SUTRAH KA BAYAN

SUTRAH KA BAYAN

Bismillahirrahmanirraheem

Yaha sutrah se muraad wo cheez hai jise namazi apne aagey khada karke namaz padhta hai takey uske aagey se guzarne wala sutrah k aagey se guzar jaye aur gunah-gaar na ho, ye sutrah laathi, barchi, lakdi, diwaar, satoon aur darakht se hota hai aur imam ka sutrah sab muqtadiyo k liye kaafi hota hai.

Hazrat Talha bin Ubaidullah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jab koi shaks apne saamne paalaan ki pichli lakdi k barabar (koi cheez) rakh le to namaz jaari rakkhey aur jo koi sutrey k pichey se guzrey uski parwah na kare". (Sahih Muslim Kitabus Salaat Hadees no. 499)

Hazrat Ata Rahimahullah farmate hai k paalaan k pichley hissey ki lakdi ek haath ya us se kuch ziyaadah (lambi) hoti hai. (Abu Dawood Kitabus Salaat Hadees no. 686, ise Ibne Khuzaima Hadees no. 807 ne sahih kaha)

Maloom hua k kam az kam ek haath lambi lakdi ya koi aur cheez sutrah ban sakti hai.

Hazrat Abu Huzaifa Razi Allahu Anhu se riwayat hai k Rasool Allah Sallallahu Alaihi Wa Sallam ne Batha (ek muqaam ka naam hai) mein loogo ko namaz padhaayi, Nabi Rahmat Sallallahu Alaihi Wa Sallam k saamne ek barchi nasb thi, aapne do rakaat zuhar ki namaz padhaayi aur do rakaat asar ki, us waqt barchi ki doosri taraf auratey aur gadhey chale ja rahey they. (Sahih Bukhari Kitabus Salaat Hadees no. 495, Sahih Muslim Kitabus Salaat Hadees no. 503)

NAMAZI K AAGEY SE GUZARNE KA GUNAH:

Rasool Allah Sallallahu Alaihi Wa Sallam ne farmaya "Agar namazi k saamne se guzarne wale ko guzarne ki saza maloom ho jaye to usey ek qadam aagey badhne ki bajaaye chalees tak wahi khade rehna pasand ho, Abu Nazar ne kaha k mujhe yaad nahi raha k Basar bin Saeed ne chalees din kahe ya chalees maheeney ya chalees saal". (Sahih Bukhari Kitabus Salaat Hadees no. 510, Sahih Muslim Kitabus Salaat Hadees no. 507)

Rasool Allah Sallallahu Alaihi Wa Sallam ne farmaya "Tum namaz ada karte waqt aagey sutrah khada karo aur agar koi shaks sutrah k andar (yaani namazi aur sutrah k darmiyaan) se guzarna chaahey to uski muzahamat karo aur usey aagey se na guzarne do, agar wo naa maane to us se ladaayi karo, beshak wo shaitan hai". (Sahih Bukhari Kitabus Salaat Hadees no. 509, Sahih Muslim Hadees no. 505)

Ek riwayat mein hai k do baar to usey haath se roko agar wo na rukey to us se haatha-paayi se bhi guraiz na kiya jaye (kyunki) wo shaitan hai. (Sahih Ibne Khuzaima Hadees no. 808, ise ibne Khuzaima ne sahih kaha)

Nabi Rahmat Sallallahu Alaihi Wa Sallam sutrah aur apne darmiyaan mein se kisi cheez ko guzarne na dete they, ek dafa Aap Sallallahu Alaihi Wa Sallam namaz ada farma rahe they k ek bakri dodati (bhaagti) hui aayi aur aapke aagey se guzarna chahti thi, aapne apna batan mubarak diwar k saamne laga diya to bakri ko sutrah k pichey se guzarna pada. (Sahih Ibne Khuzaima Hadees no. 827, Hakim aur Zahbi ne sahih kaha)

Rasool Allah Sallallahu Alaihi Wa Sallam ki jaa-namaz aur diwar k darmiyaan ek bakri k guzarne ka faasla hota tha. (Sahih Bukhari Kitabus Salaat Hadees no. 496, Sahih Muslim Hadees no. 508)

Rasool Allah Sallallahu Alaihi Wa Sallam ne farmaya "Agar namazi k aagey ounth k palaan ki pichli lakdi jitna lamba sutrah na ho aur baaligh aurat, gadha ya siyaah kutta aagey se guzar jaaye to namaz toot jati hai, aur siyaah kutta shaitan hai". (Sahih Muslim Kitabus Salaat Hadees no. 510)

Hazrat Ayesha Siddiqa Razi Allahu Anha se riwayat hai k mein Rasool Allah Sallallahu Alaihi Wa Sallam k aagey sooti thi, mere paao aapke saamne hotey they, jab aap sajdah karte to mein apne paao samait leti aur jis waqt aap khade hote to pao phela deti, un dino gharo mein chiraag nahi hote they. (Sahih Bukhari Kitabus Salaat Hadees no. 513, Sahih Muslim Kitabus Salaat Hadees no. 512)

Maloom hua k guzarna to mana hai lekin aagey koi laita ho to koi harj nahi.

