WUZU KA BAYAN

WUZU KA BAYAN

Bismillahirrahmanirraheem

Allah ta'ala farmata hai: "Ae emaan walo! jab tum namaz k liye khade ho to apne chehro ko aur haatho ko kohniyo tak dhoo aur apne sar ka masah karo aur takhno tak apne pao dhoo". (Surah Maida Ayat no. 6)


MASNOON WUZU SE GUNAHO KI BAKHSHISH:

Rasool Allah Sallallahu Alaihi Wa Sallam ne farmaya "Jis waqt bandah momin wuzu shuru karta hai phir kulli karta hai to uske muh k gunah nikal (jhad) jaate hai, phir jis waqt naak jhaadta hai uske naak k gunah nikal jaate hai, phir jis waqt chehra dhoota hai uske chehrey k gunah nikal jaate hai, yaha tak k uski aankho ki palko k nichey se bhi gunah nikal jaate hai, chehra dhoote waqqt gunah daadhi k kinaaro se bhi girte hai aur jis waqt wo haath dhoota hai to uske dono haatho se gunah nikal jaate hai yaha tak k dono haatho k nakoonu k nichey se bhi nikal jaate hai, phir jis waqt masah karta hai uske sar se gunah nikal jaate hai, yaha tak k dono kaano se bhi gunah nikal jaate hai, phir jis waqt pao dhoota hai to uske dono paao se gunah nikal jaate hai, yaha tak k dono pao k nakhoono k nichey se bhi nikal jaate hai, yaha tak k wo sab gunaho se paak saaf ho kar nikalta hai". (Sahih Muslim Kitabut Taharah Hadees no. 244)

Ek shaks ne Rasool Allah Sallallahu Alaihi Wa Sallam se pucha k aap apni ummat ko (maidaan e hashr mein) doosri ummato k (be-shumaar loogo k) darmiyaan kis tarah pehchanengey? Aap Sallallahu Alaihi Wa Sallam ne farmaya mere ummati wuzu k asar se safaid (noorani) chehre aur safaid (noorani) haath pao wale hongey, is tarah unke siwa koi nahi hoga. (Sahih Muslim Kitabut Taharah Hadees no. 247)


WUZU SE BULAND DARJAAT:

Rasool Allah Sallallahu Alaihi Wa Sallam ne farmaya "Taharat aadha emaan hai". (Sahih Muslim Kitabut Taharah Hadees no. 223)

Sayyadna Abu Hurairah Razi Allahu Anhu se riwayat hai k mene apne dost Muhammad Sallallahu Alaihi Wa Sallam ko ye farmate hue suna "(jannat mein) momin ka zaivar waha tak pahunchega jaha tak wuzu ka paani pahunchega". (Sahih Muslim Kitabut Taharah Hadees no. 250)

Rasool Allah  ne farmaya "Kya mein tumhey wo cheez na batau k jiske sabab Allah ta'ala gunaho ko door aur darjaat ko buland karta hai?" Sahaba Razi Allahu Anhum ne arz kiya, Ae Allah k Rasool Sallallahu Alaihi Wa Sallam irshad farmaiye, Aapne farmaya "Mashakkat (beemari ya sardi) k waqt kaamil aur sawaar kar wuzu karna, kasrat se masjido ki taraf jana aur namaz k baad namaz ka intazaar karna gunaho ko door aur darjaat ko buland karta hai". (Sahih Muslim Kitabut Taharah Hadees no. 251)


NEEND SE JAAG KAR PEHLE HAATH DHOIYE:

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jab tum neend se jaago to apna haath paani k bartan mein na daalo jab tak k usko (teen baar) na dhoolo kyunki tum nahi jaante k us haath ne raat kaha guzaari hai". (Sahih Bukhari Kitabul Wuzu Hadees no. 162, Sahih Muslim Kitabut Taharah Hadees no. 678)


TEEN BAAR NAAK JHAADEY:

Hazrat Abu Hurairah Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Jab tum neend se baidaar ho phir wuzu ka iraadah karo to (paani chadha kar) teen baar naak jhaado kyunki shaitaan naak k baansey mein raat guzaarta hai". (Sahih Bukhari Kitabul Badd ul Khalq Hadees no. 3295, Sahih Muslim Kitabut Taharah Hadees no. 238)

Soone wale k naak k baansey mein shaitan k raat guzaarne ki asliyat aur haqeeqat Allah hi behtar jaanta hai, hamara farz emaan lana hai k waqae shaitan raat guzaarta hai.


MASNOON WUZU KI MUKAMMAL TARTEEB:

1. Wuzu karne se pehle dil mein wuzu karne ki niyat karey.

2. Wuzu k shuru mein "BISMILLAH" zaroor padhni chahiye kyunki Rasool Allah Sallallahu Alaihi Wa Sallam ne Sahaba E Kiraam Razi Allahu Anhum se farmaya "BISMILLAH" keh kar wuzu karo. (Nasaayi Kitabut Taharah Hadees no. 78, Ibne Khuzaima Hadees no. 144)

Wazey rahe k wuzu ki ibtida k waqt sirf "BISMILLAH" kehna chahiye "AR-RAHMAN-NIR-RAHEEM" k alfaaz ka izaafa sunnat se saabit nahi.

Nabi E Akram Sallallahu Alaihi Wa Sallam ne farmaya "Jo shaks wuzu k shuru mein "BISMILLAH" nahi kehta uska wuzu nahi". (Abu Dawood Kitabut Taharah Hadees no. 101, Hafiz Munzari wagairah ne shawahid ki bina par hasan kaha)

Agar "BISMILLAH" bhool gayi aur wuzu k doraan yaad aayi to fauran padh le wuzu dobaara karne ki zaroorat nahi kyunki bhool maaf hai.

3. Hazrat Ummey Ateeya Razi Allahu Anha se riwayat hai k Rasool Allah Sallallahu Alaihi Wa Sallam ne Hazrat Zainab Razi Allahu Anha ko gusal dene waliyo se kaha dahini taraf se aur wuzu k muqaamo se unka gusal shuru karo. (Sahih Bukhari Hadees no. 167, Sahih Muslim Hadees no. 939)

Rasool Allah Sallallahu Alaihi Wa Sallam jooti pehan'ne, kanghi karne, taharat karne aur garz tamaam kaamo mein daayi taraf se shuru karna pasand farmaate. (Sahih Bukhari Kitabul Wuzu Hadees no. 168, Sahih Muslim Kitabut Taharah Hadees no. 268)

4. Aap Sallallahu Alaihi Wa Sallam ne dono haath kohniyo tak teen baar dhooye. (Sahih Bukhari Kitabul Wuzu Hadees no. 159, Sahih Muslim Kitabut Taharah Hadees no. 226)

5. Aap Sallallahu Alaihi Wa Sallam ne farmaya "Wuzu mukammal karo aur haatho ko dhoote waqt haatho ki ungliyo k darmiyaan khalal karo, aur naak mein paani chadhane mein mubaalagha karo illa ye k tum rooza-daar ho". (Abu Dawood Kitabut Taharah Hadees no. 146, Tirmizi Kitabut Taharah Hadees no. 38, Ise Tirmizi, Hakim (1:147-148) aur Noovi ne sahih kaha)

6. Aap Sallallahu Alaihi Wa Sallam ne ek chulllu le kar aadhey se kulli ki aur aadha naak mein daala aur naak ko baaye haath se jhaada, ye amal teen dafa kiya. (Sahih Bukhari Kitabul Wuzu Hadees no. 191, 199, Sahih Muslim Kitabut Taharah Hadees no. 235)

7. Phir Aap Sallallahu Alaihi Wa Sallam ne teen baar muh dhooya. (Sahih Bukhari Kitabul Wuzu Hadees no. 185, Sahih Muslim Kitabut Taharah Hadees no. 235)

8. Aap Sallallahu Alaihi Wa Sallam daadhi ka khalaal karte they. (Tirmizi Kitabut Taharah Hadees no. 31, Iben Hibban aur Ibne Khuzaima ne sahih kaha)

9. Aap Sallallahu Alaihi Wa Sallam ne daaya haath kohni tak teen baar dhooya phir baaya haath kohni tak teen baar dhooya. (Sahih Bukhari Kitabus Soum Hadees no. 1934, Sahih Muslim Hadees no. 226)

10. Aap Sallallahu Alaihi Wa Sallam ne sar ka masah kiya, dono haath sar k agle hisse se shuru kaar k gardan tak pichey le gaye, phir pichey se aagey usi jagah le aaye jaha se masah shuru kiya tha. (Sahih Bukhari Kitabul Wuzu Hadees no. 185, Sahih Muslim Kitabut Taharah Hadees no. 235)

Aap Sallallahu Alaihi Wa Sallam ne sar ka ek dafa masah kiya. (Sahih Bukhari Hadees no. 186, Sahih Muslim Hadees no. 235)

11. Aap Sallallahu Alaihi Wa Sallam ne kaano ka masah kiya shahadat ki ungliya dono kaano k suraakho mein daal kar kaano ki pusht par angootho k saath masah kiya. (Ibne Maja Kitabut Taharah Hadees no. 439, Tirmizi Kitabut Taharah Hadees no. 36, Ise Ibne Khuzaima (1:77 Hadees 148) ne sahih kaha)

12. Aap Sallallahu Alaihi Wa Sallam ne daaya pao takhno tak teen baar dhoya aur baaya pao bhi takhno tak teen baar dhoya. (Sahih Bukhari Kitabus Saum Hadees no. 1934, Sahih Muslim Kitabut Taharah Hadees no. 226)

13. Aap Sallallahu Alaihi Wa Sallam ne farmaya k jab wuzu karo to haatho aur pao ki ungliyo ka khalaal karo. (Tirmizi Kitabut Taharah Hadees no. 39, Ibne Maja Kitabut Taharah Hadees no. 447, Ise Tirmizi ne hasan kaha)

Hazrat Mastoorad bin Shaddaad Razi Allahu Anhu riwayat karte hai k mene Rasool Allah Sallallahu Alaihi Wa Sallam ko wuzu karte hue dekha k Aap Sallallahu Alaihi Wa Sallam apne pao ki ungliyo ka khalaal haath ki chooti ungli se kar rahe they. (Abu Dawood Kitabut Taharah Hadees no. 148, Tirmizi Kitabut Taharah Hadees no. 40, Imam Malik ne hasan kaha)

14. Hakam bin Sufyaan Razi Allahu Anhu se riwayat hai k Nabi E Akram Sallallahu Alaihi Wa Sallam jab paishab karke wuzu karte to apni sharm-gaah par paani ka cheenta dete. (Abu Dawood Kitabut Taharah Hadees no. 166, Nasaayi Kitabut Taharah Hadees no. 135)

15. Wuzu karte hue aazaa k dhoone mein tarteeb qaayam rakhna wajib hai aur wuzu ek hi waqt mein kiya jaaye aazaa k dhoone mein waqfa aur taakheer na ho.

