAKAAT, NAMAZ E MAGHRIB K BAAD 2 RAKAAT AUR NAMAZ E ISHA K BAAD 2 RAKAAT SUNNAT) ADA KAREGA WO JANNAT MEIN JAYEGA

Hazrat Ummey Habeeba Razi Allahu Anha Rasool Akram Sallallahu Alaihi Wa Sallam ki zooja e Mohtarma se riwayat hai k unhone Rasool Allah Sallallahu Alaihi Wa Sallam ko farmate hue suna hai k "Jo shaks rozaana Allah ki raza k liye farzo k alawa 12 rakaat nawafil ada karta hai Allah ta'ala uske liye jannat mein ek ghar banata hai". (Sahih Muslim Kitabus Salatul Musafireen)


SILA REHMI KARNE WALE JANNAT MEIN JAYENGEY

Hazrat Abu Ayyub Razi Allahu Anhu kehte hai ek aadmi Nabi e Akram Sallallahu Alaihi Wa Sallam ki khidmat mein hazir hua aur arz kiya mujhe koi aesa amal bataiye jo mujhe jannat k kareeb aur jahannam se door karde Aap Sallallahu Alaihi Wa Sallam ne irshad farmaya "Allah ki bandagi kar aur uske saath kisi ko shareek na kar, namaz qayam kar, zakaat ada kar, raham walo se talluq qayam rakh" jab wo aadmi wapas palta to Rasool Allah Sallallahu Alaihi Wa Sallam ne farmaya "jin baato ka use hukm diya gaya hai agar un par amal kiya to jannat mein dakhil hoga". (Sahih Muslim Kitabul Emaan)


KHUSH AKHLAAQ, TAHAJJUD GUZAAR, KASRAT SE NAFLI ROOZEY RAKHNE WALE AUR DOOSRO KO KHANA KHILAAN WALE LOOG JANNAT MEIN JAYENGEY

Hazrat Ali Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jannat mein aese mehal hai jinke andar (khade ho) to bahar ki har cheez nazar aati hai aur bahar (khade ho) to andar ki har cheez nazar aati hai" ek aaraabi ne khade ho kar arz kiya "Ae Allah k Nabi Sallallahu Alaihi Wa Sallam! ye kis aadmi k liye hai?" Aap Sallallahu Alaihi Wa Sallam ne irshad farmaya "Uske liye hai jo acchi baat kare, khana khilaaye, ba-kasrat roozey rakkhey aur jab loog mazey ki neend soo rahe ho wo uth kar namaz padhey". (Sunan Tirmizi Abwabul Jannah)


AADIL HAKIM, DOOSRO PAR RAHAM KARNE WALA, NARAM DIL, PAKEEZAH AUR DOOSRO SE SAWAAL NA KARNE WALA BHI JANNAT MEIN JAYEGA

Hazrat Ayaaz bin Hamaar Mujashi'e Razi Allahu Anhu se riwayat hai k Rasool Allah Sallallahu Alaihi Wa Sallam ne ek rooz apne khutbey mein irshad farmaya "Jannat mein jaane wale teen qism k loog hai":
1. Hakim, insaaf karne wala, sach boolne wala aur naik kaamo ki tofeeq diya gaya
2. Wo shaks jo har qurabat-daar aur har musalmaan k liye meharbaan aur naram dil hai
3. Wo shaks jo paakdaman hai aur ayaal daari k ba-wajood kisi se sawal nahi karta. (Sahih Muslim Kitabul Jannah Wa Sifatun Naemaha)


ALLAH AUR USKE RASOOL SALALLAHU ALAIHI WA SALLAM PAR EMAAN LAANE MEIN KHUSHI MEHSOOS KARNE WALE AUR ISLAAM KO BARZA WA RAGBAT APNA DEEN SAMAJHANE WALE LOOG JANNAT MEIN JAYENGEY

Hazrat Abu Saeed Khudri Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jis shaks ne yu kaha "Mein Allah k rabb hone par, islaam k deen hone par aur Muhammad Sallallahu Alaihi Wa Sallam k Rasool hone par raazi hu" uske liye jannat wajib ho gayi". (Sunan Abu Dawood Abwabul Witr, baab fi astagfaar)


DO YA DO SE ZAAYED BAITIYO KI DEENI TALEEM WA TARBIYAT KARNE AUR JAWAAN HONE K BAAD NAIK AADMI SE NIKAH KARWANE WALA SHAKS JANNAT MEIN JAYEGA

Hazrat Anas bin Malik Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jisne do ladkiyo ko unke jawaan hone tak paala poosa qayamat k din mein aur wo is tarah aayengey aur Aap Sallallahu Alaihi Wa Sallam ne apni ungliyo ko aapas mein milaya". (Sahih Muslim Kitabul Birr wa Silah)