AHKAAM E QIBLAH

AHKAAM E QIBLAH

Bismillahirrahmanirraheem

Allah ta'ala ne farmaya "Apna chehrah (namaz k liye) masjid e Haraam ki taraf phair lo". (Surah Baqarah Surah no. 2 Ayat no. 144)

Jab farz namaz ada karna maqsood hota to Rasool Allah Sallallahu Alaihi Wa Sallam sawari se utartey aur qiblah rukh khade ho jate. (Sahih Bukhari Kitabut Taqseerus Salaat Hadees no. 1099)

Qiblah k baare mein Nabi E Akram Sallallahu Alaihi Wa Sallam ka irshaad hai "Mashriq aur magrib k darmiyaan (junoob ki taraf) tamaam simt qiblah hai". (Tirmizi Kitabus Salaat Hadees no. 343, Is hadees ko imam Tirmizi ne hasan sahih kaha)

Madeena se  kaaba junoob ki taraf hai is liye aapne mashriq wa magrib k darmiyaan qiblah ka taeyn farmaya hamare liye pakistan aur hindustan mein shimal aur junoob k darmiyaan magrib ki taraf tamaam simt qiblah hai, takey ummat tangi mein mubtala na ho, albatta qiblah ki simt ka yaqeeni ilm ho jaane k baad qiblah rukh hona zaroori hai.

Nabi Rahmat Sallallahu Alaihi Wa Sallam doraan e safar farzo k alawa raat ki namaz apni sawari par ishaarey se padhte they jis taraf sawari ka rukh hota udhar hi aapka muh hota tha, aur sawari par hi witr padhte they. (Sahih Bukhari Kitabul Witr Hadees no. 1000, Sahih Muslim Kitabus Salatul Musafireen Hadees no. 700)

Aur kabhi Nabi Rahmat Sallallahu Alaihi Wa Sallam ka ye mamool bhi dekhne mein aata k jab uthni par nawafil ada karne ka iraadah farmate to uthni ka muh qiblah rukh karte aur takbeer e tehrima keh kar namaz shuru farma dete uske baad nawafil ada farmate rehte jis taraf bhi sawari ka rukh hota. (Abu Dawood Kitabus Salatus Safar Hadees no. 1225, ise Ibne Asakir ne sahih aur Munzari ne hasan kaha)

Is soorat mein Aap Sallallahu Alaihi Wa Sallam ruku aur sajdah sar k ishaarey se karte albatta sajdah ki halat mein ruku ki nisbat sar ko jayada jhuka lete. (Tirmizi Kitabus Salat Hadees no. 351, ise Imam Tirmizi ne hasan kaha)

Qiblah ki janib qabr hoone ki soorat mein waha se hat kar namaz ada karni chahiye, Aap Sallallahu Alaihi Wa Sallam ne farmaya "Qabro ki janib muh karke namaz ada na karo aur na qabro par baitho". (Sahih Muslim Kitabul Janaiz Hadees no. 972)

Agar koi namazi gair qiblah ki taraf muh karke namaz padh raha ho aur usey koi namaz ki halat mein sahih qibla ki ittalaah de to usey namaz hi mein apna rukh badal lena chahiye.

Hazrat Bara bin Aazib Razi Allahu Anhu se riwayat hai k Rasool Allah Sallallahu Alaihi Wa Sallam ne Baitul Maqdas ki taraf 16 ya 17 maheeney tak namazey padhi phir Allah ta'ala ne kaaba ki taraf muh karne ka hukm diya, ek shaks ne Rasool Allah Sallallahu Alaihi Wa Sallam k pichey (kaaba ki taraf muh karke) namaz padhi phir usne ansaar k kuch loogo ko asar ki namaz baitul maqdas ki taraf padhte hue dekha to kaha mein gawahi deta hu k mene Rasool Allah Sallallahu Alaihi Wa Sallam k pichey kaaba ki taraf muh karke namaz padhi ye sun kar wo loog (namaz hi mein) kaaba ki taraf ghoom gaye. (Sahih Bukhari Hadees no. 399)

AZAAN AUR IQAMAT K MASA'IL

AZAAN AUR IQAMAT K MASA'IL

Bismillahirrahmanirraheem

1. Har namaz k liye Azaan deni chahiye: Rasool Allah Sallallahu Alaihi Wa Sallam ne farmaya "Jab namaz ka waqt aaye to tum mein se koi ek azaan kahe, aur tum mein se bada imamat karaaye". (Sahih Bukhari Kitabul Azaan Hadees no. 628, Sahih Muslim Kitabul Masajid Hadees no. 674)