16. Hazrat Abdullah bin Umar Razi Allahu Anhu ne farmaya "K Agar zakham par patti bandhi hui ho to wuzu karte waqt patti par masah karle aur ird gird ko dhoo le". (Behaqui 1:228, Imam Behaqui ne ise hasan kaha)


TANBIHAAT:

1. Kulli aur naak mein paani daalne k liye alag alag paani lene ka zikr jis hadees mein hai use (Abu Dawood Hadees no. 139) Imam Noovi aur Hafiz ibne Hajar ne zaeef kaha hai, Imam Noovi aur Imam Ibne Qayyam farmate hai k Rasool Allah Sallallahu Alaihi Wa Sallam k wuzu ka tareeqa ek chullu se aadha paani muh mein aur aadha naak mein daalna hai.

2. Rasool Allah Sallallahu Alaihi Wa Sallam ne farmaya "Kaano ka talluq sar se hai "(Daare Qutni 1:98 Ise Ibne Joozi Rahimahullah wagairah ne sahih kaha hai) iska matlab ye hai k kaano k liye naaye paani ki zaroorat nahi, kaano k masah k liye naya paani lene wali riwayat ko Hafiz Ibne Hajar Rahimahullah ne shaaz kaha hai"

3. Hafiz Ibne Hajar Rahimahullah farmate hai k k (guddi k nichey) gardan k (alag) masah k baare mein qata'an koi sahih hadees nahi, gardan k masah ki riwayat k mutalliq Imam Noovi farmate hai "Ye Hdees Bil-ittefaaq zaeef hai". (Majmua E Fatawa 21:127, Zadul Maad 1:195, Al Majmua 1:489)

JANNAT MEIN DAKHIL HOONE WALE LOOG (COMPLETE)

JANNAT MEIN DAKHIL HOONE WALE LOOG (COMPLETE)

Bismillahirrahmanirraheem

NARAM DIL, AAJIZ, MUNKASIRUL MIJAAZ HAR WAQT ALLAH SE DARNE WALE BE ZARAR AUR HALEEMUL TABEY LOOG JANNAT MEIN JAYENGEY

Hazrat Abu Hurairah Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jannat mein aese loog dakhil hongye jinke dil chidyo jese hongey". (Sahih Muslim Kitabul Jannah Wa Sifatun Naemaha)


JANNAT MEIN GAREEB, FAKEER, MOHTAAJ, MISKEEN AUR KAMZOOR LOOGO KI KASRAT HOGI

Hazrat Haarsa bin Wahhab Razi Allahu Anhu ne Nabi E Akram Sallallahu Alaihi Wa Sallam ko farmate hue suna hai k Aap Sallallahu Alaihi Wa Sallam ne irshad farmaya "Kya tumhey bataau jannat mein jaane wale loog kaun hai?" Sahaba Razi Allahu Anhum ne arz kiya "Kyu nahi" Aap Sallallahu Alaihi Wa Sallam ne irshad farmaya "har naatawa, loogo k nazdeek kamzoor (lekin Allah k nazdeek itna bargazeedah) agar (kisi muamale mein) Allah ki qasam kha le to Allah use saccha karde" phir farmaya "Kya mein tumhey jahannam mein jaane wale loogo k baare mein na bataau?" Sahaba E Kiraam Razi Allahu Anhum ne arz kiya "Kyu Nahi" Aap  ne irshad farmaya "har jhagdaalu, bad akhlaaq aur takabbur karne wala". (Sahih Muslim Kitabul Jannah wa Sifatun Naemaha)


NARAM DIL, SHAREEFUL NAFS, MUNKASIRUL MIJAAZ AUR HAR DIL AZEEZ SHAKS JANNATI HAI

Hazrat Abdullah bin Mas'ood Razi Allahu Anhu kehte hai Rasool Allah Sallallahu Alaihi Wa Sallam ne farmaya "Har wo shaks jo naram dil hai shareefun nafs hai, munkasirul mijaaz hai aur loogo se qareeb (yaani har dil azeez) hai us par jahannam ki aagh haraam hai". (Musnad Ahmad, Saheeh Jamey Sageer Hadees no. 313)


RASOOL ALLAH SALLALLAHU ALAIHI WA SALLAM KI ITA'AT KARNE WALE JANNAT MEIN JAYENGEY

Hazrat Abu Hurairah Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Meri tamaam ummat jannat mein dakhil hogi magar jisne mera inkaar kiya (wo jannat mein dakhil nahi hoga)" Sahaba E Kiraam Razi Allahu Anhum ne arz kiya "Ya Rasool Allah Sallallahu Alaihi Wa Sallam kisne inkaar kiya?" Aap Sallallahu Alaihi Wa Sallam ne irshad farmaya "Jisne meri ita'at ki wo jannat mein dakhil ho gaya aur jisne nafarmaani ki usne inkaar kiya". (Sahih Bukhari Kitabul Aetasaam bil Kitabis Sunnah)


ALLAH KI RAZA K LIYE JO SHAKS ROZAANA 12 RAKAAT NAMAZ (NAMAZ E FAJR SE QABL 2 RAKAAT, NAMAZ E ZUHAR SE QABAL 4 RAKAAT AUR BAAD MEIN 2 RAKAAT, NAMAZ E MAGHRIB K BAAD 2 RAKAAT AUR NAMAZ E ISHA K BAAD 2 RAKAAT SUNNAT) ADA KAREGA WO JANNAT MEIN JAYEGA

Hazrat Ummey Habeeba Razi Allahu Anha Rasool Akram Sallallahu Alaihi Wa Sallam ki zooja e Mohtarma se riwayat hai k unhone Rasool Allah Sallallahu Alaihi Wa Sallam ko farmate hue suna hai k "Jo shaks rozaana Allah ki raza k liye farzo k alawa 12 rakaat nawafil ada karta hai Allah ta'ala uske liye jannat mein ek ghar banata hai". (Sahih Muslim Kitabus Salatul Musafireen)


SILA REHMI KARNE WALE JANNAT MEIN JAYENGEY

Hazrat Abu Ayyub Razi Allahu Anhu kehte hai ek aadmi Nabi e Akram Sallallahu Alaihi Wa Sallam ki khidmat mein hazir hua aur arz kiya mujhe koi aesa amal bataiye jo mujhe jannat k kareeb aur jahannam se door karde Aap Sallallahu Alaihi Wa Sallam ne irshad farmaya "Allah ki bandagi kar aur uske saath kisi ko shareek na kar, namaz qayam kar, zakaat ada kar, raham walo se talluq qayam rakh" jab wo aadmi wapas palta to Rasool Allah Sallallahu Alaihi Wa Sallam ne farmaya "jin baato ka use hukm diya gaya hai agar un par amal kiya to jannat mein dakhil hoga". (Sahih Muslim Kitabul Emaan)


KHUSH AKHLAAQ, TAHAJJUD GUZAAR, KASRAT SE NAFLI ROOZEY RAKHNE WALE AUR DOOSRO KO KHANA KHILAAN WALE LOOG JANNAT MEIN JAYENGEY

Hazrat Ali Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jannat mein aese mehal hai jinke andar (khade ho) to bahar ki har cheez nazar aati hai aur bahar (khade ho) to andar ki har cheez nazar aati hai" ek aaraabi ne khade ho kar arz kiya "Ae Allah k Nabi Sallallahu Alaihi Wa Sallam! ye kis aadmi k liye hai?" Aap Sallallahu Alaihi Wa Sallam ne irshad farmaya "Uske liye hai jo acchi baat kare, khana khilaaye, ba-kasrat roozey rakkhey aur jab loog mazey ki neend soo rahe ho wo uth kar namaz padhey". (Sunan Tirmizi Abwabul Jannah)


AADIL HAKIM, DOOSRO PAR RAHAM KARNE WALA, NARAM DIL, PAKEEZAH AUR DOOSRO SE SAWAAL NA KARNE WALA BHI JANNAT MEIN JAYEGA

Hazrat Ayaaz bin Hamaar Mujashi'e Razi Allahu Anhu se riwayat hai k Rasool Allah Sallallahu Alaihi Wa Sallam ne ek rooz apne khutbey mein irshad farmaya "Jannat mein jaane wale teen qism k loog hai":
1. Hakim, insaaf karne wala, sach boolne wala aur naik kaamo ki tofeeq diya gaya
2. Wo shaks jo har qurabat-daar aur har musalmaan k liye meharbaan aur naram dil hai
3. Wo shaks jo paakdaman hai aur ayaal daari k ba-wajood kisi se sawal nahi karta. (Sahih Muslim Kitabul Jannah Wa Sifatun Naemaha)


ALLAH AUR USKE RASOOL SALALLAHU ALAIHI WA SALLAM PAR EMAAN LAANE MEIN KHUSHI MEHSOOS KARNE WALE AUR ISLAAM KO BARZA WA RAGBAT APNA DEEN SAMAJHANE WALE LOOG JANNAT MEIN JAYENGEY

Hazrat Abu Saeed Khudri Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jis shaks ne yu kaha "Mein Allah k rabb hone par, islaam k deen hone par aur Muhammad Sallallahu Alaihi Wa Sallam k Rasool hone par raazi hu" uske liye jannat wajib ho gayi". (Sunan Abu Dawood Abwabul Witr, baab fi astagfaar)