WUZU K BAAD DO RAKAAT NAFIL (TAHYATUL WUZU) BA-QAIDAGI SE ADA KARNE WALA SHAKS JANNAT MEIN JAYEGA

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne (ek rooz) namaz e fajr k baad Hazrat Bilaal Razi Allahu Anhu se pucha "Ae Bilaal! Islam laane k baad wo tumhara kaun sa amal hai jis par tumhey bakhshish ki ziyaada ummeed hai kyunki aaj raat mene jannat mein apne aagey aagey tumhare chalne ki aawaaz suni hai" Hazrat Bilaal Razi Allahu Anhu arz kiya "mein , is se ziyaada ummeed afza amal to koi nahi paata k din ya raat mein jab bhi wuzu karta hu to jitni Allah ta'ala ko manzoor ho namaz padh leta hu". (Mukhtasar Sahih Bukhari Hadees no. 1682)


NAMAZ ROOZEY KI PABAND, PAAKBAAZ AUR SHOHAR KI ITA'AT GUZAAR KHAWATEEN JANNAT MEIN JAYEGI

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jo aurat paanch namazey ada kare ramazaan k roozey rakkhey apni sharm-gaah ki hifazat kare aur apne shohar ki ita'at kare (qayamat k rooz) use kaha jayega jannat k (aatho) darwaazo mein se jis se chaho dakhil ho jao". (Sahih Ibne Hibban, Sahih Jamey Sageer Hadees no. 683)


ANBIYA, SHOHDA, AHLE EMAAN K FAUT HONE WALE CHOOTE BACCHEY AUR ZINDA DARGOOR KI GAYI LADKIYA JANNAT MEIN JAYENGI

Hazrat Hasna'e binte Muawiyah Razi Allahu Anha kehti hai hum se mere chacha ne ye hadees bayan ki k mene Nabi E Akram Sallallahu Alaihi Wa Sallam se daryaft kiya jannat mein kaun kaun jayega? Nabi E Akram Sallallahu Alaihi Wa Sallam ne irshad farmaya "Nabi jannat mein jayega, Shaheed jannat mein jayega, no-molood jannat mein jayega aur zinda dargoor ki gayi ladki jannat mein jayegi". (Sunan Abu Dawood Kitabul Jihaad)


ALLAH KI RAAH MEIN JIHAAD KARNE WALA JANNAT MEIN JAYENGEY

Hazrat Muaaz bin Jabal Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jis musalman aadmi ne Allah ki raah mein itni dair tak qitaal kiya jitni dair oonthni (camel) ka doodh doohne mein lagti hai, us par jannat wajib ho gayi". (Sunan Tirmizi Abwab Fazalul Jihaad)

To Be Continued......

JANNAT KI BASHARAT PAANE WALE LOOG

JANNAT KI BASHARAT PAANE WALE LOOG

Bismillahirrahmanirraheem

JANNAT MEIN SABSE PEHLE RASOOL E AKRAM SALLALLAHU ALAIHI WA SALLAM DAKHIL HONGEY

Hazrat Anas bin Malik Razi Allahu Anhu kehte hai Rasool Allah Sallallahu Alaihi Wa Sallam ne irshad farmaya "Qayamat k rooz mein (sabse pehle) jannat k darwaazzey par aayunga aur darwaaza khulwaunga jannat ka khazin (darwaaza khatkhatane par) poochega kaun hai?" mein jawab dunga "Muhammad (Sallallahu Alaihi Wa Sallam)!" khazin kahega "Mujhe isi baat ka hukm diya gaya tha k aapse pehle kisi k liye darwaaza na khoolu". (Sahih Muslim Kitabul Emaan)

Hazrat Anas bin Malik Razi Allahu Anhu kehte hai Rasool E Akram Sallallahu Alaihi Wa Sallam ne farmaya "Qayamat k rooz sabse ziyadah ummati mere hongey aur sabse pehle mein jannat ka darwaaza khatkhataunga". (Sahih Muslim Kitabul Emaan)


HAZRAT ABU BAKR SIDDEQUI RAZI ALLAHU ANHU AUR HAZRAT UMAR FAROOQ RAZI ALLAHU ANHU UN JANNATIYO K SARDAAR HONGEY JO DUNYA MEIN BUDHAPEY KI UMAR MEIN FAUT HUE HONGEY

Hazrat Ali bin Abu Talib Razi Allahu Anhu kehte hai mein Rasool Allah Sallallahu Alaihi Wa Sallam k saath tha achanak Hazrat Abu Bakr Razi Allahu Anhu aur Hazrat Umar Razi Allahu Anhu bhi aa gaye Rasool Allah Sallallahu Alaihi Wa Sallam ne farmaya "ye dono hazraat badi umar mein faut hoone wale musalmano k jannat mein sardaar hongey khawah agli ummato se ho ya pichli ummato se siwa e anbiya aur Rasoolo k, Ae Ali! unhey na bataana". (Sunan Tirmizi Abwabul Manaqib)