2. Hazrat Bilal Razi Allahu Anhu azaan kehte hue kaano mein ungliya daalte they. (Sahih Bukhari Kitabul Azaan, Tirmizi Kitabus Salaat Hadees no. 197)

3. Hazrat Bilal Razi Allahu Anhu "HAIYYA ALAS SALAAH" kehte hue muh daayi janib phair lete they aur "HAIYYA ALAL FALAAH" kehte waqt baayi taraf. (Sahih Bukhari Kitabul Azaan Hadees no. 634, Sahih Muslim Kitabus Salaat Hadees no. 503)

4. Hazrat Usman bin Abul Aas Razi Allahu Anhu ki riwayat hai k Nabi E Akram Sallallahu Alaihi Wa Sallam ne unko unki quam ka imam muqarrar kiya aur farmaya "Muazzin wo muqarrar kar jo apni azaan par mazdoori na le". (Abu Dawood Kitabus Salaat Hadees no. 531, Tirmizi Kitabus Salaat Hadees no. 2091, ise Hakim 1:199, 201 aur Zahbi ne sahih kaha)

5. Muazzin wo muqarrar karna chahiye jo buland aawaaz wala ho: Hazrat Abdullah bin Zaid Razi Allahu Anhu kehte hai k Rasool Allah Sallallahu Alaihi Wa Sallam ne unhey farmaya "Bilal ko azaan sikhaao kyunki wo tum se buland aawaaz hai". (Abu Dawood Hadees no. 499, Tirmizi Hadees no. 189)

6. Ek Sahabiya Razi Allahu Anha farmati hai k masjid k qareeb tamaam gharo se mera makaan uncha tha aur Hazrat Bilal Razi Allahu Anhu us (makaan) par (khade ho kar) fajar ki azaan dete they. (Abu Dawood Kitabus Salaat Hadees no. 519, Ise Ibne Hajar ne sahih kaha)

7. Hazrat Abdullah bin Umar Razi Allahu Anhu riwayat karte hai k Rasool Allah Sallallahu Alaihi Wa Sallam ne ek aadmi ko farmaya "Jesa muazzin kehta hai tu bhi usi tarah jawab de phir jab to jawab se farigh ho jaye to (dua) maang! to diya jayega". (Abu Dawood Kitabus Salaat Hadees no. 524, ise Imam Ibne Hibban  295 ne sahih kaha)

8. Rasool Allah Sallallahu Alaihi Wa Sallam ne farmaya "Azaan aur takbeer k darmiyaan Allah ta'ala dua radd nahi farmata". (Abu Dawood Kitabus Salaat Hadees no. 521, Tirmizi Hadees no. 312, ise Imam Tirmizi ne hasan kaha)

9. Bimaariyo aur waba k moqey par loog ghar gahr azaaney dete hai ye sunnat se sabit nahi, kyunki is silsiley mein paish ki jaane wali tamaam riwayaat zaeef hai.

10. "AS SALAATU KHAIRUM MINAN NAUM" k alfaaz siwaaye fajar k kisi aur azaan mein nahi kehne chahiye.

11. Iqamat, azaan k fauran baad nahi honi chahiye kyunki Nabi E Akram Sallallahu Alaihi Wa Sallam ne farmaya "Azaan aur takbeer k darmiyaan nafil namaz hai, Aapne teen baar ye kalmaat kahe phir farmaya jiska dil chaahye (namaz padhey)". (Sahih Bukhari Kitabul Azaan Hadees no. 624, Sahih Muslim Kitabus Salatul Musafireen Hadees no. 838)

12. Subah sadiq se kuch dair pehle bhi ek azaan hai Nabi Rahmat Sallallahu Alaihi Wa Sallam ne farmaya "Tumhey Bilal ki azaan sehri khaane se na rookey kyunki wo raat ko azaan dete hai takey tahajjud padhne wala lout aaye aur sooney wala khabardaar ho jaye". (Sahih Bukhari Kitabul Azaan Hadees no. 621, Sahih Muslim Kitabus Siyaam Hadees no. 1093)

13. Is azaan aur namaz e fajar ki azaan mein itna waqfa nahi hota tha jitna k aaj kal kiya jata hai, Hazrat Abdullah bin Umar Razi Allahu Anhu farmate hai dono muazzino k darmiyaan sirf is qadar waqfa hota tha k ek azaan de kar utarta aur doosra azaan k liye chadh jata. (Sahih Muslim Hadees no. 1092)

14. Nabi Rahmat Sallallahu Alaihi Wa Sallam ne farmaya "Jab iqamat ho jaye to farz namaz k alawa koi namaz nahi hoti". (Sahih Muslim Kitabus Salaatul Musafireen Hadees no. 710)