DO YA DO SE ZAAYED BAITIYO KI DEENI TALEEM WA TARBIYAT KARNE AUR JAWAAN HONE K BAAD NAIK AADMI SE NIKAH KARWANE WALA SHAKS JANNAT MEIN JAYEGA

Hazrat Anas bin Malik Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jisne do ladkiyo ko unke jawaan hone tak paala poosa qayamat k din mein aur wo is tarah aayengey aur Aap Sallallahu Alaihi Wa Sallam ne apni ungliyo ko aapas mein milaya". (Sahih Muslim Kitabul Birr wa Silah)


WUZU K BAAD DO RAKAAT NAFIL (TAHYATUL WUZU) BA-QAIDAGI SE ADA KARNE WALA SHAKS JANNAT MEIN JAYEGA

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne (ek rooz) namaz e fajr k baad Hazrat Bilaal Razi Allahu Anhu se pucha "Ae Bilaal! Islam laane k baad wo tumhara kaun sa amal hai jis par tumhey bakhshish ki ziyaada ummeed hai kyunki aaj raat mene jannat mein apne aagey aagey tumhare chalne ki aawaaz suni hai" Hazrat Bilaal Razi Allahu Anhu arz kiya "mein , is se ziyaada ummeed afza amal to koi nahi paata k din ya raat mein jab bhi wuzu karta hu to jitni Allah ta'ala ko manzoor ho namaz padh leta hu". (Mukhtasar Sahih Bukhari Hadees no. 1682)


NAMAZ ROOZEY KI PABAND, PAAKBAAZ AUR SHOHAR KI ITA'AT GUZAAR KHAWATEEN JANNAT MEIN JAYEGI

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jo aurat paanch namazey ada kare ramazaan k roozey rakkhey apni sharm-gaah ki hifazat kare aur apne shohar ki ita'at kare (qayamat k rooz) use kaha jayega jannat k (aatho) darwaazo mein se jis se chaho dakhil ho jao". (Sahih Ibne Hibban, Sahih Jamey Sageer Hadees no. 683)


ANBIYA, SHOHDA, AHLE EMAAN K FAUT HONE WALE CHOOTE BACCHEY AUR ZINDA DARGOOR KI GAYI LADKIYA JANNAT MEIN JAYENGI

Hazrat Hasna'e binte Muawiyah Razi Allahu Anha kehti hai hum se mere chacha ne ye hadees bayan ki k mene Nabi E Akram Sallallahu Alaihi Wa Sallam se daryaft kiya jannat mein kaun kaun jayega? Nabi E Akram Sallallahu Alaihi Wa Sallam ne irshad farmaya "Nabi jannat mein jayega, Shaheed jannat mein jayega, no-molood jannat mein jayega aur zinda dargoor ki gayi ladki jannat mein jayegi". (Sunan Abu Dawood Kitabul Jihaad)


ALLAH KI RAAH MEIN JIHAAD KARNE WALA JANNAT MEIN JAYENGEY

Hazrat Muaaz bin Jabal Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jis musalman aadmi ne Allah ki raah mein itni dair tak qitaal kiya jitni dair oonthni (camel) ka doodh doohne mein lagti hai, us par jannat wajib ho gayi". (Sunan Tirmizi Abwab Fazalul Jihaad) 

MUTTAQI AUR ACCHEY AKHLAAQ WALE LOOG JANNAT MEIN JAYENGEY

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam se daryaft kiya gaya kaun sa amal sabse ziyaadah loogo k jannat mein jaane ka sabab banega? Aap Sallallahu Alaihi Wa Sallam ne irshad farmaya "Taqwa aur accha akhlaaq" phir Aap Sallallahu Alaihi Wa Sallam se arz kiya gaya "Kaun sa amal sabse ziyaadah loogo k aagh mein jaane ka ba'as banega?" Aap Sallallahu Alaihi Wa Sallam ne irshad farmaya "mana aur sharm-gaah". (Sunan Tirmizi Kitabul Birr wa Silah)

YATEEM KI KIFALAT KARNE WALA JANNAT MEIN JAYEGA

Hazrat Abu Hurairah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Yateem ki kifalat karne wala khawah yateem ka hi rishtedaar ho ya koi aur ho, aur mein jannat mein un do ungliyo ki tarah (saath saath) hongey imam Malik Rahimahullah ne angisht aur shahadat aur darmiyaani ungli se isharah kar ke bataya". (Sahih Muslim Kitabuz Zuhad)

HAJJ E MABROOR ADA KARNE WALA HAAJI JANNAT MEIN JAYEGA

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Umrah un tamaam gunaaho ka kaffarah hai jo mojoodah aur guzishta umraah k darmiyaan sarzad hue ho aur hajj e mabroor ka badla to jannat hi hai". (Muttafiqun Alaih, Kitabul Umrah)

MASJID BANAANE WALA JANNAT MEIN JAYEGA

Hazrat Usman bin Affan Razi Allahu Anhu kehte hai mene Rasool Allah Sallallahu Alaihi Wa Sallam ko farmate hue suna hai "Jisne Allah k liye masjid banaayi Allah ta'ala uske liye usi tarah ka ghar jannat mein banayega". (Sahih Muslim Kitabul Zuhad)

SHARM-GAAH AUR ZUBAAN KI HIFAZAT KARNE WALE JANNAT MEIN JAYENGEY

Hazrat Sahal bin Saad Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jo shaks mujhe zamanat de us cheez ki jo do cheezo k darmiyaan hai (yaani zubaan) aur us cheez ki jo do taango k darmiyaan hai (yaani sharmgaah ki) mein use jannat ki zamanat deta hu". (Sahih Bukhari Kitabur Riqaaq)

HAMSAAYA (PADOOSI) SE HUSN E SALOOK KARNE WALA JANNAT MEIN JAYEGA

Hazrat Abu Hurairah Razi Allahu Anhu kehte hai ek aadmi ne Rasool E Akram Sallallahu Alaihi Wa Sallam ki khidmat mein arz kiya ya Rasool Allah Sallallahu Alaihi Wa Sallam! falah aurat din ko roozey rakhti hai aur raat ko qayaam karti hai lekin hamsiyo ko azeeyat pahunchati hai Aap Sallallahu Alaihi Wa Sallam ne irshad farmaya "Ye aurat jahannam mein hai" phir Sahaba E Kiraam Razi Allahu Anhum ne (ek doosri aurat k baare mein) arz kiya "falah aurat sirf farz namaz ada karti hai aur mamooli khaane peene ki cheez sadqa karti hai lekin hamsiyo ko azeeyat nahi pahunchati" Aap Sallallahu Alaihi Wa Sallam ne irshad farmaya "Ye aurat jannati hai". (Musnad Ahmad tamalul minhu bayanul khisal al mojbata bil jannah Hadees no. 136)

ALLAH TA'ALA K 99 NAAM YAAD KARNE WALA JANNAT MEIN JAYEGA

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Allah ta'ala k 1 kam 100 yaani 99 naam hai jisne yaad kiye wo jannat mein dakhil huwa". (Muttafiqun Alaih, Al loo loo wal Marjaan Hadees no. 1714)

HAFIZ E QURAAN JANNAT MEIN JAYEGA

Hazrat Abu Saeed Khudri Razi Allahu Anhu kehte hai Rasool Allah Sallallahu Alaihi Wa Sallam ne farmaya "Hafiz E Quraan jab jannat mein dakhil hoga to use kaha jayega quraan ki tilawat karta ja aur darje par chadhta ja chunanchey wo har aayat k badle mein ek darja buland hota jayega hatta k aakhiri aayat tak pahunchega jo use yaad hogi aur wahi uska (mustaqil) darja hoga". (Sunan Ibne Maja Kitabul Adab)

KASRAT SE SALAAM KARNE WALE LOOG JANNAT MEIN DAKHIL HONGEY

 

Hazrat Abdullah bin Salaam Razi Allahu Anhu kehte hai Rasool Allah Sallallahu Alaihi Wa Sallam ne farmaya "Loogo! salaam phelao (yaani kasrat se kiya karo) (loogo ko) khana khilaao, aur jab (doosre) loog soo rahe ho to namaz padho (un aamaal k nateeje mein) salamati k saath jannat mein dakhil hongey". (Sunan Tirmizi Abwabul Sifatul Qiyaamah)

MAREEZ KI IYAADAT KARNE WALA JANNAT MEIN JAYEGA

Hazrat Sobaan Razi Allahu Anhu kehte hai Rasool Allah Sallallahu Alaihi Wa Sallam ne farmaya "Mareez ki iyadat karne wala jab tak wapas na aa jaye tab tak jannat k baagh mein rehta hai". (Sahih Muslim Kitabul Birr wa Silah)

ALLAH KI RAZA K LIYE DEEN KA ILM SEEKHNE WALA JANNAT MEIN JAYEGA

Hazrat Abu Hurairah Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jo shaks ilm e deen hasil karne k liye raasta tey kare Allah ta'ala uske liye jannat ka raasta (tey karna) aasaan farma dete hai". (Sahih Muslim Kitabul Zikr wa Dua)

ACCHI TARAH WUZU KARNE K BAAD KALMA E SHAHADAT PADHNE WALA JANNAT MEIN JAYEGA

Hazrat Umar bin Khattab Razi Allahu Anhu kehte hai Rasool E Akram Sallallahu Alaihi Wa Sallam ne farmaya "Tum mein se jo shaks acchi tarah poora wuzu kare phir kahe "ASH'HADU ALLA ILAHA ILLALLAHU WA ANNA MUHAMMADAN ABDUHU WA RASOOLUHU (yaani mein gawahi deta hu k Allah k siwa koi mabood nahi aur Muhammad Sallallahu Alaihi Wa Sallam Allah k bandey aur uske rasool hai)" uske liye jannat k aatho (8) darwaazey khool diye jaate hai jis se chaahey dakhil ho". (Sahih Muslim Kitabut Taharah)