HAZRAT HASAN RAZI ALLAHU ANHU AUR HUSSAIN RAZI ALLAHU ANHU JANNAT MEIN UN LOOGO K SARDAAR HONGEY JO JAWANI KI UMAR MEIN FAUT HUE HONGEY

Hazrat Abu Saeed Razi Allahu Anhu kehte hai Rasool Allah Sallallahu Alaihi Wa Sallam ne farmaya "Hazrat Hasan Razi Allahu Anhu aur Hazrat Hussain Razi Allahu Anhu dono jannati nojawaano k sardaar hongey". (Sunan Tirmizi Abwabul Manaqib)


10 HAZRAAT KO RASOOL E AKRAM SALLALLAHU ALAIHI WA SALLAM NE DUNYA MEIN JANNATI HONE KI BASHARAT DI JINHEY ASHARAH E MUBASH'SHARAH KAHA JATA HAI UN K NAAM YE HAI

Hazrat Abdur Rahman bin Aaouf Razi Allahu Anhu kehte hai Rasool Allah Sallallahu Alaihi Wa Sallam ne farmaya "Abu Bakr Razi Allahu Anhu jannat mein hai, Umar Razi Allahu Anhu jannat mein hai, Usman Razi Allahu Anhu jannat mein hai, Ali Razi Allahu Anhu jannat mein hai, Talha Razi Allahu Anhu jannat mein hai, Zubair Razi Allahu Anhu jannat mein hai, Abdur Rahman bin Aaouf Razi Allahu Anhu jannat mein hai, Saad bin Abi Waqaas Razi Allahu Anhu jannat mein hai, Saeed bin Zaid Razi Allahu Anhu jannat mein hai, aur Abu Ubaidah bin Jarrah Razi Allahu Anhu jannat mein hai". (Sunan Tirmizi Abwabul Manaqib)


HAZRAT KHADEEJA RAZI ALLAHU ANHA KO NABI E AKRAM SALLALLAHU ALAIHI WA SALLAM NE JANANT MEIN GHAR KI BASHARAT DI

Hazrat Ayesha Razi Allahu Anha farmati hai Rasool E Akram Sallallahu Alaihi Wa Sallam ne Hazrat Khadeeja Razi Allahu Anha ko jannat mein ek ghar ki basharat di. (Sahih Muslim Kitabul Faza'il)


HAZRAT AYESHA RAZI ALLAHU ANHA KO RASOOL E AKRAM SALLALLAHU ALAIHI WA SALLAM NE JANNAT KI BASHARAT DI

Hazrat Ayesha Razi Allahu Anha se riwayat hai k Nabi E Akram Sallallahu Alaihi Wa Sallam ne farmaya "Ayesha! kya tu is baat par raazi nahi k dunya aur aakhirat mein tum meri beewi raho?" Hazrat Ayesha Razi Allahu Anha ne arz kiya "Kyu nahi" Aap Sallallahu Alaihi Wa Sallam ne irshad farmaya "Tum dunya aur aakhirat mein meri beewi ho". (Mustadrak E Haakim, Silsila Ahadees E Saheeya Hadees no. 1147)


HAZRAT UMMEY SALEEM RAZI ALLAHU ANHA (ZOJA E HAZRAT ABU TALHA RAZI ALLAHU ANHU) KO NABI E AKRAM SALLALLAHU ALAIHI WA SALLAM NE JANNAT KI BASHARAT DI
HAZRAT BILAAL RAZI ALLAHU ANHU KO RASOOL ALLAH SALLALLAHU ALAIHI WA SALLAM NE JANNAT KI BASHARAT DI

Hazrat Jabir Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Mujhe jannat dikhlaayi gayi mene waha Abu Talha Razi Allahu Anhu ki beewi (Ummey Saleem Razi Allahu Anha) ko dekha phir apne aagey aagey kisi k chalne ki aawaaz suni dekha to Bilaal Razi Allahu Anhu they". (Sahih Muslim Kitabul Faza'il)


HAZRAT UMAR BIN KHATTAB RAZI ALLAHU ANHU KO RASOOL E AKRAM SALLALLAHU ALAIHI WA SALLAM NE JANNAT MEIN MAHAL KI BASHARAT DI

Hazrat Abu Hurairah Razi Allahu Anhu kehte hai hum Nabi E Akram Sallallahu Alaihi Wa Sallam ki khidmat mein hazir they Aap Sallallahu Alaihi Wa Sallam ne irshad farmaya "Mein soo raha tha k mene apne Aapko jannat mein paaya mene ek mehal k andar kooney mein ek aurat ko wuzu karte dekha to pucha ye mehal kiska hai?" unhoney kaha "Umar bin Khattab Razi Allahu Anhu ka, mujhe Umar Razi Allahu Anhu ki gairat ka khayaal aaya to mein peeth pher kar chala aaya" Hazrat Umar Razi Allahu Anhu (ye sun kar) rooney lagey arz kiya "Ya Rasool Allah Sallallahu Alaihi Wa Sallam kya mein aap par gairat karunga?". (Sahih Bukhari Kitabul Bad ul Khalk)