Agar koi jamaat ki parwaah na karte hue sunnatey padhega to phir "Naiki barbaad gunah laazim" wala muhawara poora ho jayega, lihaza namaziyo ko chahiye k agar wo tashahud k qareeb na pahunchey hue ho fauran sunnatey tood kar jamaz k saath shamil ho jaye han agar koi shaks yahi namaz us se pehle jamat k saath ada kar chuka ho to phir wo sunnatey jaari rakh sakta hai. Wallahu Aalam

15. Rasool Allah Sallallahu Alaihi Wa Sallam ne farmaya "Jab iqamat kahi jaaye to saff mein shamil hone k liye na bhaago balkey waqaar k saath chalte hue aao jo namaz tum (imam k saath) paa lo aur jo reh jaaye usey baad mein poora karo". (Sahih Bukhari Kitabul Azaan Hadees no. 636, Sahih Muslim Hadees no. 602)

16. Ek shaks azaan sun kar masjid se nikla Hazrat Abu Hurairah Razi Allahu Anhu ne farmaya k beshak us shaks ne Abul Qasim Sallallahu Alaihi Wa Sallam ki nafarmaani ki. (Sahih Muslim Kitabul Masajid Hadees no. 655)

Shari uzr ya namaz ki tayyari k silsiley mein bahar jaana padey to jayez hai

17. Nabi E Akram Sallallahu Alaihi Wa Sallam ne farmaya "Jo namaz ka iraadah kare to goya wo namaz hi mein hai". (Sahih Muslim Kitabul Masajid Hadees no. 602)

Yaani agar wo bila wajah susti se kaam na le to jab tak wo namaz nahi padh leta, usey namaz ka sawab musalsal mir raha hota hai. (Wallahu Aalam)

18. Hameed riwayat karte hai k mene Sabit Banaani se pucha: Kya namaz ki iqamat ho jaane k baad imam batey kar sakta hai? to unhoney mujhe Hazrat Anas bin Malik Razi Allahu Anhu ki hadees bayan ki k ek martaba namaz ki iqamat ho chuki thi, itne mein ek shaks aaya aur iqamat ho jaane k baad Nabi Rahmat Sallallahu Alaihi Wa Sallam se baatey karta raha. (Sahih Bukhari Kitabul Azaan Hadees no. 643, Sahih Muslim Hadees no. 376)

19. Ek dafa namaz ki iqamat ho gayi, logo ne safey barabar karli, itne mein Rasool Allah Sallallahu Alaihi Wa Sallam ko yaad aaya k aap junbi hai aapne loogo se kaha, apni jagah khade raho, phir aapne (ghar ja kar) gusal farmaya aur jab aap wapas tashreef laaye to aapke sar se paani tapak raha tha phir aapne namaz padhaayi. (Sahih Bukhari Kitabul Azaan Hadees no. 640, Sahih Muslim Kitabul Masajid Hadees no. 605)

Bhool jana insaani kamzoori hai Aap Sallallahu Alaihi Wa Sallam bashar they isi liye bhool gaye ye bhi sabit hua k bhoolna shaan e khilafat k khilaf nahi hai.

AZAAN K BAAD KI DUWAYE

AZAAN K BAAD KI DUWAYE

Bismillahirrahmanirraheem


1. Hazrat Abdullah bin Umar bin Aas Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Jab tum muazzin (ki aawaaz) suno to tum muazzin ko jawab do aur jab azaan khatam ho jaye to phir mujh par darood bhejo pas jo mujh par ek baar darood bhejta hai Allah us par das baar rahmat bhejta hai". (Sahih Muslim Kitabus Salaat Hadees no. 384)

Pas sab musalman mardo aur aurato ko chahiye k jab muazzin azaan khatam kare to ek baar darood shareef padh le

"ALLAHUMMA SALLI ALA MUHAMMADIN WA ALA AALI MUHAMMADIN KAMA SAL'LAITA ALA IBRAHEEMA WA ALA AALI IBRAHEEMA INNAKA HAMEEDUM MAJEED, ALLAHUMMA BAARIK ALA MUHAMMADIN WA ALA AALI MUHAMMADIN KAMA BAARAKTA ALA IBRAHEEMA WA ALA AALI IBRAHEEMA INNAKA HAMEEDUM MAJEED" "Ya Allah rahmat bhej Muhammad Sallallahu Alaihi Wa Sallam aur aal e Muhammad Sallallahu Alaihi Wa Sallam par jese rahmat bheji tooney Ibraheem Alaihis Salaam aur aal e Ibraheem Alaihis Salaam par beshak to tareef kiya gaya, buzurgi wala hai, Ya Allah barkat bhej Muhammad Sallallahu Alaihi Wa Sallam aur aal e Muhammad Sallallahu Alaihi Wa Sallam par jese barkat bheji tooney Ibraheem Alaihis Salaam aur aal e Ibraheem Alaihis Salaam par beshak to tareef kiya gaya, buzurgi wala hai". (Sahih Bukhari Kitabul Ahadeesul Anbiya Hadees no. 3370, Sahih Muslim Hadees no. 406)