SUBAH WA SHAAM SAYYADUL ASTAGFAAR PADHNE WALA SHAKS JANNAT MEIN DAKHIL HOGA

Hazrat Shaddad bin Aous Razi Allahu Anhu kehte hai k Rasool Allah Sallallahu Alaihi Wa Sallam ne farmaya "Sabse afzal astagfaar ye hai k tum kaho "Ae Allah! to mera rabb hai tere siwa koi ila nahi tooney hi mujhe paida kiya hai mein tera banda hu, tujh se kiye hue waadey par apni istata'at k mutabiq qayam hu, apne kiye hue burey kaamo k wabaal se teri panah chahta hu, mujh par tere jo ehsanaat hai unka aetaraaf karta hu aur apne gunaaho ka iqraar karta hu, mujhe bakhs de kyunki tere siwa koi bakhashne wala nahi" Rasool Allah Sallallahu Alaihi Wa Sallam ne farmaya "Jo shaks ye kalmaat yaqeen k saath din k waqt padhey aur shaam se qabl faut ho jaye to wo jannati hai aur jisne raat k waqt yaqeen k saath ye kalmaa kahe aur subah hoone se pehle faut ho gaya wo bhi jannati hai". (Mukhtasar Sahih Bukhari Hadees no. 2070)

JIS SHAKS KI BEENAAYI KHATAM HO JAYE AUR WO US PAR SABR KARE TO JANNAT MEIN JAYEGA

Hazrat Anas bin Malik Razi Allahu Anhu kehte hai mene Rasool Allah Sallallahu Alaihi Wa Sallam ko farmate hue suna hai k "Allah ta'ala farmata hai k jab mein apne bande ko uski do mehboob cheezo (aankho) se aazmaata hu aur wo us par sabr karta hai to uske badle mein use jannat deta hu". (Sahih Bukhari Kitabul Marz)

MAA BAAP KI KHIDMAT KARNE WALA JANNAT MEIN JAYEGA

Hazrat Abu Hurairah Razi Allahu Anhu Nabi E Akram Sallallahu Alaihi Wa Sallam se riwayat karte hai k Aap Sallallahu Alaihi Wa Sallam ne irshad farmaya "Us shaks ki naak khaak aalood ho ruswa aur zaleel ho halaak ho jisne apne waledayn mein se kisi ek ko budhaape mein paya phir (unko raazi karke) jannat mein dakhil na hua". (Sahih Muslim Kitabul Birr wa Silah)

MUSALMANO SE KISI PARESHANI YA TAKLEEF KO DOOR KARNE WALA SHAKS JANNAT MEIN JAYEGA

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Ek darakht musalmano ko takleef deta tha ek shaks aaya usne wo darakhat kaat diya aur jannat mein chala gaya". (Sahih Muslim Kitabul Birr Wa Silah)

BEEMARI PAR SABR KARNE WALA JANNAT MEIN JAYEGA

Hazrat Ata bin Abi Ribah Rahimahullah kehte hai Hazrat Abdullah bin Abbas Razi Allahu Anhu ne mujhse kaha kya mein tujhe jannati aurat na dikhao? mene arz kiya kyu nhi? Hazrat Abdullah bin Abbas Razi Allahu Anhu ne (ek aurat ki taraf irsharah karke) kaha ye kaali aurat Nabi E Akram Sallallahu Alaihi Wa Sallam ki khidmat mein hazir hui aur arz kiya mein mirgi ki mareez hu aur (mirgi k doraan) mera satar khul jata hai Aap Allah ta'ala se mere liye dua farmaiye (Allah mujhe sehat ata farmaye) Aap Sallallahu Alaihi Wa Sallam ne irshad farmaya "Agar tu chahey to sabr kar tere liye jannat hai aur agar tu chahey to Allah se tere liye dua karta hu wo tujhe sehat ata farma dega (is soorat mein jannat ka wada nahi karta) us aurat ne arz kiya mein sabr karungi lekin saath ye bhi arz kiya (mirgi k dooran) mera satar khul jata hai Allah ta'ala se dua farmaiye k mera satar na khuley Rasool E Arkam Sallallahu Alaihi Wa Sallam ne uske liye dua farmayi". (Sahih Bukhari Kitabus Sabr)

NABI, SHAHEED, SIDDEQUE, PAIDA HOTE HI FAUT HONE WALA BACCHA AUR ALLAH KI RAZA K LIYE APNE BHAAYI SE MULAQAAT KARNE WALA JANNAT MEIN JAYEGA
APNE SHOHAR SE MUHABBAT KARENE WALI, ZIYADAH BACCHO KO JANAM DENE KI TAKLEEF UTHAANE WALI AUR APNE SHOHAR K ZULM PAR SABR KARNE WALI KHATOORN JANNAT MEIN JAYEGI

Hazrat Kaab bin Ujrah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Kya mein tumhey jannat mein jaane wale mardo k baare mein na batlau? (suno!) Nabi jannati hai, shaheed jannati hai, siddeque jannati hai, paida hote hi faut hone wala baccha jannati hai, door daraaz se apne bhai ko mehaz Allah ki raza k liye milne wala jannati hai, kya mein tumhey jannat mein jaane wali aurato k baare mein na batlau? apne shohar se muhabbat karne wali, ziyaadah baccho ko janam dene (ki takleef uthaane) wali, aur wo naik aurat k jiska shohar us par zulam kare to kahe "Mera haath tere haath mein hai us waqt tak nahi sooungi jab tak to raazi na ho jaye". (Tabraani, Sahih Jamey Sageer Hadees no. 2601) 


SHARIYAT KI HALAAL KARDAH CHEEZO KO HALAAL AUR HARAAM KARDAH CHEEZO KO HARAAM JAAN'NE WALA YAANI UN PAR AMAL KARE WALA JANNAT MEIN JAYEGA

Hazrat Jabir Razi Allahu Anhu se riwayat hai k ek aadmi ne Rasool Allah Sallallahu Alaihi Wa Sallam se sawaal kiya "Ya Rasool Allah Sallallahu Alaihi Wa Sallam agar mein farz namazey ada karu, ramazaan k roozey rakkhu (shariyat ki) halaal kardah cheezo ko halaal jaanu aur haraam kardah cheezo ko haraam jaanu lekin us se ziyaadah kuch na karu, to kya mein jannat mein chala jaunga?" Aap Sallallahu Alaihi Wa Sallam ne irshad farmaya "han". (Sahih Muslim Kitabul Emaan)


DO NA-BAALIGH BACCHO K FAUT HONE PAR SABR KARNE WALE WALEDAYN JANNAT MEIN JAYENGEY

Hazrat Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne ansaar ki aurato se farmaya "Tum mein jiske teen bacche faut ho jaye aur wo Allah ki raza k liye sabr kare to jannat mein jayegi ek aurat ne arz kiya ya Rasool Allah Sallallahu Alaihi Wa Sallam! agar do bacche mare to uske liye kya hukm hai?" Aap Sallallahu Alaihi Wa Sallam ne irshad farmaya "Agar do mare tab bhi yahi sawab hai". (Sahih Muslim Kitabul Birr Wa Silah)


HAR NAMAZ K BAAD AAYATAL KURSI PADHNE WALA JANNAT MEIN JAYEGA

Hazrat Abu Umama Razi Allahu Anahu kehte hai Rasool Allah Sallallahu Alaihi Wa Sallam ne farmaya "Jisne har namaz k baad aayatal kursi padhi use maut k siwa koi cheez jannat mein jaane se nahi rook sakti". (Tabraani, Ibne Hibban, Sunan Nasaayi, Silsila Ahadees E Saheeya Hadees no. 972)


"LA HAULA WA KUWWATA ILLAH BILLAH" KA KASRAT SE WAZEEFA KARNE WALA JANANT MEIN JAYEGA

Hazrat Abu Zarr Razi Allahu Anhu kehte hai k mujhe Rasool Allah Sallallahu Alaihi Wa Sallam ne farmaya "Kya mein tujhe jannat k khazaano mein se ek khazaane k baare mein aagaah na karu? mene arz kiya "Ya Rasool Allah Sallallahu Alaihi Wa Sallam zaroor aagaah farmaiye" Aap Sallallahu Alaihi Wa Sallam ne farmaya "LA HAULA WALA KUWWATA ILLAH BILLAH"(Tarjuma: Naiki karne aur buraayi se bachne ki taaqat Allah ki tofeeq k bagair nahi)". (Sahih Sunan Ibne Maja Hadees no. 3083)


"SUBHANALLAHI WA BI HAMDIHI" KA WAZEEFA KARNE WALA JANNAT MEIN JAYEGA

Hazrat Jabir Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Jisne "SUBHANALLAHI WA BI HAMDIHI"(Tarjuma: Azmat wala Allah apni hamd k saath paak hai) kaha uske liye jannat mein khajoor ka ek darakht lagaaya jata hai". (Sahih Jamey Tirmizi Hadees no. 2757)


JO SHAKS APNE MAAL KI WAJAH SE BE-GUNAH QATAL KIYA GAYA WO JANNAT MEIN JAYEGA

Hazrat Abdullah bin Umar wa bin Aas Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jo shaks zulm k saath apne maal ki wajah se qatal kiya gaya uske liye jannat hai". (Sunan Nasaayi Kitabul Tahreemud Damm)


JIS AURAT NE HAMAL SAAQIT HONE PAR SABR KIYA WO JANNAT MEIN JAYEGI

Hazrat Muawiyah bin Jabal Razi Allahu Anhu se riwayat hai k Nabi E Akram Sallallahu Alaihi Wa Sallam ne farmaya "Us zaat ki qasam jiske haath mein meri jaan hai saaqit hamal baccha apni maa ko ungli se pakad kar jannat mein le jayega ba-shart k usne sawaab ki niyat se sabr kiya ho". (Sunan Ibne Maja Kitabul Jana'iz)


HAQQ K MUTABIQ FAISLA KARNE WALA QAAZI JANNAT MEIN JAYEGA

Hazrat Bureedah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Do qaazi jahannam mein jayengey aur ek qaazi jannat mein jayega, wo qaazi jisne haqq pehchana aur uske mutabiq faisla kiya wo jannat mein jayega aur wo qaazi jisne haqq pehchana aur jaante boojhte zulm kiya (yaani faisla haqq k khilaf kiya) aur wo qaazi jisne ilm (tehqeeq) k bagair faisla kiya dono jahannam mein jayenge". (Mustadrak E Haakim, Sahih Jamey Sageer Hadees no. 1474)