HAZRAT TALHA BIN UBAIDULLAH RAZI ALLAHU ANHU KO RASOOL ALLAH SALLALLAHU ALAIHI WA SALLAM NE JANNAT KI BASHARAT DI

Hazrat Zubair Razi Allahu Anhu kehte hai k jang e uhad k rooz Nabi E Akram Sallallahu Alaihi Wa Sallam do zirhey pehle hue they Aap Sallallahu Alaihi Wa Sallam ek patthar par chadne lage to na chadh sake chunanchey
Talha Razi Allahu Anhu ko bithaya aur un par pao rakh kar chattan par chadh gaye, Hazrat Zubair Razi Allahu Anhu kehte hai (us waqt) mene Nabi E Akram Sallallahu Alaihi Wa Sallam ko farmate hue suna "Talha par (jannat) wajib ho gayi". (Sunan Tirmizi Abwabul Manaqib)


HAZRAT SAAD BIN MUAAZ RAZI ALLAHU ANHU JANNATI HAI

Hazrat Bara bin Aajib Razi Allahu Anhu kehte hai Rasool E Akram Sallallahu Alaihi Wa Sallam ki khidmat mein ek raishmi kapda laya gaya loogo ne uski nafasat aur narmi par tajjub ka izhaar kiya to Rasool Allah Sallallahu Alaihi Wa Sallam ne farmaya "Jannat mein Saad bin Muaaz k rumaal is se afzal hai". (Sahih Bukhari Kitabul Bad ul Khalk)


AS'HAAB E BADR AUR AS'HAAB E SHAJR JANNATI HAI

Hazrat Jabir Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jang e badr aur Sulah Hudaibiya mein shamil hone wale loogo mein se koi bhi aagh mein nahi jayega". (Musnad Ahmad, Silsila Ahadees E Saheeya Hadees no. 2160)

Wazahat: Sulah hudaibiya (zil qaada 6 hijri) se qabl Sahaba E Kiraam Razi Allahu Anhum ne hudaibiya k ek darakht k nichey Rasool E Akram Sallallahu Alaihi Wa Sallam k dast e mubarak par jaaney qurbaan karne k liye bait ki thi un tamaam As'haab e Rasool Sallallahu Alaihi Wa Sallam ko As'haab e shajr kaha jata hai.


HAZRAT ABDULLAH BIN SALAAM RAZI ALLAHU ANHU KO NABI E AKRAM SALLALLAHU ALAIHI WA SALLAM NE JANANT KI BASHARAT DI

Hazrat Saad Razi Allahu Anhu kehte hai mene Rasool Allah Sallallahu Alaihi Wa Sallam ko kisi zindah chalte phirte aadmi k baare mein jannati kehte nahi suna siwaaye Abdullah bin Salaam Razi Allahu Anhu k. (Sahih Muslim Kitabul Manaqib)

Wazahat: Hazrat Saad Razi Allahu Anhu ne sirf Hazrat Abdullah bin Salaam k baare mein hi ye basharat suni lihaza unhi k baare mein gawahi di lekin daigar Sahaba E Kiraam Razi Allahu Anhum ne Rasool Allah Sallallahu Alaihi Wa Sallam se doosre Sahaba E Kiraam Razi Allahu Anhum k baare mein basharatey riwayat ki hai.


HAZRAT MARYAM BINTEY IMRAN RAZI ALLAHU ANHA, HAZRAT FATIHA RAZI ALLAHU ANHA (BINTEY HAZRAT MUHAMMAD SALLALLAHU ALAIHI WA SALLAM), HAZRAT KHADEEJA RAZI ALLAHU ANHA (ZOJA E HAZRAT MUHAMMAD SALLALLAHU ALAIHI WA SALLAM) AUR HAZRAT AASIYA RAZI ALLAHU ANHA (ZOJA E FIROON) JANNATI KHAWATEEN KI SARDAAR HAI

Hazrat Jabir Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jannati khawateen ki sardaar Maryam bintey Imran Razi Allahu Anha k baad Hazrat Fatima Razi Allahu Anha, Hazrat Khadeeja Razi Allahu Anha aur Hazrat Aasiya Razi Allahu Anhu Anha firoon ki beewi hai". (Tabraani, Silsila Ahadees E Saheeya Hadees no. 1434)


HAZRAT ZAID BIN UMAR RAZI ALLAHU ANHU JANNATI HAI

Hazrat Ayesha Razi Allahu Anha se riwayat hai k Rasool E Akram Sallallahu Alaihi Wa Sallam ne farmaya "Mein jannat mein dakhil hua to Zaid bin Umar bin Nafeel k do darje dekhey". (Ibne Asakir, Silsila Ahadees E Saheeya Hadees no. 1406)