2. Hazrat Jabir Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Jo shaks (azaan ka jawab de aur phir) azaan khatam hoone par ye dua padhey uske liye qayamat k din meri shifa'at wajib ho jati hai:

"ALLAHUMMA RABBA HAZIHID DAAWATIT TAMMATI WAS SALATIL QA'IMATI AATI MUHAMMADAL WASEELATA WAL FAZEELATA WAB ASAHU MAQAMAN MAHMOODAL LAZI WA ATTAH" "Is poori pukaar (azaan) k aur (qayamat tak) qayam rehne wali namaz k rabb! Muhammad Sallallahu Alaihi Wa Sallam ko waseela aur buzurgi ata farma aur unhey Maqaam e Mahmood mein pahuncha jiska tooney unse waada kiya hai". (Sahih Bukhari Kitabul Azaan Hadees no. 614)


WASEELA KI TASHREEH

Waseela k mutalliq khud Rasool Allah Sallallahu Alaihi Wa Sallam ne farmaya "Tehqeeq waseela bahisht mein ek darja hai jo sirf ek bandey k layak hai aur mein ummeed rakhta hu k wo bandah mein hi hu, pas jisne (azaan ki dua padh kar) Allah se mere liye waseela maanga uske liye (meri) shifa'at wajib ho gayi". (Sahih Muslim Kitabus Salaat Hadees no. 384)

Nabi Rahmat Sallallahu Alaihi Wa Sallam k irshad se maloom hua k waseela bahisht mein ek buland wa bala darje ka naam hai.


DUA E AZAAN MEIN IZAAFA

Masnoon dua e azaan mein baaz loogo ne chand alfaaz badha rakkhey hai aur wo alfaaz murawajjah kutub e namaz mein bhi mojood hai, dua e masnoon k jumla (WAL FAZEELA) k baad (WAD DARAJATAR RAFEEAH) ki ziyadati karte hai aur aagey (WA ATTAHU) k khalis doodh mein (WAR ZUKNA SHAFA ATAHU YAUMAL QIYAAMAH) ka paani mila rakkha hai aur phir aakhir mein masnoon dua k andar (YA ARHAMAR RAHIMEEN) ki amaizish hai afsoos! Kya Nabi Sallallahu Alaihi Wa Sallam ki dua mein ye khamiya reh gayi thi jo baad k loogo ne apne izaafey se poori ki hai? musalmano ko Rasool Allah Sallallahu Alaihi Wa Sallam k farman paak mein kami ya baishi karne k tasawwur se kaanp uthna chahiye, Nabi E Akram Sallallahu Alaihi Wa Sallam ne raat ko ba-wuzu ho kar sooney se pehle padhne k liye ek dua batlaayi, Hazrat Bara bin Aazib Razi Allahu Anhu ne padh kar sunaayi to (BI NABEEYIKA) ki jagah (BI RASOOLIKA) yaani nabi ki jagah rasool kaha, to Nabi E Rahmat Sallallahu Alaihi Wa Sallam ne farmaya k mere bataye hue lafz Nabi ko Rasool se mat badlo balke (BI NABEEYIKA) hi kaho. (Sahih Bukhari Kitabul Wuzu Hadees no. 247, Sahih Muslim Kibuz Zikr wa Dua Hadees no. 2710)

Is se maloom hua k masnoon duwaye aur wird tofeeqi (Allah ki taraf se) hai aur unki haisiyat ibadat ki hai lihaza unme kami baishi jayez nahi lihaza (kisi qareena ya daleel k bagair) mutakallim k saigey ko jama k saigey se badalna durust nahi hai uski bajaaye behtar ye hai k mutakallim ka saiga hi bola jaye albatta niyat mein ye rakkha jaye k mein yahi dua fala fala k haqq mein bhi kar raha hu, neez masnoon duwaon k hoote hue khud-saakhta arbi duwaon wazeefo aur daroodo ka iltazaam karna durust nahi hai aur agar unke kuch alfaaz shirk, kufr ya bida'at par mushtamil ho to is soorat mein unka padhna qatai tour par haraam ho jata hai lekin afsoos k jahil loog rozana pabandi k saath darood e taaj, darood e lakhi aur darood e hazaari wagairah ki "Tilawat" karte hai, Allah hum sabko hidayat de. Aaameen

3. Hazrat Saad bin Abi Waqaas Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Jo shaks muazzin (ki azaan) sun kar ye dua padhey to uske gunah baksh diye jayengey, Dua ye hai:

"ASH'HADU AN LAA ILAHA ILLALLAHU WAHDAHU LA SHAREEKA LAHU WA ANNA MUHAMMADAN ABDUHU WA RASOOLUHU RAZEETU BILLAHI RABBAU WA BI MUHAMMADIR RASOOLAU WA BIL ISLAAMI DEENAN" "Mein gawahi deta hu k Allah k siwa koi (saccha) mabood nahi wo ek hai uska koi shareek nahi aur tehqeeq Muhammad Sallallahu Alaihi Wa Sallam uske bandey aur rasool hai, mein Allah k rabb hoone aur Muhammad Sallallahu Alaihi Wa Sallam k rasool hoone aur islam k deen hoone par raazi hu". (Sahih Muslim Kitabus Salaat Hadees no. 386)

AZAAN KA JAWAB

AZAAN KA JAWAB

Bismillahirrahmanirraheem

Hazrat Umar Farooq Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Jab muazzin kahe "ALLAHU AKBAR" pas tum kaho "ALLAHU AKBAR" phir jab muazzin kahe "ASH'HADU AN LAA ILAHA ILLALLAH" tum bhi kaho "ASH'HADU AN LAA ILAHA ILLALLAH" phir jab muazzin kahe "ASH'HADU ANNA MUHAMMADAR RASOOLULLAH" tum bhi kaho "ASH'HADU ANNA MUHAMMADAR RASOOLULLAH" phir jab muazzin kahe "HAIYYA ALAS SALAAH" to tum kaho "LA HAULA WALA QUWWATA ILLAH BILLAH" phir jab muazzin kahe "HAIYYA ALAL FALAAH" to tum kaho "LA HAULA WALA QUWWATA ILLAH BILLAH" phir jab muazzin kahe "ALLAHU AKBAR" to tum kaho "ALLAHU AKBAR" phir jab muazzin kahe "LA ILAHA ILLALLAH" to tum kaho "LA ILAHA ILLALLAH", Jo shaks apne sadq e dil se muazzin k kalmaat ka jawab dega to (jawaab ki barkat se) bahisht (jannat) mein dakhil ho jayega. (Sahih Muslim Kitabus Salaat Hadees no. 385)

Hafiz ibne Hajar Rahimahullah farmate hai "ASSALATU KHAIRUM MINAN NAUM" k jawab mein "SADAQTA WA BARARTA" k alfaaz ki koi asal nahi, lihaza fajar ki azaan mein "ASSALATU KHAIRUM MINAN NAUM" k jawab mein bhi yahi kalma kehna chahiye yaani "ASSALATU KHAIRUM MINAN NAUM".

Takbeer k doraan ya baad mein "AQAMAHALLAHU WA ADAAMAHA" kehne wali Abu Dawood ki riwayat ko Imam Nawawi Rahimahullah ne Al Majmua mein zaeef kaha hai, ise hafiz ibne Hajar Rahimahullah ne bhi zaeef kaha hai.

AZAAN K FAZA'IL

AZAAN K FAZA'IL

Bismillahirrahmanirraheem

Hazrat Abu Saeed Khudri Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Jab tum bhaid bakriyo mein ho ya daihaat mein to namaz k liye azaan do aur apni aawaaz buland karo kyunki muazzin ki aawaaz ko jinnaat insaan aur jo jo cheez sunti hai wo qayamat k din uske liye gawahi degi". (Sahih Bukhari Kitabul Azaan Hadees no. 609)

Nabi E Akram Sallallahu Alaihi Wa Sallam ne farmaya "Muazzin k liye sawaab hai us shaks k sawaab k barabar jisne (azaan sun kar) namaz padhi". (Nasayi 2:31, 646 Kitabul Azaan, ise Munzari ne jaid kaha hai)

Mafhoom ye hua k muazzin ki awaaz sun kar jitne aadmi masjid mein aa kar namaz padhengey, un sabko apni apni namaz ka poora sawaab milega magar muazzin tamaam namaziyo k sawab k barabar mazeed ajar payega, kyunki usne unko namaz ki taraf bulaya tha.

Hazrat Muawiyah Razi Allahu Anhu se riwayat hai k mene Rasool Allah Sallallahu Alaihi Wa Sallam se suna "Qayamat k din azaan dene walo ki gardaney lambi hongi (Yaani Allah ka naam buland karne ki wajah se wo numaaya hongey)". (Sahih Muslim Kitabus Salaat Hadees no. 387)

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jab namaz k liye azaan di jaati hai to shaitan peeth phair kar bhaag jata hai, jab azaan khatam ho jati hai to phir aa jata hai aur namazi k dil mein waswasa daalta hai, fala fala baat yaad kar yaha tak k aadmi ko pata nahi chalta k usne kis qadar namaz padhi". (Sahih Bukhari Kitabul Azaan Hadees no. 608, Sahih Muslim Kitabus Salaat Hadees no. 389)