KISI MUSALMAN BHAI KI ADM MOJOODGI MEIN USKI IZZAT KA DIFA KARNE WALA JANNAT MEIN JAYEGA

Hazrat Asma bintey Yazeed Razi Allahu Anha kehti hai Rasool Allah Sallallahu Alaihi Wa Sallam ne farmaya "Jisne kisi bhai ki adm mojoodgi mein uski izzat se buraayi ko door kiya Allah par uska haqq hai k wo use aagh se aazaad kare". (Musnad Ahmad, Sahih Jamey Sageer Hadees no. 6116)


KISI SE SAWAAL NA KARNE WALA JANNAT MEIN JAYEGA

Hazrat Sobaan Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jo shaks mujhe is baat ki zamanat de k wo kisi se sawaal nahi karega mein use jannat ki zamanat deta hu". (Sunan Abu Dawood Kitabuz Zakaat)


GUSSA PEENE WALA JANNAT MEIN JAYEGA

Hazrat Abu Dardah Razi Allahu Anhu kehte hai Rasool Allah Sallallahu Alaihi Wa Sallam ne farmaya "Gussa na kar tere liye jannat hai". (Tabraani, Sahih Jamey Sageer Hadees no. 7351)


SUBAH AUR FAJAR KI NAMAZ BA-QAIDAGI SE ADA KARNE WALA JANNAT MEIN JAYEGA

Hazrat Abu Bakr bin Moosa Ash'ari Razi Allahu Anhu apne baap se riwayat karte hai k Rasool Allah Sallallahu Alaihi Wa Sallam ne farmaya "Jisne thande waqt ki do namazey padhi wo jannat mein dakhil hua". (Sahih Muslim Kitabus Salaat)


ZUHAR SE QABL CHAAR RAKAAT SUNNAT PAR MUDAWAMAT IKHTIYAAR KARNE WALA JANNAT MEIN JAYEGA

Hazrat Ummey Habeeba Razi Allahu Anha kehti hai Rasool Allah Sallallahu Alaihi Wa Sallam ne farmaya "Jisne zuhar se pehle chaar rakaat ada ki Allah ta'ala us bande k liye jahannam ki aagh haraam kar dengey". (Sunan Tirmizi Kitabus Salaat)


MUSALSAL CHALEES ROOZ TAK TAKBEER E AULA K SAATH PANCHO NAMAZEY PADHNE WALA JANNAT MEIN JAYEGA

Hazrat Anas bin Malik Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jisne chalees din tak (paancho namazey) takbeer e aula k saath ba-jamaat ada ki uske liye do cheezo se aazaadi likhi jaati hai aagh se aur nifaaq se". (Sunan Tirmizi Abwabus Salaat)


DARJ E ZAIL SAAT AADMI JANNAT MEIN JAYENGEY
1. AADIL HAKIM, 2. JAWANI KI UMAR MEIN IBADAT KI RAGBAT RAKHNE WALA, 3. ZIYAADAH WAQT MASJID MEIN GUZAARNE WALA, 4. ALLAH K LIYE DOOSRE SE MUHABBAT KARNE WALA, 5. TANHAAYI MEIN ALLAH K DARR SE ROONE WALA, 6. ALLAH K DARR SE HASEEN WA JAMEEL AURAT KI DAWAT E GUNAH SE RUKNE WALA, 7. ALLAH KI RAAH MEIN KHUFYA KHARCH KARNE WALA

Hazrat Abu Saeed Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jis rooz koi saaya nahi hoga us rooz Allah ta'ala saat aadmiyo ko apne (arsh) k saaye taley jagah dega:
1. Aadil hakim,
2. Allah ki ibadat mein mashgool nojawan
3. Wo shaks jiska dil masjid se nikalne k baad wapas aane tak masjid mein latka rahe
4. Allah k liye ek doosre se muhabbat karne wale jinka milna aur alag hona khalis Allah k liye hi ho
5. Wo shaks jisne tanhaayi mein Allah ko yaad kiya aur uski aankho se aansu beh nikle
6. Wo shaks jiske unchey khandaan ki khoobsurat aurat ne dawat e gunah di aur usne kaha "Mein Allah azz wa jall se darta hu"
7. Wo shaks jisne is tarah chipa kar sadqa kiya k baaye haath tak ko pata na chale k daaye ne sadqa kiya hai". (Sunan Tirmizi Kitabuz Zuhad)


DOOSRO KO MAAF KARNE WALA JANNAT MEIN JAYEGA

Hazrat Muaaz bin Anas Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jo shaks intaqaam lene par poori tarah qadir tha lekin (intaqaam na liya aur) gussa pee gaya (qayamat k din) Allah ta'ala use saari makhlooq k saamne bulayenge aur use hoor e aaeyn muntakhab karne ka ikhtiyaar diya jayega k jis se chaahe nikah karle". (Musnad Ahmad, Sahih Jamey Sageer Hadees no. 6394)


TAKABBUR, KHAYANAT, QARZ SE PAAK SHAKS JANNAT MEIN JAYEGA

Hazrat Sobaan Razi Allahu Anhu kehte hai Rasool Allah Sallallahu Alaihi Wa Sallam ne farmaya "Jo shaks takabbur, khayanat aur qarz se paak mara wo jannat mein dakhil hoga". (Sunan Tirmizi Baab Galool)


AZAAN KA JAWAB DENE WALA JANNAT MEIN DAKHIL HOGA

Hazrat Abu Hurairah Razi Allahu Anhu kehte hai hum Rasool Allah Sallallahu Alaihi Wa Sallam k saath they Hazrat Bilaal Razi Allahu Anhu khade hue aur azaan di jab Hazrat Bilaal Razi Allahu Anhu khamoosh hue to Aap Sallallahu Alaihi Wa Sallam ne irshad farmaya "Jisne mu'azzin jese kalmaat yaqeen k saath dohraaye wo jannat mein dakhil hoga". (Sunan Nasaayi Kitabul Azaan)

GUSAL KA BAYAN

GUSAL KA BAYAN

 

Bismillahirrahmanirraheem

GUSAL E JANABAT KA TAREEQA:

Gusal e janabat karne wala sabse pehle gusal karne ka iraadah yaani niyat karega

Ummul Momineen Hazrat Maimoona Razi Allahu Anha bayan karti hai k Rasool Allah Sallallahu Alaihi Wa Sallam ne gusal ka iraadah farmaya to sabse pehle dono haath dhooye, phir sharm-gaah ko dhooya, phir baaya haath, jis se sharm-gaah ko dhooya tha, zameen par ragda phir usko dhoya phir kulli ki aur naak mein paani dala, phir chehra dhooya, phir kohniyo tak haath dhooye phir sar par paani dala aur baalo ki jadoo tak paani pahunchaya, teen baar sar par paani dala, phir tamaam badan par paani dala, phir jaha aapne gusal kiya tha us jagah se hat kar pao dhooye. (Sahih Bukhari Kitabul Gusal Hadees no. 265, Sahih Muslim Kitabul Haiz Hadees no. 317)

Hazrat Maimoona Razi Allahu Anha farmati hai "mene gusal k baad jism saaf karne k liye Rasool Allah Sallallahu Alaihi Wa Sallam ko kapda diya magar aapne nahi liya". (Sahih Bukhari Hadees no. 266, Sahih Muslim Hadees no. 317)

Hazrat Hafiz Ibne Hajar Rahimahullah farmate hai "Kisi hadees mein (gusal e janabat ka wuzu karte waqt) sar k masah ka zikr nahi hai". (Fathul Baari Sharah Sahih Bukhari)

Hazrat Abdullah bin Umar Razi Allahu Anhu Rasool Allah Sallallahu Alaihi Wa Sallam k gusal e janabat mein wuzu ka zikr karte hue farmate hai k aapne sar ka masah nahi kiya balkey us par paani dala, Imam Nasaayi ne us hadees par ye baab baandha hai "Janabat k wuzu mein sar k masah ko tark karna". (Nasaayi Kitabul Gusal Hadees no. 420, 1:205)

Imam Abu Dawood farmate hai "Mene Imam Ahmad se sawal kiya k junbi jab (gusal se qabl) wuzu kare to kya sar ka masah bhi kare? Aapne farmaya k wo masah kis liye kare jab k wo apne sar par paani dalega".


EK HI BARTAN MEIN MIYAA BEEWI KA IKATTHEY GUSAL KARNA:

Ummul Momineen Hazrat Ayesha Razi Allahu Anha ne kaha "Mein aur Rasool Allah Sallallahu Alaihi Wa Sallam ek bartan se nahaate aur dono us se chullu bhar bhar kar lete they". (Sahih Bukhari Kitabul Gusal Hadees no. 273, Sahih Muslim Hadees no. 319)

Hazrat Abdullah bin Abbas Razi Allahu Anhu se riwayat hai k Nabi E Akram Sallallahu Alaihi Wa Sallam ki zooja e mohtarma ne ek lagan se paani le kar gusal kiya, Nabi E Akram Sallallahu Alaihi Wa Sallam ne lagan mein bachey hue paani se wuzu karna chaaha to unhone arz ki Ae Allah k Rasool Sallallahu Alaihi Wa Sallam! mein junbi thi, aapne farmaya "Beshak paani junbi (yaani na-paak) nahi hota". (Abu Dawood Kitabut Taharah Hadees no. 68)


GUSAL PARDEY MEIN KARNA CHAHIYE:

Hazrat Ummey Haani Razi Allahu Anha binte Abu Talib se riwayat hai k mein Rasool Allah Sallallahu Alaihi Wa Sallam k paas gayi, Aap Sallallahu Alaihi Wa Sallam gusal kar rehey they aur Hazrat Fatima Razi Allahu Anha aap par kapde se pardah kiye hue thi. (Sahih Bukhari Kitabul Gusal Hadees no. 280, Sahih Muslim Kitabul Haiz Hadees no. 336)


GUSAL E JANABAT KA WUZU KAAFI HAI:

Ummul Momineen Hazrat Ayesha Razi Allahu Anha se riwayat hai k Rasool Allah Sallallahu Alaihi Wa Sallam gusal (janabat) k baad wuzu nahi karte they. (Tirmizi Kitabut Taharah Hadees no. 107, Abu Dawood Kitabut Taharah Hadees no. 250, Ise Imam Hakim, Zahbi aur Tirmizi ne Sahih kaha)

Yaani gusal k shuru mein wuzu karte they, usko kaaf jaante aur (namaz k liye) dobaarah wuzu nahi farmate they, lekin isme ye ehtayaat zaroori hai k doraan e gusal, sharm-gaah ko haat na lage.