HAZRAT ABDULLAH BIN UMAR BIN HARAAM RAZI ALLAHU ANHU JANNATI HAI

Hazrat Jabir Razi Allahu Anhu kehte hai k Uhad k din jab Abdullah bin Haraam Razi Allahu Anhu Shaheed hue to Rasool Allah Sallallahu Alaihi Wa Sallam ne farmaya "Ae Jabir! kya mein tujhe wo baat na batau jo Allah ta'ala ne tumhare baap se ki hai?" mene arz kiya "Kyu nahi" Aap Sallallahu Alaihi Wa Sallam ne irshad farmaya "Allah ta'ala ne kisi shaks se bagair hijaab k baat nahi farmayi lekin tere baap se bagair hijaab k (yaani baraah e raast) guftagu farmayi hai aur kaha hai ae mere bande jo chahte ho maango mein tumhey dunga" tumhare baap ne arz kiya "ae mere rabb! mujhe dobara zindah farma takey mein dobarah teri raah mein mara jau" Allah ta'ala ne irshad farmaya "ye baat to hamari taraf se pehle hi tey ho chuki hai k marne k baad dunya mein wapsi nahi hogi" tere baap ne arz kiya "Ae mere rabb! accha to meri taraf se (ahle dunya ko) mera ye paigham (yaani dobarah zindah ho kar shaheed hone ki tamanna karna) pahucha de" tab Allah ta'ala ne ye Aayat nazil farmayi "jo loog Allah ki raah mein qatal ho jaye unhey murdah na kaho, balkey wo zindah hai aur apne rabb k han rizq diye jaate hai (Surah Aal E Imraan Surah no. 3 Ayat no. 169)". (Sahih Sunan Ibne Maja Hadees no. 2258)


HAZRAT AMMAAR BIN YAASIR AUR HAZRAT SALMAN FAARSI RAZI ALLAHU ANHUM JANNATI HAI

Hazrat Anas Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jannat teen aadmiyo ka shoonq rakhti hai Hazrat Ali, Hazrat Ammaar aur Hazrat Salmaan Faarsi Razi Allahu Aanhum". (Mustadrak E Haakim, Sahih Jamey Sageer Hadees no. 1594)


HAZRAT JAFAR BIN ABU TALIB RAZI ALLAHU ANHU AUR HAZRAT HAMZA RAZI ALLAHU ANHU JANNAT MEIN HAI

Hazrat Abdullah bin Abbas Razi Allahu Anhu kehte hai Rasool Allah Sallallahu Alaihi Wa Sallam ne farmaya "Mein kal raat jannat mein dakhil hua aur us mein dekha k Jafar Razi Allahu Anhu farishto k saath udh rahe hai aur Hamza Razi Allahu Anhu takhat par takiya lagaaye baithey hai". (Tabraani, Sahih Jamey Sageer Hadees no. 3358)


HAZRAT ZAID BIN HAARSA RAZI ALLAHU ANHU JANNATI HAI

Hazrat Bureedah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Mein jannat mein dakhil hua to ek nojawaan dosheezah ne mera istaqbaal kiya mene us se pucha tu kis k liye hai? kehne lagi Zaid bin Haarsa k liye". (Ibne Asakir, Sahih Jamey Sageer Hadees no. 3361)


GUMEESA BINTEY MILHAAN RAZI ALLAHU ANHA JANNATI HAI

Hazrat Anas Razi Allahu Anhu kehte hai Rasool Allah Sallallahu Alaihi Wa Sallam ne farmaya "Mein jannat mein dakhil hua to apne aagey kisi k chalne ki aawaaz suni mene pucha ye aawaaz kesi hai? mujhe bataya gaya k ye Gumeesa binte Milhaan Razi Allahu Anha hai". (Musnad Ahmad, Sahih Jamey Sageer Hadees no. 3362)

Wazahat: Yaad rahe Hazrat Gumeesa binte Milhaan Razi Allahu Anha k shohar aur baita gazwa e uhad mein shaheed hue unke bhai Haraam bin Milhaan Razi Allahu Anhu haadsha bare maoona mein shaheed hue aur khud jazeerah e qabras ki taskheer k baad wapas aane wale jihaadi lashkar mein shamil thi k doraan e safar mein Allah ko piyaari ho gayi (INNA ILLAHI WA INNAA ILAIHI RAAJI'OON)


HAZRAT HAARSA BIN NOMAAN RAZI ALLAHU ANHU JANNATI HAI

Hazrat Ayesha Razi Allahu Anha kehti hai Rasool Allah Sallallahu Alaihi Wa Sallam ne farmaya "Mein jannat mein dakhil hua to quraat ki aawaaz suni mene pucha ye kaun hai?" farishto ne jawab diya "Haarsa bin Noman (Aap Sallallahu Alaihi Wa Sallam ne ye sun kar farmaya) "Naiki ka ajr to yahi hai naiki ka sawab to aesa hi hota hai". (Mustadrak E Haakim, Sahih Jamey Sageer Hadees no. 3363)