Hazrat Uqba bin Aamir Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Tumhara parwardigaar bakriya charaane wale par tajjub karta hai jo pahaad ki chooti par reh kar azaan deta hai aur namaz padhta hai" Allah ta'ala farmata hai "Mere bande ko dekho jo namaz k liye azaan deta hai aur iqamat kehta hai aur mujhse darta hai mene usko baksh diya aur jannat mein dakhil kiya". (Abu Dawood Kitabus Salatus Safar Hadees no. 1203, ise Ibne Hibban ne Sahih kaha)

NAMAZI KA LIBAAS

NAMAZI KA LIBAAS

Bismillahirrahmanirraheem

Rasool Allah Sallallahu Alaihi Wa Sallam ne farmaya "Koi shaks ek kapde mein is tarah namaz na padhey k uske kandey nangey ho". (Sahih Bukhari Kitabus Salaat Hadees no. 359, Sahih Muslim Kitabus Salaat Hadees no. 516)

Maloom hua k jo loog ahraam ki halat mein hajj ya umrah k mouqey par kandhey khool kar farz namaz ada karte hai jabke wo kandho ko dhaankne par qadir bhi hai to unki namaz durust nahi hogi

Is se maloom hua k mard k liye namaz k doraan sar dhaanpna wajib nahi warna aap kandho k saath sarka zikr bhi farmate, sar dhaanpna ziyaada se ziyaadah mustahab hai loogo ko uski tarteeb to di ja sakti hai magar na dhaanpne par mulamat nahi karni chahiye.

Rasool Allah Sallallahu Alaihi Wa Sallam ne Jabir bin Abdullah Razi Allahu Anhu se farmaya k "Agar namaz padhte hue ek hi kapda ho aur wo kushadah ho to iltihaaf karo yaani jism par lapait kar kandhey dhaanko aur agar tang ho to sirf tahband banao". (Sahih Bukhari Hadees no. 361, Sahih Muslim Hadees no. 301, 518)

Hazrat Jarhad Razi Allahu Anhu riwayat karte hai k Rasool Allah Sallallahu Alaihi Wa Sallam ek dafa mere paas se guzrey aur meri raan nangi thi Aap Sallallahu Alaihi Wa Sallam ne farmaya "Raan ko dhaanko beshak raan sharm-gaah hai". (Tirmizi Kitabul Adab Hadees no. 2795)

Hazrat Umar bin Abi Salma Razi Allahu Anhu bayan karte hai k mene Rasool Allah Sallallahu Alaihi Wa Sallam ko Ummey Salma Razi Allahu Anha k ghar mein ek hi kapde mein lipte hue namaz padhte hue dekha (aapne) uski dono tarfey apne kandho par rakkhi hui thi. (Sahih Bukhari Kitabus Salaat Hadees no. 354, Sahih Muslim Kitabus Salaat Hadees no. 517)

Hazrat Sahal Razi Allahu Anhu se riwayat hai k Sahaba E Kiraam Razi Allahu Anhum Nabi E Kareem Sallallahu Alaihi Wa Sallam k saath namaz padhte aur wo apne tehbando ko choote hone k sabab apni gardano par baandhey hue hote they aur aurato se keh diya gaya tha k jab tak mard seedhey ho kar baith na jaye us waqt tak tum apne sar sajde se na uthana. (Sahih Bukhari Kitabus Salaat Hadees no. 362, Sahih Muslim Hadees no. 441)

Muhammad bin Munkad Rahimahullah bayan karte hai k mein Hazrat Jabir bin Abdullah Razi Allahu Anhu k paas aaya to wo ek kapde mein lipte hue namaz padh rahe they aur unki chadar (ek taraf) rakkhi hui thi, jab wo namaz se farigh hue to humne unse kaha? Ae Abu Abdullah! aapki chadar padhi rehti hai aur aap namaz padh lete hai? to unhone farmaya Han mene Nabi E Kareem Sallallahu Alaihi Wa Sallam ko isi tarah namaz padhte dekha tha to mene ye chaha k (aesa hi karu takey) tumhare jese jahil mujhe (is tarah namaz padhte hue) dekh le. (Sahih Bukhari Kitabus Salaat Hadees no. 370, Sahih Muslim Kitabuz Zuhad Hadees no. 3008)

Hazrat Abu Hurairah Razi Allahu Anhu se riwayat hai k ek shaks ne Rasool Allah Sallallahu Alaihi Wa Sallam se pucha k ek kapde mein namaz padhna kesa hai? aapne farmaya "Kya tum mein se har shaks k paas do kapde hai?" phir us shaks ne (musalmano ki gurbat k zamane k khatimey k baad) Hazrat Umar Razi Allahu Anhu se yahi masla pucha to aapne farmaya "Jab Allah ne tumhey wus'at di to tum bhi wus'at karo (yaani namaz mein ek se ziyaadha kapde pehno)". (Sahih Bukhari Hadees no. 365, Sahih Muslim Hadees no. 515)