JUMA K DIN GUSAL:

Sayyadna Ibne Umar Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Jab tum mein se koi shaks namaz k liye aaye to use gusal karna chahiye". (Sahih Bukhari Hadees no. 877, Sahih Muslim Hadees no. 844)

Sayyadna Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Har musalman par haqq hai k hafte mein ek din (juma ko) gusal kare, us mein apna sar dhooye aur apna badan dhooye". (Sahih Bukhari Kitabul Juma Hadees no. 897, Sahih Muslim Kitabul Juma Hadees no. 849)

Hazrat Abu Saeed Khudri Razi Allahu Anhu kehte hai k Rasool Allah Sallallahu Alaihi Wa Sallam ne farmaya "Juma k din har baaligh musalman par nahaana wajib hai". (Sahih Bukhari Kitabul Juma Hadees no. 879, Sahih Muslim Kitabul Juma Hadees no. 846)

Hazrat Ibne Joozi Rahimahullah farmate hai "Juma k din gusal wajib hai kyunki uski ahadees ziyaadah sahih aur qavi hai, ibne Hazam aur Allama Shokaani Rahimahullah ne bhi isi mazhab ko ikhtiyaar kiya hai".


MAYYAT KO GUSAL DENE WALA GUSAL KARE:

Hazrat Abu Hurairah Razi Allahu Anhu riwayat karte hai k Rasool Allah Sallallahu Alaihi Wa Sallam ne farmaya "Jo shaks murde ko gusal de use chahiye k wo khud bhi nahaaye". (Abu Dawood Kitabul Jana'iz Hadees no. 3161, Tirmizi Kitabul Jana'iz Hadees no. 993, Ibne Maja Hadees no. 1463, Ise Ibne Hibban 751 aur Ibne hazam 2:23 ne sahih kaha)

Hazrat Ibne Abbas Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Tum par mayyat ko gusal dene se koi gusal wajib nahi kyunki tumhari mayyat taahir marti hai najis nahi, lihaza tumhey haath dhoo lena hi kaafi hai". (Behaqui 1:306, Ise Hakim aur Zahbi ne sahih aur Ibne Hazam ne hasan kaha)

Dono ahadees k milaane se masla ye saabit hua k jo shaks mayyat ko gusal de, uske liye nahana mustahab hai, zaroori nahi, chunanchey Ibne Umar Razi Allahu Anhu farmate hai "Hum mayyat ko gusal dete (phir) hum mein se baaz gusal karte aur baaz na karte". (Behaqui 1:306, Hafiz ibne Hajar ne ise sahih kaha)


NOO-MUSLIM GUSAL KARE:

Hazrat Qais bin Aasim Razi Allahu Anhu se riwayat hai k jab wo musalman hue to Rasool Allah Sallallahu Alaihi Wa Sallam ne unhey hukm diya k paani aur bairi k patto k saath gusal karey. (Abu Dawood Kitabut Taharah Hadees no. 355, Tirmizi Kitabul Juma Hadees no. 605, Ise Imam Noovi ne hasan, Imam Ibne Khuzaima 1:26 Hadees 154-155 aur Ibne Hibban 234 ne sahih kaha)


EIDAYN K ROOZ GUSAL:

Hazrat Nafey Rahimahullah kehte hai k Sayyadna Ibne Umar Razi Allahu Anhu eid ul fitr k rooz gusal kiya karte they. (Muatta Imam Malik Hadees no. 1:17)

Hafiz ibne Abdul Barr Rahimahullah farmate hai k eidayn k din gusal k baare mein Rasool Allah Sallallahu Alaihi Wa Sallam se koi hadees sabit nahi, Sahaba e Kiraam Razi Allahu Anhum ka amal hai, Ahle Ilm ki ek jamaat k nazdeek ye gusal, gusal e juma par qayaas karte hue mustahab hai.

Sayyadna Ali Razi Allahu Anhu ne farmaya "Juma, Arfa, Qurbaani aur Eid ul fitr k din gusal karna chahiye". (Behaqui 3:278)


AHRAAM KA GUSAL:

Hazrat Zaid bin Saabit Razi Allahu Anhu se riwayat hai k hajj ka ahraam baandhte waqt Rasool Allah Sallallahu Alaihi Wa Sallam ne gusal farmaya. (Tirmizi Kitabul Hajj Hadees no. 830, Imam Tirmizi ne ise hasan kaha)


MAKKA MEIN DAKHIL HOONE KA GUSAL:

Sayyadna Ibne Umar Razi Allahu Anhu farmate hai k Rasool Allah Sallallahu Alaihi Wa Sallam makka mein dakhil hoote waqt gusal karte they. (Sahih Bukhari Kitabul Hajj Hadees no. 1573, Sahih Muslim Kitabul Hajj Hadees no. 1259)


MISWAAK KA BAYAN:

Sayyadna Huzaifa Razi Allahu Anhu farmate hai "Rasool Allah Sallallahu Alaihi Wa Sallam jab raat ko tahajjud k liye uthte to miswaak karte". (Sahih Bukhari Kitabul Wuzu Hadees no. 245, Sahih Muslim Kitabut Taharah Hadees no. 255)

Sayyadna Ibne Abbas Razi Allahu Anhu farmate hai "Nabi Rahmat Sallallahu Alaihi Wa Sallam raat ko har do rakaat k baad miswaak karte". (Sahih Muslim Kitabut Taharah Hadees no. 256)

Sayyadna Ayesha Razi Allahu Anha se riwayat hai k Rasool Allah Sallallahu Alaihi Wa Sallam ne farmaya "Miswaak muh k liye taharat ka sabab aur Allah ki raza-mandi ka zariya hai". (Nasaayi Kitabut Taharah Hadees no. 5, Ise Imam Noovi aur Ibne Hibban ne sahih kaha)

Sayyadna Ummey Salma Razi Allahu Anha se riwayat hai k Rasool Allah Sallallahu Alaihi Wa Sallam ne farmaya "Jab bhi mere paas Jibraeel Alaihis Salaam aate to mujhe miswaak karne ka hukm karte they mujhe khatrah la haqq hua k mein apne muh ki ungli jaanib na cheer lu". (Behaqui 7: 49, Imam Bukhari ne is hadees ko hasan kaha hai)

Sayyadna Abu Hurairah Razi Allahu Anhu se riwayat hai k Rasool Allah Sallallahu Alaihi Wa Sallam ne farmaya "Aagar mein apni ummat k liye mushkil na jaanta to har namaz se pehle miswaak karne ka hukm deta". (Sahih Bukhari Kitabul Juma Hadees no. 887, Sahih Muslim Kitabut Taharah Hadees no. 252)

NIFAAS KA HUKM

NIFAAS KA HUKM

Bismillahirrahmanirrahaam

Bacchey ki paidaish k baad jo khoon aata hai use nifaas kehte hai

Hazrat Ummey Salma Razi Allahu Anha farmati hai k nifaas wali auratey Rasool Allah Sallallahu Alaihi Wa Sallam k zamaney mein 40 din baitha karti thi (Namaz wagairah nahi padhti thi). (Abu Dawood Kitabut Taharah Hadees no. 311, Tirmizi Kitabut Taharah Hadees no. 139, Ibne Maja Hadees no. 648, ise Imam Hakim (1:175) aur Hafiz Zahbi ne sahih kaha, jabke Imam Noovi ne hasan kaha)

Aksar Sahaba Razi Allahu Anhum aur Taaba'een Rahimahullh k nazdeek nifaas k khoon ki ziyaadah se ziyaadah muddat chalees din hai agar chalees rooz k baad bhi khoon jaari rahe to aksar ahle ilm k nazdeek wo khoon istihaaza hai jis mein aurat har namaz k liye wuzu karti hai, nifaas ki kam az kam muddat ki koi hadd nahi

Sayyadna Anas Razi Allahu Anhu farmate hai "Nifaas ki muddat chalees din hai illa ye k khoon pehle hi band ho jaye". (Behaqui)

Nifaas aur Haiz k khoon ka hukm ek jesa hai yaani un halaat mein namaz, rooa aur jima mana hai.