MAKKA MUKARRAMA SE MADEENA MUNAWWARAH HIJRAT KARNE WALO KO RASOOL E AKRAM SALLALLAHU ALAIHI WA SALLAM NE JANNAT KI BASHARAT DI HAI

Hazrat Abdullah bin Umar Razi Allahu Anhu kehte hai Rasool Allah Sallallahu Alaihi Wa Sallam ne farmaya "Kya tum jaante ho meri ummat mein se konsa garooh sab se pehle jannat mein dakhil hoga?" mene arz kiya "Allah aur uska Rasool hi behtar jaante hai" Aap Sallallahu Alaihi Wa Sallam ne irshad farmaya "Muhajir loog (makka se madeena hijrat karne wale) qayamat k rooz jannat k darwaazey par ayengey to darwaazah khola jayega, jannat ka khazin unse puchega kya tumhara hisaab ho gaya hai? wo jawab dengey hisaab kis cheez ka? hamari talwaarey Allah ki raah mein hamare kandho par thi aur is halat mein hamey maut aa gayi, chunanchey jannat ka darwaazah unke liye khool diya jayega aur wo doosre loogo k jannat mein dakhil hone se chalees saal pehle jannat mein ja kar mazey karengey". (Mustadrak E Haakim, Silsila Ahadees E Saheeya Hadees no. 852)

Wazahat: Tirmizi Shareef ki hadees mein paanch soo saal baad jannat mein dakhil hone ka zikr hai, ye fark loogo k aamaal ki bunyaad paar hoga. (Wallahu Aalam bis Sawaab)


HAZRAT IBNE DAHDAAH RAZI ALLAHU ANHU JANNAT MEIN HAI

Hazrat Jabir bin Samurah Razi Allahu Anhu kehte hai Rasool Allah Sallallahu Alaihi Wa Sallam ne ibne Dahdaah Razi Allahu Anhu ki namaz e janazah padhayi phir Aap Sallallahu Alaihi Wa Sallam k paas ek nangi peeth wala ghooda laya gaya aur usko ek shaks ne pakda, Aap Sallallahu Alaihi Wa Sallam us par sawaar hue wo ghooda bidakta tha hum sab Aap Sallallahu Alaihi Wa Sallam k pichey pichey doodh rahe they k loogo mein se ek shaks ne kaha Nabi E Akram Sallallahu Alaihi Wa Sallam ne farmaya "Ibne Dahdaah Razi Allahu Anhu k liye jannat mein kitne hi, (phalo k) khoshey latke hue hai". (Sahih Muslim Kitabul Jana'iz)


UMMUL MOMINEEN HAZRAT HAFSA RAZI ALLAHU ANHA JANNATI HAI

Hazrat Anas Razi Allahu Anhu kehte hai Rasool Allah Sallallahu Alaihi Wa Sallam ne farmaya "Hazrat Jibraeel Alaihis Salaam ne (mujhey) kaha k Aap Hazrat Hafsa Razi Allahu Anha se ruju kare kyunki wo bahut ziyaadah roozey rakhne wali bahut ziyaadah qayaam karne wali hai aur jannat mein aapki beewi hai". (Mustadrak E Haakim, Sahih Jamey Sagir Hadees no. 4727)

Wazahat: Yaad rahe Aap Sallallahu Alaihi Wa Sallam ne Hazrat Hafsa Razi Allahu Anha ko raji'e talaaq di thi aur Allah ta'ala k hukm par ruju farma liya tha.


HAZRAT AKAASA RAZI ALLAHU NAHU JANNATI HAI

Hazrat Imran bin Hussain Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Meri ummat mein se sattar hazaar aadmi bagair hisaab jannat mein jayengey" Sahaba e Kiraam Razi Allahu Anhum ne arz kiya "Ya Rasool Allah Sallallahu Alaihi Wa Sallam! wo kaun (khush naseeb) loog hongey?" Aap Sallallahu Alaihi Wa Sallam ne irshad farmaya "ye wo loog hongey jo na damm karate hai na shagon lete hai na daagh lagaate hai aur sirf apne rabb par tawakkal karte hai" Hazrat Ukasa Razi Allahu Anhu khade hue aur arz kiya "Ae Allah k Nabi Sallallahu Alaihi Wa Sallam! dua farmaiye Allah mujhey unme se karde, Aap Sallallahu Alaihi Wa Sallam ne irshad farmaya tu unme se hai". (Sahih Muslim Kitabul Emaan)