Rasool Allah Sallallahu Alaihi Wa Sallam k saah auratey namaz e fajar ada karti to wo apni chadaro mein lipti hua karti thi. (Sahih Bukhari Kitabus Salaat Hadees no. 372, Sahih Muslim Kitabul Masajid Hadees no. 645)

Hazrat Ayesha Razi Allahu Anha se riwayat hai k Rasool Allah Sallallahu Alaihi Wa Sallam ne farmaya "Baligha aurat ki namaz audhani k bagair qubool nahi hoti". (Abu Dawood Kitabus Salaat Hadees no. 641, ise Ibne Khuzaima aur Ibne Hibban ne sahih kaha)

Maloom hua k aurat saraapa parda hai agar wo pindali, baazu ya sar khool kar namaz padhegi to uski namaz sahih nahi hogi.

Rasool Allah Sallallahu Alaihi Wa Sallam kabhi namaz mein nangey pao khade hote aur kabhi aapne joota pehan rakkha hota tha. (Abu Dawood Kitabus Salaat Hadees no. 653, Ibne Maja Iqamatus Salaat Hadees no. 1038, Tahawi ne ise mutawatir kaha)

Us waqt masjido k farsh kacchey hote they aur jootiyo k talwey bhi hamwaar hote they jo zameen par ragadne se paak ho jate they aaj masjido mein safey, darya aur qaleeney bich gayi hai, aur jootiyo k talwo mein basa auqaat gandagi phans jaati hai jo zameen par ragadne se nahi nikalti lihaza aaj agar koi shaks joote pehan kar namaz ada karna chahey to usey taharat ka mukammal ehtamam karna chaiye warna joote utaar kar namaz padni chahiye.

Nabi Rahmat Sallallahu Alaihi Wa Sallam ne farmaya "Yahoodiyo ki mukhalifat karo wo joote aur moozey pehan kar namaz ada nahi karte". (Abu Dawood Hadees no. 652, ise Hakim aur Zahbi ne sahih kaha)

Hazat Abu Saeed Khudri Razi Allahu Anhu se riwayat hai k Rasool Allah Sallallahu Alaihi Wa Sallam Sahaha e Kiraam Razi Allahu Anhum ko jamaat karwa rahe they k Aapne apne jooto ko utara aur baayi janib rakh diya, jab Sahaba e Kiraam Razi Allahu Anhum ne ye dekha to unhone bhi apne joote utaar diye, jab aap namaz se farigh hue to Aap Sallallahu Alaihi Wa Sallam ne farmaya "Beshak mere paas Jibreel Alaihis Salaam aaye aur unhone mujhe bataya k tumhare jooto mein gandagi lagi hai, lihaza jab tum masjido mein aao to jootiyo ko acchi tarah (gaur se) dekh lo, agar un mein najasat nazar aaye to unko zameen par acchi tarah ragdo phir un mein namaz ada karo". (Abu Dawood Kitabus Salaat Hadees no. 650, Ise Hakim, Zahbi aur Nawawi ne sahih kaha)

Maloom hua k jisne na-danishta taur par jism ya kapdo ki najasat k saath namaz ada karli aur usey uska ilm namaz se farigh hoone k baad hua to uski namaz sahih hai.

Nabi Rahmat Sallallahu Alaihi Wa Sallam farmate hai "Jab tum namaz ada karo to jooto ko daaye ya baaye na rakkho balke qadmo k darmiyaan rakkho, kyunki tumhara rabaya doosre namazi ka daayra hoga, han agar baaye janib koi namazi na ho to baaye janib rakh sakte ho". (Abu Dawood Kitabus Salaat Hadees no. 654, 655, Ise Hakim, Zahbi aur Nawawi ne sahih kaha)

Hazrat Abdullah bin Abbas Razi Allahu Anhu ne Abdullah bin Haaris ko dekha k wo pichey se baalo ka jooda bandh kar namaz padh rahe they, Hazrat Abdullah bin Abbas Razi Allahu Anhu uthey aur unke joodey ko khool diya, jab Ibne Haris namaz se farigh hue to Ibne Abbas Razi Allahu Anhu ki taraf mutawajjah hue aur kehne lage, mere sar se tumey kya sarokaar tha? Ibne Abbas Razi Allahu Anhu ne kaha Mene Rasool Allah Sallallahu Alaihi Wa Sallam ko ye farmate hue suna hai "Beshak is tarah k aadmi ki misal us shaks ki si hai k jo mashkey bandhi hui halat mein namaz ada kare". (Sahih Muslim Kitabus Salaat Hadees no. 492)

Hazrat Ibne Abbas Razi Allahu Anhu se riwayat hai k Rasool Allah Sallallahu Alaihi Wa Sallam ko saat haddiyo par sajdah karne ka hukm diya gaya aur baal aur kapde k samaitne se mana kiya gaya. (Sahih Muslim Kitabus Salat Hadees no. 490)