Rasool Allah Sallallahu Alaihi Wa Sallam Ayyaam e nifaas ki namazo ki qaza ka hukm nahi dete they. (Abu Dawood Kitabut Taharah Hadees no. 312, Ise Imam Hakim aur Zahbi ne sahih kaha)

ISTIHAAZA KA MASLA

ISTIHAAZA KA MASLA

Bismillahirrahmanirraheem

Istihaza wo khoon hota hai jo ayyaam e haiz k baad khaki ya zard rang ka jaari hota hai, ye ek marz hai, jab aurat apne haiz ki iddat k din poore karle phir use gusal karke namaz shuru kar deni chahiye kyunki khoon e istihaaza ka hukm khoon e haiz k hukm se mukhtalif hai

Hazrat Ayesha Razi Allahu Anha se riwayat hai k Hazrat Fatima bintey Jaish Razi Allahu Anha Rasool Allah Sallallahu Alaihi Wa Sallam ki khidmat mein aayi aur arz kiya "Ae Allah k Rasool Sallallahu Alaihi Wa Sallam! mujhe khoon e istihaaza aata hai aur mein (boja khoon istihaaza) paak nahi hoti kya mein namaz chood du? Aap Sallallahu Alaihi Wa Sallam ne farmaya "Nahi" khoon e istihaaza ek (androoni) ragg se (behta) hai ye khoon haiz nahi hai, pas jab tujhe haiz ka khoon aaye to namaz chood de aur jis waqt khoon e haiz band ho jaye (aur khoon e istihaaza shuru ho) to apne istihaaza k khoon ko dho aur namaz padh". (Sahih Bukhari Kitabul Haiz Hadees no. 306, Sahih Muslim Kitabul Haiz Hadees no. 333)

Hazrat Fatima binte Abi Jaish Razi Allahu Anha ko Rasool Allah Sallallahu Alaihi Wa Sallam ne farmaya "Haiz ka khoon siyaah rang ka hota hai aur pehchana jata hai agar ye aaye to namaz se ruk ja aur agar koi aur rang ho to wuzu kar aur namaz pad is liye k ye rang (istihaaza) ka khoon hai". (Abu Dawood Kitabul Taharah Hadees no. 286)

Hazrat Ummey Ateeya Razi Allahu Anha bayan karti hai k "Hum haiz k alawa baaqi dino mein peele ya matyaale rang ki kuch parwah nahi karti thi". (Sahih Bukhari Hadees no. 326, Abu Dawood Hadees no. 307)

Hasil kalaam ye k mustahaaza paak aurat ki tarah hai

Khoon e haiz baloogat ki alamat hai agar ye aadat k mutabiq aaye to ye sehat ki alamat hai, iske bar-aks istihaaza bimaari ki alamat hai chunkey ye khoon, haiz se pehle bhi aata hai aur haiz ki muddat guzar jaane k ba-wajood nahi rukta is liye baaz khawateen use bhi haiz samajh kar namaz choode rakhti hai lihaza is masle ko ba-luzahat samajhna zaroori hai:

1. Khoon e haiz gadha, siyaah aur kisi qadr badbudaar hota hai, jab uski muddat khatam hoti hai to khake ya zard rang ka khoon agar jaari rehta hai to wo istihaaza ka khoon hai.

2. Agar khatoon, haiz aur istihaaza ka farq pehchaan leti hai to wo uske mutabiq amal karegi yaani haiz aane par namaz chood degi aur haiz k baad istihaaza k doraan har namaz k liye alag wuzu karke namaz ada karegi.

3. Agar use dono khoono ki pehchaan nahi hai albatta haiz use aadat k mutabiq aata hai to wo aadat k dino mein namaz tark karegi aur unke baad jo khoon aayega use istihaaza samjhegi.

4. Agar use dono khoono ki pehchaan nahi hai aur haiz bhi adat k mutabiq nahi aata to wo apni qareebi rishtedaar khatoon (jo mizaaj aur umar mein us jesi ho masalan behan wagairah) ki aadat k mutabiq amal karegi hatta k use pehchaan ho jaye ya uski apni aadat ban jaye. (Wallahu Aalam bis Sawaab)


MUSTAHAAZA K AHKAAM:

1. Haiz k khatimey k baad aurat gusal karegi.

2. Rasool Allah Sallallahu Alaihi Wa Sallam ne Hazrat Fatima bintey Jaish Razi Allahu Anha ko hukm diya k har namaz k liye wuzu kiya karo. (Sahih Bukhari Hadees no. 228)

3. Aurat har wo kaam karegi jo ek paak aurat karti hai yaani wo namaz ada karegi, rooza rakkhegi, aetakaaf karegi, khana kaba ka tawaaf karegi

4. Mustahaaza aurat se sohbat karna jayez hai, Jumnah bintey Jahash se riwayat hai k "Unhey istihaaza ka khoon aata tha aur unke khawind (is haal mein) unse sohbat karte they". (Abu Dawood Kitabut Taharah Hadees no. 310)

HAIZ K MASA'IL

HAIZ K MASA'IL

Bismillahirrahmanirraheem

Haiz us khoon ko kehte hai jo baligha aurat k raham se har maah nikalta hai uska kam se kam waqt ek din aur ek raat hai aur ziyaadah se ziyaadah 15 din hai, aam taur par 6 ya 7 din aata rehta hai.


HAIZ WA NIFAAS K AYYAAM MEIN MAMNOO AAMAAL:

1. NAMAZ AUR ROOZA KI MUMANIYAT:

Rasool Allah Sallallahu Alaihi Wa Sallam ne farmaya "Jab aurat haiz se hooti hai to wo namaz nahi padhti aur na rooza rakhti hai". (Sahih Bukhari Kitabul Haiz Hadees no. 304, Sahih Muslim Kitabul Emaan Hadees no. 79)

Ek aurat Muaazata ne Hazrat Ayesha Razi Allahu Anha se daryaft kiya "Kya wajah hai k haiza aurat rooze ki qaza to deti hai, namaz ki nahi? Hazrat Ayesha Razi Allahu Anha ne farmaya "Rasool Allah Sallallahu Alaihi Wa Sallam k zamaane mein hamey haiz aaya karta tha to hamey rooze ki qaza ka hukm diya jata tha magar namaz ki qaza ka hukm nahi diya jata tha". (Sahih Muslim Kitabul Haiz Hadees no. 335)


2. HAIZA SE SOHBAT KARNE KI MUMANIYAT:

Haiz ki haalat mein aurat se mujami'at karna sakhat gunah hai Allah ta'ala ne quran majeed mein farmaya "FAATAZILUN NISAA'A FIL MAHEEZ" "pas (ayyam) haiz mein aurato se kinara kashi karo (yaani sohbat na karo)"

Agar koi is gunah ka murtakib ho jaye to Nabi E Akram Sallallahu Alaihi Wa Sallam ne farmaya "Jo shaks ba-haalat e haiz apni aurat se sohbat kare to use chahiye k nisf dinaar khairaat kare". (Abu Dawood Kitabut Taharah Hadees no. 264, Tirmizi Kitabut Taharah Hadees no. 136, Imam Hakim (1:171-172) aur Zahbi ne ise sahih kaha)

Dinaar saade chaar maashey soone ka hota hai nisf dinaar sawa do maashey sona hua, soone ki qeemat sadqa kare yaani kisi mustahiq ko de de aur ayindah k liye tauba kare.

Hazrat Ibne Abbas Razi Allahu Anhu farmate hai agar haiz ka rang surk hai to ek dinaar aur agar haiz ka rang peela hai to nisf dinaar khairaat kare. (Abu Dawood Kitabun Nikah Hadee no. 2169, Tirmizi Hadees no. 137, Albani ne moqoof riwayat ko sahih kaha)

3. TAWAAF E KABA KI MUMANIYAT:

Ummul Momineen Hazrat Ayesha Razi Allahu Anha se riwayat hai k mein Rasool Allah Sallallahu Alaihi Wa Sallam k saath hajj ko gayi, raaste mein mujhe haiz shuru ho gaye, Rasool Allah Sallallahu Alaihi Wa Sallam mere paas aye aur mein roo rahi thi, Aap Sallallahu Alaihi Wa Sallam ne farmaya "Kya tujhe haiz aa gaya hai?" mene arz kiya k han! Aap Sallallahu Alaihi Wa Sallam ne farmaya "Ye Allah ta'ala ka amr hai jo usne Aadam Alaihis Salaam ki baitiyo k liye rakh diya hai pas tum har wo kaam karo jo haaji karte hai siwaye khana kaba k tawaaf k, aur wo tum (haiz se paak ho kar) gusal karne k baad karna". (Sahih Bukhari Kitabul Umrah Hadees no. 1785, Sahih Muslim Hadees no. 1216)


HAIZ AUR NIFAAS MEIN JAYEZ UMOOR:

Sayyadna Anas Razi Allahu Anhu riwayat karte hai k jab aurat haiz (yaani mahwari ka khoon) se hoti to yahoodi uske saath khate peete nahi they to Rasool Allah Sallallahu Alaihi Wa Sallam ne farmaya "Haiza se har kaam karo siwaye jima k". (Sahih Muslim Kitabul Haiz Hadees no. 302)

Yaani haiza se khana peena, uthna baithna, use choona aur boosa kinaar wagairah sab baatey jayez hai siwa e mujami'at k

Ummul Momineen Hazrat Ayesha Razi Allahu Anha riwayat karti hai k Rasool Allah Sallallahu Alaihi Wa Sallam ne mujhe (halat e haiz mein) izaar baandhne ka hukm dete, so mein izaar baandhti, Aap mujhe gale lagaate they aur mein haiz wali hoti thi. (Sahih Bukhari Kitabul Haiz Hadees no. 300, Sahih Muslim Kitabul Haiz Hadees no. 293)

Hazrat Ayesha Razi Allahu Anha se riwayat hai k Nabi E Akram Sallallahu Alaihi Wa Sallam ne masjid (mein apni aetakaaf gaah) se mujhe booriya pakdaane ka hukm diya mene kaha mein haiza hu, Aap Sallallahu Alaihi Wa Sallam ne farmaya "Tera haiz tere haath mein nahi hai". (Sahih Muslim Kitabul Haiz Hadees no. 298)

Hazrat Ayesha Razi Allahu Anha se riwayat hai "Nabi Rahmat Sallallahu Alaihi Wa Sallam meri good ko takiya bana kar quran e hakeem ki tilawat karte they halankey mein haiza hoti thi". (Sahih Bukhari Kitabul Haiz hadees no. 297, Sahih Muslim Kitabul Haiz Hadees no. 301)


HAIZA KA QURAN MAJEED PADHNA AUR ZIKR AZKAAR KARNA:

Haalat e janabat wa haiz mein quran majeed ki tilawat k haraam hoone k baare mein koi sahih hadees nhi hai.

Azkaar ki baabat Imam Noovi farmate hai "Haiza k liye tasbeeh wa tahmeed, takbeer aur daigar duwaye aur azkaar bala jima jayez hai". (Majmua)

Is ki daleel Hazrat Ayesha Razi Allahu Anha ki hadees hai Aap farmati hai mein hajj k dino mein haiza ho gayi to Rasool allah ne farmaya "Baitullah k tawaaf k alawah har wo kaam karo jo haaji karta hai". (Sahih Bukhari Kitabul Haiz Hadees no. 294, Sahih Muslim Kitabul Hajj Hadees no. 1211)

Is hadees se ye bhi wazey hua k haiza tawaaf e kaba k alawa hajj k baaqi tamaam aamaal kar sakti hai.