JANNAT MEIN LE JAANE WALE AAMAAL MASHAKKAT TALAB HAI

JANNAT MEIN LE JAANE WALE AAMAAL MASHAKKAT TALAB HAI

Bismillahirrahmanirraheem

JANNAT BOJHAL MASHAKKAT TALAB AUR INSAANI MIZAAJ PAR GIRAAH GUZARNE WALE AAMAAL SE DHAANPI GAYI HAI

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jab Allah ta'ala ne jannat aur jahannam paida farmayi to Hazrat Jibraeel Alaihis Salaam ko jannat ki taraf bheja aur farmaya (jao aur) jannat ka nazaarah karo aur jo naimatey mene jannatiyo k liye paida ki hai unhey dekho, Jibraeel Alaihis Salaam aaye jannat aur jannatiyo k liye paida ki gayi naimatey dekhi phir Allah ta'ala ki khidmat mein hazir hue aur arz kiya teri izzat ki qasam jo bhi uske baare mein sunega wo zaroor usme dakhil hoga phir Allah ta'ala ne (farishto ko) hukm diya k jannat ko mushkilaat aur masa'ib se dhaanp diya jaye tab Allah ta'ala ne Hazrat Jibraeel Alaihis Salaam ko (dobaarah) hukm diya k phir jao jannat aur jannatiyo k liye mene jo naimatey tayyar ki hai unhey dekho Hazrat Jibraeel Alaihis Salaam gaye to jannat mushkilaat aur masa'ib se dhaanpi hui thi chunanchey Allah ta'ala ki baargaah mein hazir hue aur arz kiya teri izzat ki qasam! mujhe darr hai k isme koi bhi dakhil nahi ho sakega, phir Allah ne hukm diya ab jahannam ki taraf jao aur use dekho aur jo azaab mene jahannamiyo k liye tayyar kiye hai unhey dekho k (kis tarah) uska ek hissa doosre par sawaar hai, Hazrat Jibraeel Alaihis Salaam (sab kuch dekh kar) wapas lootey to arz kiya teri izzat ki qasam! koi shaks aesa nahi hoga jo iske baare mein sune aur phir usme dakhil ho, Allah ta'ala ne hukm diya aur jahannam ko shahwaat aur lazzaat se dhaamp diya gaya tab Allah ta'ala ne Hazrat Jibraeel Alaihis Salaam se farmaya dobara jao Hazrat Jibraeel Alaihis Salaam dobara gaye (sab kuch dekha) aur arz kiya gaya teri izzat ki qasam! mujhe darr hai k ab to is se koi bhi bach nahi payega har koi isme dakhil hoga". (Sunan Tirmizi Abwabul Sifatul Jahannam)

Hazrat Anas bin Malik Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jannat nagawaar cheezo se ghairi gayi hai aur jahannam khushgawaar cheezo se ghairi gayi hai". (Sahih Muslim Kitabul Jannah wa Sifatun Naemaha)


JANNAT HASIL KARNE K LIYE SAKHT JADDO JAHAD AUR MEHNAT KI ZAROORAT HAI

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jo dara wo bhaga aur jo bhaga wo manzil ko pahuncha, suno, Allah ka maal bahut mehnga hai khabardaar Allah ka maal jannat hai". (Sunan Tirmizi Abwabul Sifatul Qayamaah)


NAIMATO BHARI JANNAT CHAHNE WALA SHAKS DUNYA MEIN KABHI CHAIN KI NEEND NAHI SOO SAKTA

Hazrat Abu Hurairah Razi Allahu Anhu kehte hai Rasool E Akram Sallallahu Alaihi Wa Sallam ne farmaya "Mene Jahannam se bhaagne wale kisi shaks ko sootey hue nahi dekha aur na hi jannat k kisi khawahish mand ko sootey hue dekha hai". (Sunan Tirmizi Abwabul Sifatul Jahannam)


AAKHIRAT MEIN INAAM WA IKRAAM HASIL KARNE WALE AAMAAL DUNYA K AETABAAR SE KADVEY KARAILE HAI

Hazrat Abu Malik Ash'ari Razi Allahu Anhu kehte hai mene Rasool Allah Sallallahu Alaihi Wa Sallam ko farmate hau suna hai k "Dunay ki mithaas aakhirat ki kadwahat hai aur dunya ki kadwahat aakhirat ki mithaas hai". (Mustadrat E Haakim, Musnad Ahmad, Sahih Jamey Sageer Juzz E Saani)


MOMIN K LIYE DUNYA QAID-KHANA HAI

Hazrat Abu Hurairah Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Dunya momin k liye qaid-khana hai aur kafir k liye jannat hai". (Sahih Muslim Kitabuz Zahad)

JANNAT MEIN UMMAT E MUHAMMADIYA S.A.W.S KI KASRAT

JANNAT MEIN UMMAT E MUHAMMADIYA S.A.W.S KI KASRAT

Bismillahirrahmanirraheem

JANNAT MEIN DO TIHAAYI TADAAD UMMAT E MUHAMMADIYA SALLALLAHU ALAIHI WA SALLAM KI HOGI BAAQI EK TIHAAYI TADAAD TAMAAM ANBIYA KI UMMATO SE HOGI

Hazrat Bureedah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jannatiyo ki 120 qataarey hongi jinme se 80 qataarey is ummat (muhammadiya) ki hongi aur 40 qataarey baaqi ummato se". (Sunan Tirmizi Abwabul Jannah)