Hazrat Ummey Ateeya Razi Allahu Anha farmati hai k Rasool Allah Sallallahu Alaihi Wa Sallam ne haiz wali aurato ko bhi eid k rooz eid-gaah jaane ka hukm diya takey wo loogo ki takbeero k saath takbeerey kahey aur unki duwa k saath duwa kare lekin namaz na padhey. (Sahih Bukhari Kitabul Eidayn Hadees no. 981, Sahih Muslim Hadees no. 890)

Ummul Momineen Hazrat Ayesha Razi Allahu Anha farmati hai k Rasool Allah Sallallahu Alaihi Wa Sallam har haal mein Allah ka zikr karte they. (Sahih Muslim Kitabul Haiz Hadees no. 373)

In Ahadees se sabit hua k haiza aur junbi zikr, azkaar kar sakte hai.

JANABAT K AHKAAM

JANABAT K AHKAAM

Bismillahirrahmanirraheem

Wajoob e gusal ki haalat ko "Janabat" kehte hai, jis insaan par gusal wajib ho wo junbi kehlata hai junbi gusal karne se pehle na to namaz ada kar sakta hai aur na hi kaba ka tawaaf kar sakta hai
Mandarja zail haalato mein musalman mard aur aurat par gusal karna farz ho jata hai:

1. Josh k saath mani kharij hone k baad (is mein ehtalaam bhi dakhil hai)
2. Sohbat k baad
3. Haiz k baad
4. Nifaas k baad (wo khoon jo bacchey ki paidaish par jaari hota hai)
5. Marne k baad mayyat ka gusal
6. Kafir jab islam qubool kare


SOHBAT AUR GUSAL E JANABAT:

Sahaba E Kiraam Razi Allahu Anhum k darmiyaan gusal e janabat ka ek masla zair e bahas aaya, ek garooh kehta tha k gusal sirf dakhool par farz ho jata hai inzaal shart nahi, doosra garooh bayan karta tha k wajoob e gusal k liye dakhool k saath inzaal bhi shart hai, Hazrat Abu Mosa Razi Allahu Anhu ne Ummul Momineen Hazrat Ayesha Razi Allahu Anha se daryaft kiya, Hazrat Ayesha Siddeqa Razi Allahu Anha ne kaha k Rasool Allah Sallallahu Alaihi Wa Sallam ne farmaya "Jab mard, aurat ki chaar shaako k darmiyaan baith jaye aur uska mahal khatnah aurat k mahal khatnah k saath mas kare to gusal wajib ho jata hai". (Sahih Muslim Kitabul Haiz Hadees no. 349)

Masla ye sabit hua k sirf sharmgaaho k milne par hi mard aur aurat junbi ho jaate hai aur unpar gusal wajib ho jata hai, inzaal shart nahi hai.

Rasool Allah Sallallahu Alaihi Wa Sallam ne farmaya "Jab tum aurat ki chaar shaako k darmiyaan baith kar sohbat karo to tum par gusal wajib ho gaya, agarchey mani na nikle". (Sahih Bukhari Kitabul Gusal Hadees no. 291, Sahih Muslim Kitabul Haiz Hadees no. 348)

AURAT BHI MOHTALIM HOTI HAI:

Ummul Momineen Hazrat Salma Razi Allahu Anha riwayat karti hai k Ummey Saleem Razi Allahu Anha ne Rasool Allah Sallallahu Alaihi Wa Sallam se kaha, ae Allah k Rasool Sallallahu Alaihi Wa Sallam! yaqeenan Allah haqq se nahi sharmaata (mein bhi aap se masla poochti hu) kya aurat par gusal hai jab k usko ehtalaam ho? Aap Sallallahu Alaihi Wa Sallam ne farmaya "Han" lekin jab paani (mani ka nishan) dekhey, us par Ummey Salma Razi Allahu Anha ne arz kiya Ae Allah k Rasool Sallallahu Alaihi Wa Sallam! kya aurat ko bhi ehtalaam hota hai? Aap Sallallahu Alaihi Wa Sallam ne farmaya "Han (hota hai) tera dahina haath khaak aalood ho". (Sahih Bukhari Kitabul Gusal Hadees no. 282, Sahih Muslim Kitabul Haiz Hadees no. 313)

Is mein aakhiri jumla bad-dua nahi, mehaz ek muhawara hai, muraad tanbiha karna hota hai
Maloom hua k aurat ya mard neend se uth kar agar tari yaani nishaan e mani dekhey to (ye ehtalaam ki alamat hai lihaza) us par gusal karna farz ho jata hai aur agar ehtalaam ki kaifiyat unhey yaad ho lekin nishan na paaye to gusal farz nahi hoga aesi soorat mein shak karne ki zaroorat nahi hai.


JUNBI K BAALO KA MASLA:

Hazrat Ummey Salam Razi Allahu Anha riwayat karti hai k mene kaha Ae Allah k Rasool Sallallahu Alaihi Wa Sallam! mein apne sar k baal khoob mazboot goondati ho, kya mein unhey gusal e janabat k waqt khool du? Aapne farmaya "unka khoolna zaroori nahi, tere liye kaafi hai k teen lapp paani apne sar par daale, phir apne saare badan par paani bahaye, pas tu paak ho jayegi". (Sahih Muslim Kitabul Haiz Hadees no. 330)

Hazrat Ayesha Razi Allahu Anha ko khabar mili k Hazrat Abdullah bin Umar Razi Allahu Anhu aurato ko gusal e janabat k liye baal khoolne ka hukm dete hai aap farmane lagi, Ibne Umar Razi Allahu Anhu par tajjub hai unhone aurato ko takleef mein daal diya wo unhey sar mundhwaane ka hukm kyu nahi de dete, mein aur Rasool Allah Sallallahu Alaihi Wa Sallam ek hi bartan mein gusal karte aur mein apne baal (khoole bagair) sar par teen chullu se ziyadah paani nahi daalti thi. (Sahih Muslim Kitabul Haiz Hadees no. 331)

Maloom hua gusal e janabat k liye baal khoolne ki zaroorat nahi magar ye hukm sirf gusal e janabat ka hai, gusal e haiz k liye baalo ko khoolna zaroori hai.

Hazrat Ayesha Razi Allahu Anha se riwayat hai k unhey Rasool Allah Sallallahu Alaihi Wa Sallam ne gusal e haiz k liye farmaya "Apne baal kholo aur gusal karo". (Ibne Maja Kitabut Taharah Hadees no. 641, Busairi ne kaha k iske ravi siqa hai)


JUNBI K SAATH MILNA JULNA:

Hazrat Abu Hurairah Razi Allahu Anhu riwayat karte hai k ek din ba-haalat e janabat mene Rasool Allah Sallallahu Alaihi Wa Sallam se mulaqaat ki, Aap Sallallahu Alaihi Wa Sallam ne mera haath pakda aur mein Aapke saath ho liya, Aap Sallallahu Alaihi Wa Sallam ek jagah baith gaye aur mein chupke se nikal gaya aur ghar ja kar gusal kiya phir wapas aaya, Aap Sallallahu Alaihi Wa Sallam abhi bhi baithey hue they, Aap Sallallahu Alaihi Wa Sallam ne pucha "Ae Abu Hurairah! tu kaha gaya tha" mene sara haal keh sunaya to Aap Sallallahu Alaihi Wa Sallam ne farmaya "Subhan Allah, tehqeeq e momin na-paak nahi hota". (Sahih Bukhari Kitabul Gusal Hadees no. 283, Sahih Muslim Kitabul Haiz Hadees no. 371)

Nabi Rahmat Sallallahu Alaihi Wa Sallam ka ye farmaan k momin na-paak nahi hota, iska matlab ye hai k momin najis aur paleed nahi hota, janabat, hukmi najasat hai, hasi nahi yaani shariyat ne maslehat ki bina par ek haalat mein hukman us par gusal wajib kiya hai, pas junbi k saath milna julna, uthna baithna, ikhtataat wa irtabaat aur khana peena sab jayez hai.


MAZI K KHARIJ HOONE SE GUSAL WAJIB NAHI HOTA:

Sayyadna Ali Razi Allahu Anhu ko mazi kasrat se aati thi, Aap ko masla maloom na tha k mazi k kharij hoone par gusal wajib hota hai ya nahi, chunkey Rasool Allah Sallallahu Alaihi Wa Sallam k damaad they is liye bil mashaafah daryaft karte hijaab aya to apne doost Hazrat Miqdaad Razi Allahu Anhu se kaha k wo masla daryaft kare, Hazrat Miqdaad Razi Allahu Anhu ne Nabi E Akram Sallallahu Alaihi Wa Sallam se pucha, Aap Sallallahu Alaihi Wa Sallam ne farmaya "Agar mazi kharij ho to sharmgaah ko dhoo lo aur (namaz k waqt) wuzu karo". (Sahih Bukhari Kitabul Wuzu Hadees no. 178, Sahih Muslim Kitabul Haiz Hadees no. 303)

Neez farmaya "Agar kapde par jaha mazi lagi ho ek chullu paani le kar chidak lena kaafi hai". (Abu Dawood Kitabut Taharah Hadees no. 210, Tirmizi Kitabut Taharah Hadees no. 115, Imam Tirmizi ne ise hasan sahih kaha)


MAZI, MANI, WADI KA FARQ:

Mazi: Us chipakte hue lais-daar paani ko kehte hai jo shahoot k waqt zikr k sire par namudaar hota hai.

Mani: Azu makhsoos se lazzat aur josh k saath tapak kar kharij hoone wala safaid maada hota hai jis se insaan paida hota hai aur uske khurooj se aadmi par gusal farz ho jata hai.

Wadi: Wo gaadha safaid paani jo paishaab se qabl ya baad kharij hota hai, uske nikalne par gusal karna zaroori nahi hai.

SEELAAN RAHAM MOJOOB GUSAL NAHI:

Jin aurato ko safaid ratoobat yaani laikooriya ki shikayat hoti hai us se bhi gusal laazim nahi hota, hasb e mamool namazey ada karni chahiye.