AHLE JANNAT MEIN SE AADHI TADAAD UMMAT E MUHAMMADIYA SALLALLAHU ALAIHI WA SALLAM SE HOGI

Hazrat Abdullah bin Mas'ood Razi Allahu Anhu kehte hai Rasool Allah Sallallahu Alaihi Wa Sallam ne hamey irshad farmaya "Kya tum is baat par khush nahi ho k ahle jannat mein se ek chothaayi tum mein se hongey" ye sun kar humne (khushi se) Allahu Akbar kaha phir Aap Sallallahu Alaihi Wa Sallam ne irshad farmaya "Kya tum is baat se khush nahi ho k Ahle jannat mein se tihaayi tadaad tumhari ho?" humne phir (khushi se) Allahu Akbar kaha, phir Aap Sallallahu Alaihi Wa Sallam ne irshad farmaya "Mujhe ummeed hai k ahle jannat mein se aadhey tum hongey aur uski wajah ye hai jo mein bayan kar raha hu k musalmano ki tadaad kafiro k muqabiley mein aesi hai jese siyaah bael k jism par ek safaid baal ya safaid bael k jism par ek siyaah baal". (Sahih Muslim Kitabul Emaan)

Wazahat: Pehli hadees mein Rasool Allah Sallallahu Alaihi Wa Sallam ne ahle jannat mein se do tihaayi tadaad ummat e muhammadiya Sallallahu Alaihi Wa Sallam ki batlaayi hai jabke doosri hadees mein aadhi tadaad, dono hadeeso se jannat mein ummat e muhammadiya Sallallahu Alaihi Wa Sallam ki kasrat e tadaad sabit karna matloob hai. (Wallahu Aalam bis Sawaab)


UMMAT E MUHAMMADIYA SALLALLAHU ALAIHI WA SALLAM K SATTAR HAZAAR IFRAAD BILA HISAAB WA AZAAB JANNAT MEIN DAKHIL HONGEY
HAR HAZAAR PAR MAZEED SATTAR HAZAAR (CHALEES LAKH IFRAAD) BHI UMMAT E MUHAMMADIYA SALLALLAHU ALAIHI WA SALLAM SE JANNAT MEIN DAKHIL HONGEY
INKE ALAWA ALLAH TA'ALA K TEEN BHAREY HUE LAP (JINKI TADAAD ALLAH TA'ALA HI JAANTE HAI) BHI UMMAT E MUHAMMADIYA SALLALLAHU ALAIHI WA SALLAM SE JANNAT MEIN JAYENGEY

Hazrat Abu Umama Razi Allahu Anhu kehte hai mene Rasool Allah Sallallahu Alaihi Wa Sallam ko farmate hue suna hai k "mere rabb ne mere saath wada kiya hai k meri ummat se sattar hazaar ifraad ko wo bila hisaab aur azaab jannat mein dakhil farmayega aur har hazaar k saath (mazeed) sattar hazaar aadmi jannat mein dakhil farmayega aur teen lap bhare hue mere rabb k aur bhi jannat mein dakhil hongey". (Sunan Tirmizi Abwabus Sifatul Qiyamaah)

Hazrat Imran bin Hussain Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Meri ummat mein se sattar hazaar aadmi bagair hisaab jannat mein jayengey" Sahaba e Kiraam Razi Allahu Anhum ne arz kiya "Ya Rasool Allah Sallallahu Alaihi Wa Sallam! wo kaun (khush naseeb) loog hongey?" Aap Sallallahu Alaihi Wa Sallam ne irshad farmaya "ye wo loog hongey jo na damm karate hai na shagon lete hai na daagh lagaate hai aur sirf apne rabb par tawakkal karte hai" Hazrat Ukasa Razi Allahu Anhu khade hue aur arz kiya "Ae Allah k Nabi Sallallahu Alaihi Wa Sallam! dua farmaiye Allah mujhey unme se karde, Aap Sallallahu Alaihi Wa Sallam ne irshad farmaya tu unme se hai". (Sahih Muslim Kitabul Emaan)

Hazrat Abdullah bin Abbas Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Mere saamne mukhtalif ummato k loog laaye gaye baaz nabi aese they jinke saath das ifraad se bhi kam loog they baaz nabiyo k saath ek ya do hi aadmi they aur koi nabi aesa tha jiske saath koi bhi nahi tha itne mein mere saamne ek badi ummat aayi mein ye samjha k ye meri ummat hai mujhe kaha gaya ye moosa Alaihis Salaam aur unki ummat hai Aap aasmaan k kinaare ki taraf dekhey mene dekha to waha bhi ek badi jamaat thi phir mujhey kaha gaya ab aasmaan k doosre kinaare ki taraf dekhey mene dekha to ek bahut badi jamaat paayi mujhey bataya gaya ye aapki ummat hai jisme se sattar hazaar ifraad bagair hisaab aur azaab k jannat mein dakhil hongey". (Sahih Muslim Kitabul Emaan)